خزان الماء الالمنيوم

[عبدالعزيز الدباسي]

سبق وان فصلت خزان ماء فيبرجلاس بطول 90 وعرض 130 علشان احطه داخل اليوكون وهو اللي سبق وان نزل صورته اخوي ( العارض ) ولكن يعاب عليه الصوت اذا كان مهوب مليان فهو مزعج مع العلم اني شارط عليهم وضع قواطع ، وكذلك يعاب عليه انه يمكن يملى السيارة ماء وانت ما تدري لانه يمكن يهرب او تنسى البزبوز مفتوح ، او اي مشكلة اخرى

لذلك قررت ابحث عن مكان خارج السيارة ويكون في الاسفل .

وسألت عن اجود الورش اللي يسون خزانات الالمنيوم ، فدلوني على ورشة في الصناعية ، والحقيقة عليهم زحمه والطلبات عليهم كثيرة ،،
ويوم قلت له عن مشكلة اليوكون ، قال ما فيه الا مكان واحد للسيارة وسبق وان ركبنا منها واجد ، وبما انه الزباين واجد فانه عندنا الحين جاهز لليوكون .


المكان يا جماعة الخير ( غريب شوي ) وهو تحت الكبوت من خلف الصدام الامامي ، وياخذ تقريبا 43 لتر ، وسعره الف ريال .

وسؤالي لاهل الخبرة ، هل فيه ضرر على السيارة اذا زاد الحمل من الامام ، وهل يمكن ان السيارة ينخفض وجهها اذا زدنا الحمل 43 لتر ماء

رايكم يهمنا ايها الاحباب ، فلا تبخلوا علينا بتجاربكم ونصائحكم .

[مكشات]

هلا أبو عبد الله
عندنا واحد من الربع يسوي لك تانكي ألمنيوم بـ 600 ريال إذا كانت السعة المطلوبة لاتزيد على 100 لتر ..
وما أنصحك بتثبيته لأن 43 لتر ماتسوى التثبيت ..
تحياتي

[الـ ع ـارض]

مساك الله بالخير اخوي شقردي

انا مستغرب مررررررررره ان تانكي الفيبر جلاس ما عجبك لاني استخدمه ولا لاحظت منه اي مشكله من اللي ذكرت الصوت وتهريب المويه .

انا ما ادافع عن التانكي لاني نزلت موضوع عنه ....فكرة التانكي الفيبر للاخ رمش العين حتى انه هو اللي دلني على المصنع ...

اعتقد والله اعلم انه في عيب في تصنيع التانكي .

ارجع للمصنع او كلم صاحب المصنع (( ابوعبدالله )) وعلمه عن المشكله وانشاء الله يجد لك حل .

[عبدالعزيز الدباسي]

تسلم يا ابو ياسر على مشاركتك بالرأي وماقصرت يالغالي .

وبخصوص انه ما يسوى التثبيت ، وش اسوي اخوك محتد ، والا انا ماودي بها الكمية البسيطة .

--------------------------

شاكر لك اخوي العارض مداخلتك ، والاسباب اللي خلتني ما اقتنعت بالخزان الفيبر مثل ما قلت سابقاً ، بالاضافة الى ان طعم الماء يتغير ، مع العلم انه يمكن يزول الطعم مع كثرة الاستعمال ..

ولكن اخي الكريم فكرة الخزان داخل السيارة بشكل عام انا منزعج منها كثيراً ، وهذا اللي خلاني ابحث عن بدائل .

وتقبل تحياتي

[جميل جمال]

هلا اخوي شقردي ....

بصراحه 1000 ريال و 43 لتر ما تسوى ابد وانا اخوك ؟؟

المكان غريب جدا جدا ..

واحد من ربعي مركب تانكي خارجي لليوكون بالرس ,, وكاني منب واهم انه حاطه بين الشاصي والدعاسات ..

لكن على العموم انا باستفسر لك وباشوف ..

واذا تبيي رايي لاتركب اللي قالك راعي الورشه ذا وغير كذا عليك بالستيل لانه ما يطعم .. وانت جربت الالمنيوم وشفت الطعم .

[عبدالعزيز الدباسي]

مشكور اخوي جميل جمال على اتحافي برايك الرائع .

والحقيقة كنت متردد بسبب امرين الاول ان السعر مثل ما تفضلت غالي على 43 لتر ، والامر الثاني المكان الغير مناسب ،
خفت انه يثقل على السيارة ، او انه ينشق عند ادناة مطب .

على العموم انا في انتظار ردك يالغالي ، علشان تعلمنا صاحبك وشلون عمل الخزان تحت الموتر .

وتقبل تحياتي

[عطارد]

السلام عليكم
اولاً ابيك تعلمني اسم الورشه وعنوانها ورقم الهاتف ونوع العماله اللي يسوون الخزانات الالمنيوم لأن لحامه صعب ومتعبز

[عبدالعزيز الدباسي]

حياك الله اخوي عطارد .

اذا كان السؤال موجه لي فان الورشة في صناعية الفوزان بعد مخرج 17 والعماله اخليطي فيهم الهندي والبنجالي والمصري والفلبيني .

[ساق الجواء]

لكن اللأمونيوم يا شقردي يصدئ وصدأه أبيض اللون. لماذا ترغب عن الحديد المقاوم للصدأ (stainless steel)؟

[عناز]

الاخ شقردي... السلام عليكم ورحمة الله وبركاته...أنا شفت تانكي يصلح للصوالين الجديده عندنا بالشرقيه
في محل القناص بالدمام...ويركب فوق الستبنه...وأكيد يركب لليوكن...مصنوع من الستانلستيل
ولحامه أيضا ستانلستيل...القيمه حول 600 ريال والسعه يقدر يتحكم ألزبون بها
والسلام عليكم ورحمة الله وبركاته.

[عبدالعزيز الدباسي]

اخوي ساق الجواء شاكر مرورك الكريم على الموضوع .

وبخصوص تانكي الالمنيوم كثير من اصحاب الجيوب يستخدمونه لانه اخف من الاستيل بكثير ، والحقيقة اول مرة ادري ان الالمنيوم يصدي ، وكنت اتوقع ان الالمنيوم لا يصدأ ابداً ، لان كل خزانات البيوت مصنوعة من الالمنيوم .

تسلم اخوي عناز على هذه المعلومة ، وسوف احاول ايجاد رقم المقناص والاتصال عليهم والاستفسار عن الخزان ، بارك الله فيك وما قصرت .

[al-nashmi]

[QUOTE]الأصل كُتب بواسطة شقردي
[B]اخوي ساق الجواء شاكر مرورك الكريم على الموضوع .

وبخصوص تانكي الالمنيوم كثير من اصحاب الجيوب يستخدمونه لانه اخف من الاستيل بكثير ، والحقيقة اول مرة ادري ان الالمنيوم يصدي ، وكنت اتوقع ان الالمنيوم لا يصدأ ابداً ، لان كل خزانات البيوت مصنوعة من الالمنيوم .

ابو عبدالله صباح الخير........
ما فهمت كيف كل خزانات البيوت مصنوعه من الامنيوم.....اول مره اسمع بذالك.... وين المحلات اللي تركبها
اذا عندك عنوان لهم الرجو التكرم بتوضيحه لي...

وتسلم...
اوخيك/ النشمي

[عبدالعزيز الدباسي]

هههههههههههههههههههه
انا قايل هالكلام يا النشمي .

تصدق عاد لو انه مهوب مكتوب فوق ،،، كان قلت لك مهوب انا اللي قايله .

اسف جدا لكل الاخوة القراء على هذه المعلومة المغلوطة ،،، حيث انه وقت كتابة الرد السابق كان ذهني مرتبط بخزانات الفيبرجلاس ، التي سبق وان قمت بتفصيل واحد منها ولم يعجبني .


لذلك ارجو من الجميع العذر والسموحة ، ،

وشاكر لك اخوي النشمي طرح هذا التسؤال الذي اوضح لي خطئي في المعلومة .

[al-nashmi]

السلام عليكم ورحمة الله وبركاته

هلا والله بعمنا شقردي!!!!!...

يالله حسن الخاتمه.... الكبر شين يابو عبدالله ، خل عنك الاعذار......

نصحيتي لك بيع اليوكن واشتر هايلكس غمرتين نص هنقلين موديل 82 ورح لسوق الزل واجلس عند احد الشيبان اهل المحلات اللي هناك ودق حنك وسواليف من سنه الكسوف ورى:D :D
ولا غابت الشمس رح للبيت ونم في المجبب:confused:



يالله بخاطرك يعم شقردي نستأذن:D عندنا شغل

[الضاري]

السلام عليكم ورحمه الله وبركاتة

الله يستر عليك يالنشمي ما يمدي حبيبنا ابوعبدالله يقول الكلمة .. الا أنت لاقطه..:D :D

الغالي ... ابوعبدالله

بصراحة أنصدمت... تانكي 43 لتر بـ 1000ريال.. لايكون اللي تفاهمت معة على السعر... مصري.

طيب ... عندي لك فكرة..أن جازت لك زين على زين...
أشوف بعض الشباب .. اللي معهم جيوب صالون .. يركبون تانكي ماء على مقاس أرضية الشنطة الخلفية.. ويطلب الأرتفاع اللي يناسبة.. ويفرش على التانكي فرشة مثل لون الديكور.. ويثبت التانكي ..تثبيت صح.. لايمكن يتحرك.. ويحط مخرج الماء لي طولة مثلا مترواحد.. يفتح الباب الخلفي ويطلع اللي ..

وش رأيك بالفكرة.. أدري ماتصلح .. تخفيف الصدمة مقدما..:D

مجرد فزعة يابوعبدالله.. وأعذرنا على التقصير..

تحياتي للجميع

[عبدالعزيز الدباسي]

لك حق يالنشمي تتهزى ،،،

وش جاب تانكي الالمنيوم للفيبرقلاس :p :p :p والله قويه ذي ،، لكن الوعد قدام ...

-----------------
الله يرضى عليك اخوي الضاري وماقصرت يالغالي ،،،، حلوووووووة ضاري وغالي .

تسلم ياخلفهم ومشكور على هذا الاقتراح

ومشكور اكثر على هذا الاهتماما بالموضوع

بارك الله فيك

[path_poth]

أخوي مكشات
ياليت تعلمنا وين راعي الألمنيوم اللي بـــ600

[ذيب البر]

تبي رايي يا مشرفنا لا تعدى الالمنيوم واحرص لعى اللحام انه المنيوم بعد

انا مركبه ياطويل العمر ولا صدى ولاهم يحزنون ومويته تشرب منها وتطبخ

يمكن انا مناب مقياس لانه له معي سنه لكن فيه واحد من الزملاء في العمل مركب

المونيوم من اربع سنين ويقول لا شفت صدى ولاهم يحزنون والى الان اطبخ منه

بعدين الستيل غالى ومبالغ فيه

تحيااااااااااااااااااااااااااااتي

[عبدالعزيز الدباسي]

تسلم اخوي ذيب البر وماقصرت يالغالي .

وتصدق انه مع وجود هذا التانكي الا انني احرص على اخذ مياه معدنية معي للشرب والطبخ دائماً .

[علي الشهري]

الأصل كُتب بواسطة path_poth
أخوي مكشات
ياليت تعلمنا وين راعي الألمنيوم اللي بـــ600

[بركان]

المونيوم ويصدي!!!!

من يستطيع ان ينفي او يؤكد؟؟

انا مركب تانكي المونيوم في جيب لاند استبنه تعليق في مكان الاستبنه السفليه سعة 85 لتر كانه مجهز من الوكاله مخفي ما تشوف منه شيء ومعزول ومشدود بالتمام بمبلغ 1000 ريال ويستاهل الاف بس اللي ازعجني كلام احد الاخوان اللي قال انه يصدي.!!!

[شَعَّـاااال]

مدااااااااااااااااااااخله


الا وا حلولاه ......


يا خيي حط الالف بمخبااااااااااااااااك


وخذ لك جرجل اصرف .............

1000 على 40 لتر هذا نصب علني .. ..

مع احترامي لاصحاب الورشه .... هو انت خليت فيها احتراام ؟؟؟:D :D

[عبدالعزيز الدباسي]

اخوي التنهاة ،،، المشرف العام يتكلم عن ورشة في بريدة ، والحقيقة انا لا اعرفها .

اخوي بركان ، ما اعتقد ان الالمنيوم يصدي ، لاني كنت حاطه في سيارتي الاولى ولم يطرأ عليه تغيير ، وكذلك اخوي مركبه قبلي بمدة ليست بالبسيطة ولم يتغير ابداً .

مشكور اخوي شعال وماقصرت يالغالي ،،، وتراي استشير وما قررت ،،، ولكن كلامكم عين العقل

[اسير الجراح]

الله يعطيك العافيه ..مجهود يستحق الثناء