يااصحاب الخبره هل هذا الكلام معقول [الأرشيف]

الدرب البعيد

20/04/2009, 07:04 PM

بسم الله الرحمن الرحيم

السلام عليكم ورحمة الله وبركاته.

سمعت من بعض الاخوان ان بعض السلقان مدربه وقادره على القفز من السياره وهي تسير بسرعة 40 كليو واكثر
عند سماعها لأمر القفز والانطلاق بالاتجاه الذي يحدده صاحب السلق !!

فإذا كان هذا الكلام معقول ومجرب ياليت يااخون تفيدونا بطريقة هذه التدريبات المهمه جدا جدا والتي تتطلبها رحلات مقناص الارانب في الليل .
لاننا والله اكثر من مره عانينا من المشكله وكم مره يضع علينا الصيد بسبب ان الكلب مايحول والسياره ماشيه . بسرعه معقوله
آخر مره قبل يومين حصلنا ارنب بارض مليانه رمث ومامعنا ( سلاح رش ) طردناها ولكن الارنب صاروخ يادوب السياره تلحقها . وتعرفون طرد الليل اقشر لو هديت او وقفت السياره ضاع الارنب والسلق رافض التحويل من السياره وهي ماشيه , :no:
المهم الشكوى لله نهاية المطارده = السلق ماحول + السياره تكسرت + الارنب مغطت ظهرها وضاعت علينا :mad:

فانتمى من اصحاب الخبره افادتنا عن طريقة هذه التدريبات المهمه وياليت تكون تفصيليه ليستفيد الجميع .

abo fahd 06

20/04/2009, 08:06 PM

اخوي الدرب البيعد انت عودها واجبرها تنزل من السيارة وهي تمشي الين يجزم وسيارة
تمشي ...
الطريقة. انت اركب معها وقل حول واذا ما نزلت افع صوتك واذا ما نزلت اضربها بس اهم شي احرص هلى انك تسويها في ارض ناعمة يعني {رمل} ومع تكرار اعملية يصبح ينزل وما عندة اي مشكلة

الزير الخطير

20/04/2009, 08:09 PM

يسعدني ارد عليك وانا اقول هذا الكلام صحيح 100\100
وانا مجرب انا عندي سلقه تحول من السياره وهي تمشي 40

أبوسعود711

20/04/2009, 10:49 PM

انا عندي سلوقي ينزل من السياره بسرعه 50 الى 60 والطريقه على حسب التدريب لا الظرب مهب حل الحل يا طويل العمر انك تركب معك سلق ينزلن على سرعه 40 وان شاء الله راح تضبط واذا ما نزل حاول بسرعه 20 ومن ثم الى 30 والين يتعود

المسااااافر

20/04/2009, 11:44 PM

هلا بك اخوووي ومعووض خير انشاء الله
ويعتمد النزوول من السياره على حرارة الكلب
انشاء الله اكون افدتك

ابو تمام

21/04/2009, 12:38 AM

هلا بك اخوووي ومعووض خير انشاء الله
ويعتمد النزوول من السياره على حرارة الكلب
انشاء الله اكون افدتك

هذا الكلام الصحيح انا عندي جروه من عمرها 8 شهور اذا شافت الصيده تطلع فوق التنده وتنزل على الكبوت وتطب والسياره تمشي لكن ما ادري كم السرعه

تعتمد على حرارة الكلب

F العتيبي F

21/04/2009, 10:14 AM

ماقصرووا معك الاخوان

شكرا لهم

الصارم1

21/04/2009, 12:29 PM

الكلام هذا صحيح

ومجرب ينزل والسياره 70 - 80

موجود السلوقي عند واحد

السلق عشق

21/04/2009, 04:06 PM

ماقصروا الاخوان معكـ

الدرب البعيد

21/04/2009, 08:32 PM

اشكر جميع من قام بالرد
وفعلا كما قال اخي ابو فهد يحتاج تدرج بالتدريب وليس كما ذكر بعض الاخوان ان ذلك يعتمد على حرارة الكلب .:no2:
والحقيقه هذا التدريب مهم ويحتاج لتمارين شاقه خصوصا اثناء النزول والسياره مسرعه
لان قانون الفيزياء يقول لكل فعل رد فعل مساوٍ له في المقدار ومضاد له في الاتجاه
فلو قام كلب غير مدرب بالقفز من السياره وهي مسرعه بسرعة 70 كلم سوف يسقط عند وصوله للارض ويتدحرج .
اما لو انه مدرب على ذلك القفز فإنه سوف يقفز بنفس الاتجاه ويتحرك مباشره عند وصوله للإرض بسرعة وبذلك يتغلب على القوه العكسيه للسرعه.
ونستنتج من ذلك ان ذلك الفعل لايعتمد على حرارة الكلب وشراهته بل على تدريبه ومهارة التغلب على القوه العكسيه.

اكرر اتمنى ان يفيدنا اصحاب الخبره بطريقة هذه التدريبات .وماهو العمر المناسب للكلب لبدء مثل هذه التدريبات .

طلو الشمري

21/04/2009, 08:49 PM

يفيدونك الاخوان

ابو تمام

21/04/2009, 08:58 PM

اخوي الدرب البعيد يمكن ينفع التدريب لكن نزول الكلب عندما يرى الصيده من السياره الكلب الحار الحدوم يطب من السياره واعطيك سالفه ثانيه عندنا كلب مربوط في صندوق السياره ويوم شاف الصيده طب وبغى يموت والله مادربناه ولا شي صحيح يمكن التدريب ينفع لكن الكلب الحدوم مايحتاج تدريب يالغالي

دمت بود

الطروح

22/04/2009, 11:35 AM

عن نفسي وتجربتي كلام صحيح
تقبل مروري

راعي النص

22/04/2009, 03:13 PM

والله أول مرة أسمع ذا الكلام

بن نقا

23/04/2009, 01:07 PM

الكلام صحيح الامر هذا على حرص السلوقي ونزارته ويجي بالتدريب بعد يعني درب الجرو مع سلق كبار فترة على جرابيع ثم حاول تصيدبه لحاله لين يعرف .....
ولكن حتى لو تدرب السلوقي خل بالك من الارض مهي سالفة يطب وبس يمكن تخونه الارض وينكسر ثم تبلش فيه ياتعالجه ياتذبه ......
_______ أخر مره دربت قبل 10 سنوات _______

الدرب البعيد

24/04/2009, 05:51 AM

بارك الله فيك اخواني جميعا على مروركم الذي افادني كثيرا بهذا الخصوص
وتقريبا مشاء الله شبه اجماع على صحة هذا الكلام
ولكن إلى الآن لم نرى احدى من الاخوان قدم لنا خطوات لهذا التدريب غير ( ابو فهد ) بارك الله فيه قدم لنا شرح مختصر للطريقه
علما ان التدريب الذي راغب انا به ويرغب به الكثيرين من اصحاب هذه الهواية هو تدريب الكلب ليصل إلى مرحلة الطاعه العمياء يعنى مجرد ماتأمره بالنزول بدون تردد يحول لو على راسه ويتجه مباشره بالاتجاه الذي تؤشر له عليه .
واكرر واقول ( التدريب الذي اطلبه لايعتمد على حرارة الكلب وإنما يعتمد على الطاعه العمياء )
لماذا ؟؟!!
لان الكلب ماهو شرط يشوف الصيده وتخبرون مقناص وطرد الارنب في الليل ماتشوفها إلا على طرف نور السياره او الكشاف والسلق يكون في الخلف وينه وين شوفتها .
علما ان المناطق اللي تكثر فيها الارانب عندنا مناطق وعره وفيها رمث واجد .( والمزيونه ماتخليك تملا عينك من شوفتها ) :(
نتمنى ان نرى مشاركة بقية الاخوان ليستفيد الجميـــــــــــــــــــــــــــــــــــــــــــــ ــــــــــــــــع

نفاج

24/04/2009, 06:13 AM

هذا الكلام الصحيح انا عندي جروه من عمرها 8 شهور اذا شافت الصيده تطلع فوق التنده وتنزل على الكبوت وتطب والسياره تمشي لكن ما ادري كم السرعه

تعتمد على حرارة الكلب
كلام صحيح 100في 100 ياما كلاب أذا شافت الصيده تطمر من الخلف لين عند السواق وتضرب في الزجاجه الأماميه وتكسرها كل ذا من الحراره

قناص كنزان

03/05/2009, 11:26 PM

ماقصروا الاخوان معكـ

سعودي مطنوخ

04/05/2009, 12:02 AM

الكلام صحيح ياخوي بس نبي منك نتخاوى انا وياك وارويك

طلو

05/05/2009, 01:04 AM

هلا والله
اخوي لازم تعودها وتكسر الحاجز النفسي لهذه القضيه
اول شي
تجي بالنهالر والسلق بالصندوق والسياره تمشي بسرعه قليله وتفك لهم ارنب ولا جربوع وتحاول انهم ينزلون مره مرتين لين يتعودون

الدرب البعيد

05/05/2009, 03:35 AM

اشكر كل من قام بالرد

واخص مشرفنا العزيز طلو ونقول له الحمد لله على السلامه بعد الغيبه

والحمد لله مشرفنا عرف طلبي ومقصدي واجاب على السؤال المطلوب والذي كاد ان يكون لغز :)

راكب هدد

05/05/2009, 06:33 PM

ما قصروا معك الشباب
وتقبل مروري

الخماش111

05/05/2009, 11:26 PM

السلام عليكم ياخوي الطريقه كالتالي 1 اركب معها بالسياره ومش بالسياره على هونك وقلها انزل اذا مستجابت ارفع صوتك وحمسها وقلها يح يح اذا ماستجابت ارمه من السياره مره مرتين يتعلم ان شاء الله

تركي1127

06/05/2009, 02:54 AM

هلا اخوي انا عندي سلق تقفز
من السيارة
وهية تمشي ستين
ولاكن اين انت
وانا اروح انا ويك كي تنظر كيف السلق
تقفز من السيارة لزم يكون عندك سلق مدربة علي كذا

تركي1127

06/05/2009, 02:56 AM

معقول لن عندي سلق تسويها

خياله الجدعا

08/05/2009, 11:45 PM

حياك الله اخوي الدرب البعيد كلا م اخواني المسافر وابوتمام

صحيح مو ميه باالميه لا مليون االميه نعم يعتمد على حرارت السلوقي اذا كان صاحي ابشر باالسعد واذا كان

لاتدربه ولاتتعب عليه فكه لانه حتي لوصار بيلحق ماراح يلحق مثل الي راسه حار وهذا شي معروف عند اهل

الي مايقنص الاوسلوقيه معه مشكور على الموضوع اخي العزيز وتسلم يمينك

shaheenshah

16/05/2009, 11:41 PM

نعم تطب وبعض الاحيان تبلشك لو تشوف قطو والا حصني ما تدري الا وهي طابه تاخذ كم قلبه وتقوم وتلحق والا تنكسر
عندي سلقه مهبوله طبت على سرعة 60 وانكسرت يدها

تركي1127

17/05/2009, 03:41 AM

هلا اخوي خذ سلق مدربة معك
وحاول ان نسرع في السيارة
عطها امر النزول وراح تتعود السلق الي عندك
علي النزول والسيارة مسرعة
اهم شي تكون سلق مدربة علي النزول
وراح تشوف الفرق و تتدرب علي ذلك

سلطان العوني

18/05/2009, 06:03 PM

اخوي الحل بسيط جداً

طبعاً التدريب هذا فيه خطورة على الجرا اللي من عمر 8 شهور واقل
اول شي عليك بأرض رملية نفود وسرعة لا تذكر يعني عشق الاول وخل واحد من الشباب يحولهن من الصندوق
والتدريب هذا كله بالتكرار والتردح
ةراسلني عالخاص اذا تبي معلومات اكثر

أبو رداد

18/05/2009, 06:40 PM

السلام عليكم ورحمة الله وبركاته

ماعرف عن السلق كيف يتعلم النزول والسياره تمشي
لكن اشعر ان فيه خطوره على السلق ....
الارنب لو بغيت توقفه بالليل .... وجه اللايت بأتجاهه
اطفي وشغل لايت السياره او الكشاف
اغلب الاحيان يوقف ... واحيان اخرى يبدي يدعم بالشجر ثم يوقف
وسلامتك

الدرب البعيد

18/05/2009, 07:37 PM

اخوي راكب هدد (http://www.mekshat.com/vb/member.php?u=116774)
بارك الله فيك وصدقت الشباب ماقصرو

اخوي adad1127 (http://www.mekshat.com/vb/member.php?u=117878)
ماقصرت وانا من المدينه والحقيقه ماقصروا الاخوان وجاري عمل التدريبات اللازمه

اخوي خيالة الجدعا
حياك الله والسلق حقيقه طبعه حار ولكن بعض الاحيان نمربظروف عند المقناص تخلي السلق يقول (( يالله الخراج عسى الليله تعدي على خير بس)) هههههه

اخوي shaheenshah (http://www.mekshat.com/vb/member.php?u=38135)
مشكور وماقصرت ولكن اللي ذكرته مشكله وممكن ان السلق يصاب اذا طب على غير سنع ويجب ان يتدرب على اصول القفز الصحيح

اخوي adad1127 (http://www.mekshat.com/vb/member.php?u=117878)

اكرر شكري لك وجاري عمل التمارين اللازمه

اخوي سلطان العوني (http://www.mekshat.com/vb/member.php?u=46257)
اشكرك مرورك الكريم وتقديمك للمعلومات المفيده وجاري تطبيقها ان شاء الله

اخوي أبو رداد (http://www.mekshat.com/vb/member.php?u=8675)
بارك الله فيك والكلام اللي تقوله صحيح في بعض الاحيان ولكن فيه ارانب مصايب ماتنفع معها الحيله اللي ذكرتها ولا يأثر عليها النور ولو تقعد تولع وتطفي لين ينحرق الكشاف ماوقفت

المشترك

20/05/2009, 04:56 PM

اذاكانه حي حطه مع سلق اتحول وشرط
ايسابقها

ابوحمد 2009

09/04/2010, 06:36 PM

ان شاء افادوك الشبااب...

تقبل مرووري...

فيصل الدشاش

09/04/2010, 07:36 PM

الي اعرفه انا .. احتمال يطب على حسب .. حرارت السلوقي .. لكن هالشيء مايفيده
وانا الي شفته وعانيته .. انه يكسر ساق السلوقي . يوم ينزل والسياره تمشيء ..

لكن يمكن فيه طريقه في التدريب وانا اجهلها .. عنها اسئل اهل التدريب ؟؟

|_عاشق البراري_|

10/04/2010, 07:58 AM

نعم اخوي من ربعي فيه كثرين ينزلون السلوقي على 40 30 انت خله بالتدريج ينزل من 5 بعدين 10 طبعن اذا صندوق حاول اول ماتبي تنزله تقوله حول حول وانت تسحب فرامل عشان يضمن النزله اول ماتسحب ادعس عشان يحول همن بعد كم مره اسرع ولمس فرامل قله حول وهاكذا
طبعن للمعلوميه تعتبر من حرارت السلوقي راح ينزل معك الاما تشوف الارنب على راس النوور او يشوفه ينابح السلوقي هذا يدل على حرارته لو انت على ميه وشاف الارنب وينابح خلاص انا السلوقي حاااااااااااار

مليق السلق

10/04/2010, 08:22 AM

انا عندي سلوقي ينزل والسياره تمشي 60 اذا امرته وبيعدين يتقلب ثم مع طريته

تقبل مروررررري

اخوك مليق السلق

aaaa123

10/04/2010, 01:39 PM

من رايي الشخصي ان التدريب هو اساسي اما حرارة الكلب فهدا ممكن تجدة واحد من الف يسويها بدون تدريب
لاكن دربه من البدايه على سرعه10 وبعدها زيد السرعه بتدريج

راعي وذف

10/04/2010, 02:38 PM

اسمع وانا اخوك التدريب اول شي يعتمد على حراارة السلوقي
وبعدين ابيك تجرب خلك مع السلوقي المراد تدريبه بالحوض
ومايحتاج تضربه ولا شي وخل سلقه او سلوقي يطرد جربوع قدامه
وانت ماعليك الا انك ترفعه تخليه يناظر الطرد وهو طبيعي راااح يحول
والسياااره تمشي وخلك على الطريقه هذي حتى تشوفه اذا سمعك تقول حول
او يح يح هو طبيعي يبي يرتفع يشوف النور وعلى كيذا اذا شاف الصيده راح
يحول من الصندووق...
وتمنى اني افدتك..
تقبل مروووريـ...