الي يعرف لطبخ النيص يدخل ................(ويسعفني).....

[المنتظر]

السلام عليكم ورحمه الله وبركاته

اخواني الافاضل وانا طالع اقنص ارانب الا واشوف لي شوفه الا والله هاك النيص قدامي فما انتظرت رجفته بالسوبر بنلى الله لا يهينها المهم النيص يا اخواني من جد كبير وله ريحه زخمه غريبه وهذي اول مره اصيده فاخوكم ما صدق خبر نزلت العزبه وعلى طول طبخته بعد ما غسلته مالكم والهرج الواجد صار في اللحمه ريح زخمه والرز بعد...............:(

هل له طريقه طبخ معينه ؟؟؟؟؟؟؟؟؟؟؟؟؟؟؟؟

وهل له طريقه في غسيله؟؟؟؟؟؟؟؟؟؟؟؟؟؟؟؟

فالرجا من الاخوه الكرام لي عندهم علم فيه ما يبخلون علينا

واسف على الاطاله:p

وتقبلو تحياتي............................

[بركان]

من جدك تحكي؟؟؟؟؟؟؟

ان كان هذا صحيح فماذا تنتظر ايها المنتظر؟؟؟
اذهب الى اقرب مركز صحي للحصول على تطعيم ضد السعار !!!!!

[المنتظر]

اشكرك على مرورك اخوي بركان

انا اكلته مره مع الشباب في الجنوب والله لو انك معنا كان ما تاكل غيره
من زين طعمه بس ما سألت مسوي فاهم.............:p

وطبخته ليتني ما طبخته وخليت اهل الخبره يزينونه ولا اسالهم

وبعين اضف الى معلوماتك اكله حلال وما يامل الى جذامير النخل

والفاكهه والاعشاب بس

وتقبل تحياتي............................

[مهيلان]

اخوي المنتظر
السلام عليكم

سبب الريحة هو انك ما قطعت يديه ورجيه بعد ما ذبحته

لانه سبب الرايحه اللي تقول


المره الجايه اتصل علي وان جاهز

والسلام

[المنتظر]

اخوي مهيلان بعد التحيه

اشكرك لمرورك واهتمامك لكن

قطعت يديه ورجليه كامله يا ليت تفيدني

وتقبل تحياتي.........................................

[((( الحر)))]

اخوي المنتظر معليش على هالمداخله....يمكن انك تقصد الوبر...؟؟؟

تحياتي

[المنتظر]

اخوي الحر
بعد التحيه والاحترام

الوبر غير النيص الوبر نهاري المعيشه اما النيص فهو ليلي المعيشه

النيص حيوان اشبه ماله القنفذ بس حجمه كبير يجي في حجم الهرفي

والله يا عليه طعم جنان

وما حصلته الا في المنطقه الجنوبيه له شوك كبار طول الشوكه الواحده

حوالي 30 سم تقريبا

واذا الله وفقني راح اجيب لكم صور خاصه به

وتقبلو تحياتي...................

[ابولينه]

صح السانك انت الي وصفت هو النيص , سبق ون صاده ولد عم لي ,
بس ماعندنا خبر انه يوكل ورميناه لانه ياخذ بعض الوصاف من الحصني .
وهل هو اكله حلال ,
والسلام

[داورد]

انا من الناس اللي صادوا النيص مرات عديدة .

وكنت فيما قبل لا اعرف عنة اي شي وبعد سؤال اهل المنطقة عرفت الاتي:

عند صيد النيص لابد من اخراج مافي بطنة في الحال حتى الكبد والكلاوي والمعدة لان طعمها مر الا القلب فطعمة لابأس .

ثانياغسل مافي داخلة من دم بصب بعض الماء في بطنة ورجة . كل ذلك حين صيدة .


ولم يبقى بعد ذلك الا الصلخ ويمكنك صلخة في اي وقت مثل باقي الصيد.

ملاحظة : انا جربت حسحستة على النار ( الشلوطة ) لاكنها طريقة غير مجدية.

بالنسبة لطبخة فهو مثل باقي الصيد وياليت تجربلة المندي ( برميل) راح تدعيلي.




وانا جاهز لكل الاستفسارات اخوك .............داورد................

[بركان]

يا اخوان حسب ما اعرف وحسب العرف السائد في محيطنا وتحديدا وسط نجد - النيص ما يتوكلش بالمصري.
لان شكله يخوف وكله شوك وبعدين ما يخرج الا في الليل يعني مفترس او مزدوج التغذيه كل ما يمر عليه من القوارض بدربه يقضمه مثل الحصني ياكل الدجاج والارانب والعنب والبطيخ!!!!!
كما ان هذا النيص ابن عم للقنفذ كل جلودهم شوك ونفس الخشيشه!!!!


يا اخوان ماالله حدكم على اكله. يعني ما انتم مضطرين. رزق رب العالمين كثير.

ما عليش يا اخوي المنتظر سامحني على هذا الرد
ولا ما نع من ان تعزمني وآكله بس بشرط ان تقول انه ارنب شوكي نسبة الى الشوك وليس الى شعيب الشوكي!!!!!

تحياتي.

[المنتظر]

اخوي ابو لينه

اخوي داورد

اخوي بركان

بعد التحيه والاحترام.............

اما بالنسبه لاكله فهو حلال وسال احد المشايخ في الجنوب عنه فقال وش ياكل قالوله الاعشاب
قالهم اذا صدتوه اعزموني عليه

ويا اخوي داورد اشكرك على المعلومه القيمه اما اخوك طبخه على طول

اخوي بركان النيص حلال وما ياكل الا الاعشاب ولا له انياب عشان ياكل لحوم له قواطع اثنين كبار

اقرب ماله السنجاب............:D :D :D

وبعدين لو اعزمك على (ضبع) وش تقول والله يا عليه مرقه خبال

فيه قاعده انصحك تمشي عليها

(الى ما ياكـــــــــــــــــــــــــلك كـــــــــــــــــــــــــله):D


وشاكر مروركم ومشاركتم

وتقبلو تحياتي........................

[مهيلان]

اخوي المنتظر

السلام عليكم


ارجو افادتي عن النيص

هل يوجد في نجد

كيف شكل اثره بالارض

ما هي المواقع والتضاريس التي يصاد فيها


متى يصاد

والسلام

[راع الكحيلة]

http://www.mekshat.com/pix/upload/images5/mk5247_Hystrix_Africae-Australis.jpg

[المنتظر]

السلام اخوي مهيلان

بعد التحيه والاحترام........................

اخوي راعي الكحيله ما قصر وافادنا بالصوره الله يعطيه العافيه

ام هل يتواجد في نجد فهو كان موجود منول واخر مره شفته قبل

6سنوات في (جبله)في الدوادمي واما الان فماله ذكر

وشكل اثره في الارض زي جره الورع ...........

يوجد في المناطق الزراعيه والمناطق الجبليه .............

يصاد في الليل اغلب الاحيان او في الفجر.............

:confused:

[أبو تركي القطامي]

السلام عليكم ورحمة الله وبركاته
أخوي الغالي المنتظر مشكور على الموضوع
والنيص يأكل ومافيه شئ
وبسبب قلة ظهوره أكثر الناس مايصيدونه
وهو موجود في أغلب الأماكن في نجد وكذلك في شمال القصيم وتحديداً بالتيسيه وكذلك حول أم أنقي
أخوك القطامي

[ابو ايمن]

شكرا على المعلومات القيمة .

صدناه في الجنوب عند واحد من الأصدقاء في البر . مع المغرب .

ولولا ارتباطنا قال اذوقك اياه وماكان عندي مانع .

بس بصراحة ماسألته عن طريقة طبخه .

أما في نجد قبل حوالي 3 سنوات جابه واحد من الربع في الدوادمي في سيارته ( داخل شبك ) كانوا الشباب يسومونه .

أما إنه حلال فهذا الأصل في الشيء حله إن لم يحرم بالقرآن أو السنة .

وإذا حصل لك واحد اعزمنا عليه . ونفس تعاف ماتسمن.

تحياتـــي وشكرا

[الضاري]

الشغلة تطورت حسب ما أسمع من الشباب.. قاموا يجيبون كلاب أمريكية يتصيدون النيصه في المناطق الجبلية وخصوصا في الطائف ...( بس وين بالطائف... الله أعلم )

المهم فية واحد من الشباب .. متخصص في طبخ النيصه.. راح أسئلة أنشاء الله عن طريقة طبخه بالتفصيل وأعلمك..

خاص للمتأهلين / والله ياهم يمدحونة يا قمت تلعب مباراة ( :D ) مع المعزبة بالليل..يقولون حتى لو تبي أشواط أضافية وبلنتيات بعد.. الامور على التمام.. شغل يبيض الوجهة ..:D


والله يا شكلي أبطرد من المنتدى عقب هالرد .. بس تكفون لاتنسونن توسطو لي عند الربع..


تحياتي

[جوراسي]

السلام عليكم ورحمة الله وبركاته
اسعد الله اوقاتكم بكل خير
النيص وما أدراك مالنيص
النيص اللي نخلته ببندقك (حليله أعدمت والديه) انا اقولك ليش لانك يوم بندقته انبطت مرارته ومعروف ادا انبطت المراره تصدر رائحه ( كريهة) من الحيوان وبالتالي تتسرب المواد التي في المرارة للحم وينتج عن ذلك فساد اللحم يعني (لا يصلح للاستهلاك الآدمي ).
وبالنسبه لطريقة تجهيزه بعد صيده بالطريقة الصحيحة هو صلخه كصلخ أي ذبيحة وتفرغ أحشائه كاملة بدون استثناء وترمى.(بعد اذنك داورد)
أما طريقة الطبخ فلا اعرف غير طريقة الحنيذ وبدون أي اضافات.......
على البرميل سيده يعني بعد ما تصلخه حطه في البرميل وخليه ساعة ونص تقريبا لأنه بري ولحمه قوي شوي ثمن طلعه ورشه برشة ملح خشن واستمتع بالطعم الرائع ولا تنسانا المرة الجايه.
والله اعلم.






تحياتي:
اخوكم / جو راسي

[ذيب مجيرة]

يا سلام
نيص

يالربع النيص حلالالالال ولا هوب حرااااااام وطعمة روعة مثل التيس الصغير
وسبق ان كلناه في الجنوووووووب بعد مطاردة قوية لانها اول مرة واذا شفته ما يبي له بندق يبي له مشعاب
لان ركضه ما هناك ركض

بس شوكه مشكله اهبده على الراس
وهو لذييييييييييييييييييييييييييييييييييييذ ولا تكفي والريحة اللي تقول يالمنتظر ما لقيناها لانا طبخناه بعد تنظيفة في برمة وهي قدر حجري يباع في الجنوب طبخناه لحم بس والرز برا
وطلع يا مال الشام

راعي الكحيلة شكرا على الصورة

[المنتظر]

السلاو عليكم ورحمه الله وبركاته

مشكورييييين اخواني على مروركم الكريم

اخيرا عرفت اخوي (جوراسي) جابها

انا فعلن فجرت بطنه واكيد هو سبب الريحه

وصدته قريب في الجنوب وكانت الرميه موفقه وطبخته

وكان ولا احلى

ولكم جزيل الشكرررررررررررررررررر

سلاااااااااام

[اشهب]

http://www.mekshat.com/pix/upload/images5/mk5247_Hystrix_Africae-Australis.jpgشف انا مستعد اكل المخلوق هذا وانقش سنوني بشوكه بس بحاله وحده اذا كنت بالبر وابموت من الجوع ومالقيت الا هو اكلته
ياخوي لو بس ركزت بكشرته وهو هاجه ذليت ياكلك قبل تاكله
وبعدين قال لي واحد انه يطلق عليك شوك من جسمه زي السهم احيانا تبخق عينك علشان كذا تيك كير نكست تايم...الترجمه يعني انتبه اصلي واحد متمدن واكل المطازيز بالشوكه

[الربذي]

[يامشرفين ولي يرحم والديكم شيلو هالموضوع انا طالبكم نيص ولله ترى يفشل وماهي زينة بحق المنتدي الرائع ذو السمعة العريقة ولاعليكم امر لان بصراحة مايكلة الا !!!!وترا طبق الاصل من القنفذ وهوحيوان وصخ مرررة [/[/

[ابوفزعه]

انا بعلمك الطريقه وانشاء الله بتدعي لي
اول ماتصيد النيص شق بطنه
وحاول انك تجزره بنفس الوقت
هذا من اهم الاسباب اللي تذهب ريحة الزخمه
بعدين قطعه وحطه بقدر ورش عليه ملح وصب عليه ماء
واتركه لمدة ساعه او ساعه ونصف
وبعدين اغسله بماء واطبخه وتشوف الطعم
واقول اذا باقي شي عندك اطعمنا:p :D ;)
وبالعافيه

[الجدي]

السلام عليكم ورحمة الله وبركاته : يأخوان النيص حرام حرام حرام هذا ماقاله للى الشيخ وذ كرلى أن الرسول صلى الله عليه وسلم خصه في حد يث أنه حرام وذ كرلي الحد يث لكن نسيت الحد يث وأن شاء الله أذ كره وأقوله وذ كرلي أن ( الضبعه ) حلال وذ كر 3 أحاديث عن الرسو ل صلى الله عليه وسلم .
الله أما اني بلغت الله اما أشهد أخوكم في الله / الجدي

[راع الكحيلة]

الجدي
وإن كنت لا أحبه ولا أرغب في أكله

ولكن لا تجرؤ على الفتيا بارك الله فيك بلا دليل حتى وإن نسبت الفتوى لغيرك

فلا أنت الذي ذكرت اسم الشيخ ولا أنت الذي ذكر الأحاديث

وحتى وإن ذكرت اسمه فالواجب ذكر المصدر أو الرابط حتى تطمئن الناس

أما قولك حرام حرام...بلا دليل

فأخشى عليك من عاقبتها بارك الله فيك

والأصل في ديننا هو الحل ما لم يثبت التحريم.

شاكر لك أخي وأرجو أن تعيد الاتصال بالشيخ وتعطينا العلم الوكاد.

[ابوفزعه]

بكل صراحه انت استعجلت بالفتوى ولو انت قايل لا اعلم احسن لك ونصيحه لك لاتستعجل بالفتوى مره اخرى
وبالنسبه لموضوع هل انه حلال او حرام انا لا اعلم ولكن
اعرف واحد من طلبت الشيخ محمد بن عثيمين اكل النيص وخاصة كبده وهو احرص مني ومنك على مايدخل جوفه من حلال اوحرام وهذا والله اعلم

[راع الكحيلة]

يا الربع

احس انه قد يكون إلتبس على بعض الإخوان عن ماهية النيص


فألاحظ من نسب للنيص الرائحةالكريهة ومن قال انه يشبه الحصني ومنهم من إشمئز منه إشمئزازا شديدا
واعتقد ان الكلام في صيده وأكله شيء مخجل أو أن فيه عار و مذمة

أقول ربما ظن البعض أننا عندما نتحدث عن النيص فإننا نتحدث عن الظرمبول ..

كما سمعت بذلك في السابق..خارج النت.

وهذا خطأ

النيص هو ما ضعت لكم صورته أي الكائن الشوكي شبيه القنفذ وهنا تعريف أكثر به أضغط هنا (http://www.mekshat.com/vb/showthread.php?s=&threadid=12441&highlight=%C7%E1%D4%ED%E5%E3)


والظرمبول هو ( هنا ) (http://www.mekshat.com/vb/showthread.php?s=&threadid=18843)

[الجدي]

السلام عليكم أخوي راعي الكحيلا صحيح أنه خطا ما أذ كر حد يث الرسول صلى الله عليه وسلم لكن انا قلت أني ناسيه وظروفي في الوقت الحاظر ما تساعد ني با لبحث عنعه وأنا وعت الشباب أني أجيب الحد يث اللى حرم الرسول فيه أكل النيص ثاني شئ أخوي انا ما فتيت أنا قلت أني سئلت شيخ عند نا وذ كرللي الحد يث وكما تعلم في الد ين ناقل الفتوى ليس مفتي انا مره لقيت ثلاث أنيصه وقلت أسال الشيخ قبل لكلهن وافتى بما يعلم جزاه الله خير.
أخوي أبو فزعه العبره ماهو بالرجال تقول أكله من طلاب أبن عثيمين العبر بالحرام والحلال والد ليل من الكتاب والسنه ثاني شئ اخوي أبو فزعه خطا منك أنك تقول أحرص مني ومنك يمكن منك لكن مني الله وأعلم أخواني راعي الكحيلا أنت وأبو فزعه فيه ناس حللو أكل النيص معانا بالرد ود ليه ماقلتو مايجوز تحللون . يا أخوان انا قلت أني سئلت شيخ علم من الناس اللي نثق بهم أن شاء الله وقال أنه حرام يأخوان كل واحد منكم يروح لشيخ يثق فيه ويسئله وش المانع أني أقول سئلت شيخ وأفتى بتحريمه أسئلو أنتم أخيكم في الله / الجدي

[راع الكحيلة]

الجدي
حياك الله أخا عزيزا

وما قلت أنا هذا القول إلا لأنك استفتحت كلامك بتأكيد كأنه لا يقبل النقاش كما في قولك

حرام حرام حرام .. وكررتها

وبالنسبة لمن حللوا على قولك ولماذا لم نطلب منهم الدليل

فكما قلت لك أخي العزيز أن الأصل هو الحل ما لم يثبت تحريمه ..فمن يحرم يجب عليه الدليل

لذا اقتضى مني أن أذكرك لعل وعسى

أما من ناحية الحرص فأظن والله أعلم أن كل الناس أحرص مني وليس في ذلك أي بأس

تقبل تحيات أخوك
أبو طلال

[الجدي]

أخوي أبو طلا ل أنا قلت سئلت شيخ وقال أنه حرام وذ كر حد يث أنه ان الرسول صلى الله عليه وسلم خص النيص بالتحريم وحبيت أبين لشباب علشان كل واحد يسئل الشيخ اللى عنده وجزاك الله خير
ومن ناحيت أن كل الناس أحرص منك فأنت اعلم بنفسك وعسى الله يهد يك ويثبتك على د ينه
اخو ابو طلال وجب التنبه عليه أني ماقصتك أنت في الكلام بالحرص على الد ين أنا قصت أبو فزعه عند ما قال من طلاب أبن عثيمين وهو أحرص مني ومنك لأ نه حتى لوكان من طلاب أبن عثينين يمكن طافت عليه المسئله هذي خصوصً أن النيص من أكلات الأعشاب والرسو صلى الله عليه وسلم أحل الضبعه وهي من أكلات الحوم وهذي المسائل يصير فيها لبس على كثيري من الناس وانا مره أكلت النيص ماكنت أعرف أنه حرام.
اخيراً أخي أبو طلال أرجو أن لا تاخذ بخاطرك أنت ومن رد د ت عليه فاوالله ماقصت ألا الخير وحرص على التعاون لمصلحة الد ين وأن نتجنب ما نهانا الله ورسوله عنه . تقبل تحياتي

[راع الكحيلة]

عزيز يا الجدي

ولا في الخاطر شي

لكن أرجو منك أن تخدمنا وأن تتأكد من الشيخ مرة أخرى لعلنا ننبه إخواننا عن أمر لا يعلمونه.... ربما

[ابوفزعه]

اخوي الجدي
السلام عليكم ورحمة الله وبركاته
اول شي اذكر الله وصل على النبي صلى الله عليه وسلم
اول شي انت حرمت النيص ولا جبت لنا ايه اوحديث يثبت تحريمه وهذا اكبر خطا
ثانيا اصريت على انه حرام
ثالثا ورد عن الرسول صلى الله عليه وسلم تحريم الدأدأ اللي هو القنفذ
رابعا لايوجد نص يدل على تحريم النيص
خامسا عليك بالاستغفار لانك افتيت عن شيء لاتعلم عنه والرسول صلى الله عليه وسلم يقول : اقربكم
للفتوى اقربكم للنار
سادسا ان النيص تستخدم كبده في علاج بعض الامراض كالسكر وغيره
سابعا اني احب الخير لك ولمن في هذا المنتدى من اعضاء ومشرفين واكن لهم كل احترام وتقدير
ثامنا اتمنى من الاخوه ان لايستعجلو في الفتوى الا بلدليل من الكتاب والسنه
هذا والله اعلم

[المنتظر]

السلام عليكم ورحمه الله وبركاته

جزاك الله الف خير اخوي الربذي

على المشاركه الطيبه ولكن ودي اقولك حاجه

انت يمكن ما تعرفها ان مشرفين المنتدى (يعلمون ولا ينتعلمون)

ولا يحتاجون توجيهك على المواضيع الزينه ولا غيرها

وبعدين الجربوع طبق الاصل من الفار على قولتك اذا كان المقصد الشبه

وللمعلوميه( ما ياكل الا الفواكه والخضروات والاعشاب) يعني انظف من الدجاجه
الي تاكل الفيران والدود والحشرات وتقول انه وصخ شكلك ما تدري وشو مع احترامي لك

وارجع اقولك مشكور على ردك ومشاركتك الحلوه ويجي منك اكثر يا الغالي

[المنتظر]

السلام عليكم ورحمة الله وبركاته

يعطيك العافيه اخوي الجدي على المشاركه


لكن يا اخي الكريم اذا بغيت تفتي او غيره لازم تجيب لك دليل

واتمنى انك تجيب الحديث الي ذكر فيه النيص وحرمه ويجزيك الله الف خير

والمعروف انه حلال لكن انت الله يعطيك العافيه حرمته على حسب سؤال لشيخ

وناس سالو كذا شيخ وحللوه ومنهم من اكل منه بس يمكن الشيوخ ما عندهم

علم في حكم النيص يليت تجيب الحديث باسرع وقت لانك سببت لنا الشك فيه


ولك جزيل الشكر.................

وتقبل تحياتي.................................