هذا ما رأيته في رأس بريموس الهندي ومنعني عن شراءه.

[رفيع المقام]

السلام عليكم ورحمة الله وبركاته


وأسعد الله أوقاتكم




أردت شراء رأس للدافور ومن خلال مشاهدتي لبعض المواضيع رأيت أن البعض يمدح في بريموس الهندي


طبعاً عينه صحيح أنها أكبر وشعلته طويلة لكن هناك سبب أوقفني عن شراءه الا وهو مفتاح الراس


(اللي يقصر ويطول في الشعلة من البلاستيك) وش الحل؟؟


وعلى حد علمي أرى أنه هذا عيب ومع مرور الزمن سيتأثر ويموع..
................



رأس بريموس السويدي غالي ومبالغ فيه


الايطالي جيد ومفتاحه حديد


الصيني جيد ومفتاحه حديد وهذا اللي شريته بــ18 ريال زي الحلاوة شعلته ما شاء الله توصل السقف:eek:


هذه تجربتي أنا وودي نشوف تجاربكم كي نفيد ونستفيد..


وجزاكم الله خيراً


أخوكم



رفيع المقام

[zedan2001]

وعليكم السلام ورحمة الله وبركاته

هلا بالغالي رفيع المقام

اتفق معك يالذيب ..

أنا عندي الراس الهندي وكنت أطبخ وحاط ذراية وفعلا كان المفتاح البلاستيك ساخن شوي

مع ان فيه مسافة بين الدافور والذراية ..

بس بصراحة يا عليه شعلة تطبخ الهرش من الفيلة

[رفيع المقام]

ههه


الشعلة وانا اخوك مابه شي لكن المشكلة اذا ماع المفتاح وش بتسوي تجدع الراس كله
والا تستخدم مفتاح او مفك في رفع وتقصير النار(هنا يبدأ شغل الخنبقة):d
صراحة هذا اللي قاهرني في الهندي والاهو في شعلته ما عليه كلام..
على قولك تطبخ الهرش..هههه :d

[zedan2001]

ههه


الشعلة وانا اخوك مابه شي لكن المشكلة اذا ماع المفتاح وش بتسوي تجدع الراس كله
والا تستخدم مفتاح او مفك في رفع وتقصير النار(هنا يبدأ شغل الخنبقة):d ..


صراحة هذا اللي قاهرني في الهندي والاهو في شعلته ما عليه كلام..
على قولك تطبخ الهرش..هههه



طيب ما فيه حل لتغيير قطعة البلاستيك لحديد..

اما تغيير عادي أو ترهيم

هالشعلة وأنا أخوك حسوفة

[رفيع المقام]

والله من جد حسوفة

لكن بنشوف اخوانا المكشاتية، بيجونك بالحلول المناسبة وماهم مقصرين ان شاء الله.
....

وفق الله الجميع

[قناص خلاوي]

اخوي الراس الهندي استعمله من سنين ونطبخ فيه طبخ القدرة وعلى أعلى شي ولا تضررت البلاستيكة اللي تقول
لكن ابعد الذرى شوي عن الدافور
وتقدر تفك البلاستيكة لو تبي وتلحم بدالها حديدة
لكن حط ببالك الحديدة لو احترت تبي تبلش بها بعكس البلاستيكة

أما الصيني وجماعتة فعزل الله ما يطربك بالطبخ إذا جاء اللزوم

[لاتكب البيالة]

السلام عليكم

صراحة اوافقكم الراي ان الهندي احسن من السويدي والايطالي من ناحية الشعلة
لكن من تجربتي الراس الصيني اللي بالرابط احسن مهن وارخصهن
http://www.mekshat.com/vb/showthread.php?t=197620
طبعا كلهن مفاتيحهن بلاستيك واذا ماعت البلاستيك ما عليك الا تحم مكانه قطعة حديد كبر راس الاصبع عند اي محل تبريد
ولكن وش اللي يموع البلاستيك ما اتوقع تجيه اك الحرارة اللي تسبب تمويعه خلوا الذراية وسيعة شوي لتمرير الهواء ولا اهنا خلاف

[سرهيد]

السلام عليكم

هلا باخوي الكريم

شف طال عمرك

هناك فرق ما بين الرأس اللي هو الشربوش وبين المحبس

فالمحبس يأتي لحاله والشربوش لحاله

وبامكان الشخص ان يضع اي شربوش

شف طال عمرك انا من اشتخدامي الطويل للبريموس كنت ارتاح معه كثيرا لان الوصلة البلاستيك اولا نادرا ان تخرب لبعد المسافة وثانيا هي آمن بالنسبة لليد

فاللممسك البلاسيتك اريح لليد من المعدن اللي يجي حار ويؤثر على يدك مع ان اغلب الموجود للمسك الحديد يكون قصير .

وعلى العموم هناك حال مع الحامل اللي عند البرية واللي يعزل الحرارة نهائيا عن الدبة والمحبس وهذا يكون أأمن لك

مجرد رأي قابل للرد

تقبل احترامي

برغم استخدامي الطويل

[zedan2001]

السلام عليكم

هلا باخوي الكريم

شف طال عمرك

هناك فرق ما بين الرأس اللي هو الشربوش وبين المحبس

فالمحبس يأتي لحاله والشربوش لحاله

وبامكان الشخص ان يضع اي شربوش

شف طال عمرك انا من اشتخدامي الطويل للبريموس كنت ارتاح معه كثيرا لان الوصلة البلاستيك اولا نادرا ان تخرب لبعد المسافة وثانيا هي آمن بالنسبة لليد

فاللممسك البلاسيتك اريح لليد من المعدن اللي يجي حار ويؤثر على يدك مع ان اغلب الموجود للمسك الحديد يكون قصير .

وعلى العموم هناك حال مع الحامل اللي عند البرية واللي يعزل الحرارة نهائيا عن الدبة والمحبس وهذا يكون أأمن لك

مجرد رأي قابل للرد

تقبل احترامي

برغم استخدامي الطويل


حياك الكريم يا أبوعبدالله

بس تكفى شف لنا حل غير البرية

[يحيي بن حمد]

فك البلاستيك والحم مكانها حديده

[سطام vip]

اخوي ما يميعها الا الاستخدام الخاطى للذرايه

وهذي مشكلتنا تكتم الدافور بالذرايه وتميع اليد وثاني شي خطر كبير

على مستخدميه يمكن ينفجر الدافور بكبره اهم شي وسع الذرايه ولا عليك

والحل مثل ما قالوا الاخوان مالك الا تلحم قطعه حديد

والله يسهل أمرك

دمت بحفظ المولى

[منــاكد]

يا اخوان انا قبل فتره حصلت بريموس سويدي أصلي مع قداحه وبدون قداحه...

أخذت ابو قداحه بـ 90 ريال...
وبدون قداحه عنده بـ 70 ريال...

فهل هذه أسعاره بالسوق...

وتقبلوا احلى تحيه...

.

[aljde40]

يا اخوان انا قبل فتره حصلت بريموس سويدي أصلي مع قداحه وبدون قداحه...



أخذت ابو قداحه بـ 90 ريال...
وبدون قداحه عنده بـ 70 ريال...


فهل هذه أسعاره بالسوق...


وتقبلوا احلى تحيه...

.
أخوي كابتن جربوع السلام عليكم وبعد : الله لايهينك لك رسالة مني على الخاص .

[ولد وايل]

البلاستيكه مقاااااااومه للحراااااااره يا الغالي

[رفيع المقام]

أخي ولد وايل


إذا كانت مقاومة للحرارة؟؟
وأنها لا تتأثر بالنار؟؟



فهل جربت ذلك.
عشان نكون على بينة
الله يعافيك

[ابوفهد 1]

يا اخوان انا قبل فتره حصلت بريموس سويدي أصلي مع قداحه وبدون قداحه...



أخذت ابو قداحه بـ 90 ريال...
وبدون قداحه عنده بـ 70 ريال...


فهل هذه أسعاره بالسوق...


وتقبلوا احلى تحيه...

.



أخي كابتن جربوع


يليت تذكر لنا من أي محل شريت راس بريموس سويدي...


تحيـــــــــاتي

[منــاكد]

أخي كابتن جربوع




يليت تذكر لنا من أي محل شريت راس بريموس سويدي...




تحيـــــــــاتي



أخ ابو فهد...

للأسف انه طلع هندي لأنني رجعت للمحل وقال لي صاحب المحل انه هندي ولايوجد عنده سويدي...
لكن العمال يفتكرونه سويدي...

تحياتي...

.

[الحر 911]

بما اني مجرب الراس الهندي اكثر من كم سنه .. ونصيحتي طلع البلاستيكه وركب بدالها حديده .. او لحم محلها مسمار يكون زي الصليب وانشاء الله ماتندم ابد مجربها اكثر من سنه وماتغير ابد