استفسار بخصوص قارمن

[سعود محمد]

يا اخوان انا ابي لي جهاز قارمن المهم رحت لدار موجه وقعد البايع يشرح لي الانواع المهم سألني قال انت وش تبي يكون مواصفاته قلت اهم شي عندي السهم الخريطة مابيها قال في جهاز بيصلح لك المهم طلع لي الجهاز الجارمن الاصفر قال هذا غرضك وتراه ممتاز وسعره زين ب400


الي انا ابيه وش رايكم فيه

[عبدالله الدوسري]

أخي الكريم
صدقني أن الخريطة مفيدة في تصور موقعك على الخريطة ووين اتجاهك بالنسبة لأقرب مدينة... الخ
وكونك تزيد 1000 ريال زيادة على المبلغ مقابل جهاز متميز أتصور أنه شيء يستاهل
أما بالنسبة للجهاز الأصفر فأظنه إيتركس وهو كويس لكنه بدون خريطة
وما زلت أرى أن الخريطة رائعة جدًا
وإذا كنت تبي تقارن شف أحد من ربعك عنده جهاز بالخريطة وجهاز بدون وتصفح الجهاز اللي بالخريطة وشف الفرق

[سعود محمد]

بس الدراهم وانا اخوك بتطير ومد رجليك على قد قارمنك

[عبدالله الدوسري]

رأيي اجمع الدراهم حقت الجهاز على بعض
واصبر
لما يجتمع مبلغ الجهاز واشتر الجهاز الصاحي
لأنك بتكسب شيئين:
1/ جهاز ممتاز
2/ لو احتجت في يوم من الأيام وتبي تبيعه بتلقى اللي يشتري واجد موب مثل أجهزة إيتركس مهيب مشهورة مرة
والأمر أولاً وأخيرًا لك
والقرار بيدك
وأنا ما لي إلا النصيحة
:)

[عاشق القمرة]

السلام عليكم ورحمة الله وبركاته

عليك بالجهاز الزين لا هو الي غالي غالي ولاهو الرخيص الرخيص ..

عليك بنصيحة أخوي عبدالله ماقصر بارك الله فيه ورفع الله قدره .

شوري عليك بالنوفي 760 من صدى العامة في الرياض ( بين مخرج 12 ومخرج 13 ) 1800 ريال شامل خرائط المدن وخرائط الصحراء + ذاكرة خارجية 2 جيجا + شاحن سيارة + قاعدة للجهاز + ضمان 2 سنتين

وهذا موقع خرائط الصحراء معروض فيه الأجهزة مع مواصفاتها وأسعارها ( مع الملاحظة أن الأسعار الموجودة غير محدثة وغير صحيحة )
تفضل والله يوفقك ان شاءلله ويرزقك الجهاز الزين

http://www.desertmaps.com/index.php

وبالتوفيق

[ابو عمر النوح]

حياك الله أخوي سعود
عليك بنصيحة أخونا الغالي المشرف و لا تعداها و اصبر على جمع قيمة الجهاز لأنك لن تندم بإذن الله و من ميزة الخرائط إنك لو كنت متعمق في البر و تبغى أقرب طريق للأسفلت تبعد الزوم و تشوف الطرق المسفلتة.
مثال حنا أمس رحنا لروضة الخفيسات من الرياض إلى المجمعة ثم من طريق الحفر مشينا حوالي 40 كيلو ثم فرقنا يمين و مشينا 32 كيلو بطريق ردمية و كله بطناج يكسر السيارة و حينما أردنا العودة قلت للزملاء لن نرجع عن طريق المجمعة بل عن طريق الشحمة ـ تمير ـ الرياض و صار الطريق للشحمة من الروضة 12 كيلو فقط و سهل ليس بطناج و أقرب بكثييييير من العودة للمجمعة و قد تعرفنا على المسافات و الطرق المسفلتة عن طريق خرائط القارمن .

و أخيرا عليك بالاستخارة قبل شراء أي جهاز ، و أعذرني على الإطالة

[سعود محمد]

اشكركم على النصيحه انتو مثل واحد من الزملاء رحت ابشتري منه جهاز عنده قديم عارضه للبيع المهم جيته ويطلع الجهاز ويشغله يوم خلصنا طلع جهازه الظاهر انه 256 سي المهم ويقول مميزاته ويشرح لي السالفه وانه احسن لك واضغط على نفسك وخذه .
المهم قلت بالعربي فلوس ماعندي تبيعيني جهازك ب400 اقصد 256 فهم السالفة اني ما اقدر اجمع قال المهم انت تبي جهاز يدخلك البر والمحل الي تبي قلت ايه قال خذ اتريكس يالربع الدراهم مااقدر اجمعها ولو جمعتها كليتها فهمتوا يالربع

[asd6244]

أنا لي رأي شوي مخالف للإخوة
إذا كانت فلوسك شوية ليش ما تشتري جوال يدعم الـ gps الداخلي و تسفيد من الجوال و الملاحة والبرامج والخرائط موجودة بالنت ،،، والجوال معي منذ فترة والله إنه مكفين

[سعود محمد]

جزاك الله خير عندي الجوال المدعوم بال جي بي اس بس ما اقتنعت فيه يالربع ابي جهاز ب400 ريال وال اتريكس جايز لي بس طلبت ال اي فيه

[عبدالله الدوسري]

أخوي سعود
إذا كنت مصر على الإيتركس فأجهزة جارمن عمومًا جيدة
شف محلات غير دار موجه تبيع أجهزة ملاحة في المرسلات بالرياض، ومخرج 12 على الدائري الشرقي
واسألهم
وأظن فيه موديلات من إيتركس فيها خرائط اسأل عنها
طيب فيه حل ثاني
اسأل عن أرخص جهاز يقبل خرائط
أو اشتر لك جهاز مستعمل فيه خرائط مثل 176 وغيره يمكن تلقاه بحدود 600 إلى 800
ولو تمر بيع وشراء أجهزة الملاحة ومستلزماتها (http://www.mekshat.com/vb/forumdisplay.php?f=107)وتشوّف لك جهاز من هالأجهزة اللي تقبل الخرائط بحدود سعرك أو تزيد عليه شوي أزين لك
آسف أني كثّرت عليك الكلام

[ابو عمر النوح]

ما عليش أخوي سعود طولنا عليك و لكن أقسم لك أننا نريد مصلحتك فقط و لوجه الله تعالى و أضم صوتي لمشرفنا النشمي عبدالله الدوسري و قد نبهني إلى نقطة مهمة جدا ، أنا الآن أستخدم جهاز اتريكس اسمه ( فيستا C ) ملون و فيه خرائط ملونة و هذا الجهاز يؤدي الغرض المطلوب منه بكل جدارة و سعره جديد الآن ( 800 ) ريال تقريبا و أكيد المستعمل أقل بكثير .
و كلي أسف على إزعاجك ، و أكرر لا تنس الاستخارة في الشراء .