اصعب واحرج موقف مر بك خلال السفر او خلال رحلاتت الصيد والبروالنتيجة التي توصلت اليها

[حد السيف]

احبتي
اعضاء منتديات مكشات
السلام عليكم ورحمة الله وبركاته
موضوعنا اليوم شوي مختلف وهي عن المواقف الصعبة والمحرجة
التي يمر بها المسافر والكشات والصياد
واجزم ان الكثير منا مر بهذة التجربة وكيف تلافاها او ماهو الحل الذي استطاع بة تجاوز هذا الموقف
وكيف تصرف من خلال هذا الموقف لتخفيف اثار هذا الموقف
والاهم بالموضوع هو ماهي النتيجة والخلاصة التي استخلصها من خلال هذا الموقف
الذي ربما يكون درسا لة لعدم تكرار هذا الموقف
وتكون خلاص تجارب الاخرين مفتاح لنا
وكيفية التعامل مع هذة المواقف لو لا قدر الله
وحدث لاحد منا مثل تلك المواقف المحرجة والصعبة
مع تحياتي للجميع

محبكم اخيكم
حد السيف

[Khalid AlGhamdi]

وعليكم السلام ورحمة الله وبركاته

جزاك الله خير على الموضوع المفيد ان شاء الله



الموقف الأول

في محمية حرة الحرة في الشمال .
دخلنا للمحمية من عند المركز :rolleyes: يبعد عن مدينة طريف حوالي 40 كلم

كان معاي هايلكس وهذا اللي خلانا نجي من هالمكان لان ووعورته معقولة ، طبعا دخلنا للمحمية بدون انوار ولاشي نمشي بالليل ولما بدينا نطرد طاحت بطارية السيارة وعملت شوط والحقيقة اني احسب السيارة شبت من قو النور اللي طلع مع الكبوت

وقفنا بسرعه وشلنا البطارية وقعدنا نصلح السيارة وبصراحة كنا على اعصاااابنا لايجوننا الحماية وحنا بهالحال

المهم اننا صلحنا السيارة ومشينا وقنصنا وصدنا 3 غزلان وحبارى
وهجينا نمشي بدون نور لكن هالمره بسرعه جنونية وبدون نور والحقيقة اني اقول وانا بهالموقف
( ان كان سلمت هالمره ماعاد اعودها ) .


والحمدلله اللي سلمنا

استفدت من هالرحلة متعة القنص لكن الحقيقة انها مايستاهل المخاطر اللي فيه والعقوبات اللي يتعرض لها الواحد لو انمسك من مصادرة السيارة وغرامة وسجن وفصل من الوظيفة .. الخ .

وان شاء الله اني ماعاد ادخل لاي محمية الا بتصريح .

البطالة ووش تسوي ، بصراحه وقتها ماكنت موظف ( داشر :D ) فما كان يهمني وش بيصير
وفعلا البطالة تسبب الجريمة .

من صور المغامرة
http://www.mekshat.com/pix/upload/images5/mk6097_harrah.jpg

واعتذر من الاخوة المشرفين على وضع الصورة لكن لان جاء ذكر قصتها ، واذا كان الاخوة المراقبين يشوفون اني اشيلها فانا اعتذر مرة ثانية وماعندي مشكلة ، نشيل الصورة ولاتزعلون علينا :)


------------------------------------------------------------------------------------------------------------

الموقف الثاني

قبل شهر ونص كنت مسافر للشمال من الرياض
وقبل عرعر بـ 90 كلم جتني عجة والله يا اخوان انها من اعنف ماشفت بحياتي ، لدرجة اني كنت واقف والسيارة تهتز والحجار الصغيرة تصقع بالقزاز وكنت انتظر القزاز باي لحظة ينكسر
والمشكلة ان كان معاي زوجتي وولدي ( عمره اربع شهور ) وبدينا نحس داخل السيارة بحرارة شديدة وبدينا نتنفس الغبار وانا الصراحه اصابني خوف شديد على الطفل وبديت امشي وانا ماشوف وش قدامي وانا استغفر واستمرت لمدة نصف ساعة وبعدها الله سبحانه رحمنا بمطرة قوية اسعفتنا .

استفدت من هذه الرحلة اهم شي

يا اخوان والله فعلا الواحد مايحس بوالديه الا اذا جاه ولد وخاف عليه يتذكر فعلا الوقت اللي ماكان يبالي بخوف امه عليه او اهتام ابوه فيه وهو مطنش :o

ثانيا ما عاد اروح للشمال مره ثانية تووووووووووووووبة الا بعز الشتاء هرباً من العج .

الواحد ما يلجأ الى الله سبحانه وتعالي الا وقت الضيق وان شاء الله اني اكون في الضيق والسعة مستغفر وتائب .

وماني مطول عليكم اكثر من كذا .

[حد السيف]

السلام عليكم ورحمة الله وبركاته
لاتعليق والعبرة والفائدة موجودة في طيات المشاركة

محبك اخيك
حد السيف

[الربذي]

بسم الله الرحمن الرحيم
مره وصلت واحد من الاصدقاء الى قريتة وعندما وصلنا كانت الساعة حوالي 30/2 ليلا المهم رفض ان ارجع واصر ان انام عندة والصباح اتيسر ! لان الوقت متاخر والدنيا برد وللعلم قريتة قريبة من الحدود الشمالية لما اصريت على السرية قالي نصيحه لاتنام بالطريق لان هناك تسللات من الحدود وماعندهم الا القتل مافية تفاهم 000000 المهم مشيت وكان ياخوان طريق تلك القرية مرعب لانة ممر صحراوي ضيق وناز يعنى ماتشوف الا السماء في بعض الاماكن طبعا مشيت تقريبا 8 كيلو صحرا وقفت لغرض ما السيارة شغالة بعد ماابتعدت شوي جاني شعور ان اطفي السيارة لكي استمع الى ذلك الهدو المطبق وكان الجو شديد البروده وظلام حالك مافية قمر بعدماطفيت السيارة ولم يمر اقل من دقيقة في تلك الظلمة وذلك المكان الخالي الا واسمع صوت جري يقترب مني وهو قريب جدا لو كانت السيارة تشتغل لن اسمعة المهم رجعت لسيارة وانا خايف لاني مادري وشهو المهم شغلت السيار وتخبرون الربع تويوتا مايشتغل بسرعه المهم يوم اشتغل الا وذيك الضربة بالسيارة من ورا المهم واحط رجلي وانا اتراعد :confused: :confused: والى يومك مادري هو انس ولا جن ولا وابي اسالكم وش ممكن يصير:what:

[Khalid AlGhamdi]

يالربذي موضوعك هبلني :eek:

شكلي ماعاد اشتغل عند الكومبيوتر لحالي :no:


لكن مانقول لك الا الحمدلله على السلامة وانا عن نفسي بعد موضوعك هذا ماعاد اوقف وانزل من السيارة وانا لحالي وباخذ معاي قارورة صحة فاضية عشان اذا تازمت الامور مايحتاج انزل من السيارة ولا اوقف :j

خخخخخخخ :D

[الربذي]

شكرا على مرورك بس وش تتوقع يكون وانا مثلك اكره اوقف بظلام بعد تلك الحادثة

[Khalid AlGhamdi]

والله يا اخي الفاضل لو قلنا انه ادمي معقول ولو قلنا انه جن معقول بعد

ولو افترضنا انه جن يبي لك تسوي موضوع كامل عن سوالف الجن :hot:

لكن خلنا على الافتراض الاول اللي هو انه ادمي

في الربيع اللي فات تفاجأت بعراقيين في الصمان يشتغلون رعيان !!

ولا ادري وشلون جو وهل دخلوا بطريقة نظامية ولا وش وضعهم !!

واهل الصمان يروون لنا مشاكل الرعيان عندهم وهذاك ذبح كفيله وهذاك خذا الموتر وهج به ..

والحقيقة ان الواحد مع ان الله سبحانه وتعالى انعم علينا بنعمة الامن لازم يكون محتاط لاسوء الظروف

وحتى ماتتحول هالكشته الى مصيبه

يقولون كلمة كشته اصلها فارسي ؟ :D

[ظنى مرزوق]

السلام عليكم ورحمة الله وبركاته

والله من المواقف اللي خلتني وانتم بكرامة استفرغ بالليل :

طالعيين مرة انا وعماني والوالد وجدي رحمة الله ( فيلم هندي) لشعيب حول الرياض المهم يالحبايب تعرف الورعان مسوين راعيين بر عشان يمدحك عمك وجدك ( انواع الريأ ) المهم واقوم ياطويل العمر واروح اشد الاطناب حقت الرواق ولا ذاك الطنب اللي ارضه رملة والله واتعنقط بالحبل حق الرواق واشده طبعاً الطنب مرتخي لان الشد على الحبل وعينك ما تشوف الا النور يوم فكيت الحبل اعوذ بالله كنه موصى علي الطنب وبنط ولا يرده إلا جفني :looney: والله فك الله عيني وإلا كان هالحين ما اشوف الا بعين وحده ، والله وانادي الشايب ويقوم الـ911 حقنا ويأخذ المسمار ويحطه على الجرح والحمد لله ، وبالليل تعشينا نواشف ومعهن تونه وانا كبدي قالبه الطنب يكافي والله يوم انتصف الليل واقوم لكم الكرامة واستفرغ بنج الرواق من اللخمة ، وعقبه كرهت التونه وماعاد اكله لو ويش .

ويوم طلعت بطاقة الاحوال حطه من العلامات الفارقة .

وسامحونا على القصور .

:good:

[أبو يوسف]

مرة طلعين انا والربع قريب
بعد العاذرية 20 كيلو
بالربيع العام الماضي 1423

المهم
طلعة يوم يعني بنحرك قبل المغرب
والله ونتغداا الساعة اربع
يوم فكرنا نضف العفش
ولا نلقى مفتاح سيارة خوينا ( معنا سيارتين )
دور ياولد
مالقينا
ولافيه مفتاح اسبير
المهم ونرجع لبيت خوينا وناخذ المفتاح
والله لايوريك
نمشي ترليون
على فكرة تركنا واحد منا عند السيارة
حراسة :)
لا وفيه واحد من اخويانا جزوم ( راعي جزمة وطقة صدر ) قال
اخ لو كان الدركسون ما انقفل كان سحبنا السيارة
قلت الله يغفر لك ويييييييييييييييييييين
مستحييييييييييييييييل

استفدنا اننا مانطلع الا والاسبير في مكان حصين
وفكرت لو كنا بسيارة وحدة وش صار علينا
ولافيه ارسال جوال

مشكور اخوي حد السيف على الموضوع الرائع


تحياتي

[حد السيف]

السلام عليكم ورحمة الله وبركاته
الاخوة الاعزاء
شكرا لكم جميعا لتفاعلكم
والرجاء الالتزام ومرعاة مشاعر القراء

محبكم اخيكم
حد السيف

[حد السيف]

السلام عليكم ورحمة الله وبركاته
هلا بالكشاتة كلهم
صغيرهم وكبيرهم
الهاوي والمحترف
اصعب موقف مر علي بحياتي من حيث المشقة هو في عام 1409 هـ اخذت سيارة واحد من الربع وكان نوع قطع عشرة موديل 81 تماتيك اصلا معدل الى عايدي لاجل احطب علية لئن سيارتي جيب ربع ولا تشيل شي من الحطب وقلت اخذ سيارة الاخ وتوجهت انا وواحد من العمال الى نفود سعّد طريق الشرقية وكانت في هاك الوقت المنطقة يزخر بالحطب نوعية الارطى اما اليوم الله يخلف
وتوكلنا على الله في الصباح الباكر الى تلك المنطقة ووصلنا المحطة وشرينا بعض اللوازم
وتوجهنا الى النفود وبعد تكملة البنزين ودخلنا النفود وكان الوقت تقريبا الساعة السادسة والنصف ودخلنا في معمعة النفود ووكان معنا كل ما يلزم من ادوات حتى يكون حطبنا وافر الكمية من حيث الكمية والنوعية
ودخلنا شمال شرق ابار سعّد واسمع طقة بالموتر بعدها ولا تحرك الموترابية يتحرك وقال هذا مكاني قلنا عسى في الامر خيرة ونزلنا عفشنا وقعدنا نفطر انا والعامل ومكاننا عن الخط تقريبا في حدود عشرة كيلو بعهدها فصلت الدبل وابية يتحرك ولاشي تقل محلوف علية لا قدام ولا وراء يالله جعل بالامر خيرة
المهم قلت للعامل اقعد هنا
وانا ابروح للمحطة ادور ونش يسحبنا
وفي ذاك الوقت لا قارمن ولا يحزنون راسك والا اقعدبة
وصلت المحطة التي تبعد تقريبا اكثر من عشرين كيلو واسئل عن ونش دفرنشين قالو انتظر فية راعي ونش يبي يجي الحين
جلسة انتظرة والوقت يمر والعامل لحالة الساعة عشر احدعش ثنعش ماحولك احد اذن الظهر وبعد الصلاة اسئل وينة قالو يكن يجي او لا
وقفت عند المحطة وكل واحد اسئلة بتروح الرياض اللي يتعذر واللي يقول مكاني اقريب وعلى ها الحال اللين الساعة ثلاث العصر رزقن الله بواحد طفشان ويبي اللي يسولف معة باقي المسافة الى الرياض واركب معة وقلت يالاخو ابي الصناعية ا و وين دربك حطني في اقرب نقطة حول الصناعية
وصلت الصناعية واتشكر لرجال واحلف علية ان ياخذ الاجرة او الكروة حلف ما ياخذ شي وقال ابيك تدعيلي
طيب نقلط ونتقهوا قال ابد مشواري طويل ابي الغربية قلت درب السلامة ان شاء الله والله يكفيك شر طريقك
واسئل اهل الونوش واهل السطحات ابي ونش دفرنشين
قالو اصبر فية واحد اللحين يجي هذا الكلام تقريبا الساعة اربع ونصف العصر وصل الونش
سلام وعليكم السلام
قلت فية سيارة متعطلة بطريق الشرقية بالنفود وبعد الاسئلة من السواق والاجوبة مني
وبعد الاخذ والرد اتفقنا انة على مبلغ خمسمئة ريال واصلة الرياض قلنا ما يخالف
وصلنا الى المكان ندور العامل الله يخلف ماهوب فية وين راح يمين يسار نصوتلة ما حولك احد
بعد كلافة ومشقة وتعب وغراز وعلوم ما يعلم بة الا الله طلعنا الموتر
قلت لسواق الونش نبي نسئل اهل المحطة وخصوصا انة من جماعتهم اي من ديرتهم ونفس الكليشة
رفيق فية صديق ما فية شوف قال فية شوف غرفة انا
عسى خير ان شاء الله ليش جيت وتركت السيارة
قال بابا انا فية خوف كثير انا يسمع قرقر كثير ما فية شوف نفر :confused: :confused: :confused:
الحمد لله انة ما انفضخ قلبك اركب اركب الله يخلف على من جابوك اركب
وصنا الرياض في حدود الساعة الحاديةعشر والنصف ليلا
الى الورشة ونزلنا السيارة
وبالغد تعرفون تكملة السالفةو سبب خراب السيارة ان شاء الله

محبكم اخيكم
حد السيف

[بروق ورعود]

السلام عليكم ورحمة الله وبركاته
حد السيف الله لايهينك على الموضوع الطيب, والسالفه الاطيب. وياخي تراني ضارب عتادي عن موضوعك من امس, عجل علينا بالتكمله اللي يرحم والديك. السوالف الطيبه الواحد مايمل منها. مشكور اخوي عساك على القوه.

[حد السيف]

السلام عليكم ورحمة الله وبركاته
الغالي
بروق ورعود
الله يردك لنا سالم غانم ان شاء الله
واسف على التاخير بالرد
وابشر بباقي السالفة
اصبحنا واصبح الملك لله
ذهبت الى الورشة بعد ان اصبحنا والتي وضعت السيارة عندهم البارحة
سلام يامحمد وعليكم السلام
محمد السيارة ماتعشق والدبل ما يشتغل وتعطلة علينا بالبر
رد محمد قال البر هذا مشكلة كثير كلة سيارة خبران علشان البر
قام عامل الورشة برفعها على الرافعة وشغلها وعشق القير ويبي شي يتحرك
ماتحرك العمود الناقل للقوة عمود الكردان
قال العامل ابي افك القير واشوف السبب اللي خلاها ماتعشق ومرنا بعد العصر ونعلمك سبب عطالها
مريت علية بعد صلاة العصر الا والله مولملي قطعة ها بشر
قال القير يبلة افلنجة
ويين نلقاها الفلنجة
بدوار الخرج السيارة مرهمة والله يعينك
بحمد الله ليقينا الفلنجة وشريناها بذيك القيمة
وجبناة الى الورشة قال بكرة ان شاء الله تلقاه خالصة
المهم طلع خراب السيارة من الفلنجة وهذا عيب تصنيعي خطير بهذة الموديلات لانها ممكن تخرب باي لحظة وباي مكان
وتكلفة النقل والتصليح وقطع الغيار والزيوت ووجية القير
اكثر من 2500 ريال قيمة شحن حطب عايدي سمر من اللي يحبة قلبك في ذلك الوقت
العبرة اللي طلعت بها
ان الثوب العارية ما يكسي
تمت والصلاة على النبي


محبكم اخيكم
حد السيف

[بروق ورعود]

السلام عليكم ورحمة الله وبركاته
اخوي حد السيف, شاكرلك تجاوبك يالغالي والحمدلله اللي جات سليمه. وعسى الصبي ماتروع. يالله يسمع اصوات والا يشوفها هنا المصيبه :D

[سيف السيف1]

موضوع ياجميل ياحد السيف بارك الله بيك
الرحلات والكشتات ألي فيها مواقف كثيرة.....
كشتة من الكشتات في جمرة القيض وقت الصيد وفي أحد الشعبان غرزنا سيارتنا دفرنس واحد نسمنا الكفرات حتى الجنط وطلعنا,,, لم يكن معنا ماطور هواء ولكننا تصرفنا عبينا الكفرات ألي يقول إني راعي خبرة في البر يخمن وش عبينا الكفرات فيه!!!!!!!؟؟؟؟؟؟؟؟؟؟ ياالله انتظر الرد

[الربذي]

من الاستبنة قل تم :D :D :D :D

[سيف السيف1]

هلابك ياالربذي , جابك الله وش معنى الربذي؟
مالك لواماهي من الإستبنه:)

[الربذي]

شي يحير اخو ابوفارس والربذي معناة مشتق من الربذة وهي موقع شمال شرق المدينة المنورة ويقع فية قبر الصحابي الجليل اباذر رضي الله عنة وقصتة المشورة عندما قال لة خير الانام صلى الله عليه وسلم يعيش وحدة يموت وحدة ويبعث يوم القيامة وحدة رضي الله عنة وارضاة وجمعنا بة امييييين

[عاشق الصفاري]

نفخ الكفر بالكاتم !! ولا لا أخوي ابو فارس..

[سيف السيف1]

مشكور ياالربذي على المعلومة جزاك الله خير...
عاشق الصفاري هلابك مالك لوا ماهو من الكاتم..
حد السيف استولينا على الموضوع ;)

[الربذي]

اخوي ابو فارس تصدق ضحكتني زين انتبهت للموضوع لواني مكان حد السيف كان توليتك هذا سطو جهارا نهارا اخوك الربذي

[عطر الشوق]

مرة وانا مسافر انا واحد الزملا على سيارتان كابرس المهم وقفناة لاداء الصلاة
خويي مطفوق وعجل فك شنطة الكابرس لخذ غرض ماء المهم قفل على المفتاح بالشنطة ولا معة اسبير كيف السوات جربت مفتاح سيارتي ماينفع الغمارة طبعا فاتحة لا ومعنا عوائل احنا نبعد عن احد القري حوالي عشرة كيلوات راح خويي يبي يجيب مصلح اى كهرباى المهم انا قلت بدل ماجلس واحط يد على يد خلني افكر الشنطة لها مفتاح بالقرب من الدركسون طالعت تحت المرتبة لا واحصل ذاك السلك قلت تمام شبكت السلكبسلك مفتاح الشنطة ثم شبكتها بالبطارية وماتسمع الا طقيق الشنطة
الا وخويي جاى متحمس يبي يكسر الشنطة
انتهى النص اكييد طولت عليكم
العبرة عدم التسرع
ولازم الواحد يشغل مخة شوية
التأنى السلامة بالعجلة الدنامة

[مريقب العيفار]

أخوي ابوفارس

اما عن طريق البوجي

او لقيت سيارة كبيرة وعلبت منها

عن طريق كيبل خاص

[أبو يوسف]

أخوي أبو فارس

يمكن عن طريق الشكمان ؟؟


تحياتي

[سيف السيف1]

مريقب العيفار ابوهديل مالكم لوا

[عطر الشوق]

اومعكم معكم ماطور سيكل

[مريقب العيفار]

أخوي ابوفارس

تراك غثيتنا عاد:mad: :mad:

قول وخلصنا:o :o

[ابو شكاع]

الصراحة موضوع رايق بقوة

ما بين الخوف اللي جان بسبب اندماجي مع سالفة الربذي

وما بين الضحك على موقف ظنى مرزوق وحد السيف

ولا يهونون باقي الربع

لي عودة وابعطيكم موقف ما اظن انكم تتخيلونه لأنه مضحك بقوة

شكرا لكم

[ابو شكاع]

ما بي صبر جيت ابعطيكم الموقف

قبل الموقف اقول لاخوي ابو هديل ... في آخر كشته لنا بالصمان اعطيت خويي اسبير وهو اعطان اسبير وهذي طريقة ممتازة لا تفوتكم

طيب نجي للموقف

مره كنا مخيمين في مكان ما ماهو بعيد عن الديرة ............وقت ربيع وفلة وبرد

المهم ياجماعة كنا نايمين .... اول من قام من النوم انا <<<<هماي ذيب ............. على طول توجهت للماء علشان اغسل واتوضأ لصلاة الفجر

طبعا مثل ما تعرفون عندنا الدداسن ما يخلن من التوانك ........... كان عندنا ددسن فيها توانك وكان بالأرض جراكل مليانه

انا قلت ابغسل واتوضأ من الجركل ...........

انا فكيت غطأ الجركل وانا عينن مفتحة وعينن مغمضة ....وانا اللي اميل الجركل علشان اغسل

استغربت شي ......... الماء كان دافي مع ان البرد كان في عزه هذيك الايام ؟؟


انا كنت مبسوط من هذا الشي يعني ماراح ارتجف من البرد بعد ما انتهي من الوضوء

المهم انا حطيت يديني تحت الجركل .... وصبيت ماء قدر جمعي وكان دافي وانا مبسوووووووووط


وانا اللي اغسل وجهي ويبقى بعض الماء وانا اللي احطه بأفمي واتمضمض ويدخل بعضه في جوفي

انا شوي الا يحتر وجهي .........

النكهة اللي في فمي مهيب نكهة ماء

كان قاز ...... المهم وانا اللي الفضه الله يكرمكم بس بعد ماراح نصفه بجوفي وصارن عيوني حارات بقوة

وانا اللي اتهادى وانا مغمض لمين وصلت للددسن وخذ ياغسل بوجهي وعيوني وفمي ... وما فتحت الا عقب دقايق واحس ان عيوني مولعات وحارات

شوي والا يقلب وجهي ابيض من القاز ............

اللي قاموا صاروا يضحكون علي ههههههههههههههههههههه

من قال لهم يحطون القاز بجنب الماء المفروض يكون بعيد :(

هذا الموقف اللي حصل لي وهو حقيقة وما فيه اي زياده او تزييف



شكرا لكم ولاهنتوا

[حد السيف]

السلام عليكم ورحمة الله وبركاته
ابو شكاع
الله يهديك بس هههههههه
الظاهر قاذفات p52اللي بالخيمة اثرت على حاسة الشم عليك
وخلتك ما تميز

محبك اخيك
حد السيف

[ABU-AL-3eeS]

على طاري القاز كان واحد من الشباب ايام الطفولة :D
يلاحق له قطو في بيتهم والجدران عالية مايمديه يطمر
الزبدة كان فيه سطل موجود في زاوية من زوايا الحوش وكان فيه قاز
الا يوم يحده خوينا الا وهاك القطو غاطسن في وسط السطل!
العجيب ان القطو طلع على طول وعيونه حمر واعزكم الله يتاغر ويتارع :D
العبرة/ لاتلاحق قطاوة وبحوشكم سطل قاز:D

[عبدالعزيز الجريس]

السلام عليكم المواقف الصعبه التي تمر على الشخص كثيره اذا كان صاحب روحات وجيات في موسم 1421ه خرجنا انا وزميلي الى منطقه تبعد عن البيت بالظبط 184 كيلو لصيد طيور الماء واخذنا ندور في المكان وافطرنا ولم يتيسر من الصيد الى القليل وعندما اردنا العوده راينا جول من النحم يريد النزول في الماء وجلس البواردي يترس نفسه لهن وانا على السياره ابتعدت عن الموقع وانا اشاهد المنظر بحذر وانا امشي وملتفت اتفرج انتظره يرمي ومارد السياره الا المنقع وبوسط الطين وانزل من الجيب مع النافذه وش نسوي ياخوي مالنا الا حراثه من المزارع اقرب مزرعه تقريبا 13 كيلو وانا اشد واجي المزرعه فيه السوداني واقوله السالفه وقال ابشر ياخي الحراث موجود ولا اعرف اسوق الحرااث ننتظر العامل الى المغرب قلت انا اعرف اسوق الحراث يازوول(سقته مره بحياتي)ونمشي واجي خويي لقيته منسدح بالظل ونسحب الموتر وارجع الحراث للمزرعه واتشكر من الزول((اجيك مدحدر للبيت));) :D :D

[حد السيف]

السلام عليكم ورحمة الله وبركاته
تحياتي للجميع على مشاركتهم

محبكم اخيكم
حد السيف

[الربذي]

ابوشكاع موقف مضحك وجميل اذكر موقف حصل لواحد حول موضوعك بس توهق لانة غسل منه :D ولع المسكين وشتب تخبر مواضع حساسة والله لايوريك وكان ضيف عندهم ومايمون المهم تبهذل
وانا اتخيلك يابوشكاع وانت مشهب وشلون لو شبيت الضو وجاي مسرع تبي تدفا سان مولع لكن الله ستر والله يستر عليك

[ابوفزعه]

ذهبت الى مقناص ارنب انا وبعض الزملاء وفجاه وجدنا زملاء لنا في نفس المكان وكانت الساعه 9 ليلا
ونحن كنا على جيب gxوهم على جيب ربع تويوتا وعند الساعه الواحده والنصف تقريبا تقابلنا مره اخرى
فقالوانا راجعين وبعد نصف ساعه رجعنا نحن ايضا فاذا بجيب ربع منقلب ونرى من نرى هؤلاء زملاءنا
وكانو 6 اشخاص توفى منهم 2 رحمة الله عليهم وواحد في العنايه المركزه والبقيه لم ياتيهم الا حاجات بسيطه
فانعكست الوناسه الى نكد ولم انساهم الى هذا اليوم لانهم ماتو امامي الله يجعلهم من اهل الجنه
كانو من افضل الاصدقاء في ذالك الوقت وانا ذكرت هذه القصه لكي تدعون لهم بالجنه والرحمه
هذا من اصعب المواقف التي مرت علي

[حد السيف]

السلام عليكم ورحمة الله وبركاته
الله يغفرلهم ويرحمهم ويتجاوز عنهم
ويسكنهم فسيح جناتة انة ولي ذلك والقادر علية



محبك اخيك
حد السيف