يالنشامى.... صوره سمكة غريبه صدتها في الجبيل.. علموني ..صوره

[alarain]

السلام عليكم

اليوم في الصباح صدت سمكه غريبه في الجبيل عند حي الساحل بصراحه شكلها والله مفجع صورتها ورديتها على طول للبحر اتمنى انكم تعلموني ويش هي لاني بصراحه اول مره اشوفها... ويش اسمها

واحد يقول لي انها سامه صدق يالربع.......

وهذه هي رابط الصوره......

http://www.mekshat.com/pix/upload03/images115/mk57286_asa.jpg

[الشمطري]

هذا نوع من الأسماك التي توجد فوق الأحياد المرجانيــــة

الي يخالطها قليل من الطين

تطلع بالشوار غالباً وهي تصلح للأكل شوياً

والخوف من الشوك اللي بظهرها والأســــــــم راح عن بالي الآن

لكن بإذن الله ان تذكرت برجع للموضوع

وفيها شوكة مقلوبة آخر الذيـــــــــــل

وتقبل مروري

[هوا بحري]

وعليكم السلام ورحمة الله وبركاته
هذي تسمى في الخليج الوحره
وفيه ناس تأكلها وناس ما تفضل أكلها

تحياتي

[alarain]

ربي يعطيكم العافيه يالذيابه على المعلومه

بصراحه شكلها مفجع ومقرف.........

الف شكر على المعلومه

[أبو إبراهيم !!]

شكلهاء غريب الصراحه
الله يستر لا يكون السمك في البحر بدأ يتغير
شكر لك ،،،

[قرصان الخليج]

هذي وحرة وهي صالحة للاكل بس كلها شوك وطعمها مو لا هناك

[shaheen70]

هذي وحرة وهي صالحة للاكل بس كلها شوك لكن طعمها جميل بالمرقة

[urumba]

انا مرة صدت مثلها في الجبيل وكان الصياد اللي جنبي يقول انها سمكة ممتازة تسمى طبق لزق برفع الطاء واللام في الكلمتين
بس لما اكلتها مرضت وكرهت الجبيل

[ياسر الرايس]

هذي طال الله عمرك نسميها بالرايس عندنا
( رقده )
لانها على طول نايمه بالطينه وقريب من الشاطي وهي غير مؤذيه
يعني ماتهاجم ولكن فيها شوك وطعمها جيد

[أبوحمد 505]

أحسن شي أنك رجعتها
بالتوفيق

[غوااص رابغ]

صادق اخوي ياسر الرايس هاذي في رابغ نسميها رقده وتلاقيها في الطينه وفيها شوكة سامه في ضهرها وغالبا تطلع في الشوارات وشكرا

[accentkool]

حبيبي هذي نسميها وحرة

متوفر بالعقير بشكل كبير وهي

متواجدة قريب من الشواطئ

واكلها جدا طيب بس انتبة لوكها جدا مؤلم

[بـو بـدر]

السلام عليكم ورحمه الله

اخوي الكريم

السمكه هاذي نسميها ( الوحر ) او ( الوحره )

وهي من الاسماك الطينيه والرمليه

راسها خطير لوجود الشوك بها ( مؤلم )

جيده جدا بالاكل ( مشوي ) او ( مقلي )

وهذا رابط موضوع للاخ ( عزازي22 ) وكان شاوي الرحره

http://www.mekshat.com/vb/showthread.php?t=207393

وهي غيييييييييييير سامه ابدا

تحـــياتـــي

[Activeone]

الصراحه دائما اشوفها قريبه من الشعاب بس عندنا بجدة محد يصيدها ولا ياكلها

[A B D U L L A H]

يارجال سمي بالله وتوكل عليه

وجهز المنقل :d

[بوي ابوي]

سلام شخباركم بالنسبة للسمكة هذي ماضنيت انهاسامه لانها اكثر من مره تضرب معي وذابغيت افكها من الخيط لازم اخذكم لسعه من شوكها :d لانها تتحرك يالله افكها اسمها وحره او وحر وانا اسميها زحاف لانها تزحف وذاحست اب شي تدخل بالتراب والمنطقة اللي اصيدفيهاطينية واكثرهاتيارات ... تقبلومروري

[بعض البشر]

هذي اعتقد فيه بعض البشر يسميها سمكة التمساح

اقولك والله طعمها على كيفك

[قناص البحر]

نكتفي بما قاله الشباب

[النوخذة الأحسائي]

بلا شك ولا ريبة .. وحره

[جبرو]

هاذي ياخوي سمكة احنا أهل الغربية نقولها الوحر أو السلفوح
وفي ناس تاكلها وفي ناس ما تاكلها

[هاوي المواتر]

ذاك اليوم صدت مثله نص متر

ويعي ينطلق منها الشنكار اثمها وسيع ولا يوقف الشنكار الى باخر حلقها

[نيزو]

السلام عليكم. هذه اسمها وحرة ويوجد فوق رأسها من الخلف في كل ناحية شوكتين صغار إذا ما انتبهت وأنت تفك السنارة منها ممكن تشكك بهاتين الشوكتين وتسبب ألم (مثل سمكة الصافي) وليست سامة ممكن تسوي التهاب وقتي فقط وإذا حصل ذلك عليك بمسح المكان بسائل الخل أو الليمون حتى تفسد هذا السم، وهي تؤكل وطعمها جيد وخصوصًا إذا كانت طازجة اشويها على الفحم ثم اسخلها قبل الأكل لأن جلدها سميك، وأفضل طريقة لفك السنارة منها إنك تمسكها بقماشة سميكة وتفك السنارة منها بالزرادية لأنها في غالب الأحيان تكون بالعة الطعم داخل أحشائها. وأتمنى السلامة لكل الإخوة الصيادين.

[هاموري]

شكلها غريب ويفجع واماا للاكل ما اتوقع اقدر

[بوراشد911]

الله يسلمك هذي نسميها في قطر ((وحره))
وبالانجليزي يسمونها (( flat head))
وهي سمكه لذيذه