البحرية

[قشاع الرمث]

السلام عليكم ورحمة الله وبركاته

والله عقب ما حسفتوني بمشترى الشاهين الجير
استخرت . وهالحين عرض على بحريه وافيه
تجي 16*16 بكر تقرنس ثنو ما هدت العام
باقي معها ثلاث او اربع يوم هي فرخ صايده
حول الثمان . وهالحين مربوطه بمزرعة الامير سلطان
طلق . وما يهدونها الا عقب اطيور وما راح عليها شي .
وش رايكم علما باني ارغب الشاهين اكثر من الحر
بسبب هالطيار المكوم .
تقريبا مثل هذي كم تسوا بدون ياقي هالقرنسه .
وهل يتغير الطيران واجد.
وهل هو صحيح ان الشاهين ينسى وماعاد يصيد
وهو قبل صايد .

عطوني رايكم بكل صراحة. ولكم جزيل الشكر .

[لهاب]

السلام عليكم ورحمة الله وبركاته

حياك الله أخوي قشاع الرمث ما في شك ان الأصلي افضل من التجاري وبالنسبه للشاهين كل اللي ذكرته

منها طيب أما السعر بالنسبه لي ماودي اظلم الطير والشي هذا بينك وبين راعيها والله يوفق البايع والشاري.

اما بالنسبه للطيران حسب خبرتي بالشيهان أقول اذا مازادت مانقصت بالطيران.

والشاهين عمره مانسى صيده كان صايدها والدليل هو أن تعلومه يكون على الطايرات بدون تعلوم بعد

مايطيحونه من وحاشيته.والشي هذا عند الجير هو اللي ينسى،،،،،،

مع التحيه والتقدير،،،،،،،

[قشاع الرمث]

السلام عليكم ..

بالنسبه للطيره يمدحونها بالحيل
ويا ليت تعطوني السعر تقريبا يعني من كذا الى كذا
لان الرجال يقول ما سيمت وباشوف بكم اسومها.

[راعي مزيون]

السلام عليكم ورحمة الله وبركاته

عزيزي قشاع الرمث

انا اوافق اخوي لهاب على الكلام الي قاله في ان النسيان في الغالب للجيره
اما الشاهين الأصلي ماينسى الا اذا كان مضروب على حبارى ( يهابها )
اما للقيمه مايقدر احد يسوم وهو مشاف الطير مع ان المواصفات طيبه
مقاس الطير طيب بالنسبه لشاهين والثلاث او الاربع الي باقي معه ماترده اذا
كان سبوق حسب قولك (هذا شاهين ياخوك ) خصوصاً اذا كانت نظيفه
واذا جربت الشاهين وطلع سبوق وفعل فعلاً طيب عفت غيره من الطيور
ولكن نصيحتي لك شف روز الطير ( وزنه ) لانه من وجهت نظري البسيطه
أهم شي في الشاهين والله يوفقك ويدبر الي فيه الصلاح للجميع .


وتقبل تحياتي .

[قشاع الرمث]

السلام عليكم..

والله انتم عطيتوني معلومات طيبة بالحيل
لاكن ما احد حاول لو يلمحلي بالاسعار
لاني ابسومها وكان تبون الاصدق ما ادري بكم اسوم
وما ودي اكسر الطيره ولا اغلب روحي وانتم الله لايهينكم
عطونا سومة لهالطيره على العلوم الي عطيتكم وترى الطيره
سبوقة بالحيل تلحق الحمام والنحم سلم وحتى السوادي ..
يعني سبقها وفعلها ما عليه كلام .

ويا ليتكم تعجلون علي لاني طولت على الرجال .

ولكم جزيل الشكر .





:what: المري وميراج وينهم ( ماهو بقصور بالربع )

[اعقاب]

السلام عليكم ورحمة الله وبركاته

اخوي قشاع الرمث

اذا جاز لك الطير فلايهمك فرق الف ولا الفين

كان فيه صقار قديم قال مقوله ما انساها

(المقناص قرحه ولا يداويه الا الشاهين)
فاذا جاز لك فلاتخليه عشان ماتاكل نفسك بالحسوفه

الشاهين الصايد يتراوح سعره بين 5000 وبين 10000

واللي ما يروح عليه شي يختلف طبعا سعره غير اذا كان عليه

شروط والمشرفين مشغولين الله يخليهم لنا

[قشاع الرمث]

السلام عليكم ورحمة الله وبركاته

مشكور اخوي اعقاب على ردك
وعز الله ان الشاهين دوا
وما قصرت . وان شا الله اني ابشريها .

مع الشكر الجزيل للجميع .