بمناسبة هطول الامطار قصيدة( اتحرى بشوق هل الامطار) شوق+ابتهال+شكر

[سمح]

اتحرى بشوق هل الامطار


(شوق وحنين)
***************


أحب المطـر واشتـاق لـه شـوق=شوق صيـد الحـر لكـل صقـار
و حـب البـر بـاق قلبـي بـوق=مشجـاره وجبالـه وشبـت النـار
ينشـرح صـدري ويعتلـي فـوق=بطرياه لـوه طيـرن أمـداه طـار
أزهب زهابي مـن قبـل الشـروق=واخاوي شروى الطيـب الاخيـار
هـذا اخـو وذا خـالـن شـفـوق=وعمن وابن عمن واصحابن ابـرار
أعسف الجيـب و اسوقـه سـوق=ينطلق رصاصه لـي وطـا القـار
اشهبـن اغبـرن دايــم سـبـوق=وعلى الغبراء ما ينشق لـه غبـار
والسحاب اطـرده لكنـي ملحـوق=أخايلـه بلهفـة لكنـي علـى نـار
والغيوم أدورها لوطالـت الطـروق=ولو هطل ماها على دروب الاسفار
المـزن مصطـك مابينـه فـتـوق=محريـن بالخيـر ويـن مـاسـار
وهبت رياحن تلقح سحابـن طبـوق=جنوبية نسناسها لا باردن ولاحـار
أتشوف وينك يـا شعـاع البـروق=ياللي مـا تفصـل وللسمـاء نـوار
مكحل عينـي يـا مقصـد النـوق=يا مضوي الدرب خطاف الابصـار
والرعد تـراه بمسمعـي مايعـوق=مجلجلن مسبحـن للواحـد القهـار
أزعج الصـوت اتـوق لـه تـوق=صاعقـن كلـه عبـر و اســرار
يرجـف فـؤادي ويمتلـي شـوق=شـوق غريـبـن حــن لـلـدار
لي شفت غيمن يشعشـع بالبـروق=ولي سمعت رعدن مثل أسد زمجار
يفـز قلبـي و ينتـابـه خـفـوق=واتحـرى بشـوق هـل الامطـار


(ابتهال واستغاثة)
***************

ثم ابتهل مضطـر ابتهـال مبيـوق=ينشد حلاله وما سرق مـن الـدار
استغيث المغيث من قلبي المحـروق=من لهيب الشمس وجـدب الديـار
قلبن يخفق كمـا طيـرن بصنـدوق=يبـي المـاء مـن ضمـاه منهـار
يالله ياللي كل يومن بابـه مطـروق=يا مجيب دعوة الداعـي بالاسحـار
تزيـل جـدب مهـوب مطـيـوق=يشكي منه البهـم واهـل الاقفـار
وجفافـن محـق عشبهـا محـوق=يبكي منه الرضيع والشيوخ الكبـار
ما نيب قانطن ولا بي جزع مطفـوق=راضيـن بقضـاء مقـدر الاقـدار
كريمن ارجوه مـن قلبـن صـدوق=ينزل علينـا مـاء السمـاء مـدرار
الغيث عسـى يجيبـه اللـي فـوق=يسيـل الـوادي ويملـى الابـيـار
يغيثنا من مغيب الشمـس للشـروق=ومن شروقها لمغيبها تالـي النهـار
اطلبه ودمعي يجري على الشـدوق=هطالـن مبطيـن للديـار مـا زار
يالله بديمتن فـي صبـح وغسـوق=تـدوم بالخـيـر لـيـل ونـهـار
وسيلن على نجـد يطوقـه طـوق=سحـن يحـده ويسـوره باسـوار
ويالله تسقـي مشرفـه للـعـروق=وتروي بهمها ونخلهـا والاشجـار
وتغيثهـا بهتانـن يغدقهـا غـدوق=يسـر راعيهـا ويـن مـا ســار
يستاهـل بالكـرم دايـم سـبـوق=واكتب له واحبابه طـول الاعمـار
يارحيمن يا رؤوفن بعبـاده شفـوق=يا كاشفاً عن ايوب باسه والاضرار
استجـب دعـوة قلـبـن خـفـوق=يا منجين يونس من عمـق الابحـار


(فرحة وشكر)
***************

أبشركم المخيلة ورى المخيله لحوق=حي الحيا يحيي به الحـي الاقفـار
أول الخيـر قطـرة ثـم الحَقـوق=له الحمد استجـاب ربـي الغفـار
و هلـت دمعتـي تراهـا سـبـوق=تسبق من الفرحـة قطـر الامطـار
ألـقـط الـبـرد واذوقـــه ذوق=نصيته يوم جتنـي عنـه الاخبـار
الماء بين الحصـاء يمـرق مـروق=والشعبـان تجـري مثـل الانهـار
والسيـل يتقلـب تـحـت فــوق=سيّـل رقيعـي نـعـام والشـبـار
ارتـوى النخـل وتدلـت العـذوق=وارتـوى الشجـر لحـد الثـمـار
وغدرانن يحلـق فوقهـا الغرنـوق=بالفياض والرياض وسرب الاطيـار
يا فرحتي بشلالن يصب مـن فـوق=وبجارفن مـن علـى السـد عبـار
ربعـت ارضنـا وفـاح العـبـوق=عقـب هطالـن دايـمـن ســار
والنفل والخزامى بالانفاس منشـوق=ريحن كما المسك وعطـر عطـار
والعشب شق في الصحاري شقـوق=واستهل البهم وغردت كل الاطيـار
يـا فرحـت هـل الغنـم والنـوق=كان راعيهـا فـي بيعهـا محتـار
واليوم تدر له صبوحـن و الغبـوق=لو تجيـب لـه المليـون مـا بـار
يا لايمي هذا معشوقي ولك معشوق=بالحيل احبه وفي عشقي له اسـرار
وتـرى هـذا ذوقـي ولــك ذوق=لو خيرت اخترت المطرعلى المحار
واشكر منـزل الوبـل مـن فـوق=سبحانه محصيـن قطـر الامطـار
ثم الصـلاة علـى خيـر مخلـوق=عدد نبت العشـب بكـل الاقطـار

محبكم سمح وارجو السموحة على عدم وزن بعض الأبيات

[راع الكحيلة]

أثاري عندنا ناس ذوي مشاعر جياشة

بالنسبة للوزن ..اخوك ماهو بذيك الخبرة

لكن اتمنى لك التوفيق

ولكني ذويق للمعاني :)

ومعاني كلماتك أاشتم فيها ريح رمل مره الغيث

احس فيها بالتذلل للخالق سبحانه

أرى فيها الشكر الجزيل على نعمه

لك تقديري

وأسأل الله أن يديم علينا نعمة الامن والأمان

ويرزقنا الغيث

ويجمعنا معكم والمسلمين على الخير في الدنيا
وفي الاخرة في مستقر رحمته

[ريف النشاما]

"
"
أخوي
سمح
سمح الله دربك
قصيدة أعادة علينا
نسائم المطر
ولمعان الأرض
من ضوح البروق
تسلم وصح لسانك
[align=center]"
:good:

[سمح]

ما عليكم زود واشكركم على هذه المشاعر الجياشة والفياضة التي لا تزيدني إلا حباً في ما يرضي الجميع بعد مرضاة الله.
لا أخفيكما أن هذه الأبيات تخالجت فيها مشاعري مع حقيقة ما أتمناه من أعماق قلبي من حب للمطر منذ نعومة أظفاري وأنا أحب الغيث ومشاهدة هطوله حتى ولو سهرت إلى الفجر عند الباب الخارجي قبل أن أملك السيارة حتى يقف المطر، أما اليوم قد أذهب لوحدي في أعلى ظهره بظلامها الدامس من أجل مخايل السحاب وتكحيل العين بمشاهدة البراق وهطول الأمطار ، حتى لو اضطررت أن أنام في بري ، والله لا يبلانا.
أرجو أن تكون هذه القصيدة حازت على رضى الجميع والله يجمعني واياكم والدينا والمسلمين في الفردوس آمين.

محبكم ومغليكم سمح اللي ينتظر منكم ملاحظاتكم حتى ولو كانت نقداً على أحر من الجمر.

[ابو عايد]

مشاعر جميلة ومحاولة لإستخراج بوح هذه المشاعر وصياغتها لتكون أكثر تأثيراً ...... أجدت في رسم المعنى

مشكور على هذه القصيده الطيبه والتي بحق رائعه من الروائع

وصح لسانك وبيض الله وجهك أخي الغالــــــ سمح ــــــــــي

وتقبل تحياتي // العاشق الولهان

[سمح]

أشكرك يوم لبستني تاج الفخر بمرورك على قصيدتي.
محبك سمح

[المُهند]

صـــح لـــسانــــك ولآهــنت



وبـيـض اللــــــه وجـــــهـــك ،، ويـعـطيـك ألــــف عــافــيـــــه





مـاقــصـــــرت .....



تـحـياتـي لـــكـــ:good:

[سمح]

أخوي (مخربها ) عساها أعجبتك وأرجو أن تحوز على رضى الله أولاً ثم على اعجاب الجميع.

أسأل الله أن يجمعنا بكم وبجميع المسلمين في الجنة .

قولوا آمين

[نقا هشال]

صح لسانك والله يجيب المطر والسيل..

[سمح]

صح لسانك يا مبدع يا نقا هشال والله يعطيك العافية.

[ذيب مجيرة]

هلا يا سمح
والله وانا اخوك القصيدة معااانيها حلوة ومفرداتها جزلة بس
بس
الوزن لك عليه
وابيات القصيدة مختلفة البحر
مرة هنيا ومرة هنااااااااااااااااااك
لا تلتفت للمداحة وانا اخوك وانت في طريقك الصحيح
لحنها وغنها تبا تلقاها محدرة من ناحية الوزن فقط

مغليك
الذيب
عووووووو

[سمح]

وتراني اعتذرت في آخر القصيدة عن وزن الابيات ، لأنني لست شاعراً بل احب الشعر ولدي محاولات ارجو ان تتكلل بالنجاح، واشكرك على هذه الملاحظة الطيبة وفي انتظار المزيد منك يالغالي.
(على فكره أعجبني شعار العلم المصري اللي تحت اسمك) محبك سمح