المساعد الشخصي الرقمي

مشاهدة النسخة كاملة : وش رايكم000000مع هالعج


بواسامه
11/02/2009, 10:52 AM
السلام عليكم ورحمة الله وبركاته
حيا الله الاحبة جميعا
اللي مرتب له روحه هالاسبوع
وصادف هالعج من صباح الاربعاء
هل تؤيدون البقاء بالمنازل
او الذهاب للبر مهما كان الوضع


طبعا انا اشوف انه من الحكمة انك تلزم بيتك
وش راي الشباب
سهيل تميم
11/02/2009, 11:05 AM
نقول انشالله ان الجو يصفا بالييل

<<طالع طالع اذا الله اراد
بواسامه
11/02/2009, 11:13 AM
نقول انشالله ان الجو يصفا بالييل

<<طالع طالع اذا الله اراد
اجل فرد حمزه ثاير ثاير
اذا صفا بنسابقك على الخط
بس اذا هو كذا وعلى شدته
مهنا متعه في البر لا رؤية منظر وعسى مايلحق صدرك شي من التعب
فاحتياطا الانتظار افضل
بواسامه
11/02/2009, 11:15 AM
المتعه في البر عندي تتجلى في الصفا وقلة الهواء والبروده المعتدله

اما اذا فيه منغصات ونص عفشك تلحقه من شدة الهواء
ولا عج مثل هذا يغثك ويتك صدرك
ولا برد يخليك ركبك تصافق وانتي بوسط خيمتك

فماله داعي طلعتك وبقائك ببيتك خيرا لك
×عاشق الجنة×
11/02/2009, 11:24 AM
إن استمر فالبقاء حتم . حفاظا على الصحة وبعدا عن الضرر
وإن انقشع فالربيع لا يعوض
[ نرجو لإخواننا الطلاب النجاح والتميز]
ابو عزيز1961
11/02/2009, 11:26 AM
سبحان الله وبحمده سبحان الله العظيم
الافضل البقاء في المنزل لان الاهل ماحيكونون مرتاحين خاصة الوالدين
و الله يجيب الخير -عقب ها لجو -العكر
نسناس ليل
11/02/2009, 11:30 AM
والله محتارين وحايرين .. صحيح انا متفائل خير وقايل لشباب بعد هالغبره مطره بأذن واحد احد


أستغفر الله أستغفرالله
حجّر
11/02/2009, 11:44 AM
عسى الله يسهلها ..
تخيلو تغراضي في السيارة من بعد لعشاء
انا اقول 80% الجو بيكون رائع الليلة تن شاء الله والله يرحمنا برحمتة
قولوا آمين
بو اسامة يعطيك العافية وانا جالس اتابع موضوعك الين قرر الليلة اني اطلع ان شاء الله.
العريني1
11/02/2009, 11:57 AM
الاجواء في تحسن والحمد لله....
انا متردد بس يوم تحسن الجو ان شاء الله ابمشي
سهيل تميم
11/02/2009, 02:18 PM
المشكلة اني مجهز الجيب من امس باليل وموقفه بالبايكه على اساس اني اطلع من الدوام واريح شوي ونحرك..

ويوم قمت الصباح اليوم ضاق صدري من الجو

ولا اللغبار شين لاكن وش نسوي صعبه يروح الاربعاء والخميس والواحد ماطلع :(
نفس السحاب
11/02/2009, 02:22 PM
لا تطلع حفاظاً على صحتك وسيارتك
واذا كنت ملزم اكشت في استراحه :)
جبل راف
11/02/2009, 02:27 PM
والله وانا مثلك مشتاق للطلعة اليوم لكن ماجت الامور على كيفي
نزبن هالاستراحات احسن لما الله يفرجها
ابو الوجد
11/02/2009, 02:31 PM
البقاء خيرا من الخروج للبر اذا بقي الوضع على ما هو عليه .
ويا اخوان البر ما هو ضرورة على شأن تكدر على نفسك وعلى رحلتك وصدقوني ما راح تستانسون اذا فيه عج او غبار مثل ما هو حاصل الان بالاضافة للاضرار الصحية التي قد تحصل من هذا الوضع , والحمد لله لاحقين خير ان ما حصل عطله هالاسبوع فالاسبوع الجاي ان شاء الله الامور طيبة والحمد لله ..
جبل راف
11/02/2009, 02:34 PM
لقيت لك حل ان كنت قريب من مكان كله جبال وارضه قاسية رح هناك تسلم من العج لكن احرص من البرد والا رح وسط هالفياض مايجيك لاعج ولاغيره

لكن احرص من البرد وتدف زين
اما انا ياخوك ودي النفود وتعرف النفود وقت العج
الهمده
11/02/2009, 02:38 PM
ان شاء الله الجو يبي يضبط ومبب رايحه علينا عطلة الاسبوع
اما بالنسبي لي انا ان شاء الله كاشت كاشت من غير شر طبعا ما راح امشي الا بكرى الفجر ان شاء الله كله من هالدوام حسبي الله عليه من نطلع الا اخر العصر ولا فلاحه
فرغالي
11/02/2009, 02:43 PM
موضوع جميل حول التردد في مثل هاالاجواء

الانسان مو مجبور يهلك نفسه الكتاب واضح من عنوانه غبار وجو متقلب يعني الله يستر يااخوان

طلعت البر معروفه القصد منها الوناسه والاستمتاع في اجواء ربيعيه ترد الروح وتسر العين

البر مو الاجازه او السياره او العزبه 00

البر بدون جو لطيف مايعتبر طلعه 00 ليه الواحد يروح يتعذب في الاجواء هاذي بدون دافع ملزم

صدقون ماغير غبار في غبار ماراح تستانس في البر اسأل مجرب ولا تسأل طبيب

انا اقول بكرا الصباح ان شاء الله يزين الجو والواحد يقدر يقرر

الله يستر على المسلمين
ولد الدواسر
11/02/2009, 02:48 PM
طالع طالع الله لا يعوق بشر غبار عاصفه حرب الي هو
ما صدقت تجي اجازت الاسبوع بعد ذي الاختبارات والكرف انشالله انه يخف
العج ونستانس بالطلعه :)
الوعب
11/02/2009, 02:50 PM
لله يزينها .. انا من مؤيدين ان الهوى ينقص على الرحله.
واسئل الله ان تهدا الاجواء مع المغرب.. عرس شخص اليوم من اعز اصدقائي
الله يوفقه
اعشق الربيع
11/02/2009, 02:50 PM
والله في هذا الموقف ودكم كلن يمسك الخد الين يفرجها الله
ونشالله ان الجو بيركد في اليل ثم عاد دججو في هالبران
وشكرا
مدمن الكشتات
11/02/2009, 02:51 PM
إخواني الأعزاء
حبايبي
بعد عمري أنتم
بالنسبة لمن يريد الكشتة بالصمان
وسعو صدوركم متى ما زبط الجو توكلو على الله وامشو حتى لو بالليل تنام بأقرب نفود والصباح رباح أدخل للصمان على كيفك .
والله يجيب الخير
:good:
ولو استمر العجاج طيلة اليوم فما لك إلا تشوف لك استراحة الليلةأو في أحد المشبات .
ديزب
11/02/2009, 02:57 PM
والله في نظري الموضوع يعتمد على الشخص نفسه
بعض الناس ما يستانس الا بالعج والغبار ( بحجة انه يتعلم لملاقاة الصعاب ويتدرب ... الخ )
واذا سالته قال كل يقدر يمشي في الظل لكن من يقدر يمشي بالشمس والغبار والبرد والعجاج ؟؟؟؟
وهذه حكمة من الله عز وجل ( ولا يزالون مختلفين ولذلك خلقهم )
ا
مكشاتي الجزيرة
11/02/2009, 03:51 PM
حسب التوقعات الجويه...
بإذن الله غدا الخميس وبعد غد الجمعه جو صحو جميل ورياح ساكنه تصاحبه بعض الغيوم على المناطق الوسطه من السعودية
المجمعه
11/02/2009, 04:14 PM
ابشركم ان الجو زان عندنا فى المجمعه

يعنى كلها ساعتين والا ثلاث ساعات ويزين الجو فى الرياض
hightech
11/02/2009, 04:20 PM
صراحة الجو مايشجع على الطلعة واذا زان بكرة الخميس نلحق على

البر ان شاء اللة ومن راح ندعي له بالحقظ والسلامة
ابو كرك
11/02/2009, 04:21 PM
الله يجيب السيل اللي يركد هالغبار
دانكن
11/02/2009, 04:49 PM
الجو ان شاء الله بيزين على الساعه 6 حسب توقع الارصاد الجوية .. :) ..


.
أبو عيسى 770
11/02/2009, 04:56 PM
السلام عليكم
توي جاي من الصمان لا تفوت الوقت واكشت
مطارد
11/02/2009, 04:58 PM
ابشركم مع صلاة العصر الجو صافي والهواء فيه شوية بروده بس مهوب شين ... هذا عندنا في عنيزة

توكلوا على الله لا يقعد احد ... ولا تفوتون اليوم ... وانا اولكم ....

بسم الله توكلنا على الله ولا حول ولا قوة الا بالله ...
القنـاص2008
11/02/2009, 05:32 PM
سبحان الله ياأخوان كان اليوم بنروح الصمان لكن عز وجل ماقدر لنا أن نروح بسبب الغبار قدر الله وماشاء فعل
اللهم يجعلها خيرة للجميع أنشالله

تقبلوا مروري

القناص2008
دغيم1
11/02/2009, 07:42 PM
السلام عليكم ورحمة الله وبركاته
يعطيك العافية أخوي
ابو أسامه
على طرح هذا الموضوع
من وجهة نظري المتواضعة البقاء أفضل من الخروج للبر
وذلك من عدة أوجه
مثلا في الرياض الغبار يسود المنطقة وإن كان الآن أخف بكثير عن الصباح ولكن .
البر منطقة مفتوحة وسيكون الغبار فيها اشد والهواء سيسبب تعب كثير للمكشاتيين
والنفود لاتصلح إطلاقا مع الهواء.
منطقة الغبار شبه عامة على المنطقة شمالا من القصيم وحتى محافظة الغرج جنوب ومن غرب ثادق وحتى المنطقة الشرقية شرقا .
والخروج في مثل هذه الأوقات قد يسبب لك متاعب أنت في غنى عنها
وقدر الله وماشاء فعل
واللهم اجعلها رياح ولاتجعلها ريح
وأسقنا الغيث
تقبل تحياتي
رقم9
11/02/2009, 08:26 PM
بمشية الواحد الاحد مدبر الكون فإن مساء هذا اليوم افضل من صباحه وقد سمعت انه من شمال المملكة الى الكويت وهو نفس الجو ولكن قالوا بإرادة المولى انه بينقشع قبل فجر الخميس ان شاء الله فأنا اضم صوتي لصوت اخواني انه ما باقي بالشتا وزين الربيع الا ايام بسيطة ثم يجينا العج والحر لذلك سوف اتوكل على الحي القيوم انا وزملائي ونغادر قبل الفجر ان شاء الله واذا ساءت الاحوال الجوية دخلنا لاحد الفياض او الشعبان والشكوى على رب العباد سبحانه وهي بكل حال افضل من روتين الاستراحات اللي نعمله حوالي ثمانية تشهر بالسنة اخوكم رقم9
الكهف1
11/02/2009, 09:54 PM
البقاء أفضل من الخروج للبر
دانكن
11/02/2009, 10:08 PM
الجو ان شاء الله بيزين على الساعه 6 حسب توقع الارصاد الجوية .. :) ..







.




اجل الارصاد طلعوا ماعندكـ احد .. :D


.
وليد الشوق
11/02/2009, 10:15 PM
انا وربعي مخططين على طلعة للصمان باكر وبعد هالعج مالنا الا بيوتنا العج يعكر المزاج ويلخبط اوراق رحلتك ، الارصاد الجوية يتوقعون يستمر العج لين يوم السبت