إحذر مفاجآت الطريق وتجنب السرعة حتى في البر (( صور))

[ذيب البر]

في فترة الربيع الماضي الله يعيده علينا وعليكم وعلى المسلمين اجمعين

وبالتحديد بعد الحج مباشرة

كنت مسافر للقصيم بعد الفجر و وصلت مخرج تمير بدري شوي وانا ماودي اصل القصيم

الا حول الظهر وكانت عزبة القهوة معي وفطور جاهز اخذه من البيت

قلت ياولد افرق شف ايات الله في ارضه مع اني جاي المنطقة قبل الحج

بس ارض تشرح الصدر المهم فرقت وتعديت تمير يوم وصلت روضة الخشم فرقت

يمين وتعديتها وكان المنظر رائع حلال من غنم وابل ورعيان في كل مكان وبادية مبسوطين

بالربيع مع حلالهم المهم مشيت مسافة وفجأة في خلا خالي على مايقولون ما حولك زفلت ولا

سيارات ولا غيره لقيت جيب شروكي منقلب ما حوله احد اتمنى ان راعيه سالم ان شاء الله معافى

ويبدو لي والله أ علم انه تفاجأ بناقة ويمكن انه كان مسرع ما امداه يتفاداها اتوقع كذا

المهم كانت الكاميره معي وصورت صورتين وحبيت انكم تشوفونها


http://rainfood.jeeran.com/037.jpg

http://rainfood.jeeran.com/038.jpg


تحيااااااااااااااااااااااااااااتي

[مهيلان]

لا حول ولا قوة الا بالله

ان شاء الله انهم سالمين

شكرا لك يا ذيب البر على الصوره

وجود السياره ما عندها احد يفرض احتمالات :

ـــ اما ان احدهم مصاب وودوه للمستشفى .
ــ او ان السائق لحاله فراح يدور احد يعدل السياره .
ــ او تهاوشوا مع راعي الناقه ووصلوا الشرطه .

ودمت سالما

[ابو شكاع]

لاحول ولا قوة الا بالله

فعلا ................ السرعة في البر فيها خطورة

وحتى لو ما كان فيه بعارين .............. ممكن يكون قدامك حفرة ......... او شعيب ............. او مطب

او حصيان ............. او يمكن وانت مندمج ومسرع تدخل لك بشبك مزرعة الله يستر

كان يلقطون وجهك من الشبك تلقيط ...........

او تضرب لك حصاة وتعدم موترك من تحت

صار لي قصة مره ,,,,,,,,,, مسرع بالليل ومعي 200 ال ........... طبعا ال 200 ال هذي سيارة قديمة وانتم تعرفونه

ما كان بالديرة احد معه 200 ال الا انا ............ وفرعون ........... كان فرعون يركب هامان ويروحون يدورون ويتمشون ويمرون على خوفو وخفرع ومنقرع لأنهم كانو زركت وراعين بر,,,,, وفلة هرم .... عاد فلة هرم ذي عندهم بدال قولة فلة حجاج عندنا

ما عليكم من الهرج اللي فوق

الكلام اني معي 200 ال ومسرع ومعي شباب نطارد جرابيع .... قريب من بدرة ...

وما دريت وانا مسرع الا قدامي هكالبعير اللي الظاهر انه ميت من عهد كليوبترا......

واثره مزير ......... يعني منتفخ بطنه يعني له فترة ميت ...... ومير ادعسه مع منتصف السيارة

ياجماعة الله يكرمكم .............. طلعت ريحة دود .......... ما احد يقدر يتصورها

ونرجع للديرة انا وخوياي وحنا مطلعين روسنا مع الدريشة ,,,,,,,,, تقل مضيعين مفتاح موتر

وتجلس الريحة بعد غسيل الموتر ما يقار ب شهر

انتبهوا الله يرحم والديكم <<<<تأثرت بهرج خشم الحصان ...... بس يازينه من تأثر

شكرا لك اخوي ذيب البر

ولاهنت

[الجوني]

لاحول ولا قوة الا بالله صور مفجعه

لاكن مالحل ...

انا اقول اذا كان اللي قدامك (( اللي بتدعسه )) بعير او ماشابهه حاول تفاديه بأقل الخسائر

اما ان كان بس او فار او جربوع او ضب او غيرهم ... لا والله ادعسه ولا اقلب ونموت قبل كم يوم على طريق الثمامه مع الوالد نمشي بسرعه ميه وأشوف البس ( ميو = قط ) من بعيد ويوم بقا عليه حول مترين ومير يخطم ... بالحاله هذي وش تبيني أسوي أوخر عنه ... هذا اللي صار يوم وخرت عنه بغيت اخم الصبه لاكن الله فكنا عقبها حرمت أوخر عنهن لاهن ولا الجرابيع بالذات بالبر باليل وانت راجع وتمشي حول سرعه 60 - 80 يخطم جربوع فاذا بغيت توخر عنه ... سلملي على الهجة اللي بتهجبكم السيارة ... لأنه مع سرعه وارص حصحاص ...

8
8
8
كلامي هذا خذ اللي يعجبك واترك الباقي

ابو صالح

[مبرقع الذيب]

السلام عليكم ورحمة الله وبركاته

انشاء الله انهم سالمين يارب

اما ابو شكاع جرابيع ببدرة ؟؟؟؟ قبل الوادي الأخضر والا بعده ;)

والبعير منتفخ واوش:mad:

[ابو شكاع]

هلابك يامبرقع الذيب

بس وشلون تجي مبرقع الذيب ........؟

ما علينا



هالهرج وانا خوك من تقريبا 13 سنه وحول ............... او اكثر بعد وانا اتكلم عن بدرة اللي جنوب عن الوادي ......... خلف الجندل ......... عرفته ؟ :)

البعير ايه منتفخ .........ميت من مبطي

هلابك

[Khalid AlGhamdi]

الحمدلله الذي عافا مما ابتلاهم بهم وفضلنا على كثير من خلقه تفضيلا



والله يا اخوان صحيح السرعه في البر ماهي زينه خصوصا في الليل ، ولو ان الواحد يزهق احيانا من طول الطريق ويكون تعبان ووده ياصل لمكان اللي يبيه ويريح

سبق اني في الصمان من ثلاث شهور تقريبا تركت اخوياي بــ ( بربك دغيم ) ورجعت اخر الليل للرفيعه بجيب ماء لان مانا قرب يخلص وربعنا من اللي يتروشون بالماء لو انهم في الربع الخالي

المهم اني الطريق ياخذ منك ساعة ونص رايح ، ساعة ونص راجع فحاولت استعجل شوي ، ومع نزلتي من فوق واحد من هالحزوم الا النياق بوجهي والله يا اخوان اني اشوفها واكذب نفسي لوما ستر الله علي كان جبت العيد

والواحد اللي ماهو مضطر يخلي مشيه في النهار بعد ازين لان الليل ماتشوف لاربيع ولا مايحزنون

الصيف والشتاء واحد بالشوف .

[أيمن]

إنا لله وإنا إليه راجعون ..

الحمد لله الذي عفانا مما ابتلاهم به وفضلنا على كثير ممن خلق تفضيلا ..
أحسن الجميع بهذه الآراء والنصائح القيمة، ومع ذلك فالله هو الحامي وليس هناك شر محض ..
الله يقينا وإياكم الشرور ..

تحيتي

[ذيب البر]

هلااااااااااااااااااااا فيكم كلكم واشكر كل من رد او زار الموضوع


واعجبتني سالفة البعير مع ابو شكاع ومطلعين روسكم كنكم مضيعين مفتا :D


وانا بصراحه مع رأي اخونا الجوني وبقوة ان الشي اذا كان صغير وانت مسرعة

فالشكوى لله مالك الا انك تدعسه وتمشي ولا تعدم الناس الي معكم اما اذا كان كبير

فحاول انك تفاداه

تحيااااااااااااااااااااااااااااااااااااتي

[صقر]

لاحول ولا قوة الا بالله..

والله الحوادث بالبر كثيرة وأغلبها الانقلاب مثل ما حصل بالسيارة اللي بالصورة.

مشكور اخي ذيب البر على هذه النصيحة

وبارك الله فيك.

[الضاري]

السلام عليكم ورحمه الله وبركاتة

الحمد لله الذي عافاني مما أبتلوا به وفضلني على كثير مما خلق تفضيلا

مشكور أخي محب البر على التنبية والتحذير..

ابوشكاع ..

كااااااااااع .. كاااااااااع ..كعكعكعكعكعكع ..

هاتــــــــــــسوة.. <<<< هاذي عطسة من كثر الضحك

الله يغربل عدوك..

ضحكت ضحك ما عمري ضحكت مثلة ..وأنا أتخيلكم مطلعين روسكم مع النوافذ..
حتى المرة أستغربت من ضحكي (( قالت .. بس الرجال طايح بالغزل بالأنترنت .. لأنة تسمع من بعض الحريم انة فية غزل ومحادثة وصور بنات بالأنترنت .. ومن هالكلام ... المهم ما أقتنعت يما وريتها قصتك أنت والجرابيع .. الله يقلعك))

.. على طاري الريحة .. ذكرتن بالهالقصة..

أشوف بعض الشباب معلق ذنب حصني ( ثعلب ) معلقة في المنظرة اللي قدام ..

قلت .. ياولد منظرة شيء .. خل نعلق واحد ونزين منظر الغمارة .. والسيارة ددسن موديل ثمانين ( ياربي لك الحمد )..

المهم رحت أدور حصني ومن حمد ربك لقيتة وصدتة .. لقيتة مسير على الدجاج بالمزرعة .. وأستقبلتة بالشوزر ..خذيتة وقطعت ذنبة وغسلتة بصابون وعطرتة .. وعلقتة بالمنظرة..

صار شكلة ... ياسلام

قمت أفر على الددسن بالحارة .. قدام عيال جيراننا .. وامر من عندهم.. ولا أسلام عليهم .. بزعمي وين راسي ( من قدي )..

المهم من باتسر.. ويم قربت من السيارة لقيت القزاز مليان ذبان ( الله يكرمكم ).. قلت غريبة .. ركبت السيارة

والا هاكالريحة االمعفنة.. ريحة شيء فاطس بالسيارة .. وأسوق السيارة وامشي طبلونة .. وفاتح النوافذ

علشان تطلع الريحة.. ومطلع راسي مع النوافذ .. من الريحة الشينة ..

وعل هالحالة ( رايح ... جاي ) قلت يمكن الريحة تروح ..

بعدين لقيت أن سبب الريحة ذنب الحصني .. خذيتة وأنا متلطم وحطيتة بالزبالة .. وجلست الريحة بالسيارة مدة طويلة..

تحياتي للجميع

[سماوي]

نسأل الله العافية ... عسى الله يستر ..

هالرويبط يمكن يعقّل بعض الغافلين ... وغديه يهدّي من طفاقة المطفوقين

http://www.mekshat.com/vb/showthread.php?s=&threadid=13886&highlight=%C7%E1%C8%D1

مشكور أخوي على هالصور ...

لكن لا تصير أنت اللي منكفي ... ومن الهبلة صوّرت البعير معه :D :D