معلومات عن كشران

[سهيل البحري]

السلام عليكم ورحمة الله وبركاته

ممكن يا شباب الله يعطيكم العافية اهل المعرفة
انكم تدلوني على منطقة كشران وتعطوني معلومات عنها

لأني ما أعرفها بس سمعت عنها وبجمع معلومات عنها

في المنطقة؟
كم بعدها عن جده ؟كم الوقت اللي استغرقه الين اوصل لمكان الصيد
فين الأماكن اللي تصلح لصيد الجلب والسنارة فيها ؟
الطريق معبدة ولا وعرة ؟
لازم نوع سيارات معين ولا أي سيارة مومشكلة ؟
يعني سيارة عادية كويس ولا تاكل هوا وتحكحك؟
في شبكة جوال ولا مافي ؟

اذا في امكانية صيد جلب او سنارة يكون ممكن من فوق اليابسة ولا لازم ادخل الموية ؟


ويعطيكم الف عافية :)

[GPS-MAN]

حياك الله اخي الفاضل
اذا انت من جده بعدها من دوار المعارض حق الحراجات حوالي 120 كيلو تقريبا واذا تبغه من تقاطع قرية القطان حوالي 50 كيلو .. طبعنا تقدر تميز الدخله بعد محطة اسمها محطة المجيرمة ( تعتبر اول محطة بعد ما تعدي تحلية الشعيبة ) تمشي حوالي 500 متر او اكثر شويه على يدك اليمين تنزل على التراب شويه تلقى لوحة صغيرة مكتوب عليها ( قرية المجيرمة ) . من عندها تدخل راح يجيك خط مسفلت تمشي فيه مسافة تقريبا 2 كيلو في اتجاه البحر .. راح تلقى الخط يميل معاك يمين ويسار .. الى ان تشوف مركز خفر السواحل قدامك قبل المركز بشويه الخط المسفلت ينتهي ويجي الخط تراتبي .. تمشي شويه على مهلك الى ان توصل لخفر السواحل وتصرح من عندهم تنزه او غطس حسب رغبتك .. وبعدها تتجه يسار خفر السواحل .. يعني تخلي المركز في ظهرك وتتجه جنوب تمشي موازي مع البحر .. طبعا المنطقه هذه منطقة المجيرمة والطريق فيها ممهد وما يحتاج دفع رباعي والبحر في بدايتها الكسر بعيد شويه ولكن كل ما تعمق جنوب اكثر كل ما قرب الكسر .. وانصحك بالصيد بعد اول 15 كيلو من المركز .. ومن نفس الخط تمشي كمان اكثر يعني حوالي 21 كيلو من المركز راح تبداء معاك منطقة كشران لكن انصحك ان يكون معاك سيارة دفع رباعي او بيك اب .. لانه في مناطق رمليه ويبغالك تحط رجلك على البنزين واذا اول مره تروح روح بجيب عشان تشوف المنطقة وتعرفها .. ومن بعدها عاد انت وحسب رؤيتك للمكان اللي تحبه .. فيه مناطق الكسر فيها قريب وحلوه للسنوركل والغطس وفيه مناطق ما فيها كسر حلوه جده للصيد ويضرب معاك اشياء من العيار الثقيل ..
بالنسبة لشبكة الجوال تضعف كل ما بعدت عن مركز خفر السواحل .. ولكن توصل معاك اذا كنت في منطقة مرتفعة .. يعني الى تطلع على سقف السيارة او تخلي الجوال فوق السيارة ..
ونصيحة لا تفكر انك تطلع بيسارة صغير او سيارة واطيه ... يا جيب او جمس او بيك اب .. وتكون اقل شيء سيارتين لانه المنطقة معزوله .. لا سمح الله اذا احد تعطل او شيء الثاني يسعفه ..

هذا ما لدي واحب اضيف جمله صغيرة وهي ان الصيد هذا ارزاق بيد الله وانت ما عليك الا ان تتوكل على الله

تحياتي لك اخي العزيز وتقبل مروري واسف على الاطالة

[سهيل البحري]

السلام عليكم

GPS-MAN

مشكووووووووووووووووووووووور أخوي الكريم اخي الكريم على الوصف الر ائع
متاشاء عليك شكلك من مدمنين المكان

واكيد كلنا بنتوكل على الله سبحانه وتعالى
وهو الرزاق الكريم
بس انا ابغ ابعد شوية عن مناطق جدة لنها طفشتني -نفسي مصدودة مها-
وما ابغ اروح اماكن ما اعرف عنها شي

المهم كفيت ووفيت اخوي الكريم ويعطيك الف عافية

[tawmw]

الاخ GPS ما قصر..افادك وافادنا فشكرا له ولك

[ميتو أبو نقطة]

مشكور يا أخ Gps على الوصف الدقيق

[DIVE STAR]

ما شا الله عليك يا جي بي اس

شكلك مقطع المنطقه تقطيع

عموما فيه منطقه ممتازه للصيد بالقصب

في نفس المكان

وهي من المركز المهجور ( جنوب مركز مجيرمه 15 كلم ) الى البتره ( بداية التغريز تحصل عمود بارتفاع 1 متر تقريبا)

بين المنطقتين هذي ارمي قصب

والله يستر

ههههههههههههههههههه

تحياتي لكم

واذا تبغى صيد كساره جلب احجام عائليه


امشي جنوب كمان لين يجيك جرف رفيع عن المويه وارضه صلبه وهو في وسط منطقة الرمل اللي فوقها اشجار خضراء راح تلاحظها لانها واضحه جدا

وقف السياره فوق الجرف ونزل اغراضك

انزل من جهة شمال الجرف وامشي في المويه ( الكساره قريبه حوالي 50 متر فقط )

وانت تمشي رايح للكساره روح يمين شويه لين توصل

جرب هناك

وانصحك اذا لك خبره في الوقوف في الكساره في الليل تجلب هناك بعد 1 ليلا

بس امسك خيطك واقولها بكل ثقه

امسك خيطك وانتبه له

واذا سحب معاك شي لا تعطيه فرصه

سحب باليدين الثنتين

بيطلع لك ابو عين

او بهار حجم عائلي

او شعور ملكي

وغالبا راح يقص الخيط

والله يوفقك

وللعلم كسارات هذيك المنطقه حلوه مره مافيه حجار كثير ولا فيها حفر خطيره

والمنطقه امنه ليلا

جربتها اكثر من 3 سنوات

وشكرا

ملاحظه

منطقة ما بعد البتره لازم تروح لمركز كشران وتسجل هناك

يرفضون تصريح مركز مجيرمه لانه المنطقه هذي تابعه لمركز كشران

هذا للاهميه والا راح تدخل في مشاكل مع سلاح الحدود

[أبو إبراهيم !!]

الله يعطيك العافيه

[صديق المبدعين]

المنطقة تستاهل التعب