امير يتخلص من أمير .. والسبب مخرج!

[حفرلوجيا]

سلام يالربع
صديق عزيز , وشخص آخر تنبل , مع كم واحد مثله تذكرتهم اليوم بعد أن قرأت خبرا آو تصريحا لمخرج افلام مشهور ( الله يكرمكم ).:mad:

أبدا بالتنبل وهو صديق من شلة الكشتات( سابقا ), إذا جاء ذكره وهو غايب يتبادر على الذهن ( عدة السيارة ) اللي فيها مفتاح عجل وزرادية , وبعض المرات (سكروب منعفط ومنكسر نصابه او قطعة البلاستيك الصفراء ) , وكل مرة تفكر تتخلص منه تنسى أو ( تهون ) ويستمر متربع مع ( الشقردية : اللي هم مفتاح العجل والزرادية ) ..
هذا الصديق أشبهه على السكروب المنعفط ( ماله داعي ) :), والغريب إنه القاسم المشترك في كشتات الشلة ولم يسبق أن تخلف , وأظن لأنه عارف ربعه مخلينه ( محفول مكفول ) أكلف ماعليه يرمي فراشه بأحد السيارات , حتى سيارته كابرس من الأولات مايتعدى أطراف الديرة. يعني ماهو خسران = شلة يكشتون به يوسع صدره ويضيق صدورهم ! :confused: لا .. ويكملها ببرودة هي ( غلاق الحمل ) فمثلا إذا احتمى الوطيس حول سالفة أو مشكلة ( انعفط ) له بزاوية , ولو سألوه : وش رايك ؟ رد ببرود مع ( فغرة بلهاء ) : وشو عنه تتكلمون ؟ :mad:ودايما هو آخر من يصحي وأحيانا يصلي الفجر مع طلعة الشمس ( الضغط H ).

على النقيض منه صديق آخر شقردي ( وحار ) وباستمرار يفكر بغيره وإذا بدأنا نتجهز لرحلة يحب يتدخل بكل شيء , ويزعل لو فكرنا نستغني عن أدواته الخاصة ( من السيارة للخيمة للقارمن لجراكل الماء ... وامسك خط لكل التجهيزات ) . لكن فيه عيب إنه يحب ( الإماره ) ويحرص على أن يكون مستشار , ولازم ( يبزع ) باتجاه معاكس , فمثلا لو بقى ( فضلة ) نظيفة من غداء المكشات واجتهدنا نعطيه راعي غنم حولنا , قال : ليش ماكبيتوه للطيور تراها أولى , الراعي تصدقوا عليه بفلوس ! .. ولو بكشتة ثانية كبينا ( الفضلة ) للطيور قال : يافسقانين هالأدمي ( يقصد الراعي ) اللي جنبنا أولى ! جيدين بس بالدراهم ! تلقون هالمسكين له شهر ماذاق الدسم ؟! :eek:.. ولو ذكرته أو ( نقزته ) وقلت : غريبة هذا عكس كلامك بمكشاتنا الأول ؟! .. يرد ( بعصبية ) : هذيك ظروف مختلفة ! ..
وهنا وقف لاتحارشه ( وتختلف ) عليك أنت الأمور !
--- لكن إلى اللحين وش علاقة كل هالكلام بالمخرج ؟
................ أرد

[راع الكحيلة]

رد
وعجل بالرد
وحنا بانتظارك يالغالي

[حد السيف]

ابو سليمان
مساك الله بالخير
عجل تكفى go to:D :D :D

محبك اخيك
حد السيف

[أبو تركي القطامي]

الله يجزاك خير يا حفرلوجيا
من السرد الراقي والأسلوب المتميز نسيت سالفة المخرج:D
ومثل ماقال أخوي راعي الكحيلة عجل بالرد وحنا بانتظارك يالغالي

[تالي الاولين*]

.


هلا ابو سليمان

من طول الغيبات

حنا في انتظار الرد


.

[حفرلوجيا]

اخوي الريس راع الكحيلة : ابشر .
أخوي حد السيف :هلا بالزميل أبشر يا( زميل ).
أخوي أبوهناالقطامي : تامر , والله طاري هالمخرج مايناسب مجلسكم يالمكشاتيين لكنها ( في نفسي ).
اخوي تالي الاولين* : والله الغنايم مع المكشاتيين , وسالفتنا اليوم عن واحد :
من الناس ثور ادرع معمعم .............. رد البهيمة لاتروح البهيمة
--------------
في يوم كنت مع الأمير الحار بسيارته متجهين لمكان التجمع للكشتة , سألني : من هو أمير كشتتنا ؟ ! استغربت : هذي مايبي لها كلام , مافيه أوفق من ( سموكم ) طال عمرك !
قال : لا أنا ودي يكون أميرنا ( التنبل ) يقصد ( المنعفط ) ويقول : إني ناوي ( أفكه ) من كشتاتنا! بس أنت وافق ! , الحقيقة كان لي ( كل ) الخاطر .

وفي مكان الإجتماع ( وهق ) الحار التنبل وعلمه أن الشلة اتفقوا على أن الأمير يكون بالتداول , والمرة ذي القرعة عليك . ( على جنب ياراعي الكابرس ) :flog:

الضعيف حمر وصفر ( وتعفط ) وجهه :good: وأبدى رغبته بالتنازل الذي كان مرفوضا من الشلة , وهقوتي لو ماهو متحسف ( بالقطة ) كان فرك له !:good2: .. لانه بإختصار ( ثور الله ببرسيمه ). ماادري كيف دبر أموره ليلة عرسه !:cool:

اللي صار باختصار ان ( الحار ) مارس أنواع الإذلال والتعقيد . مرة وحنا نمشي بالسيارة يطفي القارمن ويقول يالله يالأمير دلنا . . ومرة يخرب الكينوود ويقول : صلحه ! ومره بالليل يولع نار براس الحزم ويقول ترى هذولا أهل بسم الله ( جنون ) أقرأ يااميرنا علينا الورد والذكر نبي نرد وراك .. ومره يساله وين الجدي يالأمير ترانا مختلفين أيهن اللي يدل على الشمال هو وإلا ( العنز ) . طبعا المعنى (بتيس الشاعر ) :D. ومرة يقول لازم الأمير يكون صاحي قبل الشلة يأذن لصلاة الفجر ويكون جهز القهوة . ومرة يطلع يعوي مثل الذيب ويقول : ترى ذي ( قرطة ) تدور ( اللي بين رجلين الأمير ) :good:

وعلى هالحالة عد وأغلط من هالأمور اللي تخلي ( الأمير المنعفط ) يروح لشهار لو فكر يكشت مع الشلة مرة ثانية .. والحقيقة ان ذيك الكشتة كانت ( نهاية رجل منعفط ) > يصلح عنوان فلم .

أيه .. نجي للفلم والمخرج اللي خلاني أتذكر السالفة , إذ بعد أن قرأت اليوم تصريحا للمخرج – أكرمكم الله – يوسف شاهين السينمائي اللي عمره ( 78 ) سنة , تمنيت الأمير الحار يستلمه بمكشات يخليه على قولة المصريين يروح ( للسرايا الصفراء = يقصدون مستشفى شهار حقهم ). لكن الأكيد ان اللي بمستشفيات المجانين أعقل منه . كلام يكدر لكن الشكوى لله .
طالعوا الخبر : يوسف شاهين يتحدث بإسفاف عن التدين والحجاب (http://www.al-jazirah.com.sa/147063/ms7d.htm)
يقول هالشايب العايب وهو يقيم بالقاهرة إنه :

( يشعر بالغضب الشديد عندما يعلو صوت أذان الصلاة عبر مكبرات الصوت في مساجد القاهرة ليقطع عليه حديثه مع الآخرين.ويقول: سأشتري مكبرا للصوت أكثر قوة لبث موسيقى أمريكية بصوت عال جدا، أعلى من صوت المؤذن ) . انتهى ( تخريفه )

أتوقع البوذي وأي وثني سيحترم المشاعر ولن يقول مثل هذا الكلام . لاحول ولا قوة إلا بالله ..
ليا ( .......... ).
وسلامتكم , الله لايسلم ( العدو ).

[عاشق الصفاري]

سرد رائع ..
ننتضر البقية

[راعي الطويلة]

من ؟؟؟

أستاذ حفرلوحيا هلا والله وغلا .. يامرحبا وسهلا بك وبعودتك الغالية ...

هالحين توا ما أستوت وحلا المنتدى ولا يهونون الشباب .. كلً بأسمه ..

منتظركم

راعي الطويلة

[أبو تركي القطامي]

أخوي القدير
حفرلوجيا
بارك الله فيك ومشكور على الموضوع الراقي
وسلملي على المنعفط والحار:D

والفاجر المخرج لا هو ولا غيره يسكت نداء الحق والحمدلله
أخوك القطامي

[راع الكحيلة]

يا والله الشايب العايب الخايب جعله تحت الارض غايب ولا فوقه شي من النصايب
هاللي قوله كله مصايب ولا تجرأ يقوله حتى الاجنبي لباس الصلايب..

[مهيلان]

حفرلوجيا سلام عليكم
يا صبر اخوياك عليك . ابسألك : هل قلت لهم انك تكتب فيهم ؟؟؟

اتوقع انك تكتب عن نفسك واعرف ذلك من بعض الشخصيات اللي ذكرتها طبعا غير المخرج الله يكرمك


سلام عليكم

[تالي الاولين*]

.


سرد متميز اشتقنا له

وبالنسبة للمخرج الذي اتقن وصفه اخي راعي الكحيلة

حين قال ((( يا والله الشايب العايب الخايب جعله تحت الارض

غايب ولا فوقه شي من النصايب ...... )))


فهو مصيبه والاعظم مصيبه اني سمعت من احد ابناء

هذا البلد ادعائه ان اذان الفجر يزعج عياله ويروعهم

وكان يطالب المؤذن في الحارة انه يغير توجيه المكرفونات

بس شياب الحارة يعجبونك طردوه من بيته الى كان مستأجره

يوم سمعو كلامة ..


تحياتي

.

[الجوني]

أخوي ابو سليمان :/

يالله حية ... هذا اولا

اما ثانيا ... فالهمخرج السخيف قرأت كلامه ومن كلامه يدل على انه بوذي ومسيخي وكل شي ... إلى اي حد يصل اليه هذا السخيف في قولة ..؟؟ والله عجيب


والصراحة شوية مستشفى المجانين حقهم (( يسمى عندهم العباااااسية )) هذا كفوة يسوون به مثل ماسوو بالامريكان بالفلوجة

[خشم الحصان]

الاخ الغالي
ابو سليمان(حفرلوجيا)
السلام عليكم
هذي ياخيي يبيلها جلسه وشاهي ثقيل بدون حلي وعاقد كنه نظرات لحام حديد
اخوك
خشم الحصان

[رعد الجنوب]

السلام عليكم ورحمة الله وبركاته

ابوسليمان
هلابك والف هلا ومرحبا
افتقدناك طولت الغيبه افتقدنا اسلوبك الجميل افتقدنا مشاكساتك الجميله
لكنك رجعت في الوقت المناسب هالوقت المكشاتيين في فراغ هالوقت ماهنا كشتات ولامقانيص

لكن رجعت بهدوء وبدون مقدمات المفروض يابوسليمان يقام لك حفل استقبال لانك تستاهل
كاتب في مستوى ابداعك فعلا يفتقد واتمنى ان تعوضنا عن غيبتك الطويله بمواضيعك وقصصك
الجميله والمثيره.

وكنت اتمنى انك ترفعت ورفعت قدرك وقدرنا عن هذا التافه الشاذ.

تحياتي

[عليان الليل]

تدوير حلو ...
وطلتك احلى..
خل الناس تعرفه على حقيقته .. شايب الشر.

تحياتي..

[(محمد العبري)]

حفر لوجيا يحفظه الله
نفخر في منتدى مكشات بتواجدك انت وأخرون من أمثالك
ونقراء لكم مايسرنا ويبهجنا فلك الشكر والتقدير ولأعضاء هذا المنتدى
عزيزي ((حفرلوجيا )) لاشك أن موضوعك رائع وشيق ومن المواضيع التي هي مثل الفيتامينات
تفيد البدن ولا تسمن يعني موضوعك خفيف على المعده وخالي من الكلسترول
وأنا معجب جداَ بمقالاتك ..............
لكن هالمره عندي استفسار صغير ؟
((وش دخل سالفة ربعك بهالمخرج الداج !!!))
أرجو الربط بين هالسالفتين
يمكن يكون هناك رابط بس سامحني على ثقل فهمي وخذني بحلمك وفهمني
وتمنياتي لك بالتوفيق

[ابو ايمن]

شكرا لك اخي حفر لوجيا على سرد قصص الأمير ( التنبل ) .

وأشكاله في المكاشيت واجد . ومالك إلا تروح مع واحد منهم علشان تكتشف إن كلامه في المكاتب والاستراحات غير الرحلات وتطلع في السفرات الصدقيات .

لكن مع هذا أخوي . وش علاقة الموضوع هذا بالمخرج الفاشل الساقط ؟؟؟؟؟؟؟

يعني شتان بين الموضوعين ؟؟؟؟

تحياتــــــي .

[* ضب *]

اخوي حفر لوجيا
الا على الطاري وش يصير لك هذرلوجيا
7
7
موضوع شيق وكأنك تتحدث عن اعضاء الكشتات
فمنهم مفك العجل ومنهم الزرادية ومنهم السكروب ابو وجهين
ومنهم ابو جلمبو اللى يفك كل شي ومنهم كسرة لوح وخذ وخل

7
7
لكن المهرج يوسف شاهين هذا نصراني ابن كلب
وما يستاهل من يشيل همة لا هو ولا كلامة


77
اخيراً تحياتي وتقدير لك وللجميع

[المسفهل]

يوسف شاهين، مخرج نصراني لا يهمنا ..
ولكن الذي يهمنا هو أبو سليمان وهذا الأسلوب الرائع
والحديث الذي لا يمل يجمع فيه يبن السخرية للاذعة
والتوجيه البناء والنقد الهادف والعبارات التي لاتستخرج
مكنوناتها إلا بالغوص العميق لاستجلاب لآلئ أبي سليمان
وما ذاك إلا لحترامه لقرائه وظنه الجميل باستطاعتهم
على الفهم والإدراك ... كلنا ننتظر وجباتك اللذيذة التي تغذي
بها عقولنا وتهذب من خلالها أخلاقنا وتمتع بأطايبها نفوسنا .

[السمح]

تسلم يابوسليمان على هذا الموضوع الذي في ظاهره تعرية لمخرج نصراني
يعني وش متوقعين من أمثاله
قلت في ظاهره لأني أرى أن الهدف هو في المقدمة التي سبقت خبر المخرج
نعم الأمراء هو الهدف ياجماعة من الموضوع وليس المخرج
هو رأي شخصي على كل حال ، وهذي ميزة الكتابة الرمزية
ولن يفصح عن الهدف الأساسي إلا صاحب الموضوع نفسه ;)
لك كل الشكر ياكاتبنا ومؤلفنا الرائع

أحلى تحية

[((( الحر)))]

اخي حفرلوجيا عوداً حميداً...!!!

بارك الله فيك اخي ابوسليمان ... ومثل ماقال اخوي ابو تركي - هذي ميزة الكتابة الرمزيه ولن يفصح عن الهدف الاساسي الا صاحب الموضوع - ...!!!

واعتقد ان الهدف تعرية هذا الخبيث وتبصيرالقراء بحقد الخبيث على الاسلام واهله...!!!


مشكور اخوي ابو سليمان وننتظر منك عقود الدرر القادمه...!!!

تحياتي..........اخوك.........((( الحر)))............ابومحمد...!!!

[المربد]

وانا اتصفح الردود لقيت صورة الشيخ احمد ياسين بتوقيع اخونا (مهيلان).

قلت الله اكبر

تموت الاسد في الغابات جوعا ... ولحم الضأن يرمى للكلاب.

تسلم اخوي على هالموضوع الشيق.

[ميراج]

اخوى ابو سليمان السلام عليكم يا مرحبا ويا مسهلا

ياقل الكشته اللى عددهم اكثر من خمسه ويخلون من السكروب المنعفوط مكسور نصابه ودك تلوحه كل

ما فتحت العده وتقول بعدين ولاكن يعوضك فيه كحيلان ابو جلنبو ومفتاح العجل

أمتعتنا بأسلوبك وسردك المميز

[تواق]

ياشباب المروح مروح اعزالله مجلسكم من ذكر اسمه والله ثم والله مايعين خير جزاء تصريحه
هذا السافل والوضيع لان الشعب المصري غيور جدا راح فيه وتشوفون يجيكم خبره


ولاذان قائم الى يوم القيامه والى ان يرث الله الارض وما عليها يكفي الصوت ترتاح له نفسك لانها
طيبه


اخوكم / تواق

[عليم العطش]

السلام عليكم ورحمة الله وبركاته
الله يعافيك يالهزلاج على السرد الجميل والتصوير الاجمل0
اما النصراني قاتله الله معطينه اخوانا المصريين اكثر من اللازم عليه من الله مايستحق
اسمه الحقيقي(جوزيف شاين) وافعاله كلها شينه حتى المتدينين من النصارى يرفضونها
تحياتي:)

[الضاري]

ياهلا بحفرلوجيا..

الحمدلله على السلامه

ياشين يا توهقت بأحد منعفط مثل ما قلت ... والمشكلة اذا كانت الرحلة طويلة.

[الهلالي]

مبدعنا أبو سليمان
السلام عليكم ورحمة الله وبركاته
أيه الله يحييك لا تخلينا.... كل ما هذا طل علينا .... ولا هنا هاك المسافة .
أما بخصوص هذا المسخ التافه فهو أقل من أن يرد عليه . ونعلم جميعاً أن غيرتك على الدين هي السبب الذي جعلك تورد الخبر . جزاك الله خير الجزاء ولك تحياتي .


التوقيع / مفك صالب :D :D

[هواوي]

الرائع حفرلوجيا

رائع كالعاده ولو ان هذا الموضوع رفع ضغطي مليون وكل الي اقوله لعنه الله من هم على شاكلته هذ المصري

الله يا زين من فكه في الربع الخالي لا انيس ولا ونيس ولا شي الا صوت اذان فقط والله يا شيخ ان يرجع القاهره ويكتب ان اجمل صوت هو صوت الاذان

لكن الحمد لله ان هذه هي العينات هي التى تحارب الاسلام واهله

عموما موضوع رائع جدا