كيف نعلم الطير التفريع والطلع؟

[العرق]

السلام عليكم ورحمة الله وبركاته
كيف حالك أخي المري ولا يهونون الاخرين ومشكورين على هذا المنتدى الطيب والمفيد لكل محبى هذه
الهوايه
وعندى سؤال ارجوا الاجابه عليه مع الشكر للجميع وهو كيف نستطيع تعليم الطير التفريع و الطلع ؟

[نشوان]

التفريع بالطير( تكشف برقعوه بالسيارة ) يشترط ان الطير راكد وهذا عند المشترى لان الكفاخ ما احد يبي شوفوه.
ومن ناحية الطلع تعلفوه على التكاية وتمرحوه علية , واليوم الثاني تفرع بالطير ويشوف العلف خرج السيارة وتخلي العلف من يم نافذة الراكب لجل يطلع معه وبعد ما تكرر هالعملية, انتف لك حمامة وخلة تدرج على ماقال يبي يشوفه الطير ويطلع عليه انشاءالله وبعدة حمامة سلم وبعدة ان حصلك من بعض معارفك الصقاقير حبارى حيه خلوه يطلع عليه طلع وهو على التكاية والله كريم.

وتلقى عند اهل الخبرة أكثر وافيد وفيهم الخير والبركة
وشكرا

[العرق]

شكراً لك اخي نشوان على هذا التوضيح المفيد وهذا التواضع والله لا يهينك وارجو المعذره للتأخير وهذه ابيات متواضعه لك وللاخوان المشاركين

وجدي على منوة كثير الصقاقير قرناس بيت وفيه نسبه وحاشه
سو على شرد الحباري المعاشير والى طرد مع راعىالصنف شاشه
واطرب الى خاليت كنها عصافير يلحق وهى فى الجو كنها فراشه
هذا غرامي يالقروم المناعير ماهو بجير فيه نسبه خباشه


مع العذر لعشاق الجيره الطيبه الي فعلها طيب
ولا هي تردى فيهم بعض المرات خصوصا اذا فيه
بينهم وبينهم تحدي ومزاود في الافعال فهذه
النوعيه نادره وتستثنا ولا يشملهاالبيت الاخير


والسلام عليكمورحمة الله وبركاته

[المري]

مرحبا اخوي العــرق


والحمد لله ماقصر اخوي نشوان اجابك ووفى..


وتسلم على ردك اخوي العرق وخاصة ذا الابيات الزينة اللي تنومس راعيها..



وجدي على منوة كثير الصقاقير= قرناس بيت وفيه نسبه وحاشه
سو على شرد الحباري المعاشير= والى طرد مع راعىالصنف شاشه
واطرب الى خاليت كنها عصافير= يلحق وهى فى الجو كنها فراشه
هذا غرامي يالقروم المناعير= ماهو بجير فيه نسبه خباشه