الشاهين الجير

[قشاع الرمث]

السلام عليكم ورحة اللة وبركاته

سؤالي عن الجير الشاهين هي اصلا طير وحش
والا من هالطيور التهجين وطيور المزارع .

والي جرب هالنوع من الطيور يعطينا المميزات والعيوب
مع الشكر الجزيل . لاني حاط عيني على وحده وقلت
اشاور قبل ما اسوق الدراهم .

[راعي مزيون]

السلام عليكم ورحمة الله وبركاته

اخوي قشاع الرمث

الجير بشكل عام هي من انتاج المزارع
وهناك مزارع للتهجين انتاجها طيب ومميز وتفعل اغلب طيورها فعل طيب
وهناك مزارع يظهر في انتاجها بعض الطيور والباقي يفشل
وهذا يعتمد على عدة اساليب مثل طرق تطيرها وتعليم الصيد ........... وغيرها


وأهم مايميز ا لجير الشاهين بشكل عام:

السرعه ( السبق الفارط ) والقرنسه قبل الشاهين البحري في الغالب .
ويقولون ان الجير كل ما قرنس كل ما زاد سبقه وهذا حصل عندنا .
ولا تهاب ( الشجاعه ) .

عيوبها :

الغباء الزائد
والجير يبغي له صقاره خاصه لانه ان قصرت عليه مانفع وعاقبك بالكفخان
وتملع وبعضها مايعلق بالصيده بسرعه .
قصر النسم ( التعب ) ولا يتحمل الحر .


هذا على حد معرفتي واسمحلي على القصور .

وشكراً

[لهاب]

السلام عليكم ورحمة الله وبركاته

أخوي قشاع الرمث والله ان اخوي راعي مزيون كفى ووفى ولاعندي شي ازيده على اللي قاله

لكن اذا فيك شريه للجير ولا انت حاب هالنوع انصحك نصيحه تكفى لا تشتري الجير الا من شخص ثقه

ويكون الجير هداد وكاد وانت تعرف راعيه.

وأذا عندك كم درهم هذي نصيحه ببلاش وقبل النصيحه تشرى بفلوس أتعب على الطير الأصلي
( والأصلي أحسن من التجاري )


مع التحيه

[سنافي]

الجـــــــــــــير

هو فصيلة من فصائل الطيور السيبيرية ومناطق الشمال البارد.
ويوجد عند سمو الأمير نايف طير سيبيري ( جير ) بكر خلوي وحش ولا يزال موجود لديهم وصقارة عبيد الودايع المري. هذا النوع موجود كما ذكرت سابقا في المناطق الشمالية من اوروبا وأسيا ولها مواكرها الخاصة.
اما التهجين الربع والثلث والنصف والثلاثة أرباع المشهورة فتسمى تهجين الجير وذلك بأخذ حيونات منوية من الطير الأصلي الجير وبنسب معينه وعمليات فصل بعض الجينات في المختبرات يتم تلقيح الأنثى من الطيور المراد تلقيحها وهي بالغالب الشاهين بحيث يأخذ الإنتاج بعض خواص الجير الأب وخواص الشاهين الأم ... وقد رأينا عمليات التخصيب والتهجين في ( ند الشبا ) بالإمارات وهم متقدمون في هذا المجال.

اما التفريخ ( حر - حر ) ( شاهين - شاهين ) فهذه طريقة بسيطة جدا وهي حبس الطيور في موقع مناسب يتم التشابط ( التزاوج ) بين الطيور طبيعيا وفي الغالب يتم تزاوج الطيور الملونة لتحسين لون الطيور المنتجة وقد اثبت الدكتور الألماني نلسون جدارتة في هذا المجال وقد شاهدت إنتاج مزرعتة في معرض ابوظبي للطيور والرياض لدى الصقر والصقــار ( الوكيل العام بالمملكة )


ارجو انني قد اجبتك على سؤالك ........... هذا في حدود معرفتي

[أبو رداد]

بسم الله الرحمن الرحيم

السلام عليكم ورحمة الله وبركاته

الاخ العزيز قشاع الرمث ... ان فصيلة الجير شاهين لاتكون من الوحوش .. بل هي من انتاج مزارع التهجين .. كما تفضل الاخوه الذين سبقوني بالردود ... ولكن هناك ملاحظتان ... الاولى / المزرعه التي انتجته .. اذا كانت قد عملت له (هوك).. بمعنى اطلقته عند تمكنه من الطيران... فهذا الطير نادرا مايخيب وتكون افعاله كالوحوش......
والثانيه / الشخص الذي صقره يوم كان فرخ ... اذاعرف صقارته الصحيحه ... فانه يكون طير فعال .. ويبقى فعال الى ان يموت او يضيع (لاقدر الله)....
اما مسألة المحبه فانها من الله ... مهما يفعل الجير.. فانه لاينومس راعيه او صقاره مثل الوحوش ... هذا رأي .. والله اعلم..

[المري]

ماشاء الله الربع كفو ووفو بالردود

وانا اقول مثل ماقال اخوي ابو رداد ..

وجزاكم الله خير...............


اخوكم / المري

[قشاع الرمث]

السلام عليكم ورحمة الله وبركاته

والله ما قصرتو .
يعني مل تن صحوني بهن .

[حزم النيران]

الاخ الكريم قشاع الرمث
انا جربت الجير وهو عدة انواع وهذا يعود لتدريب وللمنتج وانا جربت التهجين الالماني وهو ممتاز
ولاكن كما قال الاخوه يجب تعرف راعي الطير جيدا
وشكرا