أدخل وشارك بالي ناقص في العزبة لكي نفيد ونستفيد

[" الصرصخ "]

السلام عليكم ورحمة الله وبركاته :
أول شي ما يخفى عليكم إن في رجاجيل قبلي شرواكم حطو موضوع عن العزبة والأغراض بس حبيت أنا أعيد الموضوع ونفيد ونستفيد بالي ناقص إن كان في شي ما كتبته ، لأن يا شباب موضوع العزبة مهم ودايم تلاحظون ننسى أشياء من العزبة سواءً عزبة المواعين ولا الطبخ ولا الشاهي والقهوة فحبيت أقسم الموضوع إلى ثلاثة أقسام :
1/ عزبة المواعين 2/ عزبة الطبخ 3/ عزبة الشاهي والقهوة
يعني يبيلك ثلاث صناديق " عزب " عشان ترتب وضعك وإن كان طلعاتك واجده بتنفعك لاكن الله يعينك بتاخذ عليك محل من السياره ، ونبدأ بأغراض العزب : بسم الله
1/ عزبة المواعين :
بيز - سكين صغير وسط كبير - ملاعق ( العدد إلي تبي ) - شوكة - مفك صلصة - ملاسة - مغرفة - ساطورة - قطاعة ( إلي تقطع عليها اللحم والخضرة ) - كيسان بلاستك عشان ما تتكسر عليك ( العدد إلي تبي ) - صحون صغير ووسط وكبير بلاستيك ورق تفكك من الغسيل ولا تاخذ محل في العزبة ( العدد إلي تبي ) - بوادي وسط بلاستيك ورق ( العدد إلي تبي ) - صحن مدور ( الحجم الي تبي ) - سرويس كبير - قدر صغير ووسط وكبير - قدر ضغط ( الحجم إلي تبي ) - درزن كيسان ورق ( أنطلها في العزبة إحتياط ) - سفرة - تاوه ( الحجم الي تبي ) - شواية - صابون تايد ( حاول تحطه في علبة ملح فاضية " ساسا " :D عشان ما يغثك ولا ينكب في العزبة ) - ليفة - إسفنج - فوطة تمسيح ( إن كانك فاضي وراعي فلسفة ) .
2/ عزبة الطبخ :
زيت طبخ صغير - ملح خشن - ملح ناعم - ماجي - صلصة طماط - بهارات - ليمون أسود - دارسين - كمون - زعفران - فلفل أحمر مطحون - هيل - بهارات كاري ( إن كان ودك ) - حبحار - رز 5 كيلو - مكرونة - معلبات ونواشف ( شكل على هواك بس لا يكون من النوع إلي يفسد بسرعة ) .
3/ عزبة الشاهي والقهوة :
دلة قهوة - بريق شاهي - بريق موية - بيز - فناجيل ( العدد إلي تبي ) - بيالات ( العدد إلي تبي ) - ليفة الدلة - قهوة مطحونة ومحمصة - زعفران - هيل مطحون - مسمار مطحون - شاهي - نعناع يابس ( إن كان ودك ) - سكر ناعم - فوطة تمسيح صغيرة - ملعقة صغيرة وكبيرة .



طبعا العدد والحجم والكمية خذ على إلي تشوف إنه مناسبك .
وأرجو إني وفقت في كتابة الأغراض وأي شي ناقص يا شباب أرجو إنكم تكتبونه عشان نفيد ونستفيد ...
والسلام عليكم ،،،

[عناز]

شكلك ما تحب البصل والثوم

[العويصي]

السلام عليكم ورحمة الله وبركاته
أنا أقترح أن تأخذ فناجيل بلاستك لانها دايم تكسر اذا لم تكن بلاستك

[العويصي]

السلام عليكم ورحمة الله وبركاته

أخي الفاضل أظنك نسيت أهم شي وهوالغاز
ثانياً أنا أقترح أن تأخذ فناجيل بلاستك لانها دايم تكسر اذا لم تكن بلاستك

[" الصرصخ "]

السلام عليكم :
وش دراك إني ما أحب الثوم والبصل ، عموماً أنا ما أحب الثوم ولا البصل الني
لاكن مطبوخ ما فيه مشكله والكراث بعد ...
أما الغاز أنا طبعي ما أحطه مع العزبه ولا أنا ذاكره الله يسلمك ولا فكرة الفناجيل
البلاستيك والله ذي زينه وتفكنا من الشرا من كثر ما تتكسر ذا الفناجيل القزاز...
وأشكر تفاعلكم مع الموضوع وإلــــــــــــــــــ الأمام ـــــــــــــــــــى ......

[تبريزة]

السلام عليكم ورحمة الله وبركاته


باقي ياطويل العمر والسلامه (مسن)
لاتقولي اقرب حصاة ،،، اخاف تطلع بنفود

وباقي اكياس زبالة الله يكرمكم على شان تجمع فضلاتكم وتولع فيها قبل ماتمشي


وباقي قز وذراية
وقصدير

لي حق غاز لأني اظن انه يكون داخل العزبة دايم على شان ماتنساه


ودمتم

اخوكم تبريزة

[" الصرصخ "]

السلام عليكم ورحمة الله وبركاته :
أنا بقولكم ألحين ليش ما حطيت بعض الأغراض المهمة مثل المسن و الغاز وغيره ،
لأني أنا راعي فلسفة الله يعينكم علي ، أنا حاط بعض الأغراض في صندوق خاص
بأغراض غير العزبة والطبخ بس ترتب عمرك ترتيب ولا أحلى ...
والأغراض إلي حاطها في الصندوق هي /
دربيل - سكين ذبح غير السكاكين إلي في عزبة المواعين - مسن " يفضل مسن الرماية "
تراه زين - كريك وفاس صغير - مصنع سويسري - كشاف عادي - كشاف مليون شمعة على
بطارية السيارة - دسوس كم طويل " ضروري لتضبيب ولا أي شي عشان ما يقرصك عقرب
ولا داب داخل الجحر بإذن الله " - لي طويل - دافور كبير ووسط وصغير - تريك - لمبة علاق
على بطارية السيارة - ولاعة - درزن كبريت - كبريت كبير - مكعبات نار - صاجة طبخ على
الجمر - ذراية " ساتر هواء " - ملقاط - أكياس عادية - أكياس زبايل الله يكرمكم - مضخة
قوارير .
بس ذكرتني بشئ إلي هو القصدير ...
وإن كان فيه شي ناقص أرجو إنكم تشاركونا فيه ،،،
والسلام عليكم ...

[عناز]

الله يعينك على شيل هالصندوق...ولا تنسى تحط صفيرة قدر كاتم احتياط بالصندوق...عنــــــاز

[" الصرصخ "]

والله أنك صادق يا كثر ما تضيع صفيرة الكاتم بس المشكلة وين أحصل
واحد يبيع صفيرة لحالها ؟؟؟؟؟؟؟؟

[تبريزة]

اذا ضاعت عاد الصفيره

مالك الا انواع الاختراعات


ياتقلب لك فنجال وتحطه فوق المكان اللي يطلع منه البخار

ولا تجيب ليمونه سوداء وتشقه وتدخل الفتحه اللي يطلع منه البخار بوسطه


ودمتم

اخوكم تبريزة

[هملان]

السلام عليكم ورحمة الله وبركاته
الاخ صرصخ كل ماذكرت صحيح ولا كن تجهيز العزبه يكون حسب مده الرحله وحسب عدد الاشخاص
وحسب نوع السياره او عدد السيارات وانا افضل ان تكون العزبه مقسمه الى عزبه شاي وقهوه في
صندوق وعزبه الطبخ في صندوق حتى تكون اسهل عند الحمل والتنزيل واحيانا لاتحتاج عزبه الطبخ
في العصر او الصباح وعموما كل ماكانت العزبه مبسطه تكون احسن
ولاداعي للماجي لانه مضر بالصحه ولاداعي للمعلبات وتستبدل بالطحين ويكون من البر الجيد
تحياتي

[حد السيف]

الصرصخ
السلام عليكم ورحمة الله وبركاته
فية اشيا كثيرة تنقص عزبتك يالغالي
ملقاط جمر طويل وقصير
ذرا نار
مطبقية تمر
كباسة عصير ليمون من ال ستل استيل
كرسي نار من النوع اللي يتصفط وعندي كرسي نار مقاسة 45*95 سم واحط علية ثلاث دلال وابريق الماء سعة 20لتر وابريقين والقدر يطبخ ولا يقول شي ويطلب الزود واذا خلصت منة صفطة
ولي ملاحظة تقول فناجيل اقهوة بلاستك
فية فناجيل قهوة صيتي ضد الكسر تلقاة عند بادريق والسعيد
اما مايخص الكاسات برضة ذكرت البلاستك ياخي الكريم فية بدائل
مثل كاسات الاستل استيل لك ولزمن او طاسة من ال استل استيل
اما مايخص الملاس فية انواع خشبية وصحية
وعلى فكرة كل الصحون اللي بعزبتي صغيرها وكبيرها وسهلة التنظيف من ال ستل اسيل ما تقشر ولا تصدي


محبك اخيك
حد السيف

[" الصرصخ "]

هههههههههههههههههههههههههههههه يا حبك للقرقعة والإزعاج والقروشة يا حد السيف أنا كاتب ألحين أغراضي أغلبها بلاستك رحت قلبتها ستانل ستيل وحديد وإزعاج مع ذا البطانيج في البر وأنا أقولكم ترى في أغراض ناسيها وودي نكتب إلي ناسينه عشان نستفيد منها بعدين ونرتبها صح ونشوف الضروري من غير الضروري وتكون عزبة متكاملة بإذن الله ...
ذكرتني يا تبريزة بأول نجيب ليمون أسود ونوخر الصفيرة ونخلي الليمون في الهواء يطير بس متعه صراحه :D ؛؛؛؛؛؛؛؛

[حد السيف]

الصرصخ
السلام عليكم ورحمة الله وبركاته
اذارتبتها زين مالها صو ت ولالها قرقعة يالصرصخ من اسمكك راعي ازعاج ههههههههههههههههههههههة:
وترا عزبتك ماتزبن اذا كل شي بلاستك صارت عزبة هنود يالحبيب
وبعدين لا تنسى اسياخ الشوي الله لايهينك
سلام
حد السيف

[عناز]

أخوي الصرصخ... السلام عليكم ورحمة الله وبركاته... الصفيره يبيعونها لحالها... وبعدين طرت لي فكره... ودي ولا عليك أمر أنك بعد الانتهاء من حصر أغراض العزبه تعملها في بيان وتعرض بالمنتدى ...لاني أول واحد سوف يقوم بنسخها وتغليفها ووضعها بالسياره من كثر ما أنسى بعض الاغراض الخاصه بالعزبه

[" الصرصخ "]

السلام عليكم ورحمة الله وبركاته /
أخوي حد السيف :
خلااااااااااااص يا شيييييييخ لعيونك أبقلب أغراضي حديد بدال بلاستك:D ...
أخوي عناز :
أنا ودي أرتب وأحصر الأغراض في بيان:rolleyes: واحد لاكن أنا ما عندي ذيك الخبرة عشان أحط بعض الأغراض وبعض الأغراض ما أحطها بعدين ذوقي أخاف ما يعجبكم:no: فودي واحد منكم يتكرم ويرتبها ويشوف الشي الضروري من غير الضروري ونطبعها ونحطها في السيارة :redcar:على قولتك عشان ما نقول هااااااه:eek: نسينا ملح نسينا الملقاط نسينا إلخ ... وإذا جينا نطلع ما لك إلى تشوف الورقة إلي طبعتها:type: ويسلام سلم وصورها بعد إن كان في واحد من ربعك راعي بر وتكون فايدة لنا ولكم بإذن الله .
أخوكم / الصرصخ .:)

[أبو فراس]

السلام عليكم ورحمة الله وبركاته

ما شاء الله ما خليتوا شي للبطن الا وحطيتوه ولكن

وش اكثر المشاكل اللي بالبر تصير

انا على كثر سفرياتنا وكشتاتنا نعاني من مشاكل الصلاة

متى نقصر ونجمع

متى نقصر فقط

متى نجمع ولا نقصر

متى يدخل الوقت ومتى يخرج

وسجود السهو بالصلاة دائما يتخالفون الجماعة عنده ويدورون اي شي على شان يفصلون المشكلة

ولذلك لا اسافر بدون كتاب الله وهو مصحف صغير في درج السيارة

ولا كتاب كيفية الصلاة للشيخ الطيار

وسلامتكم