قير نيسان 4800 فتك يقولون لازم توضيب

[wail2]

السلام عليكم ورحمة الله وبركاتة

اخواني من لديه خبرة
شريت نسيان فتك وبعد عشر ايام غيرت السيور وقالو ان الرديتر يبي تصييخ وحملته للمصلح وتم تصييخه وبعد يوم حصلت مشكلة في القير عندما أضعه في (R) لم ينقل إلا أن ازور على السيارة اكثر من مره وهي في Rبعدها يقبل واما في (D) عادي وينقل الغيارات ممتازة
وكل ما اجي مصلح يقول لي توضيب هل من خبير علما أنني جيت الحمراني في الرياض وقالوا ما في قطع لقير نسيان سفاري 4800 حتى في الشركة المصنعه
نأمل من أهل الخبرة مساعدتنا

[عاشق البسمه]

اسأل الله أن يجعل كلامهم مردود عليهم ويسهل امرك والأخوان مايقصرون

[wail2]

مشكور اخوي على مرورك
ونسأل الله عز وجل ان يوفقك

[مجنون الفتك]

الله يعينك علي حل المشكله من اساسها

[كايد]

الله يكون في عونك

وتركد ولايضييق صدرك كل مشكلة ولها حل ,,,,,,,,,,,

الله يسهل امرك

[مذخور]

اخوي لم تذكر الموديل .. وكم ماشي الموتر .. وهل سبق تغيير زيت القير والفلتر .. ام لا ؟

[mo7taj]

الله يسهل امرك.....والشباب ما يقصروا.....

[ملف علاقي]

تحياتي اخوي هل غير الزيت ترازيته خاص وانتبه تغيره بزيت عادي وعلي فكره تراه بدون فلتر وعمومن القير ماله توضيب ولا يضحك عليك الحمراني اوغيره تراهم يجيبو واحد من دبي ويقولون طلبناه من اليابان وانت اولي باالفرق وجبه انت من وكيل نيسان في الأمارات ارخص لك هدا إدا كان قير موترك تب ترونك 00

[سوبر VTC]

و عليكم السلام و رحمة الله
يابعدي ناظر ماء الاديتر هل به بقع زيت ام لا ؟
لان الفتك اذا احتمى تهرب سيلة او جه مبرد القير اللي بوسط طبلة الاديتر
و يدخل الماء على القير و يخبط
عندنا ورشة العثمان بالقصيم يحط اديتر خارجي للقير يكلف 600ريال تقريبا
احد الربع معه فتك 2003 دخل الماء على القير و وضبه عند العثمان
ب7000الف و هالحين له 3سنين

اهم شي

تاكد من بقع الزيت بالاديتر و تاكد من زيت القير لا يكون به ماء

اذا امكن انك تفضي القير

و تغسله بالزيت مرة او مرتين لعل ان شاء الله يطلع الماء

ان بغيت رقم العثمان علمن عشان يفيدك و ما يقصر

تحياتي

[ساري 111]

يمكن يكون نقص بالزيت حسب مااعرف ان زيت القير اذا نقص لازم تدوس اكثر عشان يمشي.

اذا الزيت اسود احتمال كلاتشاته محترقه ومحتاج توضيب

واذا الزيت فيه ماء ..
او ماء الديتر معه بقع زيت فحتمال يكون خالط ماء الاديتر مع زيت القير بحكم انهم بإديتر وااااحد




يابعدي ناظر ماء الاديتر هل به بقع زيت ام لا ؟
لان الفتك اذا احتمى تهرب سيلة او جه مبرد القير اللي بوسط طبلة الاديتر
و يدخل الماء على القير و يخبط

قبل فتره اذكر طرحت موضوع من باب النصيحه بهذا المنتدى
بضرورة عزل إديتر المكينه عن القير
وذالك بترهيم إديتر خارجي للقير وعزله تماماً عن اديتر المكينه لضمان عدم وصول الماء الى القير اذا شدت الظروف

ولكن قوبلت بالأتهام بالتحامل على الفتك وووو ... الخ

لكن الأن تظهر النتائج وتبين الحقائق .. والله لايخسر مسلم ..

اخوي اتمنى ان المشكله بسيطه وماتضطر الى توضيب ..

[سوبر VTC]

قبل فتره اذكر طرحت موضوع من باب النصيحه بهذا المنتدى
بضرورة عزل إديتر المكينه عن القير
وذالك بترهيم إديتر خارجي للقير وعزله تماماً عن اديتر المكينه لضمان عدم وصول الماء الى القير اذا شدت الظروف

ولكن قوبلت بالأتهام بالتحامل على الفتك وووو ... الخ

لكن الأن تظهر النتائج وتبين الحقائق .. والله لايخسر مسلم ..


كلامك على متمه :good:
عموما تراهن توفيق بعد الله انت و حظك

على فكرة وش انت كاتب :D


كلاتشاته

ههههههههه
الله يخلف عليك ما تعرف تكتب :no: :D :p :j

[محمدالعريني]

يا جماعه احد يعرف ورشه بالصناعيه القديمه بالرياض اسمها باترول
متخصصه بالباترول او ورشه متخصصه بالفتكات يعني فاهمين الموتر

[خشم العرمة]

شف وانا اخوك اول شي تسوية بحكم انك توك شاري السيارة يعني ماتدري اللي قبلك متى اخر مرره غير زيت القير
رح للحمراني واشتر منهم زيت قير اصلي وكالة وغيرة عند ورشة كوية وهو يغير الزيت شف اذا فية رايش مثل بودرة الحديد هاذا معناته الكلتشات بادية تنتهي لكن اذا مافية رايش كلتشاتك سليمة
على فكرة نقص زيت القير يسبب التأخير في التعشيق
دائما أبدء بالاسهلا ثم الاصعب واسهل شي قدامك تغير زيت القير

[سوبر VTC]

اخوي خشم العرمه و انت ابخص
اي موتر امريكي ياباني طبعا تماتيك
يجي بكرتير الزيت حق القير ماص يمسك الرايش
و هذا الرايش او رايش احتكاك الكلتشات يصير باي موتر
حتى لو ماشي الموتر 30000الف يعني جديد
هالحين عندي كورولا تماتيك ماشيه 120000الف به رايش
جمس ماشي 150000الف به رايش
شيروكي ماشي 200000الف به رايش
يعني الماص ماحطوه الوكاله عبث
الا عشان يمسك رايش الاحتكاكات
اضافة للتروس
ارجو تقبل وجهة النظر بصدر رحب :cool:
اولم العصابة قبل الفلقة :j:no:

[wail2]

السلام عليكم ورحمة اللة وبركاته
احيي واشكر جميع من اشاروا علي وكذلك من جاء باقتراحات ومرئيات
كما اخص بالشكر الأخ ابو محمد واشكر جميع مشرفي واعضاء هذا المنتدى ( مكشات)
الذي يجمع جميع الخيرين بالوطن السعودي والخليجي

احبائي سلمكم الله من كل شر وادام عزكم ورعاكم .

اخوكم ابو وايل

[قرم العيال]

يمكن المشكله تكون كهربائيه

تأكد من كتاوت القير

عندك منتدى نيسان ارابيا

http://www.nissan-arabia.com/

إن شاء الله يفيدونك الشباب

وما هو قصور بشباب مكشات

[ABO AL-HESH]

اخوي القير التماتيك .. اذا فكيت الاديتر ينزل زيت القير .. شيك على الزيت عند الوكاله .. واذا كان ناقص واجد ومشيت عليه بسرعاة عاليه اكيد ان القير خبط.. انت شيك عليه وزوده اذا كان ناقص وناضر يختلف عليك والا لا (( اذا كان الزيت ناقص يصير القير ما يستجيب على طول))

[wail2]

شكراً لمرور الجميع
مديل السيارة 2004
ماشي 100000كم

[محمدالعريني]

بالنسبه للزيت انا غيرته اليوم عند الوكاله كلف علي الزيت مع شغلهم 500 ريال خذ 4 ونص لتر وقيمت اللتر 75 ريال يا بلاش استغلال واحتكار القير التماتيك مايوجد له عيار الا عند الوكاله

[عبدالسميع]

السلام عليكم .
شف ونا أخوك القير التماتيك ميزتة أذا نفص زيت واجد يبوش ويفصل نظام حماية من الشركة المصنعة .
صارت معي موتر باترول تماتيك نزلت الرديتر انظفة والعامل الله يهداه جرح هوز الزيت الي يروح لمبرت زيت القير ونا بالطريق هرب الزيت بكثرة وكانت سرعتي بحدود120 ويثقل الموتر شوي وأسفط على جنب وأتفحص الموتر ويوم جيت أمشي قال هذا مكاني القير بوووووش لايروح قدام أو وراء .
وأضبط الهوز وأزيده دولكتين زيت وما مشى ألا تحريك بسيط جدأ وبعد ما زدتة 5 دوالك قمز كنه حصان المهلهل معمر :)
شيك على مستوا الزيت ......

[صلفان.نجد]

عندك مجموعه من الشباب السعودي (ميكانيكيه مبدعين)ورشة التركي في الرياض الصناعيه القديمه خلف شركة ترايستار, او العثيم في القصيم,وتراهم افضل من فنيين الوكاله.

[Abu Saad]

اخي العزيز اذا انت في الرياض فيه ورشة متخصصة في الباترولات فقط اسمها ورشة الشنيفي 4×4
الوصف: في صناعية الدائري وانت على الخدمة عن الصناعية جنوب ووجهك غرب آخر لفه يمين لف معها شارع سيدين وفي النصف رصيف (من عند ورشة الراجحي) يطلع وجهك شمال امش الين ينتهي الرصيف اللي بالنصف وبعدين اول لفه يمين لف معها ثم بيطلع وجهك شرق ، لف اول لفه يمين بيطلع وجهك جنوب بتجيك ثاني ورشة على اليسار لوحتها صغيرة عليها 4×4 فيها شاب سعودي محترم جدا(ابوسليمان) وفاهم جدا في الفتكات ومايشتغل الا عليهن او على السيارات الدفع الرباعي ترفيع وترهيم ...انصحك تاصله وان شاء الله يفيدك ..


بالنسبه للزيت انا غيرته اليوم عند الوكاله كلف علي الزيت مع شغلهم 500 ريال خذ 4 ونص لتر وقيمت اللتر 75 ريال يا بلاش استغلال واحتكار القير التماتيك مايوجد له عيار الا عند الوكاله

لا يالغالي يوجد في الورشة اللي فوق عيار مخصص لقير الفتك .
وبالتوفيق للجميع