سؤال لهل المرابط

[شنوان]

السلام عليكم ورحمة الله(ولا يهينون اخواني في المنتدى وعلى روسهم مشرفينا)
اذا انا قيضت طيري عند رجال (طلق) مفكوك والطير اكله طير عندوه
هل هذا يلحق راعي المقيض بشي ولا لأ
علما ان المقيض فيه اكثر من طير وراعي المقيض لا يعلم بأن هذا الطير يأكل الطيور
وسلمتكم

[سلطان 1]

اخوي شنوان الخطا ماهوب خطا راعي المربط خطا راعي الطير الؤكؤل اللي يدري ان طيره ياكل الطيور ولا ينبه راعي المربط بالشي هذا 0
والله اعلم

[الهواوي 502]

الله يرزقك

وابشر بل عوض

[جـرح الشمـال]

اخوي شنوان الخطا ماهوب خطا راعي المربط خطا راعي الطير الؤكؤل اللي يدري ان طيره ياكل الطيور ولا ينبه راعي المربط بالشي هذا 0
والله اعلم

مع كلام اخوي الخطا من راعي الطير

[((السنياري))]

الحق يلحق راعي المربط

لانه قصر على طير وهو يدري انه اكله

انا من الناس طيري اكله ويخالط الطيور بصيده ولا يتعرضها

مع العلم اني اول ماسلمت الطير للمربط قلت له ان الطير اكله وماكل طيور واجد وراعي المبط يعرفهانه اكله ومالك طير جير شاهين بمقناص وسالفه هذي لها قصه عوجا

الحق يلحق راعي المربط 100%

[المري]

مرحبا اخوي وحياك الله ..

اذا الجاني له سوابق قبل كذا فالحق يركب راعي الطير لانه يدري ان طيره يأكل الطيور ولا علم به..

أما اذا انه اول مرة فأقول الله يخلف عليك ويعيضك بأبرك منه ...

اخوك - المري

[قرناس ارامكو]

السلام عليكم ورحمة الله وبركاتة
أنا أقول أن الخطاء هذا خطاء راعي المربط لأنة لو أنة مكرم الطيور وخاصة الطيور الشرهه بالعلف ماهدة على بعض أبد .
في المربط الطلق
أساسيات يجب عملها قبل أطلاق الطير في المربط :
1- يفحص الطير فحص كامل من والى .
2- يقوم راعي المربط برفع صنعة الطير حتى يحس أنة وصل حدة في الصنعة , وبدى الطير يبقي من العلف .
3- يبدى راعي المربط بفك الطيور على دفعات ويراقبها مراقبة دقيقة .
4- يجب أعطاء الطيور وجبتين في الصباح وبعد المغرب في الفترة الاولى حتي تستقر الاوضاع في المربط , ويبدى راعي المربط بأعطاء الطيور الشرهه أولا ثما باقي الطيور ويرجع ويعطي الطيورالشرهه وجبة أضافية .
وبالطريقة هاذي لا يمكن يهد طير على طير أبد
والله يعطيكم العافية
وسامحونا على الاطالة

[حوران نجد]

والله ياخوي الحق يلحق الطرفين راعي الطير ماعلّم راعي المربط وهاذي مشششششششكله وراعي المربط عنده الطير نزل وزنه وهاذي مششششششششكله
يعني محديلحق الثاني ملامه والناس لاناس والكل بالله

[علي آل جميله]

مرحبا اخوي وحياك الله ..

اذا الجاني له سوابق قبل كذا فالحق يركب راعي الطير لانه يدري ان طيره يأكل الطيور ولا علم به..

أما اذا انه اول مرة فأقول الله يخلف عليك ويعيضك بأبرك منه ...

اخوك - المري
مانتعدى على بومعيض تعدي تلحقه بملام اذا الطيور عليها نقص علف واذا ان راعي المقيض عارف الطير الي كلاه انه يقارش الطيور من قبل على العلف و اذا انه يعرفه كان لازم ان يربطه ويعلم راعيه
الله يخلف عليك ببرك منه انشاء الله

[دلوع الهوى]

السلااام عليك انت ليش ماعلمت خويك افا عليك يا ولد ليش ماتعلم خويك انة ياكل الطيورررر

[عاهد بن علي]

الله يعيضك باحسن منه ان شاء الله

[راعي غضبان]

وعليك السلام انا اقول الخطاء من الثنين راعي الطير اخطاء مابلغ راعي المقيض ان طيره ياكل الطيور ونسبة غلطه 35% وراعي المقيض لو انه مكرم الطير ومرهي عليه العلف والله مايلتفت للطيور ولا ياكلها انا اتوقع الي حداه لانه ماوصل حده من الصنعه علشان كذا يهد على الطيور وياكلها لو انه يعلف غدى وعشاء كان ماصار الي صار ونسبة الخطاء على راعي المربط 65% وتقبل مروررررررررررررررررري

[صقار مبتدئ]

السلام عليكم
انا اشوف و الله اعلم ان الحق على الطرفين
راعي المربط لابد انه يكون مكرم الطيور ومراقبها زين
بس لو ان راعي طير يعرف ان طيره اكول ولا علم راعي المربط يركبه الحق 100%

[عزوم الاولين]

,,,السلام عليكم ورحمة الله وبركاته,,,
كلهم غلطانين .
والمفترض ان راعي الطير يعلم راعي المربط ان طيره اكله
ولازم ان الطير يستصنع قبل الربطه الطلق لابد .
وجزاكم الله خير
وتقبل مروري......

[صاحب نوماس]

شوف وانا اخوك

اذا الطير اللي اكل الطير سبق ان اكل طير وصاحب الطير ماعلم صاحب المربط فهذا على صاحب الطير
اما اذا الطير اول مرة ياكل طير يعني لاحقة ضعف فهذي اهمال من صاحب المربط ويتحملها صاحب المربط


والله يعوض عليك بطير اطيب ان شاء الله

[هماش]

السـلام عليكم
اذا كان صاحب الطير ابلغ صاحب المربط بئنه الطير ياكل الطيـور فهنا يركب الحق راعي المربـط
واما ان كان صاحب الطير مابلغ راعي المـربط فئن الحق يركب راعي الطير
انا كان عندي شيهانـه ماكل طيـر ولما جا وقت المربـط ابلغت صاحبه ان الطير وكـول ياكل الي حلوه ربطه هدد وكان يعطيها 3 وجبات بليوم ولا صار شيئ
والربـطه الي بعدهـا نشب لي واحد من الربع على المربط انه يربط الطير فئبلغته ان الشيهانه تاكل في حالت القصران وبلفعل اكلت عنده شيهانه بلمربط
ولم يلحقني حاجه بشيئ وللعلم اني قلتله ابشر بلعوض حلف لي انه مايجيه وان المشكله منه هو شخصين لئني انا قد ابلغته قبلها
وشكرآ للجـميـع

[أبو فيصل]

الناس تختلف بالآراء ولكن ......... أما أنهم يتسامحون .... و طير كلا له طير.... بغض النظر من المخطئ و المخطى عليه

واذا كان الموضوع ما فيه تسامح ....لا راعي الطير شكر الله وطلب منه العوض على القضاء و القدر .... ولا راعي المربط عاضه بطير بداله ... ويمكن يتدخلون شياطين الجن و الأنس ...

فالعلم عند المفتي الشرعي..... ومن منكم مفتي شرع؟

[قناص الهمله]

الله يرزقك اخير منه

[شنوان]

مكثورين الخير جميعا وبيض الله وجيهكم كفيتو وفيتو يا(طيور شلوى)
سلطان والهواوي502 والبرفسور والسنياري والمري وقرناس ارامكو وحوران نجد وعلي ال جميله ودلوع الهوى وعاهد بن علي وراعي غضبان وص وصقار مبتدئ
(عز الله جبتو الجواب والحل الوافي)

[بو غازي]

كلام المري سليم ولا قصور في الباقي.

[روزفلت]

السلام عليكم ورحمة الله وبركاتة

أنا أقول أن الخطاء هذا خطاء راعي المربط لأنة لو أنة مكرم الطيور وخاصة الطيور الشرهه بالعلف ماهدة على بعض أبد .
في المربط الطلق
أساسيات يجب عملها قبل أطلاق الطير في المربط :
1- يفحص الطير فحص كامل من والى .
2- يقوم راعي المربط برفع صنعة الطير حتى يحس أنة وصل حدة في الصنعة , وبدى الطير يبقي من العلف .
3- يبدى راعي المربط بفك الطيور على دفعات ويراقبها مراقبة دقيقة .
4- يجب أعطاء الطيور وجبتين في الصباح وبعد المغرب في الفترة الاولى حتي تستقر الاوضاع في المربط , ويبدى راعي المربط بأعطاء الطيور الشرهه أولا ثما باقي الطيور ويرجع ويعطي الطيورالشرهه وجبة أضافية .
وبالطريقة هاذي لا يمكن يهد طير على طير أبد
والله يعطيكم العافية

وسامحونا على الاطالة

نعم هذا الكلام السليم واللي ماعليه غبار وصح لسانك

[@قرناص@]

الله يعوضك ..

الخطأ من راعي الطير لانه ماعلم صاحب المربط ان الطير يعلف الطيور الثانيه ،،

والخطأ الثاني اذا صاحب المربط يعرف ان الطير علاف لطيور الثانيه اذا ما اكرمها وخلاها صنيعه ..!

وبالاخير المفروض طيور الطلق تكون صنيعه حتى ماتاكل بعض ،،

تقبل مروري يالغالي ،،

[راعى شاهين]

ي اكثر من مربط اناس وين رايحين وين عقولكم راعى المربط اهم شى يطلع فى نهايت الموسم وعنده مكاسب انا اعرف ن الطيور بعذرها كلت بعض اكثر من مربط يعطونها افاذ دجاج ساديا وعشى بــس لها العذر الطيور تاكل بعض اهم شى راعى المربط يطلع بفايده والطيب حيل منهم يعطيها فرى مثلج وجبه وحده والقليل منهم الى ضميره حى