أتدرون ليش أهل الرس مشهورين بالحبحر ...؟؟؟

[سماوي]

بسم الله الرحمن الرحيم
السلام عليكم ورحمة الله وبركاته
علشان مايزعلون أهل الرس ... تراي منهم أصل وفصل ...

وصراحة دايم الناس يقولون أهل الرس هم أهل الحبحر ... وصراحة ما أدري وشو السبب ...

ومرّة كنت جالس مع فرّاش مدرستنا .. وقعدنا نسولف أنا وإياه ...
ومع السواليف قلت له يا أبو عبد الله وشّي اللعاعة ....؟؟؟
قال يا أبومحمد هاذي منطقة غرب عن سواج أرض فيها هضاب وشعبان وشغيّات وجديبة و...
بس ليش تسأل ؟؟
قلت أنا : يمدحون الضب اللي فيها ...
فقال : إيو الله إنك صاج ( يعني صادق ، وليس صاج معدن ) :D :D
... الضب بهالأرض ياكل حمض ورمث وياكل من العشب اللي موجود طول السنة ، ومثل ما إن الرْجَال تختلف .. فالأراضي تختلف بعد ...
فقلت له : والله إنك كلامك صحيح ...
أنا أكلت ضب اللعاعة .... وأكلت ضبّ الصمّان ... والله الفرق بينهن واضح بالحيل ...

قال إيه .. ضب اللعاعة مثل ( حبحر الرس )

فبغيت أقوم أضربه .. أحسبه يسبّني ..:mad: :mad:

فقلت له وشلون ..؟؟
قال : الرس فيه حبحر ما يخْبَرْ ... والله إن له طعم بالراس وريحته تنعش القلب ،،،
( قصدي البطن واللغابيب )... :p :p
ماهو مثل طعم حبحر الأراضي اللي غيره ...
وإن الناس إلى جو للسوق إلى دوّروا حبحر مايدوّرون إلا حبحر الرس ...

وبعدين عرفت ليش الناس ينادوننا بأهل الحبحر ....!؟!!؟!؟!؟
وأنا منذ مبطي وأنا أحسب إن الدعوى ( معيارة ) ومذمّة .... وأثره ممدحة :good: :good:

فوش رايكم يا أهل مكشات وخاصّة أهل الرس عن هالمعلومة ... هل هي صحيحة أم لا ...؟؟؟

والله يرعاكم

[الضاري]

والله ياهي مدحة..:D

بعض الأماكن أو البلاد تشتهر بحاجة تميزها عن غيرها..

أضرب لك مثل ..

مثل ( نعناع عقدة ).. عقدة هذي تقع غرب حائل داخل ضلع أجا .. وفيها نعناع .. ياسلام..

رائحة .. وطعم ..:good:

تحياتي أخي السماوي

[خشم الحصان]

الاخ الغالي
سماوي
السلام عليكم
وش دعوا حبحر الرس الوحيد يمدح انت فكر بعد اكله ولا لا:D الله ياهو يجيلها صولات وجولات :(
مشكور يابعدهم
اخوك
خشم الحصان;) :eek: :confused: :(

[* ضب *]

اجل انتم اهل الحبحر:D

الله يغربل بليسك .. حبحر!!!! ...
ينعش اللغابيب .. ويغثك
تحالا لمدخاله ويعذبك مخراجه

انت تعرف ليش الهند مشهورين في عمليات البواسير؟؟؟؟ .. الله يستر لاتنافسونهم

لكن انت تسوي دعاية
وشكلك ناوي تصفط الهايلكس جمب (الجموس ..نعناع المدينة) وتحط لوحة (حبحر الرس)

انا اقول الله يرزق

لكن اقول لزبائن المثل
من كل ابرة (....)* هيب*



(....)* = طلع
هيب = اداة الحفر = العتلة

7
7
7

لكن تبي العلم

خل عنك .. الحبحر هو عنبر الزاد


تحياتي لك

[المترو]

فعلا الحبحر الرساوي له طعم ويشتهرون اهل الرس بأكلاتهم الحاره ويفضلونه علوب او مطبوخ مع الاكل لكن كل ديره لها مثلا اهل عنيزه بالكراث وحبهم له مع الاكل وبالجلسات مثل الفصفص (وان كان قل هذا الموضوع بوقتنا الحاضر )
واهل البكريه بالقرع
واهل البدائع بالحبحب
وهكذا يعني ترى الموضوع ماهو بس لاهل الرس وحبحرهم الحار حتى الهنود مثلهم ؟؟؟؟؟؟
وسلامتكم من الحبحر الرساوي

[ذيب مجيرة]

الله يهديك
كان الناس ما مدحوووكم الا بالحبحر فزالله ما مدحتو يا اهل الرس

ان كان مدحي لك على شان هاذي= فالشاهد الله ما مدحناك يا فلان

مغير امزح يا راعي الرس
اويلاه ابو علي

اخوك ذيب مجيرة
طريق دخنة
امتداد طريق القرين

[ابو شكاع]

هلاهلا

يالله حيوه

اسمع وانا اخوك ..................... الرس على قولتك اشتهر بالحبحر

ومنول الناس مايعرفون الحبحر الا عندنا ............. عاد هالكلام مبطي يوم كانت عمارة المملكة طين مهوب مثل هالحين قزاز وحركات

وترى هالهرج بعدي مبطي يوم النت هكالوقت عادي مهوب ملون

تصدق شي عاد .......... انا اروح لم زكرت بالقصيم اقصد بعنيزة تربطني بهم قرابة ..... اشوف حرصهم على الحبحر اكثر من حرصنا عليه

بس عاد الناس تعارفت علي شي وخلاص يستمر

للمعلومية انا من المقلين لأكل الحبحر ....... لكن لي كم سنه وانا بادين يجوز لي

قبل كم سنه كنا في المخيم ........ المهم كنت جالس وكان علي وقت الغداء

جاء واحد من الشباب وقال ذق هالسلطة وش زينه ...... وهو اللي يحط اللقمة بفمي بالملعقة

السلطة كانت عبارة عن طماط وبصل ....هذا اللي مفروض

لكن اللي حاصل هو 1- حوض حبحر 2- طماطة3- بصله

ولاهوب اي حبحر .......... الا نار الله الموقدة

انا على طول تغير وجهي لون جديد للحين ما شفت مثله .........
اما اذاني فذابن على طول ......... وصارن تحت مستواهن الطبيعي ........ اعرف اني ردفتهن بعود نقاشة لأني صرت ما اسمع زين

هي حرارة ......................... هي لهدة .............. ما صارت ولا استوت

حواجي حتن (اي تساقط شعرهن) وايضا جفوني ........... صرت كأني الحكم الإيطالي كولينا

لكن يبقى الحبحر من المشهيات ....... وهذا بلانا :)

تسلم

ولاهنت

[دبكه]

السلام عليكم ورحمة الله وبركاته هذه القصيم لكل وحده منهن شىء تشتهر به..................؟

[ساق الجواء]

في ما أعرف أن أهل القصيم يعيرون أهل الرس بالحبحر لشدة حرارة حبحرهم بسبب طبيعة تربة الرس. وحيث أن أهل الرس شأنهم كبقية أهل نجد كانوا أيام الجوع يبهرون اطعمتهم الرديئة كالذرة والشعير بما ينبت في ارضهم من الحبحر كان أهل القصيم يعانون من شدة حرارة حبحر الرس إذا نزلو ضيوفا عندهم أو صاحبوهم في سفر.

إن أهل الرس لا يمدحون بشدة حرارة حبحرهم ولكن يمازحون بذلك ولا يغضب من ذلك عُقّالهم فليست مذمة بل يغضب من ذلك صبيانهم اثناء المباريات الرياضية.

[منصور]

الله يهديكم جميع كبتوا عشانا من العقله الى الغاط


ان ما عقلتوا نكبت عشاء الجزيره كله:p :) :) :) :)

[الطامي]

الأخوة الأعضاء
ماهو الحبحر

الحقيقه ماأعرفه وابي له صوره ومعلومات عنه
يمكن اسمه عندنا في الشرقيه والجنوبيه غير
تحياتي للجميع

[صقر]

الطامي :


الحبحر هوالفلفل الأخضر

[ابو شكاع]

اخوي الطامي

استلم هالرابط

واول ما تدخل الرابط التفت يسار تبي تلاقي صورة الرمز :D

http://www.thechilli.com/