يا عقاب

[عليمي يحب البر]

بسم الله الرحمن الرحيم
مساكم\صبحكم الله بالخير
حبيت أشارككم بها القصه الي جرت معي
هذا ياطويل االعمر والسلامه في إحدى طلعاتي للبر لمحت جبل ونصيته والجبل كان قريب من البلد المراد يوم اقبلت إلا وذاك العقاب يلعب بالسما ويحول على عشه وأنا اتبعه وادربل عليه واشوفه مع فروخه يأكلهم المهم والله واتعلق فيه وصرت كل يوم أو يوم ورى يوم أنا عنده رسمي أجلس تحت وكره وتمت هالحاله ثلاث شهور وأنا لو عندي ساعتين فضاوه نقزت يمه
وما غير اهوجس فيه وفي اسبوع ابطيت عنه ثلاث ايام ثم رحت له الخميس الفجر إلا أشوف الحمام يم وكره وهذي أول مره العاده الحمام يبعد عن الوكر ولا أشوفه بالسما واحتري إلى حول غروب الشمس وأنا أقول يجيبه الله لكن ماعود واسمع الفروخ تنادي قلت آنا باخذ لفه على المنطقة علني أشوفه لكن ماش ماحد بحولك المراد أعود يم الوكر إلا أشوف موتر عنده وانقز له امشي مليون يوم أقبلت عليه وينغزني قلبي قلت له ما شفت عقاب حولك ويلتفت على خويه ويجيب لي العقاب مذبوح هو وأنثاه ويقول سم مالنا فيه حاجه وينزل عليه بيتطابق وياه أفاكك بينهم وأمشيهم ويوم راحو ابي اسمع صوت الفروخ ابد اثر النذل معود على الفروخ ذابحهم آنا أبي اسأل هو وش استفاد والله بتستغربون لاقلت لكم اني ولفت على العقاب ثم يذبحه بس عشان يقولون عليه رماي والله شي يقهر أنا أبى اعرف وش تعليقكم على هالتصرف ولا كل من عنده بندق له الحق بإبادة أي مخلوق يدب على هالبسيطه.
ويتوسط بي الليل من هاك اليوم والنوم معيي يجي وكتبت هالابيات (مع العلم اني لست بشاعر لكن من الهم وهي أول أبيات اكتبها واتمنى من كل شاعر يساعدني بالتعبير عن هالي حصل)

http://www.mekshat.com/pix/upload/images5/mk5247_brown.jpg

يا عقاب من بعدك ترى البال ضاقي=من بعدكم ياعقاب ما طاب لي عيش
من بعدكم كني غريب(ن) بداري=من بعدكم ياعقاب صاب العقل طيش
لاواحسافه كيف عقب الرفاعي=أطمنت ياشيخ الطيور المطاريش
من بعدكم والبوم سو احتفالي=ونادى الحمام ورافقتها الخفافيش
ياعقاب صابك سهم غدر(ن) ولالي=في صد سهم الغدر لو قلت حتيش
جيتك على خبري بنفس المكاني=مفارق ديار العرب و الدراويش
مسكت راسي وصحت يا عزتالي=من يوم شفت العظم كسر مع الريش
اوااه يا قلبي رمته الليالي=بفقدكم ياعقاب يا أشعل الريش
يافروخ لاتنادين ذيب العوالي=أمسى صويب(ن) من عيال(ن) مرابيش
لا واعذابي ثم ياحر مابي=لامن سمعت فروخ ذيب المطاريش
يا فروخ مالي حيلة(ن) ياحلالي=الوكر عالي ماتطوله مطاريش
ياعقاب خذلك عهد سبع المعالي=ماانساك ياشيخ الطيورالمطاريش


مع خالص شكري

[محاذر]

السلام عليكم ورحمة الله وبركاته

والله ان كلامك صحيح والمصيبه ان هالاشكال واجد وهذا ان دل فإنما يدل على الجهل ولكن النصيحه لها دور


ماكل طيرٍ في السما طار نرميه = مانرمي الا ياعليمي عشانا
اسلم وسلّم

[راع الكحيلة]

يا مرحبا والله بك

هذي والله الناس اللي الله أنعم عليها وملأ قلوبها رحمة

ويا ويل اللي رمى ها الطويرات وكأنه ما كفاه وش سوا في أبوهم وأمهم

يا ويله من شكوى الطير عليه يوم القيامة

وكيف انه قتله بلا حاجة

وترى كثير من حيوانات وطيور الجزيرة ما انقرضت من قليل

بل من ها الناس اللي ما يجي جنونها الا لاصاروا ورا سلاحهم

وكل شي عندهم حلال

لا حول ولا قوة الا بالله

والله ودك إن الناس ما تأخذ رخصة سلاح صيد
إلا بعد أن يعطوا دورة مكثفة في فن التعامل مع البيئة




الله يكثر من امثالك

واعذرني ترى نقلت مشاركتك للقصايد لأن قصيدتك مكشاتية بحته

وعدلت في طريقة عرض القصيدة حتى تسهل قراءتها...وكذلك اضفت لها صورة
كل هذا لأن موضوعك فعلا يستاهل ومؤثر

[صليب الراس]

صح الله لنسانك واشهد ان فى قلبك رحمه يس ياحوى ودى اعرف وشلون تفرق بين الخصفى والصقر

[عليمي يحب البر]

السلام عليكم ورحمة الله وبركاته
ليت كل الرماين مثلك يا محاذر
يامحاذرن مثلك قليلن من الناس
ياليت كل الخلق اتصير مثلك
وسامحنا على البيت الركيك ولا قصدي مجاراتك واستر ما واجهت

مشرفنا العزيز راع الكحيلة
بيض الله وجهك وعزالله انك كفيت ووفيت وهذا من طيب أصلك
وبالنسبه للنقل انت ابوها وسمها

صليب الراس والله مدري وش تقصد لكن اتوقع لو تسال بخيمة الصيد بالصقور يمكن يفيدونك


مع خالص شكري للجميع:)