ابريق اثنين في واحد .... لايفوتك

[ابو شكاع]

اليوم رحت لمحل عندنا في الديرة ولقيت لكم هالبريق

غريب ......... سألت العامل .قال يصلح للشاي والحليب مع بعض

طبعا شكله ما يصلح يكون على النار مباشرة ........ يعني تحكر الشاهي والحليب ........ او الشاهي الحالي والشاهي اللي بدون حلا للي ما يبون الحلا

همن تحطه زبرقة .......... بس جاز لي


لا تقولون انه قديم تكفون

واللي يبي يقول انه قديم بس يكتب( ق . ب )

يعني( قديم بالحيل) . وانا افهمه

ايه نسيت شي

السعر

سعره 70 ريال


اليكم الصور

http://www.qosman.com/uploads/00002407/ebreq.jpg



http://www.qosman.com/uploads/00002407/ebreq2.jpg

هلابكم

ولاهنتوا

[خشم الحصان]

الاخ الغالي
ابو شكاع
السلام عليكم
وين ياخيي جبته منه هذا فيه شبه منك وانت تلبس فنيله العلاقي:D :D وبعدين وش قصة بياله وفنجال
اماك تقول انه للشاهي والحليب طيب اذا بغيت احط فيه شاهي وحليب وشبية عليه ثم قلب الحليب قبل لا يفوح الشاهي وش السوت لا تقول حط شطر منه علي الغاز لئن الثعبه بتبغبغ بسرعه ثم تطفي الغاز اقول مهوب كن جايه ابا الوجيه والغطاء وشوله لياك تقول للفوح وشلون تزله اذا فاح الماء هذي سايده بالحيل اقول انت تراسل في المطبخ وش قصة هالاريل والله بيتكم زبرقه يالرسويه
اخوك
خشم الحصان

[*القبطان*]

البريق هذا يوجع الراس ما تعرف وجهه من قفاه

[ابو شكاع]

هلا هلا هلا

هههههههههههههههههههههههههه

والله ياناقعدت اضحك على ردك .......... الله يخليك لعين ترجيك

اجل مثلي وانا البس الفنيلة ههههههههههههه

اسمع عاد هرج واحد من الشباب معي بالمسنجر

يقول ان هالبريق مهوب بس ق . ب

يقول الا ق ق . ب

وقال لي كلام مقنع جدا

يقول هالبريق يستخدم بالشكل التالي

واحد منهن للشاي يعني خامر يعني بس ماء وشاهي

والثاني يكون ماء وسكر

همن تصب بالفنجال من هالثعبة شوي ومن هالثعبة شوي

انت توحي


يالله انك تصبحه بالخير .................

ابرجع لك الوقت مهوب زين وانا ودي اسولف معك

[ابو شكاع]

هلابك القبطان

وانت الصادق هذا ابريق سيامي

مشكور ياللي عطرت هالمشاركة بالرياحين

هلابك

ولاهنت

[الروضة]

السلام عليكم ورخمة الله وبركاته
اخوي أبو شكاع
هذا ابريق ( ق ب ) ويستمل للشاهي التركي يعني يكون الشاهي فوق ثقيل واللي تحت يكون فيه ماء فقط لإنه يصعب غسله ماتحط مع الماء شي وإنما تخفف الشاهي منه وسعره غالي شوي 70وأنا اعرف سعره 45ريال
والسلام عليكم ورحمة الله وبركاته

[ريع الدياب]

بسم الله الرحمن الرحيم
السلام عليكم ورحمة الله وبركاته

الغالى أبو شكاع

بالنسبة لى هذا الابريق (( ج ب)) ... أول مرة أشوفه

أما ما يتكلم عنه الأخ الروضة للشاهى التركى فهو شكله غير ويسمى (( السماور))

[المسفهل]

أنا أحذر الجميع من هذا الإبريق ..
فهو خطير جدا وما أقول لهم إلا :
( إياكم وذا الوجهين ) وهو الذي
يأتي هؤلاء بوجه وهؤلاء بوجه .. :D

[راعي العليا]

ماقصرت يابو شكاع

ج . ب . ب

لكن ابيك تتخيل شكله وانت عازمن الربع على ذاك الطعس وحاطن هالابريق على النار ومير يفوح هالابريق الإزدواجي... هذا يكب على النار منا والثاني على شنق النار الثاني ... الله يعينك عد رح ناظر خشك بالمرايه منعفسه من الرمااااااد

[ابو شكاع]

هلا هلا هلا بالروضة

ربي محييك

اجل هو قديم امممممممممم

عموما ........... انا كنت عارف انه قديم بس ابشوف انتم تنتبهون او لا <<<< واحد بلش

هلابك وانا اخوك وشاكر لك هالإضافة الطيبة

تسلم

ولاهنت

[ابو شكاع]

هلا هلا هلا ريع الدياب

الله يرفع من قدرك ................

وياليت لو عندك صورة للبريق اللي تقول تنزله لنا نشوفه

هلابك

ولاهنت

[غـريـب]

السلام عليكم

اخوي ابو شكاع

ماكن اسمي امبين اني انا العامل( بعدين انا مافي كلام ساهي وهليب انا فيه كلام ساهي وممكن اي سي ساني )



في امان الله

[ابو شكاع]

هلا هلا هلا


هلا بالمسفهل

اجل هذا ابو وجهين ............... وانت صادق فعلا يمكن يهك عليك ...... يفوع مع هالثعبة والثانية ما درت عن النار هههههههه

تسلم

ولاهنت

[ابو شكاع]

هههههههههههههههه

هلا براعي العليا

انا تخيلت الموقف

اسمع .................. هو اصلا خامته الله العالم ما تستحمل النار

لذلك هو بس ترزه عندك يعني تحط به الشاهي عقب ما يخدر ............

تسلم

ولاهنت

[الـ ع ـارض]

ق م ب

( قديم مره بالحيل)

[الضاري]

أهبوووووو يالهالمصانع .. ما خلو شيء ماصنعوة..

والله أني ذال باكر تجينا دلة بفتحتين..

ملاحظة / البريق هذا يضيق صدور الشيبان .. ما ادري لية !!!!

تحياتي للجميع

[المهلي]

الله يغربل عدوك يا شكاع
ذكرتني بسوالف السواقين من اول لا وقفوا بالقهاوي على الطريق وطلب الواحد شاي قاله القهوتسي تبي شاي برغوه ولا بدون اذا قال برغوه رفع البريق لمن يقوم يزبد وطبعا الي برغوه بربع وبدون رغوه بقرشين
اقول وينهم عن بريقك هذا يصلح لهشغله برغوه وبدون رغوه ههههههههه:D :D

[صقر]

واللي يبي يقول انه قديم بس يكتب( ق . ب )


طيب يا بو شكاع

واللي اول مرة يشوفه وش يقول ؟؟؟

شكرا على هالسبق المكشاتي العظيم.

وبارك الله فيك.

[ابو عمر اللاحم]

هالبريق ذكرني بالتوئم اللي يجون متلاصقين ! يبيله من يوديه لمستشفى الحرس يسوون له عملية فصل .

واللي يضهر لي ان اللي صانعه سوداني لأنه فيه ثوب سوداني له مخباتين يعني تلبسه وانت مغمض ويصير صح .

مشكور اخوي على هالبريق الـ غ ر ي ب .

تقبل تحياتي ،،،

[عبدالعزيز الدباسي]

تسلم يا ابو شكاع وماقصرت

تصدق انك حليت لي مشكلة كبيرة .

لانه فيه واحد من الزملاء قبل فترة قام يتكلم عن هالبريق ويوصف شكله ويقول انه تقدر تحط ورق الشاهي بالوسط ويصير خادر بالحيل واذا بغيت تصب للواحد تشوف مزاجه هو يبيه ثقيل والا خفيف اذا كان ثقيل معناه تبي تستخدم واحد من (المثاعيب) واذا كان يبيه خفيف لازم تستخدم كل هالمثاعيب .

والحقيقة انا عجزت اتخيل هالبريق ، ويقول اننا نسوي الشاهي باول الليل ويجلس معنا الين نسري ،،،

طبعا انا ما صدقته ،،،،،،،،،،ما ادري ليه .

بس انت جبت العلم الوكاد ،،،، وشفنا هالبريق الا نسمع به ، ولا نشوفه .

مشكور وماقصرت

[ابو شكاع]

هلابك غريب


لا والله ياخوي ما بين من اسمك انك انت اللي بالمحل ..............

بس عاد انت هالحين اهرج ......... سمعن صوتك زين ............. همن احكم

لالا مهوب انت ............. لالا انت غريب خوينا بمكشات <<< كأنه بدأ يخبط


هلابك

ولاهنت

[ابو شكاع]

العارض

اجل ق م ب

لاااااااااااا

هين

اعترف

اعترف انه اول مره تشوفه .............. معليش ياخي ما فيها شي اعترف

لا تكون مغرور

عاد تدري وش ال ق م ب

اعلمك بعدين ههههههههههههههههه

هلابك

ولاهنت

[ابو شكاع]

هلا وغلا بالضاري

وليش ياخوي يضيق صدور الشيبان ؟

اتوقع العكس صحيح .......يوسع صدورهم

انت تعرف بعض الشيبان يكون ما يبي الشاهي يكون حالي

ولا وده بنفس الوقت انه يحوس على ربعه التكية ,,,,,,,,,,,,, فايكون الشاهي على المزاج

مره هيك ............. ومره هيك

تسلم

[ابو شكاع]

هههههههههههههههههههه

المهلي الله يقطع سوالف عدوينك ضحكتن

اجل برغوة او بدون رغوة

هالحين ممكن بعد تسويه برغوة او بدون رغوة

لكن عاد اوقف ............ وشهي الرغوة ؟

تقدر تحط رغوة فيري وبدون ماترفع البريق فوق

تسلم

ولاهنت

[ابو شكاع]

هلا ابو احمد

قل آمين ان الله يوفقك ........مهوب مثل الطايل قصدي العارض اللي فشلن يقول ق م ب

هههههههههههههههههه

تسلم

ولاهنت

[ابو شكاع]

هلابك نهار

عاد تدري وش يذكرن به هالبريق

يذكرن بالمضيفه اذا صار الواحد راكب الطيارة <<<< اجل راكب السيكل

المهم وبدأت تعطيك التعليمات ...... ومن هالتعليمات اذا صارت تأشر على مخارج الطوارئ

بهالحالة البريق يشبه المضيفه

هلابك

ولاهنت

[ابو شكاع]

هلابك الشقردي

وهذي الساعة المباركة

هذاك شفت البريق ..............

لكن عاد يبي لك تشوف خويك وهو يقول يقعد معنا الين نسري

وترى خويك صادز .......... لأن البريق مهوب يمشي ولا شي ...........يعني لو انه ماطور كهرب كان ممكن .... لأنه هو اللي يزحف مع الرجه ...... لكن هذا ابريق ما يتحترك من مكانه

فأكيد انه يكون معهم لمين يسرون ......... ويمكن هذا قصده

اما اذا كان قصده انه يكفيهم فكلامه فيه نظر قل وراه ؟

انا اقول لك .......... لأن قاعة هالبريق مهيب شي ....... يعني ما ياخذ شاهي واجد مثل البريقات الثانية

واذا تبون اصوره من الداخل ما عندي مانع علمون وانا اروح انقز لم المحل واصوره

لا تقولون اشره .......... لأني اولا لأنه غالي .............. ثانيا لأن سعره مرتفع شوي :)<<<< وفسر الماء بعد الجهد بالماء


هلابك

ولاهنت

[بــرق الشمال]

مشاركه رائعه الله يعطيك العافيه اخوي ابو شكاع
بس يقولون ان هاالأبريق فيه جني(شبيك لبيك)هو وولده:D :D

[ابو شكاع]

هلابك برق الشمال

اجل به جني ؟

الله يستر ....................... ياخوي وانا اشوف البريق عند المحل مغير يطامر ويناقز

شكلهم يتهاوشون

الله يستر ................ بس بيني وبينك مرتاحين ........ لا غثا سكن .......ولا ايجارات ولا غيره

ولا كهرب طفى ولا تلفون فصلته الشركة ........... ايه الله يهنيهم

شكرا لك وانا اخوك

ولاهنت

[علي الشهري]

مرحباً بك أبو شكاع

أنت وأبريقك

إلا وش سالفة ها الأناتل اللي راصها جنب الإبريق:D

[حد السيف]

ابو شكاع
السلام عليكم ورحمة الله وبركاته
متى عملية الفصل للابريق السيامي



الله يخلية لك يالغالي ويتربى بعزك الدعوة هذي ماتخص الموضوع



محبك اخيك
حد السيف

[ابو شكاع]

هلابك التنهاة

بالنسبة للأناتل هذي الله يسلمك موجودة في المحل

ولأني كنت مستعجل ............. صورته بهالشكل

يمكن تقول وش عندك مستعجل .............. انا اقول لك ............. ما تقول ان ابو ابراهيم اتصل علي وقال تبي تجي للإستراحة ؟

قلت نعم ........... قال جب معك خبز حار ............... قلت وش عشانا ...... قال صينية دجاج

قلت طيب ما لك هم ........... عاد انا شلت هم الخبز لأنه يبي لي اروح ادور خباز يخبر وهالهرج عقب صلاة العشاء


هلابك

[ابو شكاع]

هلابك حد السيف

الله يجزاك خير ياخيي ................. ويسلمك ويخليك لمن تحب ويوفقك

بالنسبة لفصل السياميين هذولا

هذانا ندور استشاري حدادة يشوف لنا العملية .......... ولكن كلهم رافضين يقولون ما نقدر لأن الحديد مرتفع وهالعملية تبي تكلف مبالغ كبيرة

لذلك أجلناه لعل صاحب ورشة حدادة يحن قلبه ويتبنى العملية

شكرا لك

ولاهنت

[الضاري]

ابو شكاع ..

بالنسبة لعملية الفصل .. على أي قناة ستنقل للعالم وبث متواصل ومباشر من الورشة ..؟؟

ماهي شهادة الميكانيكي الذي سيقوم بعملية الفصل ؟؟

تحياتي

[ابو شكاع]

هلابك الضاري

حتى الآن ما لقينا وفيه احد اصحاب ورش الحدادة

دار بيني وبينه هالحاشي ........... قصدي هالحوار

ابو شكاع:السلام عليكم

فاعل الخير : وعليكم السلام

ابو شكاع :ابو فلان ... صاحب ورشة كل واشكر ؟ <<< صار مطعم !

فاعل خير : نعم من انت ؟

ابو شكاع :انا ابو شكاع

فاعل خير : وش ابو شكاع ؟

ابو شكاع : افاااااااااا ما تعرفن ؟ وانا اللي احسبن مشهور !

فاعل خير : انا ما اعرف الى مشهور ذياب بهالإسم

ابو شكاع: طيب ما علينا ........... عندنا ابريقين سياميين ويقولون عندك ااستشاري حدادة ونبي يسوي العملية لهن

فاعل خير : ما فهمت

ابو شكاع : والله يانا فاضي بعد افهمك ............... ادخل على مكشات على هالرابط http://www.mekshat.com/vb/showthread.php?s=&threadid=20396&perpage=15&pagenumber=3

وانت تعرف السالفة

فاعل خير : لكن انا رجل مشغول ...

ابو شكاع : مشغول ؟! الأخ تلفون ؟

فاعل خير : وغير هذا منب راعي انتر نت

ابو شكاع : طيب ياخي على الأقل اشتر لك كنبيوتر واشر لك بطاقة انتر نت مدته ربع ساعة همن ادخل الموضوع واعرف وش السالفة همن عاد من باتسر بع الكنبيوتر بطايح نصف القيمة ........ وما لك الا اني اشريه منك ...... ولو يكون نوت بوك يكون ازين بعد

فاعل خير : اقول يالأخو

ابو شكاع : هاه

فاعل خير : شكلك فاضي

ابو شكاع : وش قالوا لك قير ددسن 77!

فاعل خير : المهم لا تطوله وهي قصيرة انا ماعندي استعدا لهالكلام اللي انت قاعد تقوله تبي شي ثاني او اسكر السماعة بوجهك

ابو شكاع : افااااااا بس ... هذا وانا من اليوم اكتب قدام اسمك فاعل خير ! خلاص ابغيره ابحط مهوب فاعل خير

مهوب فاعل خير : حط اللي تبي المهم يالله طس عن وجهي لأني مشغول

ابو شكاع : طيب لحظة لحظة قبل تسكر السماعة

مهوب فاعل خير : نعم انجز

ابو شكاع : ما عندك سلف 50 ريال لمين الراتب ؟

مهوب فاعل خير : طووووووط طووووووووط طووووووووووط

ــــــــــــــــــــــــــــــــــــــــــــــــــ ـــــــــــــــــــــــــــــــــــ

هذا اللي حصل ........ وهذانا نحتري

ان خبرت لنا رجالن يبي الأجر وصلنا له

لاهنت

[ابو شكاع]

بالنسبة للقناة يالضاري

اتفقنا مع قناة اسمه iron planet

وهي تبي تنقل الحدث على الهوى مباشرة .......

مع ان القناة تبث من موزمبيق .......... ولغتها موزمبيقية ........... بس وش نسوي

ياخوي أغلب القنوات العربية ما همه الا الرقص والمرادح ........... او تجيك قناة كل اخباره تسذب بتذسب

ما لقينا غيره

هلابك

ولاهنت

[الضاري]

يارجال ماهي مشكلة .. موزمبيقية .. موزمبيقية ..

المهم نتابع الحدث ... الخطير

العوض ولا القطيعة..:D

تمنياتي بنجاح العملية..:D

[al-nashmi]

السلام عليكم ورحمة الله وبركاته

اخونا ابو شكاع...

البريق هذ منتاز بالحيل لا صرتم منتم واجد.......

ونا شريته قبل اربع سنين من محلات ادوات المطابخ والمخابز اللي في شارع طارق ابن زياد اللي شرق بوابه الثميري.....ولحد الان يسمعك في صندوق العزبه

واكيد انك تعرف الطريقه اللي يستخدم بها البريق ......

الدور الاول تحط فيه شاهي وماء فقط... وتخليه يغلي بفعل بخار الماء الموجود في الدور السفلي ( ويصير عندك شاهي ثقيل مره)
الدور السفلي تحط فيه ما ء فقط بدون سكر .... ( صار عماره تجاريه حشا ماهو بريق شاهي)ههههههههههه
واذا فاح الماء تخلط من الشاهي الثقيل مع الماء الحار في البياله وتضيف السكر على مزاج ورغبه الموجودين وتقدر تثقل الشاهي او تخففه حسب الرغبه......

جرب تراه ممتاز جدا.....

اول ما شريته طلعنا جه حايل ومعنا ربعلي من حايل وتعال شوف الطنازه والتعليقات......بس بالخير اعجبهم..


تحييييييييياتي

[ابو شكاع]

الضاري ربي محييك

نعم ما يهم بهالوقت اللغة ................. تقدر تجيب لك افريقي يهز راسه ويترجم لك اثناء العملية ........... وبالأخير تعطيه المقسوم

هلابك

ولاهنت

[ابو شكاع]

هلا هلا بالنشمي

تسلم على هالإضافة وانا اخوك

اجل هو تسذا ...............والهندي قاعدن يرج راسه ويقول واحد شاي وواحد حليب

قلت له طيب واذا صرنا بمثل هالوقت حر وسموم وش نسوي ؟

نسوي شاهي وحليب ونكب الحليب ؟

ربي محييك

وهلابك

ولاهنت

[الصقر الجارح]

مشكور يا ابو شكاع
ابريق 2 في 1


تحياتي ...............

[ابو شكاع]

اهلا وسهلا بالصقر الجارح

نعم 2 في 1


وباتسر يطلعون 3 في 1

يعني مثل الشامبوهات

تسلم

ولاهنت

[الربذي]

لايكون حق علا الدين افركة وشف وش يطلع لك :p
بصراحة عني انا اول مرة اشوفة يصلح لشاهي والحليب
بصراحة ماقصرت صورتة لعيون المكشاتيين على وزن الشاميين وتسلم اخوي لاتزعل علينا لانك ماتبي الفشيلة ويكفى ق ب وانت تفهم لكن انا اقول ج ب

[ابو شكاع]

هلابك الربذي

اجل حق علاء الدين ؟ هههههههههه

يمكن بس هذا دبلوكس يعني فيه مرادين اثنين مهوب واحد

تسلم وانا اخوك وربي محييك

هلابك

ولاهنت