ذبحنا التطور

[Khalid AlGhamdi]

السلام عليكم ورحمة الله وبركاته

قريت موضوع لواحد من الاخوان يشتكي من الكاتم ويطالب بالطبخ بالقدور العادية .. :D

وكلامه حسسني فعلا اننا مصخناها ، يعني ذبحنا التطور وصرنا نهتم بامور كمالية اكثر من اللازم

وماصارت الكشتة زي اول ، ولاحتى تحس بالمتعة اللي تحسها اول

وماذكر اني طلعت سابقا وماكنا ناسين شي ، لازم يكون فيه شي مهم بعد ناسينه مثل الملح او السكين او الصحن اللي نقلط فيه عشانا ومع ذلك كانت طلعات روعة

لكن الحين استجدت علينا امور كثيرة

اجهزة GPS ، من اول مانطلع بعيد عن الديره الا نظيع ونقعد ندور وكل واحد مننا يسوي فيها خبير بالنجوم وبالاخير ندل بعد جهد جهيد

الايكوم والكنود وطقتها ، من اول سوالف انت وخويك اللي معاك بالموتر ولاتسال عن اللي بالموتر الثاني ، الا اذا بغيت شي ضروري وقفته لكن الحين يروح اليوم وخويك تلقاه مستلم ريشة الجهاز يسولف مع ناس ماتدري منهم ولايدرون من انت ، ونص المحادثات تنتهي بـ ( @#&&^% انواع المسبات )

صناديق العزبة ، اول كان الواحد يجمع قشه بكرتون ولا مفصل صندوق خشب في الحوض

قدور الكاتم ، والله انا ماعرف اطبخ فيه للحين ولا اغامر

الدافور ، كل شي من اول على الحطب

السيارات وتجهيزاتها يبي لها موضوع كامل ، ماشاء الله الحين كل واحد معاه جيب ومنفاخ هواء من احسن نوع وونش بعد ومحول كهرب و و و ولا حتى لو انها هايلكس ماشاء الله وين ووين هايلكس اول يعني من اول مافيه طلعه ماتمر بدون تغريزات وبناشر او تعليقات

الانارة ، الحين الواحد معاه ماشاء الله شركة كهرب ، من اول اذا توفرت الاضاءة اصلا تلقاها لمبة اسطب ونورها مثل قلته عن قولة

الفراش ، الحين الواحد ماشاء الله فراشة مبطن وعليه شراع تنزاني ضد الماء وشغل مايحتاج
ومن اول اطرف لحاف وانت طالع

احس اني شيبت يوم كتبت هالموضوع :D عندي شعور اني صرت كبر خشم الخصان ، يالله حسن الخاتمه :cool:

[الجنوبي]

الله يعطيك العا فيه
اخوي max power
وانا معاك في ان الشي كلما كان بدائي كان افضل وله نكهه
ونسال الله ان يعيد ايام الوناسه زمان ....................

[الاسود]

السلام عليكم ورحمة الله وبركاته

الله الله الله ... كلامك درر يا max power..
لاكن تراني اختلف معك في بعض الاشياء مثل .. طرمبة الهواء .. فهي ضروووووورية.. وكذلك قدر الظغط لانك لو عرفت تطبخ فيه ماراح تغيره ابد .. توفير للوقت والجهد والغاز بعد.
واتفق معك قلبا وقالبا بالنسبة لاجهزة الماجلان والقارمن واجهزة الاتصال الايكوم وغيرها... فهي اضافه تقنية رائعة لاكننا نستخدمها بشكل خاااااااااطئ جدااااا واعتمادنا عليها بالشكل الحالي خااااااطئ لانه يقتل فينا(( الفرااااسة والتفكير والاستدلال بالظواهر الطبيعية كالنجوم والجبال وطبية النبات والتربة ))).

وعندي قاعدة دائما في مكاشيتي وهي ((( اياك وكثر العفووووش والاغراض اللي مالها داعي )))... واللي نشاهدها وصارت علامة مميزة وفارقة لكل كشاااااااات حتى ان البعض بااااااااااالغ بشكل يدل على بعض (( الرفاله)) واصبح يأخذ معه حتى اعواااااد الاسنان!!!!!!!


وبعدين توك شباب ... ياخي انت بحسبة واحد من عيال خشم الحصان:D

[بركان]

اخي ماكس
ولا تنسى الطلعه للنفود في سياره مافيها دبل
ياهي طلعه توسع الصدر وبعد احداثها ما تنسى!!!!

[خشم الحصان]

الاخ الغالي
ماكس بور
السلام عليكم
شف ياخيي مدامك انشبتآ في موضوعك استلم يالحبيب .
1-انت تقول انك قريت موضع لحد الاخوان عن الطبخ بالقدور وان ودك تطبخ بالقدر ولا ودك بالكاتم ياخيي مهيب مشكله في الطبخ المشكله في غسيل القدر الي منه جاء فيه سنو ثم قمت تغسله وخذ فرك بالطين او الرمل لين تغدي يديك كنها ركبة حاشي والماء ينتصف وانت مانتصفة قي غسل القدر وباقي البرقات وغيرها منول ثلاث ارباع العده جركل ماء والسبه الغسيل من السنو والبعض يغسل داخل القدر ويخلي الخارجي بسنوه
وبيني وبينك طبخ القدر زين الي منك قمت تشم هاك الكشنه وثم كل شوي فاتش الغطاء وطال بوجهك فيه و كاننه عشاء مايخلي من طيحة ابو قباس فيه مهيب مشكله نضهره بالملاس وكل شوي تطعم المويه بالملعقه
كل هذي يابعدهم زينه وبيني وبنك الكاتم الله ياهو يكتم قلبي وصدري من الروعه اخاف ياخيي يثور او ينفجر فيني وانا حوله ثم تغد كنك ثريا في سقف متعلق في احد هالشجر وخذ ونين هذا اذا كنة سالم ولاهنا تشويه
وانا معي في العده كاتم بس حق الربع اذا ضهرو معي ومن كرهي له ماحطيته في الشنطه مخايه براء علشان مع المطبات يتفلق حاقد اما نسيان يامالك من النسيان .
2-جهاز الملاحه ياخيي شي ضروري ولاهوب عيب بس انا ايدك في انه مهوب ضروري ان حنا نشغله من يوم
يزلف الموتر مع الباب لا اذا ضيعة مره ودخة اضهره حلال القوم وخله يخدمك واذكر مره يومني توني مسجل في هالمنتدي المبارك (نحسبه) كتبة موضوع عن( لماذا نعتمد كليآ بعد الله علي جهاز الملاحه) وخذ ياخيي ترجيم وخذ لعلعه اللهم ياكافي حسبة اني طاق مسكين سان اتلطم و قعد يومين مادخلة واذا بغية ادخل دخلة
بعد الفجر اقول كودهم نايمين لكن وجود الجي بي اس شي ضروري في العده بس انه لا يطلع الا وقت الضروره القصوي وشغل هالدميغ الله لايهينك ومهوب ترتسي علي الحب والسيسبان والقرع غدية خشة الوحد
كنه شارب من جفار الملح ولا شافط اله بنزين وشارق فيه.
3- الايكوم هم ضروري ياخيي وهي ترجع للي يستعمله يمكن احد ياخيي يحتاج فزعه شي محد يدري ولكن اذا كان الي راكب معك ملوسن وقف ياخيي وركبه مع الي وراك او علمه انه للضروره ترا الايكوم زوين الي منه تهيا هجيني ومراد تره يطرب الواحد بس هجيني ماقيه خمبقه يعني شي مباح الله يغفرلك يابعدهم
4- انت ماش كنك ضاهر في الشمس هاليومين اونك نايم في السطح وجتك الشمس الله يثيبك ياخيي المنفاخ
اهم شي لو بنشر الموتر وصلحته وش تنفخهبه تبيني انفخ بثمي ثم تغدي ياخيي لويزاتي كنها ترنج او جح سيدلان ثم اذا ضهرتا من الرمل ومسكت المقيره والارض كلها حصا ولا فروش و الكفر ناقص هواه ثم طق عليك كفر كفرين اها وش السوات . لا ياخيي لا تضيقها علينا وهي وسيعه
شف الونش بلا والله ماطحة في طينه ياخيي وراح عليك يوم او نصف يوم وانت تناضر هالموتر تقول كنه واحد محرول ويبلك ترقابه نخله مدام الله مصخره للمسلمين وينفع وقت الزنقات السايده الله محييه لالالا ماش كنك ضهرة عن الجاده ما ايدك في هالنقطه يابعدهم والونش يغنيك عن تنطيل الوجه علي هاناس وكل شوي ممكن لو سمحتو الفزعه دفو معنا منهم من يقدر ويقوم ويكثر الي يتعذر اما يقول فيني بعج او فيني ملع او خير ان شاء الله ثم احتره .
5-الاناره اذ كانت زوينه يعني خافته مهيب مثل بيت عروس او غرفة عملايات يشفون دميغك من شدة النور فهذي انا ايدك تضيق الصدر انت وانا ضاهرين نبي نشوف هالنجوم يالله من فضلك ونبي جلسه راكده وهنا سويليفات خاثره وذالك البريق الغضار وكل واحد منشكح تقول قعدان مصدومه علي جال خط ومدد رجيلاتك يالله من فضلك وهاك الوزار والهواء يرفرف به تقول علم باخره مقبله علي ميناء هذا الي نبي ويصير فيه نور قوي للطواري لو تعطل شي في الموتر تقدر تفك وتربط وانت مرتاح اما استعماله في الجلسه ودي والله اجيب نبيطه ثم القط هالامبات.
6- اما الفراش فيوه اذا شفة هالفرش تقول كنه( دوشق) مطلقه ومن كبره تقول برميل بترو مين اهنا فرو وهنا شراشف وهنا لحف لو نوزعها علي افريقياء لحفتهم وزاد عندك اثنين وهنا وسايد كنك قالص معك غرفة نوم
يعني شي علي قد الحال لا تزيد ولا تقصر علي روحك.
هذا بنسبه للي كتابته لكن تعال ياخيي الله يغفرلك ويرفع من قدرك انا وش دخلني يومك تقول
(احس اني شيبت يوم كتبت هالموضوع عندي شعور اني صرت كبر خشم الخصان ، يالله حسن الخاتمه )
ايه اثرك منتاب بعيد من حفرلوجيا ويا طبيب وصقر وضب وابوشكاع :mad: يصير خير
عموم الله يغفرلك ويرفع من قدرك وان الله يثيبك ويختم لك بحسن الخاتمه يابعدهم امين يارب العرش العظيم
اخوك
خشم الحصان:mad: :( :mad:

[Khalid AlGhamdi]

وعليكم السلام ورحمة الله وبركاته

اخوي الجنوبي الله يعيد ايام الخير :good:

اخوي الاسود انا فعلا بحسبة واحد من عيال خشم الحصان بس اقول لك مجرد احساس مسالة الكبر يوم اني كتبت هالموضوع :D

اخوي بركان ، والله انك صادق :)

جدي خشم الحصان :D انا والله ماني ضد استخدام كل هالاشياء اللي ذكرت لكن اقول اننا مصخناها اكثر من اللازم ومابقى شي ماخذناه من الديره ، يعني باقي بس تربط بيتكم بسلسلة وتسحبه معك

وانا مع انك تاخذ الاشياء الضرورية مثل المنفاخ والـ GPS وغيرها
وبالنسبة لقدر الكاتم بالذات فانا ناوي ان شاء الله اخذ دورة في استخدامه وبدور لي لبس واقي وخوذهhttp://mindscraps.com/s/contrib/owen/wedge1.gif والله يستر من تاليتها


والله انها نعمة مانقدر نوفيها حقها من الشكر ،
وجزاكم الله خير على تعقيبكم
اخوكم ابومعاذ :rolleyes:

[الربذي]

يامرحبا باخينا MaxPower ياهلا والله موضوعك رائع وانت اروع وكلك ملح بس الله يهداك ياخوي تبينا نطفي القارمن ويصير طول يومك تدور على اخوياك او موقعك انا معك في بعض النقاط بعض الناس ياسال زمان طلعتو للبر قالو اية قال غرزتوا قال لا قال اجال ماطلعتم وطلعات البر لازم يكون هناك تعب وتكون ناسي شي وتصدقون يصير لها طعم000 مرة كنا طالعين للبر المهم صرنا ناسين الكبريت((( ياقدمي الحمد للة ماماشي الي يدخنون !!!!!!!!!!!!!!!!!!!!!!!!!!!!!!)))توقعوا ايش سوينا ولعنا النار بعد جهد من ولاعة السجاير مانستغني عن المدخنين من الولاعة حقت السيارة نجيب منديل ونمسك الولاعةلا تطلع حتي تحتمي مرررة وتكون حمرا مولعة ونضع المنديل عليهاحتي يحترق وننفخ علية حتي يشتب 00 الناس الحين يبون السرعة وانت ماشي اضبط الكاتم وانجزعلينا لكن بصراحة اذا صارت الطلعة من اواني الماضي اقصد نار مقرصة جمرية شاي على الجمر او خبز على الحجر يكون لها طعم مميز الا هالطلعة مرة طلعت انا ولاهل لنفود ومعنا اغراضنا ولكن على سيارة عادية موجيب تصدق طول اليوم حفر ودفن حتي جن علينا اليل وخافت المرية ورحنا نشر على الطريق وجانا واحد واسعفنا الله يجزاه الف خير وارجعنا نجر اذيال التعب والغضب والندامه واغراضنا بعضها خرب ورمينها والبعض رجعنا فية لكن تعبنا مرررررة وخصوصة الاهل وش عرفهم للحاجات هذة لوانا على جيب ماحصل هذا والحمد للة شين اشوا من شين

اخوي الجنوبي وش عندك متوزي وسط الشجر تصدق( موه) مررررة ماتنشاف بسهولة وفعلا كل ماكانت طلعت البر بدائية كل ماستانست اكثر وصارت حلوة ولها مذاق خاص
اخوي الغالي خشم الحصان اضحك الله سنك تصدق ضحكتني بمفرداتك التي تنم عن فكاهتك وشخصيتك النكتية ماشاء الله عليك الحين لازم الواحد يوكل محامين يردون عليك هذا هجوم كاسح
اخوي بركان مانسي تلك الطلعة ابي اونسها واتعبتها وكرهت المسكينة النفود بعد هاكاالطلعة وكنت غشيم مرة 0طيب سؤال من فيكم شاف نجمة اسهيل او العقرب او السبع 000000 وتحياتي

[Khalid AlGhamdi]

حيا الله الربذي اسفرت وانورت والحمدلله على السلامة

ايه من قدك ماشاء الله الحين جيب باثفايندر لا ومركب فرارات بعد :D مايحتاج تأشر لاحد

الله يعطيك من خيره ويكفيك شره :good:

وبعدين الله يهديك انا ماقول طف القارمن بس اسوي مقارنة بين اول والحين

خصوصا اني لاحظت بعض الاخوان الله يغفر لنا واياهم يوم تشوف التجهيزات اللي مسويها تقول بيروح يكتشف الربع الخالي وهو كاشت عصرية لروضة خريم :D