المساعد الشخصي الرقمي

مشاهدة النسخة كاملة : الفزعه يالشعار (الصقاره)..؟!


شاهين الميلان
03/03/2009, 05:37 PM
السلام عليكم ورحمة الله وبركاته كيف الحال؟
اخواني انا ابغى اكتب قصيده عن طير ولا عرفت طريقة توصيف الطير بالقصيده ياليت احد يفيدني بعدت امثله
شاهين الميلان
03/03/2009, 06:11 PM
شكلي ما حطيته بمكانه المناسب
ذعذاع نجد
03/03/2009, 06:12 PM
يفيدونك الاخوان ان شاء لله ونت فيك الخير والبركه
شاهين الميلان
03/03/2009, 06:15 PM
الله يسمع منك
وحيد الصحراء
03/03/2009, 07:09 PM
ابشر بسعدك يالغالي وابشر بالقصيدة وهاذي كتبتها في مقناصنا العام الماضي في شعبه نصاب ومنطقة رفحاء ارجو ان تكون على المستوى المطلوب

يا محلا المقـناص في شـعـبة نـصاب &&& مع طلعة الـوسمي يزين الهدادي

والطـير قـرنس واعـتلى فوق مركاب &&& مـتـنـطح يـسـبر على كـل غـادي

ومسمي بطويق ويطرب له إطـراب &&& ولا من زهمت طويق لبى المنادي

طير وفيه الوصف ما أضـنه يخاب &&& هو غايـتي والطـير هـــاذا مرادي

لا من تـعـلى فوق طـوح بالارقاب &&& وحط الحــبارى بـين ضـلع ووادي

ومـيل عـليـها كـن ما فـيه مخلاب &&& واركى عليها الساق بأرض شدادي

ثم انتهض ما بين مجموعه اسراب &&& واصبح يموج بهالـفضاء بأرتدادي

مر يصيد الخرب من دون مضراب &&& ويلف مخلابة على الضـرب عـادي

ومر يصيد ولا يـبي فزعة أصحاب &&& يـكفي تهده حـيـن وقـت الـهـدادي

طـير وصـوفه كلها تعـجب أعجاب &&& والله يـفكه من عـيون الـحــسادي

ويا الله يا مـنزل تـبارك والاحزاب &&& يــا خــالـق ســبع بــلـيـا عـمــادي

تـقـبل دعـاة مــلـبي مــنـك طـلاب &&& واشـوف إنا هالـطــير وقت البرادي

في خـبـة مـا صـادفـت كل حطاب &&& ويطرب لها طـير الوحـش بعـتـيادي

تمت وصلى الله على خير الأحباب &&& عـلى نـبي مــرسـل خـيـر هــادي


اخوك وحيد الصحراء التميمي
قرناس الزبارة
03/03/2009, 07:24 PM
صح لسانك يا الشاعر
شاهين الميلان
03/03/2009, 07:35 PM
صح لسانك يابعد حيي
الله يعطيك العافيه على القصيده الحلوه والله ساعدتني :)
طير الهقاوي
03/03/2009, 08:51 PM
تبي الطير له مواصفات كثيره المناكب تصير مفهوقه العاتق يصير اهدف يعني طويل دق الريش مايصير ريشه عريض عاراته من الريش مايكون ريشه كثير صاقه قصير سراويله طويلهعينه تكون فيقحف يعني تكون في مثل الغيران يكون لون ريشه زين انا افضل الاشعل والاشقر والحمر والمجهم وغيرها من المواصفات الكثيره اكتب وطربنا ببياتك ياشاعر
شاهين الميلان
03/03/2009, 09:14 PM
تبي الطير له مواصفات كثيره المناكب تصير مفهوقه العاتق يصير اهدف يعني طويل دق الريش مايصير ريشه عريض عاراته من الريش مايكون ريشه كثير صاقه قصير سراويله طويلهعينه تكون فيقحف يعني تكون في مثل الغيران يكون لون ريشه زين انا افضل الاشعل والاشقر والحمر والمجهم وغيرها من المواصفات الكثيره اكتب وطربنا ببياتك ياشاعر

مشكور يالغالي على التوضيح الطيب..
وعلى فكره انا شاعر مبتدئ يعني اذا انتهت القصيده وعرضتها لكم لا تضحكون:j
صقار الأسياح
03/03/2009, 09:19 PM
حياك الله نحن بانتضارك
شاهين الميلان
03/03/2009, 10:07 PM
لا تتحمسون عارف نفسي اوصل 6 ابيات وادقر
قرناس الشملي
03/03/2009, 10:11 PM
ياعين شيهانه ماهي بيتيه
أبو فهد العيد
03/03/2009, 10:25 PM
السلام عليكم ورحمة الله وبركاته..
مناسبة الابيات:
في سنه من السنين,,شريت طير اخر الوقت,,وقيّظته عند واحد ذكروه الناس ومدحو مقيضه لي,ولكن للاسف,, اخذت الطير من عنده والطير مهوب طيري اللي حطيته عنده,,
الريش دمار
والطير صحته تعبانه
وبعض الريش ماتم,,
وامور ثانيه,
اضطرتني ابيع الطير,غصب علي,,
وبها القصيده توجدت على طير ,, شفته ,, وجازلي, وابشركم توفقت وشريته,


الله مـــن قـلــب رثــع فـيـه هــاجــوس
.............................هاجوس شوقِ باري للمـحانــــي

لااظـلـم عـلـي اللـيل والـكـل مـنـعـوس
...........................عيني جزت والنوم طار وجفاني

واصبحت ساري في فراشي وملحوس
.............................واعيد ذكراً ماظـــيه في زمانـــي

ونّيت ونّـة ضـايق الصـدر منـحــوس
............................ونـّة عزيزِ مارضــي بالهوانـــــي

يصبح علي الصبح والنوم محـبـوس
........................والـــحـــق دوامي مابقــى الا ثوانــي

والياوصلت الشغل زادت بي هجوس
...........................ويبدا شريطِ ماضـــيِ بالــكيــانـــــي

واقـول يـارب الـمـلا كـاسـي الــروس
.........................يــالـلــي لــه الشكوى رفيع المــكانـــي

افرج همومِ داست القـلـب وتــحـوس
..........................واغفــر ذنــوبِ للجــحــيم تـحــدانــي

ومن بعد ذا قافي عن الطير مدروس
........................... واحبك قوافي خاطري بالمعاني

اليا نظمـت الـقيـل مـانـيـب دنـفــوس
...............................انظم جزيل القاف ماقد عصاني

وجدي على طيرِ به الريش ممسوس
...............................كاشف نحر وارقط عريض المثاني

وجهه صبوح بعينه الغل محســـوس
.............................والعين في قحفِ كما غار جاني

وافي جــناح مـشـددِ ريـشـة الـمـوس
............................افجح قصيرالساق عدل المتاني

الـيــا طـلـع فـي ديـرةِ تـشـرح نفوس
..............................عقب المطر ماطبها المودمانـي

ارض قفر مـاداجه قـنوص وعـسوس
..............................ايضا ولا فيها الغنم والمبانــــي

فيها الحباري داجت الـقـاع وتــدوس
............................تلقى جرايرهن عـيـانٍ بــــيـانـي

وفرعت حرٍ يودع الخــرب مــفـروس
..........................حرٍ عليه اللحق علــم ضمــانــي

اليا تعلى الخرب ثم جاه مــــضـروس
........................ راح يـتـرقّـى حـاديته الامــانـــي

ردّه وطـقّــه ثــم حــوّلـه مــنـكــــوس
.........................وجاله مثل جيّة طــلـيـبٍ لجـانـي

وليا دبسه وصحت انا الطير دابوس
......................... طيرٍ عجيب وفعله اليوم زانـــي

هــذا الغرام اللي سـبـايـبـه مـنـعـوس
..........................عيني جزت والنوم طار وجفاني




//ابو فهد//
شاهين الميلان
03/03/2009, 11:00 PM
صح لسانك يابعدي
ان شاء الله ان الله عوضك بخير منه؟
طير الهقاوي
04/03/2009, 02:05 AM
لا ولا يهمك ماناب نقاده جب بس لاتكسر الابيات كلش ولا الكسر اما الضعف لاصار في الصدر او العجز ماشي شي مرينا عليه ونتهينا منه

طير الهقاوي
صقار قديم
04/03/2009, 02:40 AM
لا ولا يهمك ماناب نقاده جب بس لاتكسر الابيات كلش ولا الكسر اما الضعف لاصار في الصدر او العجز ماشي شي مرينا عليه ونتهينا منه

طير الهقاوي

السلام عليكم

إلا الكسر ما ينغفر هههه
بالتوفيق أخي الكريم نحن في الانتظار
قعقاع التميمي
04/03/2009, 02:55 AM
صح لسانكم على هذي القصائد