وشرايكم في حياتي

[AJMI08]

السلام عليكم ورحمة الله وبركاته اخواني اعضاء المنتدى مكشات ...


اخواني سراحه مادري وين ابدا منه لكن خلني ادش في الموضوع على اطول مع حياتي في البر والمقانيص اشوف كل يوم اطلع للمقناص اقول هذا اخر مقناص لكن بعد ما اشوف الصيد او يذكرلي احد من خواني انه شاف له صيده او ذكر احد صيده على طول حمل الاغراض والعده شغل السياره وعليها حتا اذا ابطينا ماحصلنا صيده وفي الليل مانرجع للبيت الى مع اذان الفجر ويا له شف انواع الحوسه في الوجيه والسيارات الله لايوريك وشايب يضيق علينا وخص انا :d ياهوحاقد على الله يسامحني ما اضيقه ثانيه وتصدقون والله على ما اقول شهيد انا نصرف مبالغ خياليه بين رصاص وكفرات والسيارات حدث ولاحرج انواع التكسير عشان ارنب وحده ولاثنتين ولا جول حجل ولاسوادي اقسم بالله وانتوا محلفتوني ان الحوش حق بيتنا صار تقولا سكراب منشاه عسكريه هذي خمس كفرات متسلخه وبطاريات محترقه من الانوار القويه المركبه وهذا الكمبرس حق الباترول انكسرت قاعدته وقمنا وقطعنا الليات (ماعندنا وقت) وهذي انواع العزب وخلها على ربك , بس تدرون من انا راحمه هي شغالتن ا:( لصار اليوم يوم الجمعه في الليل وجينا من البر خلاص تجهز نفسها عند باب الكراج من الساعه 6الى 12 ليل علشان موعدوصولنا من الطلعه تشوف الضعيفه انواع الشيل واخواني الي اصغر مني موظفين لكن المساكين انواع التاخير على دواماتهم وسبه انا لاني مثل ماقال ابوي الي ( مدشرهم ) في البر......:(

اخواني طولت عليكم لكن شوفولي حل الله يرحم والديكم...

[0007]

يارجال انا مثلك واذا لقيت حل قلي عنه واكون لك من الشاكرين

[ذgggق]

" ماكثر من شي الا سمج"


اعتدل في قنصك وترى الصيد هوايه راحه نفسيه وليست تعب نفسي وقلق

[الطرفاوي@]

عندي لك حل بع الموتر واهد العزب والسكراب واشتر لك موتر كشخه ماهو حق مطامر للبران واجلس بالديرة وخل المقانيص للي يحبون البر والصيد لاانه لايمكن يجي صيد وانت مرتاح

[البرًي]

:D:Dاهلا بخوي الحقيقة انك تبي حل الحل الاول بع موترك واشترلك سياره صغيرة ثاني شي بع بواريدك وخاصة ام خمس وعليك بأم صتمه ثالث شي تقريبن لا تطيع نفسك وياخذك الحماس ترى الحماس يدهور الي ما ينتدهور ؟؟؟؟ لاكن زبدة الهرج نيشان لبغيت تبيع اغراضك وسلاحك اذا كان مصرح وسيارك راسلن على الخاص ؟؟؟؟;);):D:D

[بالون]

ياخوي مالك وما الصيد خل الصيد اذا انك تقول انه تعب وكان عندك بندق ومصرحه انا شراي وشتر كامري وقط بستراحه مع شباب (خكاريا) وريح راسك <<لاتزعل يمكن اني قاسي شووي..

[هاوي الشنانه]

الله يعينك ياخوي والحال من بعضه

[المتحـ2007ـد]

ما فيه حل ابد ومن تعود على الصيد والطلعات البريه يبطي ما تركها الا ما ندر

كلنا مثلك اذا طلعنا وتعبنا قلنا وش حادنا على الشقاء لونا عند المكيف ابرك واحسن

لكن هي العاده ومن الصعب تركها بسهوله

ما اقول الا عسى الله يهادينا ونركد عن الطلعات اللي توجع الراس

[الدربشي]

ما أقول إلا الله يكون في عونك

[AJMI08]

السلام عليكم ورحمة الله وبركاته
اولا اشكر اخواني على الردود

ثانيا الموضوع من اللي يقول انه مدموج او منقول ليش مكتوب كذا انا جزاكم الله خير ماني سارق قصص وافكار . وشكرا

[حاتم البدراني]

السلام عليكم

اخوي منت مجبور دامك تحس بالندم على الخساير والمصاريف يعني انت منت هاوي الصيد الي يحب الصيد لايمكن يفكر يتركه
ولا يتحسف على خسايره
وبعدين الصيد نوع من انواع الكيف انكانك ماتدري مثل
اهل الاغاني والعود[/ ياالله لاتبلانا كيفهم الجلسات المحرمه كذالك اهل الخراب يالله لاتبلانا كيفهم بالخراب وعلومه
واهل الصيد كيفهم بالبران والصيد والربيع وهالعلوم
:mad: فااحمد ربك انك طحت بالصيد ولا طحت:no2: بالبلاوي لاسمح الله وانك تصرف فلوسك بالصيد احسن من انك تصرفها بشي يغضب الله
وتقبل مووووووري واسف على الاطاله

[أبوفيصل1144]

هون عليك أخي الكريم وحاول انك ترتب أمورك وخل أوقات الصيد محددة وحاول قدر المستطاع ترتيب الامور وصدقني راح ترتاح وتمبسط من صيدك بالتوفيق أخي

[القطاوي 2008]

والله الحال من بعضة يالغالي

[ابوراشد 99]

السلام عليكم ورحمة الله وبركاته اخواني اعضاء المنتدى مكشات ...


اخواني سراحه مادري وين ابدا منه لكن خلني ادش في الموضوع على اطول مع حياتي في البر والمقانيص اشوف كل يوم اطلع للمقناص اقول هذا اخر مقناص لكن بعد ما اشوف الصيد او يذكرلي احد من خواني انه شاف له صيده او ذكر احد صيده على طول حمل الاغراض والعده شغل السياره وعليها حتا اذا ابطينا ماحصلنا صيده وفي الليل مانرجع للبيت الى مع اذان الفجر ويا له شف انواع الحوسه في الوجيه والسيارات الله لايوريك وشايب يضيق علينا وخص انا :d ياهوحاقد على الله يسامحني ما اضيقه ثانيه وتصدقون والله على ما اقول شهيد انا نصرف مبالغ خياليه بين رصاص وكفرات والسيارات حدث ولاحرج انواع التكسير عشان ارنب وحده ولاثنتين ولا جول حجل ولاسوادي اقسم بالله وانتوا محلفتوني ان الحوش حق بيتنا صار تقولا سكراب منشاه عسكريه هذي خمس كفرات متسلخه وبطاريات محترقه من الانوار القويه المركبه وهذا الكمبرس حق الباترول انكسرت قاعدته وقمنا وقطعنا الليات (ماعندنا وقت) وهذي انواع العزب وخلها على ربك , بس تدرون من انا راحمه هي شغالتن ا:( لصار اليوم يوم الجمعه في الليل وجينا من البر خلاص تجهز نفسها عند باب الكراج من الساعه 6الى 12 ليل علشان موعدوصولنا من الطلعه تشوف الضعيفه انواع الشيل واخواني الي اصغر مني موظفين لكن المساكين انواع التاخير على دواماتهم وسبه انا لاني مثل ماقال ابوي الي ( مدشرهم ) في البر......:(

اخواني طولت عليكم لكن شوفولي حل الله يرحم والديكم...

هذا وباء مله دواء الا ذا الحكومات انشئة مصحات خاصة لعلاج مدمنين الصيد تقبل مروري

[العزوم]

ياخوي مالك وما الصيد خل الصيد اذا انك تقول انه تعب وكان عندك بندق ومصرحه انا شراي وشتر كامري وقط بستراحه مع شباب (خكاريا) وريح راسك <<لاتزعل يمكن اني قاسي شووي..


:no2: :no2: :no2:

السلام عليكم
الاخ صاحب الموضوع طرح مشكلته ليجد الحل المناسب ربما لانه وجد معارضه من والده (جزاه الله خير) و خوفه عليهم من خطورة الطرد او الدخول في مناطق لايسمح الصيد بها

والبعض اخذ الموضوع طنازه وتندر وبعدين ليس كل من لايحب الصيد (خكاريا) على قولتك الصيد له اوقات

ارجو ان نرتقي بحوارنا كما تعودنا منكم اخي الحبيب ليبقى ((مكشات)) مجلسنا المفضل

تحياتي للجميع