ارجوا المساعده في تحديد سعر للطراد [الأرشيف]

مشاهدة النسخة كاملة : ارجوا المساعده في تحديد سعر للطراد

shopard2000

08/08/2009, 12:58 PM

السلام عليكم ورحمة الله وبركاته
اعزائي ، انا احب البحر واحب الصيد وودي اشتري طراد ولا اعرف عن الطرادات شي كنت اسوق طراد اللي يتحرك بالرجلين الله يعزكم اللي في العزيزيه :) وهذا حدي وقد طلعت مع شباب في طرادات بس سقت وعندي خبره لا والله، ولقيت طراد بس مادري كم يسوى وعشان مااظلم راعيه ولا يظلمني بالسعر ودي انكم تشوفونه وتبلغوني بالسعر المناسب له .... ورجاء اللي مايعرف عنه لا يقول شي تكفون ماودي يجي في خاطري والا خاطر راعيه شي .... المواصفات اللي اعرفها :
1- الشعالي مكتوب عليه
2- 20 قدم
3- المكينه 125 الظاهر اسمها مارينر يقول 4 ستروك اللي وكيلها عبدالله هاشم
4- البودي رهيب ولا فيه عيب واحد
5- المكينه ماشاء الله تبارك الله ودي اقول بقراطيسها بس صعبه شوي :) يعني جديييده
6- في اول الطراد مكان صغير كذا للسدحه
7- ارضيته يبي لها شغله ولا ادري وش بتكلف
8- ودي احط الارضيه خشب زي اللي في اليخوت :) بس مادري كم تكلف
9- معه عربانه بس مصديه ورايحه فيها ... ودي اعرف بكم العربانات
10- مغبر من جد ومطول وهو واقف
11- معه فش فايندر ومعه يقول جهاز اللي يقيس العمق ويعلمك اذا قدامك شي لاتصدمه وفيها كاميرا يقول قدام وورا بس مادري وشهي :)
12- موديله وموديل المكاين ماعرف ولا يعرفه هو بس شكل البودي بالتسعينات والمكينه يمكن 2000
13 صور المكينه مادري انحذفت من الجوال بصورها ثاني مره بس لاتشيلون همها هي زينه ترا ونظييفه

اخليكم مع الصور
http://up.up-images.com//uploads4/images/image-012a3f0ccd.jpg (http://fashion.azyya.com)

http://up.up-images.com//uploads4/images/image-b6909e2470.jpg (http://fashion.azyya.com)

http://up.up-images.com//uploads4/images/image-562eea400a.jpg (http://fashion.azyya.com)

ولكم جزيل الشكر

سديم نجد

08/08/2009, 02:29 PM

الأخ shopard2000

السلام عليكم
اول شي أنا صريح بنصيحتي وردودي علشان كذا تنحذف مشاركاتي
الحق شوف اللي كاتبه لك قبل لا يجوه المشرفين المحترفين المهم خذ نصيحة من رجال له بالبحر 30 سنه

النصيحة

هذا البوت حق نزهه وتمشية عصريه وحق سرعه ويستعمل للتزلج الإسكيت
اذا انت تبيه لهذا الغرض فهو يصلح ولكن يبيله تضبيط الفرش من الداخل
بالنسبة للماكينه المارينر ما انصحك فيها نهائي ماتصلح بتعذبك
اذا كنت تبي البوت للصيد والخروج فيه للبحر المفتوح لا تشتريه مو هذا النوع اللي يصلح للبحر المفتوح
أطلب صاحبة يبيع لك البوت بدون المكينه اذا رفض لا تزيده عن 15000 الف ريال مع المكينة
اذا شريته نصيحة فك المكينه بيعها باي ثمن وأشتر مكينه 140 سوزوكي فور ستروك اذا تبي تسرع
او مكينة 100 ياماها فور ستروك اذا تحب السرعه
واذا تبي سرعة معقوله اشتر مكيننه صغيره سبعين مثلا سوزوكي فور ستروك
نصيحة اخيره لا تطلع بهذا البوت البحر المفتوح للصيد خاصة اذا كنت بالبحر الأحمر الخليج ما اعرف
شلون الموج فيه
والزبدة دور غيره تكون مكينته سوزوكي او ياماها او هوندا
لا تشتري بوت عليه مكينه مارينر او ايفنرود او ميركوري

غواص فلسطين

08/08/2009, 02:44 PM

معلوماتي المتواضعة ان المكاين البحرية وكل ما يتعلق بالبحر من طرادات وجيتسكي وسيدو الخ ... اذا طولت وهي واقفة ما تشتغل ييجيها العيد علطول .. وتكلف تكاليف عالية وبالاخر ما ترجع زي الجديدة .. طبعا أتكلم عن المكينة وتنجيد المقاعد وعن أي صدي بالبودي وأي ترقيع بالفيبر يعني موووال .. الله يعينك وان شاء الله الشباب يفيدوك وما خاب من استشار
تحياتي وما تنسى الاستخارة

shopard2000

08/08/2009, 02:49 PM

shopard2000

08/08/2009, 02:52 PM

اخوي Glocks34
يعطيك الف عافيه على افادتك واحب اقول لك ان الرجال يقول لاتاخذ الا وانت فاحص في اي مكان البودي رهيب ومافيه اي مشكله والمكينه بعد ..

والله يجزاك خير واكيد الاستخاره شي لابد منه :)

تحياتي

غواص فلسطين

08/08/2009, 03:02 PM

الله يعافيك ويكتب لك الخير ويطرح لك فيه البركة اذا شريته وما أوصيك التأكد من وسائل السلامة قبل كل شي
تحياتي

سديم نجد

08/08/2009, 04:55 PM

سديم نجد ، تسلم لي على هالطله الحلوه والشور الاحلى
يعني الزبده حق البوت 15 الف ؟ صح
انا احب الصيد لكن مو ذاك الصيد اللي في بالك انا اطلع اتمشى بالطراد واذب السناره ان صدت زين ماصدت رجعت مبسوط :)
الرجال بصراحه مارضى باقل من 24 الف وانا معه ب 18 وصلت 20 بس عيا .....

انا ابيه بس وناسه وفله لكن اذا سعره بالخمسطعش وبيبيعه ب 24 بخليه ابرك
على فكره مافهمت وش بحر مفتوح ؟ انا في الشرقيه بس مادري مفتوح والا مسكر ؟ واذا كان فيه امواج وهوا اصلا ماراح اطلع فيه تراني اخاف شوي :) واللي ابي اعرفه هل هو يهز ويقلب الكبد والا حليو ؟ والمكاين يارجال لو مامشى معي الا سنه خير وبركه ..... كلها اصلا شوي وبمل انا عارف

ويعطيك الف عافيه ومالهم حق يشيلون مشاركتك لان مافيها شي يزعل :)

تحياتي

shopard2000

البوت مايسوى اكثر من 15000 الف ريال ومن كلامك باين انت جديد بالبحر لو كان هذا البوت عليه مكينه سوزوكي او ياماها اوهوندا كنت قلت لك يستاهل 22000 الف ريال او حتى 24000 الف ريال بس عيبه المكينه لا تستعجل بتلاقي افضل منه ولو انا منك اروح البحرين في الويك اند تحصل احسن منه وبأرخص
لآن قوارب النزهه اللي يشترونها محدودين مو كل واحد يرغبها
حاول تكتب موضوع في منتديات خاصه باهل البحرين عن رغبتك في شراء طراد نزهه راح تلاقي عروض كثيره اذا ماتقدر تروح البحرين
وإذا تعرف احد بجده كلمه بيلاقي لك واحد احسن من هذا بالف مره ب 25000 الف ريال
وبالنسبه لسؤلك عن البحر المفتوح هو البحر اللي بعيد عن الشاطيء مالايقل عن 10ميل بحري واكثر وهذا النوع من القوارب كثير الإهتزاز في الموج وانت مرسي في البحر المفتوح لأن قاعدته السفلية على شكل نصف دائرة
والعيب الثاني في الأمواج المرتفعه ماله صدر
والعيب الثالث ماله مكان لتصريف الماء من داخل القارب لو دخلته الامواج مافي غير طرمبة الشفط وهي غير مفيده في الاوقات الصعبه فقوارب الصيد لها اربعة مخارج للماء فإذا دخل فيها الماء يخرج تلقائياً
أما هذا البوت اذا دخلته موجه وحده راح يصير بانيو
( الحين يجيك واحد يقول يا اخي عقدت الرجال )
راعي البوت قالك فيه كاميرا ورا وكاميرا قدام ؟ علشان تشوف الطريق لا تصدم بشي ؟ هو قالك كذا ؟ :D
والله أنا ماتدخلت الا لأني عرفت من كلامك ومن صورتك إنك شاب صغير بس رجال علشان لا تزعل وخفت يغشونك لأن الدنيا صار مافيها خير والدين النصيحة

الله يحميك لعينن ترجيك

marzouq2008

08/08/2009, 05:11 PM

shopard2000

لا يضحكون عليك الرياجيل

Dr. Shark

08/08/2009, 07:06 PM

سديم نجد

08/08/2009, 09:42 PM

السلام عليكم
أنا أؤيد كلام الأخ سديم نجد ١٠٠٪
البحر و انا أخوك ما فيه أجرب و مكينة تجلس معاي سنة و بعدين أصرفها! هذا و انا اخوك عمرك و حياتك.
و أزيد من الشعر بيت: لا تشتري أي قارب إلا يكون مكينتين على الأقل. أنا شخصيا تعطلت معاي واحدة من المكاين و لولا فضل الله بوجود مكينة ثانية كان رحنا فيها. و تقبل مروري.
خالد الحربي (Dr. Shark)

Dr. Shark

هذا سبيد بوت مايركب عليه ماطورين قدحه صغير وضيق مايشيل غير مكينه وحده وبالعاده يركبون له مكينه 150 حصان وأكثر لانه في الغالب مصمم للإسكيت ( اللي يسحب وراه شخص ماسك حبل ولابس زلاجات )
علشان كذا مانصحته بالمكينتين لآني اعرف هالنوعيه زين خاصة اللي في الصوره فيه نوع ثاني اكبر منه 8 متر واكثر قدحه كبير ممكن يركب له مكينتين لكن هذا البوت بالذات وكل الابوات الاسبيد بوت اللي طولها من 5 متر الى سبعه متر مايتركب لها الا مكينه وحده فقط وهذا البوت اللي بالصورة طوله مو اكثر من خمسه ونص لسته متر
واذا تبي تشوف زيه تعال جده واطلع الخور يوم خميس وجمعه وشوف كيف الشباب وحتى البنات كيف طايرين فيه يفحطون هججوا السمك من الخور

shopard2000

09/08/2009, 08:24 AM

الاخ Glocks34
الله يعطيك العافيه وماعليك ان شريته ان شاء الله اكيد اغراض السلامه بتكون موجوده + مكينه صغيره احتياطيه

الاخ marzouq2008
الله يسعدك يارب ..... قلت غشيم بالبحر وباسعار الطرادات ماقلت خبل :)

الاخ سديم نجد

الله يجزاك خير على هالدعوه الحلوه وضحكتني بصراحه في تعليقك الاخير :) ماراح اقول ليه :) بس من جد اضحك الله سنك قل امين
وبعدين لو اكتشفت اني كبير يعني ماراح تتدخل ؟؟ :)

الاخ Dr. Shark

جزاك الله خير يابو وليد وترا مكينه ثانيه شي ضروري اكيد ولقيتها عند واحد من الشباب راميها مايبيها وقال خذها :)

اخواني ... من جد اشكركم على نصايحكم واقتراحاتكم بس لحد الان ماعطيتوني سعر الا ابو سديم قال يسوى 15 هل تشوفون حقه 15 ؟ ابي اعرف السعر ومايذبح الا الرصاص على قولتهم وماظن بطلع فيه بعيد يعني حدي اشوف الانوار :)

جزاكم الله خير على سرعة ردودكم وتجاوبكم ويشرفني والله اني اكون احد اعضاء هذا المنتدى الطيب بادارته واعضائه ... عاد بكره تلقوني اتفلسف اذا دخل احد يبي شي وتذكرووون يوم كان ماعندي سالفه ذيك الايام يووووه ياسرع الايام .... الله يحفظنا وياكم من كل شر

ودمتم بحفظ الله ،

اخوكم ابو تركي

سديم نجد

09/08/2009, 12:14 PM

الاخ سديم نجد

الله يجزاك خير على هالدعوه الحلوه وضحكتني بصراحه في تعليقك الاخير :) ماراح اقول ليه :) بس من جد اضحك الله سنك قل امين
وبعدين لو اكتشفت اني كبير يعني ماراح تتدخل ؟؟

والله باين ماطلعت وجهك بالصورة خايف لا تبين الصلعه ههههههههه عموما كلنا في الهوا سوا هههههههه
بس لو عرفت انك كبير ماكنت تدخلت لانهم ماراح يقدرون يضحكون عليك لانك خابر الحياة بس الشباب الصغار هم اللي ينضحك عليهم في البيعات
عموما باين عليك رغبان البوت الله يبارك لك وعلى قولتك ماراح تبعد حدك تشوف الأنوار
الله ينور عليك ليتك تصور المكينه بس بشرط تطلع صورتك علشان نتعرف بالوجه الطيب اتمنى لك السلامه والسعادة

shopard2000

09/08/2009, 02:58 PM

اخوي سديم نجد ،

لا والله ماراح اشتريه هونت ... ابي واحد يمدح مالقيت ؟ كلمت ناس وايميلات وحالتي صعبه لكن شكلي بخليه والله يرزقني احسن منه واللي يخبر لي شي حليو يبلغني الله لايهينكم

اخوي سديم نجد ، ماقصرت ويعطيك الف عافيه انت وجميع الاخوان :)

ولي الشرف اني اتعرف عليك وعلى شرواك من اهل الطيب

دمت بحفظ الله ،

عقام الرايس

09/08/2009, 05:45 PM

الشباب كفوا ووفوا جزاهم الله خير

احد الشباب انعرض عليه انظف من هذا الجت بوت في جده وما يبغاله غير دق سلف وانزل البحر وبمبلغ 24 الف وكان اكبر تقريبا ثمانية متر ومع ذلك نصحته لا يقربه

الاسباب كما تفضل الاخوة هذه قوارب سرعة ونزهة فقط يعني لا تفكر ترسي بها في البحر خذ لفه وارجع للمرسى وايضا في الخور ما ينفع في المفتوح ولا بريال

وكما تفضل الاخوة المارينر ما تنفع ابدا خصوصا عندنا في الغربية ولكن ابن خالي من سكان الشرقية وهو من أهل البحر وقال ان المرينر في الخليج ماشي سوقها والعهده عليه

مع ذلك اي مكينة تتوقف عن العمل لفترة طويلة تحتاج لصيانة وصيانة المكاين مكلفة ولا ترجع كما كانت

اذا معك مبلغ 20 الف تحصل بها قارب يمشي الحال في المنطقة الشرقية ينفع للصيد والنزهة وعليه ماطورين ولكن لا تستعجل انتظر الاجازة تنتهي

تحياتي

shopard2000

10/08/2009, 07:17 AM

اخوي عقام الرايس

الله لايهينك انت وجميع الاخوه ... ماقصرتوا عز الله
الله يسهلها يارب ... بس الى بعد الاجازه كثير :( لكن مابعد الضيق الا الفرج يمكن القى يخت بعشرين :)

تحياتي للجميع ، :)

sss123

16/08/2009, 04:38 AM

الشباب صادقين والله يكتب اللى فيه الخير

shopard2000

16/08/2009, 08:29 AM

امين يارب ... شاكر لك اخوي sss123