موضوع يحتاج الى أرائكم

[الامبراطوري]

السلام عليكم ورحمة الله وبركاتة

أخواني صقاقير مكشات

تصادف كثيرا مع الصقايير مشكلت الشرط على فعل الطير بانة صايد وبعد بيع الطير يتفاجئ الشخص الذي شراء الطير بأنه مايهد عكس كلام راعية الاول ؟ مع العلم بأن الطير مع راعيه الاول معروف بفعله
:no: هل يحق ترجيع الطير ؟

ارجو التفاعل مع الموضوع
ودمتم بود
أخوكم الامبراطوري

[جـرح الشمـال]

ايه يحق انه يرجعه . دام انه شرطه خلاص بس مهو كل واحد يشرط لك خلاص لا يبي ناس ثقة والثقة وين تلقاهم الايام هذي.
مشكوووور على الموضوع
تحياتي لك
البرفسور

[@قرناص@]

اذا شرط فعل الطير وانه صاد مع نفس راعيه ..

يحق له يرجع الطير ،،

بعد التاكد من ان الطير مايفعل ولا صاد ..

قرناص

[مهبااش]

الطير لو صايد وفيه شي ماقالك عنه نعم لك الحق في ترجيع لانه غشك وماصدق معاك

[مدهوش]

ابوي البيعات سلوم وتقاليد وراعي الطير اذا كان معروف وصدوق وربعة شايفين فعل الطير لايحق لة الترجيع لان الرداء موباالطير الرداء بلي شراء الطير ماعرفلة اواواو
واذاكان راعي الطير شريطي ويقول الطير فاعل عن عن فلان وفلان فهذا يرجع شرعا
تقبل مروري وتعقيبي

[ربع خالي]

يا اخوي الشرط عباره بين عقد بين البايع والمشتري وأي خلل في الطير المباع يخل بالشرط.. ولكن احيانا يكون المشتري سبب في تقصير الطير ,,
اذكر ان شخص اشترا طير على شروط الطلع والسبق وبعد عشرين يوم من شرائه للطير سافر ايران وكل من هد الطير على حبارى عود عليه الطير فماكان من المشتري الا ان اتصل لصاحب الطير وقاله طيرك ماهو سبوق ,, وماكان من البايع الا ياخذ اجازه ويسافر لإيران وعند وصوله للحمله اخذ الطير وقال لصاحبه هذي فلوسك , المهم صاحبنا اخذ الطير وظل في المخيم تقريبا اسبوع وهو مايطلع من القنوص , وبعد اسبوع قالهم بطلع معكم ولي هدد الصباح كله وماكان من القنوص الا يوافقون وهم يعرفون بأنه في اول حبارى بيسمح خاطره ,, المهم طلعوا الصباح وبعد فتره قصيره صاح الصايح دونك دونك هد هد , وهد راعي الطير وعدد صيده قبل المقيال 8 حبر والجماعه منصدمين وش لون الطير اللي هم خابرينه مايصيد واليوم هذا صيده وطياره على الشرد,, طبعا اكيد بسألونه وش سويت بالطير.. فقالهم ابد الطير كان مسويله نفس وانا عدلت نفسه وكان محتاج لشناذر وشنذرته .. فرجع المشتري يبي يشتريه مره ثانيه فماكان من راعي الطير الا يقوله يابوفلان تبيه عطى ؟ هذي سبوقه اما البيع فماعاد معروض للبيع مادامني حي ولو تحط فوق خمسينك خمسين , لأن المشتري كان شاريه بخمسين الف درهم,,,,,
نفهم من القصه بأن احيانا يكون المشتري ماوصل لنفس الطير ويكون البائع صادق في شروطه ( نفوس الصقور مثل نفوس الرجال),,,
تقبل مروري
تحياتي

[جو الشيخ]

مساء الخير
اذا الطير جاهز للهدد من ناحيه الوزن والجرد والطير مشنذر وريته الحبارى
اكثر من مره وريته الحبارى درج وطيار
ولا طلبها الطير هذا اترده لراعيه لانك ماقصرت بالطير ولا خليت عنه شي

[صاحب نوماس]

اخوي من رايي انة اذا شرط راعية ان الطير فاعل ويوم وريتة الحبارى جنب عنها انا اقول انة يرجع بس اذا تحقق لك انة صاد مع راعية الاول ويوم هديتة ماهد مايرجع لان هذي تعود لمشكلة بالطير اما ضعف او ديدان بالطير

لانها صارت معنا طير من طيورنا الموسم اللي راح هديناة على خرب وراح ووقع جنبة وهو الموسم اللي قبلة صايد معنا وديناة المستشفى قال فية ديدان ,,,,,,,,,,,

تقبل مروري

صاحب نوماس

[راعي غضبان]

وعليك السلام موضوع حلوا جدا وصار مع الناس كلهم بس انا اقول لو ان الطير صايد مع راعيه ومعه رجال فيهم الخير اوصدقان انا بصدق حتى لو ماصاد الطير معي او شايف هدده على كميره فيديوا هذا ما يحقله يرجعه واما انه ماخذه يقولون صايد وانت شاريه شرط صياد وسبق يحقلك ترجعه بس انا الواحد ودك انه مايرجعه الا متاكد ان الطير سليم من الديدان والكوسيديا وانه جرب الطير بالصنعه والا بتنزيل الطير لان بعض الطيور مايجيب الي وراه لين تنزله وتدق خشمه وبعض الطيور عطه ويعطيك وان كاني امون على راعيه اسئله عن الطير قبل ماارده وش وزن الطير وهل الطير يطرد بصنعه والا لازم تنزله وان مانفع عقب هذا كله يحقله يرجعه وتقبل مرورررررررررررررررررررررررري

[حامد الحنيني]

السلام عليكم
اخوووووي اذا الطير مشهودله بالفعل مع راعيه الاول وهو متاكد من كلام راعيه والطير ماهد معك على الحبارى مايحق لك ترجع الطير لان السبب من الشاري .
وشكرا لك على مثل طرح مثل هالمواضيع.

[ذيب الاسلم]

1/ فيه فرق بين ذابح وبين اذاماذبح رده
2/ممكن تكون المشكله من الصقار الجديد
3/فيه طيور قاطعه ولحاقق وذابحه واجد ووريناه صمكه يناظرها كنه اول مره يشوفها والسبب ان الطير ماستهد
4/ ممكن يكون الطير منه المشكله مريض او على كبده حاجة

[قرناس ارامكو]

اخوي اذا الطير مشهود له
بالفعل مع راعيه الاول وعلية أشهود وهو متاكد من كلام راعيه والطير ماهد معك على الحبارى مايحق لك ترجع الطير لان السبب من الصقار الجديد .
وفية بعض الصقاقير يهون عن شرية الطير , ويدور عذر ويقول أنة ماصاد علشان يرجعة .
والدعوى ذمة

[هماش]

السلام عليكم
الي يشتري الطير واكيد الطير على الشروط اكيد اذا ماهد لازم بيرجعه
والوكاد الي بيشتري الطير لابد ما ينشد راعيه مته اخر مره شنذر الطير والشاري لابد له مايعرف الطير
يعني كل صقار يعرف الطير ونفسه والشناذر شر لا مافر منه

انا كان عندي شيهانه قرانس شريتها مجهوله باخر الوقت والموسم الي بعده لقيت حبارى
وهديت عليها وعطتنا عرض غريب على الحبارى
وبئخر الوقت طرشتها لرجال من الي كانوا حاضرين الهدد يوم الحبارى
قنص فيها الموسم الي بعده حلف لي بالله لو انه ماشافها يوم الهدد الي فات كان حلف انها مابعد صادة الحبارى حاول يهدها على كذا حبارى عيت تروح
ومشكورين على الموضوع الجميل
بس الي يشرط على الطير اكيد انه يقبله لو رجعوه

[عاشق المقناص3]

عطاك العلم الشمالي (البرفسور)

[قرناس شماالي]

فيه ناس طيور متهد ويقول تهد كويكذب علشان يجيب مكسب
والله مغاير يكسب دعوات اناس علي
تقبل مروري

[ابو سلطان898]

والله يالربع الطيور نفوس وصيدت نفس الطير ماهي سهله اما اذاكان معي طير صايد وهاد ومعروف لدى الكثير او انه مصور بعد وابيعه لواحد بعد فتره يجي يرجعه يقول عيا يهد انا اقول مايرجع الطير لأني بايع طير مابعت صقاره
اما اذاكان من فلان عن فلان هنا يرجع الطير
ونصيحتي ياخوان بيعوا بدون شروط وترتاحون لأن الطير والله احياناّ يكذب راعيه

[عزوم الاولين]

الاخوان ما قصرو مشالله

[عاشق الوكار]

السلام عليكم
احس ان مايحق لك الترجيع لين حضك كذا
مرة واحد شاف طير فعله زين وصياد ومايفوته شي اعجب فيه الرجال وشراه
هده على حبارى ماطار عليها وكان يشوفه قبل لايشتريه فعله زين وصياد حباري
ويوم شراه مايهد على شي وهو قبل طير فريد النوع

[بو غازي]

والله يالربع الطيور نفوس وصيدت نفس الطير ماهي سهله اما اذاكان معي طير صايد وهاد ومعروف لدى الكثير او انه مصور بعد وابيعه لواحد بعد فتره يجي يرجعه يقول عيا يهد انا اقول مايرجع الطير لأني بايع طير مابعت صقاره
اما اذاكان من فلان عن فلان هنا يرجع الطير
ونصيحتي ياخوان بيعوا بدون شروط وترتاحون لأن الطير والله احياناّ يكذب راعيه
انا كلامي مع اخوي ابو سلطان من ناحية ان البيع يكون من دون شروووط لانه هذا نفس مهيب مكينة ولا شي يشتغل نفس كل يوم لا اليوم طيب بكرة ردي والعكس صحيح انا من الناااااااس حتى لو طيري الخاص صايد معي وشهود على صيده ماأبيعه شرط اما والله ابيعك سيارة شرط ماعندي مشكلة اشرطها لك اما طير لا مهوب صحيح لان ابليس يدخل في البيعه بعد ايام فرضا مالقيت حبارة هالسنه الي شريت الطير وانت ماغير بليس يوس وس لك ولا هادلك على حمامة وراحت على طيرك ها ولا صلح لك الطير ها يدخل فيها شك يااخوان ماحسن من البيع الي من دون شرووط ودائما ياأخوان سواءا كنت بايع ولا شاري احسن النية والله حتى لو انك مغشووش وانت شاري على عماها لكن نيتك طيبة ولا جاك شكووك بعد ماشريت ها فلان غشني ها فلان مدري شكله مهوب صدوق ها...الخ دائما احسن النية وباذن الله يبارك لك في شريتك او بيعتك وعسى الله يوفق الجميع لما يحبه ويرضاه.

[الامبراطوري]

السلام عليكم

واحد من الربع باع طيره معروف سبق وذبح ومالله وفقه بالموسم اللي باعه يشوف حبارى والموسم اللي بعده وراه راعيه اللي شراه حبارى وضايف معها مع العلم ان الطير صايد قبل خمس حباري

فهل يحق له الترجيع



شكرا على تفاعلكم على الموضوع

[قناص الهمله]

الاخوان مايقصرون