طير حير بعض الصقاقير

[عروق الدهنا]

بسم الله الرحمن الرحيم



هذا ياجماعه طير شافوه صقاقير وحتارو بعلته


وهو لخوي ابو مسفر



الطير حر مقاسه
17*17 ويزود
قرناس ثامن او تاسع


الطير تأخر بالربطه ماصف شي من ريشه
والطير مفحوص عليه بالمركز سليم
ومدهنة الطير سليمه


بس المشكله الطير ضعيف
ومايرتفع وزنه


وزنه 950 الى 1000 ولايتعداه


وشافه كم صقار وكلن يعطي عله
ناس تقول ضاربه طير من ورى


وناس تقول كبر سنه


واللحين بقى رايكم انتم
وهذي صور الطير



http://up.graaam.com/uploads/thum-1/graaam-25ff6fc8954.jpg (http://up.graaam.com/uploads/imag-1/graaam-25ff6fc8954.jpg)



http://up.graaam.com/uploads/thum-1/graaam-2a26c348ce6.jpg (http://up.graaam.com/uploads/imag-1/graaam-2a26c348ce6.jpg)



http://up.graaam.com/uploads/thum-1/graaam-2a1d4765bd5.jpg (http://up.graaam.com/uploads/imag-1/graaam-2a1d4765bd5.jpg)

[قلب ذيب]

الطير فيه دود رئه !
والطبيب اللي فحصه لك يفحص الرئه لانها تحتاج الى تخريق بالمنظار , اذهب به الى دكتور الصقور في البحرين او مستشفى سويحان في ابوظبي , وسوف تجد التشخيص الصحيح والعلاج الشافي , واذا فيه طبيب منظار في الرياض او الشرقيه اذهب بالطير اليه .
دود الرئه هو الذي يؤدي الى هزول الطير وضعفه بدون ان تبدو عليه أي عوارض بينه و ويصاب الطير بدود الرئه من قلة المناعه في الجسم نتيجة الظروف المناخيه الحاره المصاحبه للغبار وغرف الربط الغير صحيه .

[ربع خالي]

السلام عليكم ورحمة الله وبركاته
اعتقد والعلم عند الله ان الطير به اوكسيديا , هي اللي ماتخلي الطير يزيد وزنه ,, أما غيرها من الامراض اذا جت الطير ونزل وزنه فهيه تقتل الطير ماعدا الاوكسيديا ,,, وانصحك تاخذه للدكتور ,,, وان شاءالله الاخوان يفيدونك اكثر مني ,,,
تقبل مروري
تحياتي

[عروق الدهنا]

قلب الذيب


بيض الله وجهك وماقصرت

بالنسبة لدود الرئة

عطيناه ابرتين

ولافاد
واللي به ماهو دود رئة
لان ضعيف قبل يدخل الربطه
والرجال جابه عندي
وقال:ابيك ترفع وزنه اني عجزت عنه

وعطيته ابرة دود

وبعدها عطيته لحم بقر (عجل)
وارتفع وزنه من 850 إلى 960
ولاتعدها

وعلى العموم بيض الله وجهك على المرور

(منكم نستفيد)


تحياتي

[عروق الدهنا]

ربع خالي

بيض الله وجهك على المرور والتعليق


بالنسبه لل اوكسيديا

مثل ماقلت لك فحصنا عليه بالمركز والطير سليم


لكن على العموم
الله لايهينك على المرور

تحياتي

[أبو شعلان]

عروق الدهناء مساك الله بالخير .

حبيت أسألك الطير شافه العويدي وإلا لا ؟؟؟

[عروق الدهنا]

ابو شعلان

لا والله ماشافه

وانا اقول لخويي وحنا بالمربط البارح

مابقى الا العويدي هو اللي يبي يعطينا العلم


بيض الله وجهك على المرور



تحياتي

[البـــــيسج]

دواه عند الله ثم ابوعبدالله


العويدي


تحياتي

[عروق الدهنا]

اخوي البسيج

بيض الله وجهك على المرور

وكلامك بحمله

دواه عند خالد العويدي
بعد الله سبحانه


نورت الموضوع
والله لايهينك على المرور

[قصاف123]

اخوي عروق الدهنا
لزم ترجع للمستشفى وتسوي لطير (اشاعه)
انا عندي طير قبل كم سنه نفس الطريقه
ماحذف _ضعيف_نقص الوزن_والغريب علفه شبه طبيعي
باالنهايه سويت له اشاعه اوكانت النتيجه _دود رئه كثير حتى اصابه *رداد*
ارجو انك ماتروح لأي شخص عدال للمستشفى
ارجو اني اكون قدرت افيدك

[قناص الهمله]

الله يشفيه

[مشبر البران]

الله يشفيه

[شَعَّـاااال]

ماشاء الله عليه

الاخوان جابوا

كل اللي في خاطري

الله يشفيه ان شاء الله


ـــــــــــــــــ

عطنا علوم الطير الصحيه

عسى لقيت علته ودواه

[شعاق1420]

السلام عليكم ورحمة الله
اخوي عروق الدهناء باالعادة اذا كان الطير ماينفعه العلف يكون من الديدان وخاصتآ ديدان الرئه
لكن انت جربت حبوب ديدان الرئه تجي على شكل مكعبات بنيه غامقه انشاء الله بتلاحظ الفرق .
من مشاكل ديدان الرئه انك ماتلاحظ على الطير شي ابد ولا تنقد عليه ألا بالضعف والطير مايرتفع وزنه.
الله يشفيه.

[هماش]

السلام عليكم
مرحبا اخي
انتبه اذا الطير فيه دود رئه وقالك الطبيب لازم نشيل دود الرئه بلمناظر
لازم تكون موجود معاه لئنه المنظار يدخله الدكتور مع فخذ الطير
وهنا تكمن المصيبه انه يسحب فخذ الطير علشان المنظار انتبه منه علشان مايعمل خلع في فخذ الطير ويصبح التعليق صعب عنده
لئني قد مررت بنفس التجربه
دود الرئه اذا كان متمكن من الطير لابد من عمليت المنظار
وتقبل مرور

[عروق الدهنا]

اخوي قصاف

بيض الله وجهك وماقصرت

وانا بقوول لراعي الطير يروح به للمستشفى وياخذ اشعه له


والله يستر من الرداد

نورت الموضوع

تحياتي

[عروق الدهنا]

قناص الهمله

الله يجزاك خير
اللهم آمين



تحياتي

[عروق الدهنا]

مشبر البران

الله يجزاك خير


آللهم آمين


تحياتي

[عروق الدهنا]

شعال


آللهم آمين

الله يجزاك خير

تحياتي

[عروق الدهنا]

شعاق

بيض الله وجهك

والله العالم ان دود بس اهل المربط يقولون عطيناه ابر ولافاد
والحبوب والله ماجربته
لكن نبي نوصل المعلومه لراعي الطير


والله لايهينك على المعلومه


تحياتي

[عروق الدهنا]

هماش


بيض الله وجهك على المعلومه


الله يجعلكم ذخر


تحياتي

[hawwamT]

مساك الله بالخير أخوي..
الطير نازل وزنه في الربطة...دليل على ان به مرض في داخله...
الطير ما يحذف الريش ...لانه ضعيف وحذف الريش وطلوع ريش جديد يحتاج الى دم واجد وصحة جيدة..
المستشفى ان لم تاتيك بالعلم الصحيح ..ارفع الموضوع من جديد فعندي شي للطير لكن بعد المستشفى..تحياتي للجميع

[~ V T A C ~]

دود الرئه هو الذي يؤدي الى هزول الطير

وعليك بحبوب الثوم

[عروق الدهنا]

بيض الله وجيهكم جميع


وماقصرتو


والطير عرفنا علته من واحد من الاخوان معنا
بالمنتدى الله يجزاه خير

وكان معه الموسم الماضي


والله يعوض خوينا باطيب منه


الله لايهينكم



تحياتي

[@قرناص@]

اخوي اذا كانت شهية الطير ضعيفه .. فآكيد ان فيه دوده الرئه ،،

والحل تفحصه بالمنظار لان العلاج مايفيد الا بعد ماتتاكد من ان الطير فيه دود ،،

وانصحك تروح للعويدي بـأقرب وقت .. وترى عمر الطير كبير ،،

وانصحك بحبة كبد الحوت تفتح الشهيه .. وبترفع وزنه بآذن الله

والله يشفيه ..

[((السنياري))]

الله يشفيه

[قرناس حائل]

وشي علته اخوي , ومنكم نستفيد

تقبل تحياتي

[جملا2008/]

الله يشفية

[راعي غضبان]

ماقصرو الشباب الله يبيض اوجيهم تحس ان في تنفسه شي تنقد عليه بشي لان دود الرئه اذا كثر ووصل حده يسبب رداد والرداد يبطي وطيره مايرتفع واكله طبيعي بس مايستصنع ولما يبطي فيه يبين في تنفسه ومن ثم في حاله يضعف ويقضي عليه والحق على طيرك مادام الموضوع في بدايته اول شي رح للعويدي ترى يده مبروكه ومن ثم الى المستشفى يتئكدون من دود الرئه لو بالاشاعه والله يعافيه ويستر عليه ويقط ريشه من العافيه والصنعه قل امين الله يعافيه وشكرا

[لعّاب المنايا]

الله يشفيه ويعافيه صار عندي من سنتين مثل حالته تقريبا
وبعد الله سبحانه عالجته عند عيادة الدرع والحمدلله طاب الطير
مع العلم إنه قبل مريت به المستشفى ومريت به العويدي ولكن بدون نتيجه ,,,وتماثل بالشفاء عقب زيارة عيادة الدرع ,,,

[شاهين الميلان]

ماعندي خبره يالغالي وان شاء الله ما يقصرون معك الاخوان ولا اظن ان قبل الذيب قصر معك الله العليم انه عطاك العلم

[عزوم الاولين]

الله يعينك ويشفي طيرك

[عروق الدهنا]

الله لايهينكم جميع

وماقصرتو


الطير عرفنا علته

وماله علاج

والله يعوض خوينا باللي اطيب منه


تحياتي

[النجم السماوي]

وش طلعت علة الطير يا عروق الدهنا

لتعم الفائده

[ابوفهد الصقار]

السلام عليكم الله يعوضكم بالاطيب ويرزقكم والله واعلم على حسب مااشوف بالصوره وقفت الطير على كف الاخ اللى بالصوره ظهر الطير فيه ملوع والله اعلم تاكد من النقطه هاذى وابشر بالعوض والسلام عليكم

[شَعَّـاااال]

الله لايهينكم جميع





وماقصرتو



الطير عرفنا علته


وماله علاج


والله يعوض خوينا باللي اطيب منه




تحياتي




الطيب طيب ومثيله قليل


لكن الله يعوضكم بأطيب منه


علمنا وش علته الله يعافيك


وأسبابها وهل فيه طرق وقايه


ومن اللي قال لكم ماله علاج

تحملنا كثرناها عليك

والقصد الفايده


تحياتي لك

[عروق الدهنا]

حياكم الله جميع

علت الطير ياجماعه
بداية الرداد والتهاب بالامعاء

وهذا العلم جانا من واحد بالمنتدى
كان الطير معه الموسم اللي فات
ويقول اني عجزت عنه مابه محل الا وديت الطير لمه

واخر شي وداه لدكتور بالدمام
فحص عليه بالمنظار وقال هذا به التهاب بالامعاء وماله طب
ومع العلم ان خويي وداه للمركز اللي عندنا بالرياض
وفحص الطير فحص كامل
والسوداني يقوول لخويي:يازول زات الطير صحته طيبه وسليم
ومافيه حاجه
بس انت مهمل الطير شوي



يعني فك سبوقه يابومسفر والله يعوضك باطيب منه

تحياتي

[البراء آل عثمان]

السلام عليكم ورحمة الله وبركاته...أصبحت بالخير أخوي عروق الدهنا
في الحقيقه شفت الموضوع وردود الأخوان والطير إن شاء الله له علاج
لكن ياطويل العمر أحتاج لصورة أشعة وفحص الدم كيمياء وكريات الدم
وهذي تقدر تجيبها من ملف الطير إلي بالمستشفى
بالنسبه لإلتهاب الأمعاء
ترى الطير بإذن الله سليم
ثانياً إلتهاب الأمعاء يجيك المرش ممزوج على بعض والطير مب واضح عليه مستوجع من المرض

بالنسبه لدود الرئه لا أضن إن الطير فيه دود رئه والطير إذا فيه دود رئه تلاقي تنفسه سريع حيل حيل
لكن يسير ولا هو سبب في إنه ينزل عدة الطير
وإنت قلت إنك فحصته ولازم يطلع فيه إذا كان فيه دود في الرئه ولا رداد ولا أي شي
*الطير إلي مقاسه 17 تكون عدة من 1100 إلى 1150 تقريباً وإنت الطير تقول 1000 يعني بين وبين
ومستحيل إلتهاب الأمعاء يخلي الطير ماشاء الله بهذي الصحه
والطير يصيد لين يصل عمره 19 سنه وبكل كفائه

عموماً أرجوا إنك تشرح لي الحاله أكثر حتى أقدر أشوفها وأشوف وش هو السبب الرئيسي ولا نكون توسعنا في الموضوع بدون حل وأعطيك علاج بإذن الله يفيد الطير
أو تجي لمنا مرحبا ومسهلا
الأحساء-جامعة الملك فيصل-كلية الطب البيطري-قسم الطيور
أسأل عن
د.مصطفى الرمضان
د.البراء محمد العثمان
وحياك الله في كلا الحالتين لكن أرجوا إنك تنبهني على الخاص في حالة إضافتك رد للموضوع
وتقبل تحيات أخوك البراء العثمان

[شَعَّـاااال]

الله يسمع منك يادكتور

لازال الرجل متمسك ببصيص أمل

http://www.taimiah.org/MEDIA/H2.gif ما أنزل الله داء إلا أنزل له دواء ... (http://javascript<b></b>:OpenHT('Tak/Hits24007344.htm'))http://www.taimiah.org/MEDIA/H1.gif


والله كفوو يا دكتور البراء كفوو
الله يجعلك سبب شفائه
والطيب يستاهل العنوه للمريخ .. ياراعيه
تحياتي للجميع

[النجم السماوي]

الله يعوض عليكم

[أبو_خالد]

والله الدكتور البراء ما قصر ..

[لعيون مكشات]

الله يشفيه ان شاء الله

[عروق الدهنا]

اخوي البراء
الله يجعلك ماتشوف مكروه

وبيض الله وجهك
وعلمك غانك طال عمرك


وانا ابي اعلم راعي الطير
اذا له شف بالطير للحين خليته يدخل المنتدى
ويتفاهم معك

بيض الله وجيهكم جميع

رأيتكم بيضا



تحياتي

[منسر الطير]

مرحبابك أخوي..

أنا أوصيك بوصية غريبة نوعا ما..
وممكن جديدة ولأول مرة..

أوصيك أخي أنك إذا ما نفع مع طيرك شي أنك ترقيه بالقرآن..
والقرآن ليس فقط لعلاج البشر..

فاقرأ عليه كل يوم الفاتحة سبع مرات
وآية الكرسي 3 مرات
والمعوذات 3 مرات
وبعض أدعية الرقية مثل
بسم الله أرقيك من كل داء يؤذيك ومن شر كل نفس أو عين حاسد الله يشفيك باسم الله أرقيك /7 مرات
بسم الذي لا يضر مع اسمه شيء وهو السميع العليم / 7 مرات
لا حول ولا قوة إلا بالله العلي العظيم / 7 مرات

كرر هذه العملية كل يوم
وانفخ بعد كل سورة في الطير وانفث بريق خفيف
وكذلك افعل في ماء شرب الطير

وإن شاء الله بعد أسبوع راح تلاحظ الفرق
وتقول صدق منسر الطير..

والله يبارك في الطير ويشفيه..