تحبون العلــوم الطيبة

[سنافي]

على طاري السوالف وعلوم المقانيص....طرى علي سالفة مقناص عـــــــــــــــــ1423ـــــــــــام
كنت مقيض طير شاريه بـ( 15000 ) في آخر الوقت طير أخضر لونه عـــادي جدا أسواء ما فيه لونه اما مــا عدا ذلك فكل ما فيه فوق الزين ( ثنداه, هجر, قحوف, منسر, كف ) والأحسن من اوصاف الطير علومة ... الطير يلحق شـــارد أمس وإذا راحت الحبارى وعقب الطيور كلها فرّع به .....وإن الله حطها في عينه إعتبرها في العلقة وبشر الشايب بالمرقة ......المراد ان الطير منوة الصقـــار.
أراد الله ان الطير يمرض في آخر المقيض وينقض ويطلع ريش الطوايل مصــــعد ولا صار الطير يطير طياره المعروف حتى باقي الريش صار متنتف وخشن ما يساعد الطير على الطيران.....
راح الفقير لله يدور طير ما خليت مكان ولا طير معروف إلا وصلتة ,,,,, وكنت مجهز نفسي لمقناص العراق وصار منتصف رمضان ما عندي إلا طير مجهول شاريه واحدٍ من اخواني الصغار من أحمد الحسن ومعطيني الطير عوض في طيري ....... ويذكر لي ابو دغش طير عند زياد الحربي .... طير صغير لاكن تهدة ولا تهد فرخ الشاهين من زين طيارة ولحوقة وطلعة,,,, رحت للرياض وجيت زياد في المحل الجديد ( توّه فاتحة ) وأخذت الطير بالمقسوم,, وجيتك راجع للدمــــــــــام وفي اليوم التالي دعيت الطير بسبب ولا أعجبتني نفسه طبعا ما عطيته علف وبعد المغرب عطيته كسرة شناذرة وحذف الشبيكة. وفي اليوم الثالث جيت للسوق نجتمع مع الصقاقير ونأخذ علومهم وبعضهم عرف الطير وذكروا علومه ..... وجــاء وقت صلاة العشــاء ركزت الطير وطلعت للمسجد ... فإذا بأحد الأخوان ( ابو علي ) يسألني هل الطير للبيع؟ قلت انت عندك طيورك وش تبي بزود الطيور قال الطير يبيــه ( ابو ســالم ) ابو سالم ؟ قال نعم ذاك الشايب ... قلت منهو ما أعرفه؟ قال هذا خـــال خوينا ( ابو فهـــاد ) توه جاي من قطر وطيره موسه لا يزال يســوق ويبي طير.... جيت ابو سالم وحلفت عليه بالطير وحلف هو كذلك انه ما يأخذ الطير الا بقيمة ... قلت انا شاري الطير بكذا ( 0000 ) قال وهذا آلافين مكسب ... قلت الطير عندك مكسب عطني رأس مالي وخذ الطير وحلف بألف ريال ... المهم راح الطير ..... باقي خمســـــــة أيـــام على موعد المقناص في العراق .... ما عندي إلا المجهــــــــــــــــــــول........

هل إستمتعتوا بالســـــــــــــالفة وتبون تعرفون ما ذا عمل المجهــــــــــول جنوب محطة ( 160 ) في وادي الحجية جنوب غرب الرمــــــــــادي؟


للحديث بقية

[بوصقر]

ماقول الى الله يهديك يالسنافي

نتضر الهدد وخرته للحديث بقيه لكن لله كريم في انتضار اعلوم المقانيص

[أبو رداد]

السلام عليكم ورحمة الله وبركاته

الاخ العزيز سنافي ....عز الله انها معاناة .... يكولون .. لوجاك الليل تحزم بحزام ذيب .. وعلى كلام اهل الامارات وقطر والافلام الي نشوفها.. حباري العراق .. ليل الحبار.. وانت يخوي جاينه بطير مجهول..
ووين !! بديرة الاعوج !!!...
يخوي اذا مجهول صاد بديرة الاعوج طيار .... لاتدور وراى طير .. بس علمني الحبار لقيتوا بشعيب الغدف لوبطعوس الرمل... لو قرب الخبره ام شفلح ...
وبالمناسبه هذه المنطقه حبارها قليل وشرد .. واني اسميها قاعة الامتحان...

[المري]

أبو ناصر هذا بلاء ابو عقاب اذا زانت السالفة قالوا : للحديث بقية..



وفي انتظار يابو ناصر

ولا تطول علينا.....

اخوك / المري

[الفيتو]

السلام عليكم ورحمة الله وبركاته

طيب .. طيب .. يالسنافي إما عطيتك ردها . هالحين تقول تحبون العلوم الطيبه
وتقول اخذ اخوك من الحسن طير ونعيش السالفه خليتني اقول اعرف الحسن
اسلم ثم تقول ابودغش وافكر منه ابو دغش هم زياد الحربي ثواني قاعد افكر
من زياد هم ابوعلي قلت اكيد القحطاني هم ابو سالم وابوفهد لين قلبت راسي
والرياجيل بيروحون للعشاء وينادوني واقول زين زين عشان اعرف النهايه
والله اني ما اظنك تسوي هالسواة
والسلام
الفيتو
http://www.mekshat.com/pix/upload/images5/mk8575_w.jpg

[سنافي]

ها ها ها ها
والله اني صرت مثل الخبــــــــــــــل .... جالس أضحك ما عندي أحد

-*- ابو صقر ...... ابشر بالعشـــــــــــــــــــاء

-*- ابو رداد ....... لا تستعجل ( على كيفك ) وأنا أخوك ابشرك ( هوايا حبر ) وانشد ابو ثامر الشايب اللي في الرطبة.
( على كيفك ) يعني على مهلك.
( هوايــا ) يعني كثير.

-*- المري ...... ابشر بالشحــــــــــــــم

-*- الفيتو ...... ولا يهمك ما لك إلا أعزلها لك سلم.

[سنافي]

تحبـــــــــــــــون العلوم الطيبة

يوم جاء يوم 25 رمضــان ( الفيز جاهزة من السفارة في البحرين والتصريح معنا من إمارة الشرقية ) سرحنا الصبح عقب السحور معنا طيورنا ... ( المجهول - فلاح ) و ( فرخ شاهين - منوه ) وتوكلنــا على الله سيارة وحدة ( نيســان 2003 ) جديد ما مشى إلا ( 2000 كلم ) افطرنا بعد عرعر بـ ( 50 كلم ) وتوكلنا على الله وصلنا الحدود ( الحديثة ) حوالى الســــاعة ( 02:00 ) وكــــان الجو بارد المربعانية نزلنا في فندق قبل الحديثة وتسحرنا وصلينا الفجر ثم رقدنا الى الساعة ( 07:00 ) وحركنا بإتجاه الحدود ........ ما لكم بالطويلة وتمغيط الحتسي ( هذي على شأن الفيتو يلحق العشاء ) وصلنا رويشد ( الحدود الأردنية العراقية ) الساعة الثالثة عصرا وإستقبلنا الأخ ( 000000 ) والأخ ( 000000 ) وأخذوا الطيور والأجهزة وعدة المقناص لتهريبها داخل العراق وتواعدنا في الرطبـــة عند معزبنا وهو رجل معروف في العراق ومن أشهر الصقاقير وتوكلنا على الله متوجهين الى الحدود العراقية مركز ( طريبيل ) وبعد حوالي ( 5 ) ساعــات من الإنتظار والمراجعات وتختيم الأوراق دخلنا الى العراق أذان المغرب وطبعا أفطرنا في السيــارة فطور سفري وصلنا للرطبة بعد صلاة العشــاء ولا لحقنا إلا على صلاة التراويح ..... مع الترحيب والحفاوه من معازيبنا قلطونا على الشحم وفرشوا فرشنا وعند الصباح وصلت طيورنا وكانت كما تركناها في أقفاصها ريشها سلم ولا هيب متملعة.......... المهم جهز معزبنا السيارات والعزبة وعدة البر والمقناص ( سيارة العزبة جمس حوض ) وسيارة معزبنا ( جي اكس ار ) وسيارتنا وركبنا الأجهزة وكان في كل سيارة رشاشين كلاشنكوف وزهابها وشوزن وزهابها وبلجيك وزهابها ( يسمونها برنو )
انا وخويي في سيارتنا ومعزبنا مع ولده ( عــــامر ) في سيارتهم و ( عمر وثاير ) في الجمس وسرحنا مسراح بعد السحور بإتجاه الرمادي طريق بغداد ( الدولي ) وعند محطة ( 160 ) فرقنا جنوب في منطقة يقال لها الحجية وهي منطقة صخرية وعره جنوب وادي الحجية وأول جول الساعة ( 3 ) العصر كان ( 7 ) طارت من تحت السيارة .... هدينا الشاهين ( فلحـــا ) طير المعزب ومشاء الله طرحت وحدة وعزلناها حية بنعلم الطير المجهول ( فلاح ) وطبعا سبرنــــــــــا الـ ( 6 ) ورحنا وهدينا ( منوه ) طيرنا الشاهين ومشاء الله عزلت لها وحدة من الست وطرحتها والله ان السيارة ما تحركت أكثر من 100 متر صارت ترددها علينا وطرحتها نسرناها ورحنا على جهة الخمس الباقية وطرحنا الله في جول حوالي ( 9 ) طارن كلهن من بعيد طردناها بالسيارة وحذفنا ( منوه ) ومشاء الله أرتفعت الشاهين وخالطت الجول والله انها تلعب عليه وتكسر وسط الجول ..... لين إعزلت وحدة من الجول وقامت تضربها وترتفع وتأخذ منها ريش وتنجم ...... الحبارى انقطع ظهرها ونزلت بالأرض وقامت تكّبر والشاهين تنشّها وتماسحهـــا ( تبيها طيار ) طيّرنا الحبارى والشاهين مخالفه والحبارى قضبت القاع ( مسوحل ) بعد ما نزلت اللي في بطنها ( تكرمون ) والشاهين ما عاد رغبتها وراحت تكسر وتلعب على الهواء ..... خويي هو اللي يسوق راح يطرد وراء الحبارى وخويانا ورانا .... قلت يأبو ( .......... ) انت ليش تطرد الحبارى ؟ خلنا ندعي الشاهين ونقضبها ... قال إي والله صحيح .... قبل ما يوقف طرى علي عذب السجـــــــــــــايا المجهول ( فلاح ) قلت يأبو ( ...... ) سق سق وراء الحبارى بـ أفرع بفلاح ................ فلاح السعد ساعة فرعت به ( لا كنه يتيم مبشر بخـــالته ) قضب القاع والحبارى والله انها كنها ( ابو خصيفان ) فوق ..... يوم صارت الحبارى فوقة قام يزم جناحة ويرتفع ويشق الســـــــــــماء .... الحبارى شافتة لا والله يوم أختلف طيارها وقامت تصلفق وتدلي رجليها وتلفت تبي القــــاع والطير مشاء الله يعنز لهــــا .... إلين دخل من تحت جناحها وعلقها فوق يمكن بإرتفاع 40 م والله اعلم ويوم اقبل على الأرض فكهـــــــــــا ورماها ( موسة أخضر ) ونشها اول مرة وهي عادها دايخة جناحها منكسر ويقوم فلاح ويعقرب عليها ويقضب جناحها ثم بدل في راسها.

هذا كان اليوم الأول فقط







للحديث بقية

[بوصقر]

نعم هذي للعلوم الطيبه كفيت وفيت

وننتضر المزيد

[ميراج]

بيض الله وجهك عز الله انك سنافى على اسمك

مشكور سالفه ممتعه لاهنت اخوى

تقبل تحيات ميراج

[لهاب]

السلام عليكم ورحمة الله وبركاته

عزالله انها علوم طيبه ،،،،،،،،، وبيض الله وجهك

وانا بروح هالسنه للعراق ماتبيع لي فلاح وتخليه يشفيني بهالمخاريش .

مع التحيه

[المري]

في انتظار حديثك يابو ناصر..


اخوك / المري

[ابو عايد]

وش ذا الزين يا سنافي من ها العلوم الطيبه وينك من ذو مبطي خاشن ها السوالف الي تشرح الصدر

يعطيك الف عافيه

تقبل تحيات // العاشق الولهان

[سنافي]

_*_ ابو صــقر : ابشر

_*_ ميراج : لا شنت

_*_ لاهـــاب : الطير وصلت علومة لشرواكم وأرسلة الشايب له والهدو عندك او عندة ما هوب خسارة.

_*_ المــري : على خشمي

_*_ ابو عــايد : ابشر بالسعد لا جاء مجـــــــــــــــــال والزين منك وعندك

شكرا لكم على متابعتكم وإهتمامكم والزّود عندكم وانتم تستاهلون.

[سنافي]

السلام عليكم

طبعاً بعد الهدد والنومــــاس, مــا ودك إلا تشوف حالتنا طيورنا صايدة وشايفين أجوال الحباري ..... الله يعيد ذيك الأيــام ....
المهم طرّف النهــار والأرض اللي حنا فيها ما فيها لا حطب ولا ذرى ..... قال معزبنا نبي نتجة شرق حوالى (30) كلم في أرض فيها فياض رمث وحزوم زينة بنلقى الذرى والدفى ..... وتوكلنا على الله ومشينا وقبل الغروب في طرف الرمث نفجت أرنب ( عدنــــــــــــــــة ) وقامت تخبط بين السيارات ( غرّ ) ما تعرف السيارات ولا بعد ذيرت هد معزبنا عليها جير ومشاء الله قشــها وقش معها ثلاثة جرووووووووم رمث من طفاقة ذاك الجيـــر.

شبينا النار ونزّلنا الدلال وزهاب القهوة وأفطرنـــا فطور خفيف عند مكان الهدد ثم تحركنا ندور المعشى ..... وصلنا لمكان زين وانتم خابرين كل واحد يقول المكان الزين عندي ..... نزلنا أغراضنا الخفيفة وبدءوا ( عــمر وثاير ) يزينون الأغراض ويرتبون العزبة ويجهزون للعشــــــــاء ... أمــــــــا انا و عـــــــــامر فذهبنــا نجيب العشـــاء نبي ( ثلاث ) أرانب مع اللي معنا من الصيد...... خذينا الجيب وتوكلنا على الله وعلى بعد (300 ) متر تقريبا شفنا عدنة معشية ...... انا خفت انها تزبن الوعر رديت الموتر بنمرة ورحت بإتجاه العدنة وانا أصيح على عـــــامر ( ارم ارم ارم ..... لعنبوك ارم .. أرم الله ياخذ عمرك ) وعــامر حذف البندق عند رجليه وتمسك وهو يقول ( على كيفك يابو ناصر ... على كيفك يابو ناصر ... وقف ... وقف .... وقف ) قلت اكيد انه ما يعرف يرمي والموتر يمشي ... وقفت وقلت له ليش ما ترمي ... اما ارم الصيد على طول او عطني البندق انا بارمي وانا اسوق ( كثر منها ) المهم العدنـــــــــة سلّمها الله من عامر وابو ناصر ............قال يابو ناصر إذا شفت الأرنب اقرب منها بشويش وقف ... ابدا ما تروح ... قلت له انت مجنون او انك جاهل بالأرنب ... يا ابوك لمن صرّت اذانيها وحطتها على غاربهـــــــــا والله ماتلحقها ... قال هذا عندكم وعند ارانبكم اللي نصفها ارنب ونصفها جني ... اما ارانبنا ما تروح ما تعودت على الطرد والرمي ..... قلت ابشر بسعدك ... دجنــــــــا حوالي (10) دقايق ..... شفها ... عـــانها ..... عانها ... قال على كيفك يابو ناصر وقف وقف ... وقفت .. مدّ البندق والأرنب واقفة على بعد ( 50 ) متر ... رماها عامر وصادها ........نزل عامر ( بوّلهــا ) وانتم بكرامة وحللها وحطها بالكرتون ... وعلى نفس الطريقة صدنا ثلاث ورجعنا للمعشى والعيــــال يجهزون قدرهم عطيناهم العشى ..... وتعشينا ( عشى سحور ) وقبل الفجر قمنا وتسحرنا سحور المقناص ( باقي العشاء ) وصلينا وتوكلنا على الله ..... بإتجاه المكان اللي كنا فيه أمس .... وذاك اليوم هدينا أكثر من ( 50 ) هدد والطيور صادت كلها ( بعضها اربع وبعضها ثلاث ) واللي راح واجد ........

[بوصقر]

والله ايعود عليك ايام الهدد والصيد ونت سالم على طاعته

[أبو رداد]

السلام عليكم ورحمة الله وبركاته

الاخ العزيز سنافي .. تستاهل والله يهنيك ويعود ذيك الايام عليك .... ولو قايل غير ابوثامر معك .. كان ظل عندي شك ... بس هذا الرجال انا اعرفه .. راعي طير وويندل الحباره وين تسرح وين تمرح ...
ولو قايل لابوثامر عبرني نهر الفرات صوب الجزيره كان شفت حبار اكثر ..ولو قايل لابوثامر عبرني نهري الفرات ودجله كان شفت (هوايه) .. يعني اذا الجول اقل من ثلاثين حباره ... وتلاقي اربع او خمس جوال في اليوم... مانسمي (هوايه) ...
وبالمناسبه الاسبوع القادم عندي سفره لصيد الغزال وانشاءالله اخذ ابو ثامر معي ان كانك توصي شي انا حاضر...


ملاحظه الى الاخوه في المنتدى / الحديث الشريف يقول انما الدين النصيحه .... المقانيص في العراق خطره في الوقت الحالي ... الا اذا كان عندك معزب شروا ابو ثامر .. راعي طير يندل ويعرف الزين من الشين (اهل مكه ادرى بشعابها).. مع تمنياتي للجميع بالتوفيق ...

[ابو عايد]

الأصل كُتب بواسطة بوصقر
والله ايعود عليك ايام الهدد والصيد ونت سالم على طاعته

[سنافي]

ابو ردّاد

جزاك الله خير وكثّر الله من أمثالك

نعم سلم لي على أبو ثامر وكلّ عياله ( ثامر, عــامر , عــمر , ثائر وراعي الطيور محمد ) وقل له ابو ناصر و أبو مســفر يسلمون عليكم السلام الكثير وقل له يقول ابو ناصر ( خشمـــــك يأبو ثامر ) حيث انه كل ما صاد فلاح جاني ابو ثامر وقف عندي وبعد ما أعزل الطير و أقوم يقول ( ابو ناصر خشمك ... ويحب خشمي الله يعز مقدارة ) و ( يدوووخ هههههههههههه على قوله ) إذكر له إني حاولت الإتصال بهم أكثر من مرة أيـــام الحرب وبعد الحرب ولكن للأسف سوء الأتصالات لم تمكنني من ذلك.

ابو رداد ولا عليك أمر

قل لأبو ثامر او عامر

يتصلون ضروري

الهاتف هو
00966506850055

ولا تنسونــــا من الطيور طرح العراق عطونا خبر ... وعليكم بالزين

وجزاك الله خير و ما قصرت

[سنافي]

تســـــــــــــــــلم يابو عـــــــــــــــــــــايد

ولا هنت

[أبو رداد]

السلام عليكم ورحمة الله وبركاته

الاخ العزيز سنافي .. انشاء الله السلام والرقم يوصل لابو ثامر .... والطيور انشاء الله نخبرك فيها بالموسم ... وفالك طيب ... وابشر بسعدك ...

[تالي الاولين*]

.


الله يوسع صدرك بالعافية يالسنافي

عالى هالسالفه اللي توسع الصدر



.

[سنافي]

تالي الأولين ..................

يا حبني للأولين وإحترامي لك ولو كنت تاليهم...... والوكاد إنك اولهم وأطيبهم

شكراً على مرورك الكريم وآسف على تأخري بالرد عليك.

أبو ردّاد ....

شكراً .... وقد تم الإتصال بالأخ عــــامر
لك التحية والتقدير.

[اعقاب]

السلام عليكم ورحمة الله وبركاته

كل اعلومك طيبه يا السنافي

[سنافي]

وعليكم السلام ورحمة الله وبركاتة

الطيب منك وعندك يا عقــــــــــــــــــــاب من غير قصور في الربع كلهم
شكرا على مرورك الكريم

[اعقاب]

السلام عليكم ورحمة الله وبركاته

اعتز بمشاركه الطيبين

[هاوي مقناص]

الأصل كُتب بواسطة اعقاب
السلام عليكم ورحمة الله وبركاته

كل اعلومك طيبه يا السنافي

[لطام سلطان]

السلام عليكم ورحمه الله وبركاته اشكرك اخوي السنافي على الحديث الممتع والله يكثر من امثالكم ودي افيدكم اخواني القناصين دام انكم تمرون بمنطقه الرويشد ودي ادلكم على احسن قناص والزمن يشهد له اسمه عشوي بن دحيلان ابو خالد او اخووه معاشي ويعرفون كل مناطق المقناص وانصحكم لاتاخذون ماجلان اذا مريتو ابو خالد وهو افضل من اخوه ولكم تحياتي اخواني القناصين وياريت كل الناس مثل الطير وفيين

[راعي صاروخ]

بسم الله الرحمن الرحيم


ولا عليك امر لطام سلطان والسنافي

او ابو رداد ابغي مساعدتم الله لايهينكم

هذا رقمي 009745066411

وتسلمون

[Abunaif]

مرحبــــــــــــــــــا مليون يالسنافي حي ذالطاري من العراق و160 والرطبه ومنها جنوبن قابل:)))))))))واحمد اللي سلمك من الوادي لاطيح فيه انت وخويك ولاعاد نعين من يزين المشاوي رفيقه يغني :))))

خلك بارز يا محزمي :)))))))))))))))))))))))))))))))))))))))
لاهد كنه شاربٍ كـــــاس بيره &&&& ولاصاد كن اللي يعزله سكارى
لاهد ياتي في السواويق غيره &&&& من يتخر يضفي عليه الغبارى