سخنا الماء وطار الديك............

[حد السيف]

السلام عليكم ورحمة الله وبركاته
اخواني اعضاء مكشات
اسعد الله اوقاتكم بكل خير

سخنا الماء وطار الديك

لنا لقاء بعد عودتي من الطائف ان شاء الله
يوم السبت القادم
واعلمكم بسالفة العنوان


محبكم اخيكم
حد السيف

[ريع الدياب]

بسم الله الرحمن الرحيم
السلام عليكم ورحمة الله وبركاته

ايش هادا يا حد السيف ؟

أسلوب جديد فى الاثارة ؟ بعد ما صرت عضو مجلس ادارة ؟

ولا يعنى بتحجز عنوان ؟

ترجع بالسلامة من الطايف ... (( عسى بس ماانت رايح تودى لهم الاستكر))

لا تنسانا من البرشومى والحماط والعنب

[أبو يوسف]

تروح ترجع اخوي حد السيف بالسلامة

وحنا بالنتظارك

الله الله بالصور السنعة


تحياتي

[خشم الحصان]

الاخ الغالي
حد السيف
السلام عليكم
وين يالحبيب وشلون بتسافر يعني هالسفره هي من كيسك ولا من كيس المنتدي نبي نعرف انا مثلك عضو اذا كانت من كيسك الله يقويك واذا هي من كيس المنتدي يعني(انتداب) ممدك يرشحونك الا منتدبينك وش انت مسوي المهم نبي علي دربك كرتون برشومي لبو شكاع ولا تقشره خله كوده ياكله بقشره وكرتون عنب ومر علي حقين موية الورد وجب غرشتين اصليه سبدي عليها حراره ومر وحس ان رجلي فيها نمل وان مرية مكه الله يشرفها ادع النا وجب جركل ابو 50 موية زمزم وان ماجبة ترا اي اقتراح في المجلس ابي اعترض عليه
عموم الله يردك سالم وغانم يابعدهم والله يغفرلك ورفع من قدرك
اخوك
خشم الحصان

[المربد]

استودع الله دينك وامانتك وخواتيم اعمالك ،
ولا تنسانا من دعائك

وما نبي تجيب معك شيء ابد ، بس لا تبطي علينا

[ابو شكاع]

بالسلامة ياخيي

بالسلامة ان شاء الله

وترانا نحتريك

خشم الحصان ..................... تحسبن مثلك اول ما سمعت بالبرشومي رحت تطعم هههههههه

[الضاري]

هذا بركان الثاني ..

حط عنوان الموضوع ... وحط رجلة..

طيب وين طار الديك .. يم الجيران والا وين ؟؟

عساكم مسكتوة ؟؟

[حد السيف]

السلام عليكم ورحمة الله وبركاته
الاخوة الاعزاء
صبحكم الله بالخير
خلونا بالاول نرد على الاخوة ثمن نقول لكم السالفة
ريع الدياب
هلابك والله وكنك عارف والسالفة اكبر من كذا
اما بخصوص ماطلبت تو الناس رحت للحلقة اتمنا ماتفسر شي ثاني وش اسوي هذا اسم سوق الخضار بالطايف البرشومي مقطوف قبل وقتة واخضر مالغ مالة طعم ويبيلة من عشرة ايام الى خمس عشر يوم
وابشر بسعدك يالغالي
ابو هديل
مرحبتين كبار بكبر حبك لهل المنتدى وهلابك والله يسلمك من كل شر
خشم الحصان
محبوب الجميع انت يبلك رد لحالك وعلشلن مايزعلون الاخوة الزملاء ابرد عليك من ضمن ردودهم يالغالي
اولا الانتداب هذا لا هو من كيسي ولا من كيس مكشات رغم انة يقدر
هذ الانتداب من كيس الوالد الله يطول بعمر الوالد على الطاعة ان شاء الله
واستغليت ها الانتداب لمصلحة مكشات ولكن يافرحة ماتمت والبرشومي اصبر على رزقك والجايات اكثر وماء زمزم ان قالة الله تشربة قريب وماء الورد والكادي ياصلك الى حدك ان شاء الله يالحبيب
جعل من عقبوك بالجنة انت ومن تحب واللي ماتحب من المسلمين كلهم بالجنة
وبعدين من قالك ان ابو شكاع ياكل البرشومي بقشرة اللي اخبرة ياكلة بشوكة وملعقة من زود التمدن والذرابة
تحسبة مثلك طابخة تحسبة مرقة يوم قيلك هذا بطاطس اهل الطايف الله يهديك بس
ادري لو اني حولك ما يفكني منك السمح وطاقمة الاداري :D :D :D :confused: :good: :D :mad: المشرف على المنتدى
ياحبيلك وحبي لخفة دمك وكبر قلبك وهذي بوسة على راسك كلش ولا خشم الحصان
وعلى فكرة خشم العان وش يقربلك يافكيك وين الباب
المربد
هلابك والله والقلوب عند بعضها يالغالي
جعل من عقبوك بالجنة ويكفيني ها الحب اللي غمرتوني بة
ابو شكاع
هلابك والله ورسالتك وصلت والسبة الكيبورد اللي بالكفي شوب ممسوح والله لايوريك الا النور حروفة ممسوحة كنة درجة الجوزات بالرياض ويبلة مطرقة علشان تضغط على حروفة
وبعدين وراك على حبيبنا خشم الحصان يبي الفزعة من منك وصرت فازعا علية
البرشومي توة والجايات اكثر
اسعدتني رسالتك
وهلابك والله
الضاري
هلا بك وهلا باهل حايل كلهم
لا يالغالي ماطار للجيران وابشرك مسكناه
الديك تجيك سالفة
سالفة سخنا الماء وطار الديك
كنت بالاسابيع الماضية على تواصل بالهاتف مع احد الاخوة اصحاب المحلات بالطائف وكانت البشرى انة سوف يفتتح محل جديد و بي موقع ممتاز بطريق شهارالمؤدي الى الردف وهذ المحل صاحبة حرص على افتتاح المحل مع بداية فعاليات مهرجانات الصيف الطائف احلى وكنت على تواصل معة لاقناعة بوضع استكرات مكشات عندة لانة سوف يتم توزيع جوائز عند الافتتاح وكان منبع حرصي على ذلك اقناعة على ان يكون من ضمن الهدايا استكر مكشات وتم الاتفاق على ذلك
بلغت الاهل اذا فية شي يبي يرسلونة معي الى الطائف وخصوصا ان السيارة فاضية قال الوالد الله يطول بعمرة على الطاعة خذ ها الاغراض وحطهن ببيت الطايف علشان اذا سافرنا تكون السيارة خفيفة
قعدنا انحمل الاغراض وهذ نبية وهذ نحتاجة وراح تحميل السيارة سواليف والكرتون اللي بة الاستكرات قدامي
هاه بقي شي
قالو لا توكل على الله
بذهابي الى مكان الكرتون رن تلفون البيت والا صوت احد الخوال بالطايف سمعنا انك جاي بعد السلام
قلت ان شاء الله
قال تمر على افلان قلت ابشر فية شي ثاني
قال لا سلامتك توصل بالسلامة
شغلت السيارة وطلعتها من الكراج
والكرتون ببالي واساس السفرة من اجل ذلك
ولما وصلت الطائف كانت المفاجئة ان الكرتون منسي بالرياض ولا حملتة
كيف نسيت الكرتون مدري
ووش اللي نساني اياة الله اعلم
وراح كل الجهد هباءً منثورا
واول شي خطر ببالي
المثل
سخنا الماء وطار الديك
وامسحها بوجهي يالسمح
ومالك الا اللي يطيب خاطرك



محبك اخيك
حد السيف

[الربذي]

هذا طال عمرك بطاعة الله ياحد السيف من زود الحرص وكل شي يزيد عن حدة ينقلب ضدة ماعمرك طلعت سيارة من الوكالة لوهي صني ومن زود حرصك كل شي عدك تصدم تصير عليمي اتحفتنا بقصتك المملوحة
محبك اخوك الربذي :eek:

[* ضب *]

اخوي حد السيف
ترى ما هوب لازم ديك... اذا طار الديك حط اي شي قدامك

انا اعرف وش نساك الكرتون
انت كان همك منصب على ماذا ستفعل في المجلس القروي لمكشات بعد ان تم اختيارك
لكن تصرفك هذا لا ينبغي ان يبدر من مسؤل .. لذلك يجب النظر في مسألة ترشيحك
ووضع عضو اخر مكانك .. تنطبق عليه مواصفتي ...

صورة لمكشات ..
صورة للسمح...
8000 صورة للاعضاء
صورة للعضو الجديد * ضب *
صورة للمذكور
7
7
:D :D

اخوي حد السيف

العوض براسك
ولا تحزن على ملا يستحق
ولو ما جا من المشوار الا انك وديت اغراض الوالد هذا يكفيك
واذا بتروح مرة ثانية علمني عندي بعض الشغيلات تبي من يوديها .


تحياتي لك..

[بركان]

اخوي حد السيف
سافر وترجع يا حبيبي على خير ونشوفكم مع ديككم عقب السفر بالسلامه

[حد السيف]

السلام عليكم ورحمة الله وبركاته
الاخوة الاعزاء
الربذي
علي فكرة الصني نقعوها بالماء وكبرت:D :D :D :good:
ضب
آهـ من ودالك لمحمية محازة الصيد وتشفوف اللي ماهوب عبى بالك وتعثي فية
ما باليد حيلة
واغراضك خلهن عند الباب من داخل لااحد ياخذهن وتحسبا انا اللي مريت واخذتهن
بركان
بشر وش اخبار دبي
والظاهر بعد المسافة من كثر ماسمعت الاغاني صاركل كلامك شعرفي شعر او له اشرلي بالكلنيكس واخرها مشاركتك
لكم تحياتي
والعشق الله يكفيكم شرة



محبكم اخيكم
حد السيف

[الضاري]

الله يستر عليك ياحد السيف..

أنا قلت الرجال طايح بطبخ الديكة بحرور هالصيف ..من قل الصيد ..

أثري الديك طلع( مثل )..

[ميراج]

اخوى حد السيف السلام عليكم ورحمة الله وبركاته

تعيش وتاكل غيرها انت اشوى من اللى راح يوم وصل الحدود مع الأردن ولا الجواز فى البيت فى الرياض

يعنى كنك يا بو زيد ما غزيت انت اشوى يابو سليمان وديت اغراض الوالد

تقبل تحيات ميراج

[nooh79]

السلام عليكم ورحمة الله وبركاته
الاخ حد السيف نحمد الله على السلامة .
اخوك بعدك قضيت اسبوع بالطايف ومريت ولقيت من برشومي ( بني قريش ) الزين ، وكان الكرتون منه 20 ريالا بس فوق كبير واللي تحت كله صغير مثل الحشف، وهناك بعض الكراتين لو دورت زين وقيمته 35 ريال (مالك فيه نصيب ) .
انا وصوني شباب على ان أجيب لهم برشومي ولكن أعتذرت لهم وقلت لهم لو حملته بالسيارة فان الشوك اللي بالبرشومي يطير منه ويصيب الاهل والاولاد .

[أبو فراس]

السلام عليكم ورحمة الله وبركاته

اخوي حد السيف

اخوك ابو فراس رقبته سدادة انا ابروح للطايف السبت الجاي ان شاء الله اذا كنت تبين اوصل شي على دربي

بس هاه ماهنا شي ببلاش ... لاني يخوك ما اعرف شي بالطايف ... بس بعد الترقية بالوظيفة واعدنا البزارين وامهم برحلة نوع ثاني عن رحلاتهم السابقة ولذلك بودي انك تدلنا على المحلات والمنتزهات الي تخليهم ينبسطون ويدعون لك

تحياتي للجميع ... ولا تطلبون شي من الطايف لانه ما معي محل لبرشومي ولا غيره لان السيارة مليانه ملابس شتوية لان المعزبة تخاف على هالبزران من البرد وتقول ما راح يتعب معهم الا امهم (صدقت)

[ابوفزعه]

انت ماسمعت بشخص يدور ولده وهو بيده


فمابالك بكرتون

[الرماي]

الله يسهل دربك

[الجنوبي]

بسم الله الرحمن الرحيم
الحمد لله على السلا مه اخوي حد السيف
وخيرها بغيرها ...وان شاء الله مشوارك ماراح بلاش
والا ستكر ..يدبر امره .............................
.............الجنوبي...........