عجبي

[مكشاتي سابق]

السلام عليكم ورحمة الله وبركاته


لا حظت من خلال المنتدى وجود مسميات للطيور لم أكن أسمع بها من قبل
خاصة عندما تذكر ألوانها وبالذات عندما يقال "حمر مجاهيم" أو "حمر أدهم"
وأيضاً عدم التفريق بين وكري الحرار والحر
وأيضاً سرعة بعض الأخوة بالجزم ومن خلال الصورة بماكر الطير
وأنا أرى وأسمع شيبان أمضوا معظم حياتهم بالصقاره
ومرت عليهم أشكال من الطيور إلاّ أنهم يمتنعون عن الإدلاء برأيهم عن ماكر الطير
فهل هذه المسميات تختلف بإختلاف البلد
ولذلك نجد اختلاف المسميات بإختلاف المنطقة وبناءاً على ماهو متوارث عليه
أو أن هذه المصطلحات والمسميات هي واحدة في دول الخليج
وأن ما لاحظته من إختلاف ينم عن جهلي بهذه المصطلحات وعلم غيري بها
أو ينم عن علمي وجهل غيري بها


الموضوع مطروح لإبداء الرأي دون استنقاص بقدرة وكفاءة كافة الزملاء

[مدرس الصقاره]

وان بعد صراحه مستغرب من هالطياره الي بالتوقيع حقك بعد

صراحه عجب

[هشام سيد]

لايوجد احسن من الاصول رزقق الله الصلا ة على النبى

[طير الهقاوي]

بسم الله الرحمن الرحيم
تتعجب وغيرك من الاناس يتعجب عليك وانا اولهم كيف تقول وكري حرار لم اسمع بهذا المسمى لامن الشيبان ولا من الصقاقير الي لهم باع في الصقاره ويمكن يكون مسمى في احد الدول المجاوره لسعوديه اما من ناحية اهل نجد وبلدها المسمى هذا غير صحيح وانت ونا نعرف من هم اهل نجد شاكر لمشاركتك الجميله واختلاف الراي لايسبب ضغينه بيني وبينك تقبل مروري

طير الهقاوي

[راعي الجرودي]

اضم صوتي لك يا مكشاتي سابق

[صاحب نوماس]

وان بعد صراحه مستغرب من هالطياره الي بالتوقيع حقك بعد

صراحه عجب

:good: :good: :good: :good: :good: :good:

[هواي داورد]

والله انا المعلومات اللي عندي

حطيت عليها معلومات من مكشات

وحطيت عليها معلومات من شايبي

وشف انواع الضحك هههههههههه

كل يوم يطلع لي شي حافظه غلط

ويارجال الصقارة موب إنك تحفظ نوع الطيور وتروح تعدد انواعهن

اصقارة إنك تاخذ الطير وحش وتدربه وتدهلة ثم تجرده ثم تقنص به


هذة صقارتي وماني بمحتاج افرق بين الطيور علشان اصير صقار

وكلن يقول صقارتي اطيب

[شلوان999]

مساء الخير على الجميع صراحه شدني الموضوع حيل بغيت اطيح انا اقول في السنين الاخيره ومع تغير الاوضع من ناحية البيأه وغيرها من تغير تتغير معه الكاءنات الحيه مثل الطيور وتتغير مواكرها ما شي يقعد على حاله الا الله سبحانه دمتم

[قنيص غبر]

السلام عليكم ...
اشكر اخوي مكشاتي سابق على هذا الموضوع واللي انا اضم صوتي له ..
الاخوان اللي ردو على الموضوع تراهم مافهموا مغزاك خوي ...
اولهم مدرس صقاره ماكان يحتاج تدخل عرض في الموضوع يعني الرجال يشاركم بموضوع وانتم تستهزؤون فيه ..
طير الهقاوي اخوي يقول عدم التفريق بين الحر و وكري حرار هو ماقال انه لايوجد مسمى وكري حرار !!!

صراحه انا قريت كثير في مكشات اللي يقولون للوكري انه حر !!! وشفت مواضيع يقولون مسما حمر ادهم وحمر مجاهيم وهذي المسميات غير صحيحه .. الحمر لون والادهم لون ثاني ولا يجوز تخلط بينهم .. مثل اللي يقول سيارتي لونها ابيض مايله على سواد
فالنهايه اخوي انا اقول من اهم الاسباب على هذي المصطلحات هوا صغر كاتب الموضوع وجهله في الصقاره ... ولو كل من جا ونجر ماضل في الوادي شجر

[مكشاتي سابق]

هلا بك يا مدرس الصقاره
أولاً : هاذي الطياره كان جدي الخامس عشر الله يرحم موتانا وموتاكم يرد عليها الإبل وآخر الإسبوع يكد عليها تكسي 000 أمزح لا تاخذ ردي على إنه تريقه 0
ثانياً : ليه تتعجب وأنت مدرس في الصقاره أكيد أنت ما قد قنصت الرمله 0

الأخ هشام هلا بك
واللهم صلي وسلم على نبينا محمد وعلى آله وصحبه أجمعين

طير الهقاوي مرحبا بك
ردك يؤكد بأن المسميات تختلف بإختلاف المناطق 0
نعم والله أعرف أهل نجد فهم عبيد الله شأنهم شأن باقي المسلمين فيهم من يستحق المدح وفيهم من يستحق الذم ، لكن هل أنا وأنت نعرف أهل أفغانستان أو أهل غزة الذين هم بالفعل من يستحقون أن نفاخر بهم 0

راعي الجرودي هلا بك
شاكر لك مرورك وتؤييدك

صاحب نوماس يا مرحبا بك
تقدر تقرأ ردي لزميلنا مدرس الصقاره وشاكر مرورك

هواي داورد
مرحبا بك ولو إني عجزت أفهم إسمك
أخي الفاضل نحن لا نتحدث عن الصقاره ، أنت في وادي وموضوعنا في وادي
المغزى من طرح الموضوع إن بعض الرجاجيل لا قام يوصف لك الطير بالتلفون أو ختى في هذا المنتدى يرسم صوره مغايره للوصف الحقيقي للطير ، واستشهد بذلك بأن سبق واتصل علي زميل من أهل نجد على قول أخونا طير الهقاوي ووصف لي الطير على إنه مغتر ، ويوم شفت الطير ولا راسه من ظهره وله مدامع (وكري حرار) يعني الطير عادي جداً لكنك تتكاشف نحره وشليله ، وفيه إناس لا وصف لك الطير صوّره لك كأن الطير قدامك تشوفه 0

شلوان 999
هلا بك وعسى الله يتم علينا نعمة الإيمان

قنيص غبر يا مرحبا بك
شاكر لك مرورك وتؤييدك ، صحيح كلامك الظاهر إن بعض الأخوان ما فهم المغزى
أما أخونا طير الهقاوي فأنا اللي فهمته من كلامه إنه يقول لا يوجد أصلاً مسمى (وكري حرار)
وهذا يؤكد لي الإختلاف في المسميات 0

أشكر كل من شارك وقرأ موضوعي
ولو لا إختلاف الأنظار لبارت السلع
لكن تؤكد لي أن بعض المسميات التي هي بالنسبة لي جديده
والتي لم ألاحظها إلاّ في الآونه الآخيرة عندما كثر شريطية الطيور
الذين انتهجوا مسميات حديثة لرفع قدر الطير للتسريع في عملية تسويقه وتبعهم في هذه المسميات حديثي العهد بالطير
ولم يتأكد لي ذلك إلاّ لما وجدت أن هناك من يشاطرني رأيي في طرحي
فمن لا يعرف الفرق بين الحر الأصيل ووكري الحرار فهذا ومن وجهت نظري يحتاج إلى التواصل أكثر مع أخونا مدرس الصقاره لكي يستفيد إن هو رغب في الإستفاده 0

[بوالحر]

لا تعليق علي الموضوع

[المزروعي]

السلام عليكم ورحمة الله وبركاته ,

أخي العزيز مكشاتي سابق موضوع رائع و تستحق الشكر عليه و موضوع أعاد الحياة لهذه الصفحه أقصد صفحة الصيد بالصقور .

أول شي أخي العزيز كلامك صحيح بالنسبه لألوان الصقور لم نكن نسمع بحمر مجاهيم أو حمر أدهم في السابق و خاصه عند شوابنا لأن أكثر طيورهم كانت من بلاد الشام أو طرح أراضيهم و هي إما فارسي أو شامي وأغلب هذه الصقور ألوانها محددة أشقر أو أدهم أو أخضر أو جرودي أي أنها لم تكن مغلطانيه أبد و يسهل وصف الوانها . أما الان و بعد أن تسهلت الامور أصبح الناس تجلب الصقور من منغوليا و بلاد الصين و صقور هذه البلاد فعلا لها ألوان محيره بعض الشي !! و يعود السبب لكثرة الصقور فيها و بالتالي يتزاوج الاشقر مع الاخضر و الاحمر مع الادهم و تضيع الالوان و تتشعب الالوان أيضا ! كما أنه وجد جير وحش تزاوج مع حر و تم توثيق هذا الشي بالصور . كما أنه تم جلب طير للبحرين هذه السنه من منغوليا أتحدى أي شخص يستطيع وصف لون هذا الصقر و أعتقد أن صورة هذا الطير مع صقار البحرين .

أما موضوع الحر الوكري فهذا المسمى يختلف من بلد لبلد !! الوكري معروف شكله و حجمه و هو بالغالب صغير الحجم و لا يتعدى 16.5 و له مدامع واضحه فهذا هو الوكري المعروف و لا يطلق عليه وكري حرار . و لكن إذا وجد طير حجمه 17 في 17 أي أنه وافي الحجم و الجرم ولكن له مدامع و رأسه أحمر فهذا هو وكري الحرار لأن الحر الاصيل لا توجد له مدامع وبالتالي وجد هذا المسمى للتفريق بينهم .

أما موضوع ماكر الصقور فهذه هي الكارثه بكل معنى !!!

لا أعرف كيف يستطيع الشخص أن يعرف ماكر الطير من الصوره مع أن لي خبره 12 سنه في الطيور الفارسيه و ما زلت اجد صعوبه في التفريق بين الفارسي و الباكستاني أو التركماني و أغلب هذه الطيور تجد فيها الدق الفارسي !!! وأكثر الطيور التركمانيه يوجد بها الشد الفارسي !!!! و هنا الحيره !

و أخيرا لك مني جزيل الشكر و الإحترام
أخوك المزروعي

[مكشاتي سابق]

أخي المزروعي
حيّاك الله وبياك وبالخير أسعد الله صباحك ومساك

كلامك يا الغالي على راسي من فوق ، كلام واقعي ومنطقي ولا يجادل فيه إثنان عندهم قدر من المعرفه بالطيور
إن الذي قصدته بقولي "وكري حرار" تماماً بالطير الذي وصفته أنت
فإذا جئنا نصفه فهل نطلق عليه حر وافي 00 لا ويقول لك زود على ذلك إنه حر وافي أصيل
إذا كان وكري الحرار حر وافي أصيل ، عجل وش بقينا للحرار الأصايل
السؤال هنا : هل نحن على استعداد أن نناقش ونتعلم ونستفيد من بعضنا

الواجب إني إذا شفت الرأي للأغلبيه ، العقل يقول إني اراجع معلوماتي وأصححها
أما من ناحية الألوان كما تفضلت وتعددها في الآونه الأخيره للأسباب الذي ذكرتها
فو الله بالنسبة لي أفضل إني أقول في وصفها التالي " ما عرفت له لون - لونه مغلطاني - إن قلت حمر فلا هو بحمر وإن قلت أدهم فلا هو بأدهم وإن قلت خضر فلا هو بخضر "
هذا الرد أفضل بكثير من إني أبتدع ألوان من راسي على قولة حمر أدهم ولا حمر مجاهيم
تقبل تحياتي وتقديري

[المزروعي]

الله يحييك يا الطيب

كلمت وكري حر وافي غير عن كلمة وكري حر أصيل ! يطلق على وكري الحرار الوافي إذا كان مقاسه 17 في 17 لأن أغلب وكري الحرار قياسها 16.5 في 16.5 وكلمة وافي ليس معناها أنه أصيل !! فمهما كان قياس وكري الحرار كبير لا يطلق عليه أصيل وإنما يطلق عليه وافي فقط .

أما وصف الالوان فحدث و لا حرج !! والله أنه قليل من الناس إللي يعطيك وصف الطير الصحيح إذا أراد البيع . اللحين الاخضر يقال عنه أدهم و الاحمر يقال عنه أشقر. الله المستعان


أخوك المزروعي

[ربع خالي]

السلام عليكم ورحمةالله وبركاته...
اليوم اصبحت كلمة صغار تشمل صقارت الطير وترويضه والمعرفه التامه بأنواع الصقور وهذا من وجهت
نظري خطأ,,,,
الصقار من روّض الطير وعلمه الصيد على الانواع اللي يبي يصيدهن الصقار .. هذا يطبق عليه كلمة صقار بغض النظر عن معرفته بأنواع الصقور ...
والدليل على كلامي بأن بعض اصحاب محلات بيع الصقور تجده يعرف اغلب انواع الصقور لدرجة ان الصقار مايعرف بعضها ولكن اذا سألت صاحب المحل اذا في يوم صقرله طير وهده على قنيصه فالجواب يكون لا ...
فكيف نطلق اسم صقار على صاحب المحل مع انه يعرف اغلب اذا ماكان جميع انواع الصقور ...
اما اللي يعرف انواع الصقور هذا نسميه صاحب الخبره في انواع واصناف الصقور ....
وإذا إجتمعت معرفت صقارت الطيور مع معرفت انواعهن عند الشخص فهذا نسميه الشايب والكلمه هذي تتداول في مجلس الصقاقير وان سأل شخص عن حاجه تخص الصقور ولا احد عرفها فيقولون له اسأل الشايب ابو فلان وهذى دليل على ان اكتسابه للخبره ما اجت بين يوم وليله ......
اما في مايخص مسميات صقور الصيد , فالمسميات عندنا حنا اهل الامارات هي ::::
الشواهين : شاهين ,,, خميسي ,,, تبع شواهين ...
الحرار: حر بجميع الوانه ومواكره ..
الوكارا : وكري والاغلب يكون لونه ادهم او خضر ,, اما الوكيري وهذا يطلق عليه هالاسم لصغر حجمه وهو محقور عندنا في الامارات ولا نشتريه الا لعيالنا يتعلموا فيه الصقاره ,,, وكري حرار ويجيك لونه يا ادهم او حمر وفيه دق خفيف على الظهر(ويلي عليه) وهذا قريب للحر ولا يختلف عن الحر الا بالمدامع لأن الحر ماله مدامع وكبرالكاشح والخنصر (يكون الكاشح اطول من كاشح الحر ومحفور في باطن الكاشح أما الحر لايوجد فيه هالحفر ويكون طبعا كاشحه صغير ,, ونادر مايبور هالنوع ...
القراميش : قرموشه ,,, و قرموشة حرار ويكون حجمها اكبر من القرموشه العاديه ....
وهذي المعلومات اللي اكتسبتها بعد هالسنين في الصفاره من شيبان بعضهم حي يرزق وبعضم من توفاه الله ....
اما الالوان فاليوم اصبحنا نسمع تصنيف الوان مامرت علينا ,,
وعساني مانسيت شي ....
تقبلوا مروري
تحياتي