متى نقول على الطير طلاع ؟؟؟ (دعوه للنقاش)

[مكشاتي سابق]

ما نوع الطير : حر
ماعمرالطير ؟؟ :فــرخ ينقــل بكــر
ما(قياسه او وزنه)؟؟ :
مالمزرعه التي انتجته (للمفرخات والمهجنات) ؟؟ : اصيل
أين مكان الطير حاليا (المنطقه / المدينه)؟؟:
ماهي الحاله الصحيه للطير؟؟ :
علوم الطير ؟؟
هل صاد الطير الحباري والكروان ؟؟ ما كتب له شي لاكن الطير هد على الوز والبط والديك الرومي والنورس الأشهــب ( الصلال )
هل الطير طلاع ؟؟ نعم ثبت
هل الطير راكد على التكايه ؟؟ نعم مسمار
هل الطير يمسح على التلواح او يلاعب الشلو(خالي ) ؟؟
هل توجد في الطيرعيوب (الارتفاع,الكوشه,نقل العلف,الصياح)؟؟
ماهو حدك في الطير أو اخر سومه للطير ؟؟؟
ملاحظات اخرى :


أصبح وأمسي على الجميع بالخير


يزداد العرض والطلب مع حلول كل موسم


والمواصفات التي يدلي بها راعي الطير عن طيره تلعب دوراً هاماً في إما رفع قيمة الطير أو العكس صحيح
لذا وقد يشاركني بعض الأخوة أن عدم تحري الدقة في وصف الطير قد يعطي الطير أكثر أو أقل من حقه
ووصف الطير أعلاه هو لأحد الأخوة في المنتدى وقد ذكر صاحبه أن الطير غير صايد الحبارى
ولكن شد إنتباهي أنه ذكر أيضاً أن الطير طلاع وطلعه ثبات
أنا حقيقة قليل خبرة في الصقارة وأبي منكم إخوتي الأعزاء تشرحون لي وشلون ماهب صايد ويشرط عليه الطلع الثبات ... هاذي شلون تجي
على حد علمي إن فيه طيور تفرع على اليد وعلى التكية لكنها ما قد إطلعت على حبارى
فهل نطلق على هذا الطير طلاع أم إننا نقول عنه إن الطير راكد ويفرع
هل الطير اللي ما قد صاد حبارى لكنه يفرع يطلق عليه طلع ؟؟؟
أسمع منكم الإجابة
آمل من صاحب الطير أعلاه أن لا يأخذ الموضوع على إنه إنتقاد لشخصه أو تقليل من خبرته في الصقارة ، معاذ الله أن أستنقص من شأن أي من الأخوة
ولكن إلتبس علي الموضوع وأردت أن أستفيد وأفيد لكي تتضح لنا الأمور أكثر في وصف الطير وتعم الفائدة

[بو غازي]

السلام عليكم ورحمه الله وبركاته
حياك الله اخوي وبالنسبة لي انا وهذي وجهة نظري اذا قلت ان طلع معناتها طلع على حبارى لكن اذا قلت انه راكد على التكية فقط راكد مهوب طلع واوضح اذا مثلا الطير اطلع معي على صيد غير الحبارى ابا اقول ان الطير راكد على التكية وقد اطلع معي ارنب مثلا او كروان لكن راكد على التكية .

[عـــرادي]

حياك الله يالغالي

وبخصوص استفسارك /
نظرا لكثرة الأعضاء ( الله يزيدهم ) وابتعاد المناطق عن بعض لا بد بأن يكون هناك
إختلاف في بعض المفاهيم وهذا شي طبيعي ، وحتى مسميات الطيور نفسها تختلف
من مكان وأخر .
وأنا عن نفس ونيابه عن منطقة نجد فإن الطير الطلاع لا تطلق إلا على الطير الذي
يطلع على الحبارى ويتكرر هذا الطلع ومن مسافه بعيده والركاده والطلع على الصيد
الأخر لا يعتبر الطير طلاع أبد
وهذا حسب عرفي ويمكن قد أكون مصيب أو مخطي
وتقبلوا خالص تحياتي ،،،
أخوكم / بدر العرادي

[ابو امنه]

ماقصروا الاخوان
موفق خير يالغالي

[صقرالحروب]

سب فهمي ان الطير اللي يطلع على اي شي بعيد ويقوم يوعد يعتبر طلاع فنحن في الغربيه في موسم طرح الطيور مثلاً نفرع عن الطرادت وقت ماناخذ استراحه فنرى بعض المرات بعض الطيور توعد وتطلع شي بعيد وبعضها مايحرك ساكن مع انهم موجودين في نفس المكان وفي نفس اللحظه لدرجه ان بعض الطيور نفك سبوقها ونمشي وراها بالمواتر نقول يالله عسها شايفه طير وتقطعنا مسافات ماهي بسيطه مره تصيب ويرزقك الله ومره تلاقيه شي مايسوى يابكه ياشبط

[هماش]

السلام عليكم
انا اشوف ناس تصقر الطير على التكيه وتلقاه مثل المسمار في لوح من طلوع الشمس لين المغيب لكن الطير مايطلع راكد على التكيه
الطير الطلع الطير الصايد ويطلع على الحباري اما تسير او تطير
واعتقادي شيئ واحد انه الي يعلم الطير التفريع على التكايه
لو انه يهد له دجاج حبشي ويخليه يمشي بروض ويهد الطير عليه من التكايه كذا مره ويعلمه على البط والصلال صدقني كان الطير قد صاد الحباري
انه لايتعلم الطلع ويصيد
مر علي واحد من الربع كان يهد لطيره دجاج حبش ويهد له بط ويهد له صلال واهو على التكيه وبئذن الله الزمان الي بعده الطير صار طلع وراكد
واطلع للحباري
تقبل مروري

[أبو أمين]

من وجهة نظري ان الطير الراكد على التكايه الي اطلع ارنب ولا كروان لكن ما اطلع حبارى

عندي يسمى طلاع

يعني الطير الي يطلع على الحبارى هو الطلاع بس؟؟؟؟؟ اجل كذا لازم يتغير المسمى ويسمى مظهر الحباري او او او .......الخ

لكن الطير الي يطلع على اي صيده يسمى طلاع بس طلاع الصيده هذي يعني مثلا يقولك الطير هذ طلاع ارنب ولا طلاع كروان

امل اتضحلك مقصدي

شاكر لك

[الصقار111]

أنا مع أخوي أبو أمين

[طيرالحمــــاد]

المعروف ان الطير الطلاع هو اللي يطلع على الحبارى

ولا كن الطير اللي راكد على التكيه وعلى اليد ولايشوف الشجر ويقولون طلاع هذا كلام غير صحيح
ينقال عنه راكد

وبعض الطيور ماهوصايد حبارى ولاكن معلم على حبارى وراكد ويوريك شي انت ماتشوفه وتلقاه طالع على كروان وطالع على ارنب وتلقاه حريص بالمقناص ويقنص
انا اعتقد انك تقدر تقول الطير طلاع
المهم
الاختلاف في الراي لايفسد للود قضيه

[مشبر البران]

والله ما عندي علم

[راعي غضبان]

الراكد راكد ولابعد طلع على شي بس مايكفخ على التكيه ويتشوف وطبوعه زينه بس مابعد شاف شي واما الطلاع الي تشوفه من يوم تفرعبه وهو يتلهب ويفتش الارض ويتهايق وراء الشجر وقد طلع على شي اما ارنب او حبارى والف شكر لك وتقبل تحياتي

[عبدالرحمن 211]

كان عندي طير فاسد ويطلع على الحباره
وصدر صوت (يكرك)
وهو فاسسسسسسسسسسسسسسسسسسسسسسسسسسسسسد

[مكشاتي سابق]

شاكر للجميع تفاعلكم مع الموضوع
الحقيقة ومن خلال مشاركاتكم تتضح إختلاف وجهات النظر في تعريف الطير الطلع
فإخوانا الطواريح عندهم الطراد اللي يطلع الطير الوحش يسمى (طلاع)
ولدى بعض الأخوان إن الطير اللي يفرع وكل شوي وهو يغز يسمى (طلاع)


لكن إن جينا للبيع والمشترى ومن وجهت نظري يجب أن نوضح طلع الطير لكون العامه يبحثون عن الطير اللي صايد الحبارى ، فعندما نقول إن الطير طلعه ثبات تلقائياً يفهم منها أن الطير قد صاد وأطلع الحبارى ومعيد بعد في طلعه .


هناك صقاقير وأنا واحد منهم والعياذ با الله من كلمة أنا إن الطير اللي قد صاد وقد أطلع حباري لكنه يطلع بعد على كل محتركه غير مرغوب فيه لأنه تلقاه يدوخ راعيه كل شوي وهو طالع له على حاجه ، وكل ما طلع تعال إطرده ووقف وإظهر التلواح (الملواح) ولازم يكون معك نسير .


راح أقول لكم سالفه على هذا النوع من الطيور الطلع ، كنت أنا ورفيق لي وكل منا على سيارته على جرت حبارى هريب وطير رفيقي مفرع والطير قد صاد وأطلع معه حبارى ، المهم وحنا نقص الجره متحرين الطير يطلعها ويهد وبالفعل طلع الطير محمي وهو يجي بين هاك الرمث ويمسح ثم عود ووقع على الأرض وساعة ما وقف راعيه إلا بفقعة الحبارى من الجهة الثانية من سوء حظ رفيقي موتره حال بين الطير والحبارى ، هفت الحبارى من ورى هاك الحزم وسماء وماء دورناها ما لقيناها ، عودنا نشوف الطير وشهو مطلع عليه ولاهي مجحرت جراذيه أعزكم الله ، عقبها قام خويي يسب في الطير عقب ماضاعت الحبارى ، ولا فيه شك إن الله كاتب كل شئ .
لهذا نجد أن الطيور اللي طلعها ثبات ولا تحترك إلا على الحبارى حافظه سعرها ، لذا ومن وجهت نظري الشخصية ما الواجب أن نطلق كلمة (طلعه ثبات) على كل طير يفرع ويقنص على قول بعض الأخوة فما باللكم إن نطلق على طير ماقد صاد الحبارى إن طلعه ثبات .
العذر والسموحة أطلت عليكم ومرة أخرى أشكر مشاركاتكم وآمل أن تتقبلوا وجهت نظري

[أبو أمين]

انا اوافقك الرأي ان الطير المعروض خطأ ينقال عنه طلعه ثبت لانه ماصاد شئ من الروض

باختلاف الصيدات المعروفه للطير

[مكشاتي سابق]

انا اوافقك الرأي ان الطير المعروض خطأ ينقال عنه طلعه ثبت لانه ماصاد شئ من الروض

باختلاف الصيدات المعروفه للطير



هلا والله بخوي أبو أمين
شاكر مشاركتك
لكن تعال ياخوي ما شاء الله على الجروة اللي في توقيعك ، بس طريقتك وأنت ماسك راسها عاجبتني ليكون تبي تعلمها الطلع .... (أمزح)
سعدت بمرورك حفظك الله

[النداوي712]

يااخوان بارك الله فيكم جميع وانا عندي وجهة نظر ان الطير الي ينقال عنه طلاع هو الطير الي يطلع على الحباري هذا هو الطير الطلاع بوجة نظري والله يبارك في الجميع

[أبو أمين]

هلا والله بخوي أبو أمين



شاكر مشاركتك
لكن تعال ياخوي ما شاء الله على الجروة اللي في توقيعك ، بس طريقتك وأنت ماسك راسها عاجبتني ليكون تبي تعلمها الطلع .... (أمزح)


سعدت بمرورك حفظك الله


يامرحبا

اعلمها الطلع والله ياليت اتمنى يريحنا الطير والسلوقي بعد ههههههههههههههههه

تعرض عمرها ياطويل العمر

[أبو رداد]

الله يحيك يالسابق
موضوع طيب ويتناول شقين
الأول (قد تم تعديله في شروط البيع) وأصبح
هل الطير طلاع على الحباري ؟
لان هذا الشي هو المطلوب والدارج في عمليات بيع وشراء الصقور
والشق الثاني
متى نطلق على الطير طلاع ؟؟؟
يبدو لي أن هناك خلاف !! مع أني مقتنع بان عبارة (طلاع) مبهمه دون توضيح
تطلق على الطير الذي يطلع على الحباري حصراً
(الأرنب والكروان)
*لاتسرح في النهار الاماندر
*لاتشرد من مسافات بعيده
كيف تستفاد من الطير الي يطلعها ؟!
بينما الحباري أما شردت من بعيد وأما بدأت بالدريج لغرض الشرده
وهنا يبرز دور طير الطلع ... ياكم حبارا راحت ولادرى بها الصقار الي ماعنده طير طلع
(وجهة نظر)
وسلامتكم

[أبو يزيد 11]

الراكد راكد ولابعد طلع على شي بس مايكفخ على التكيه ويتشوف وطبوعه زينه بس مابعد شاف شي واما الطلاع الي تشوفه من يوم تفرعبه وهو يتلهب ويفتش الارض ويتهايق وراء الشجر وقد طلع على شي اما ارنب او حبارى والف شكر لك وتقبل تحياتي


:good: أنا رأيى مثل أخونا راعى غضبان

[نواف وبران]

السلام عليكم

والله يا خوي الي اعرفه ان الطير الطلاع الي يطلع على صيده انت ما تدري عنهااا مو شرط حباره وخلاص

وثانيااا كان عندي فرخ اخذته اول الموسم ما عمره شاف الحباره وقمت اعلمه على الوز والديك الرومي والدجاج الحبشي طلوع من مسافات بعيده ورزقه الله بشهر 11 بحباري ثلاث طلوع وكبس وحده فيهم من مسافه حسبناهااا 2150 متر في الارض ماهن طايرات

يعني نقول عنه شنو هالطيررر يالغالي اترك الاجابه لكم

[crozman]

الطير له ثلاث من الصيد وهي المعروفه والدارجه
الحبارى والكروان والارنب
واللي يطلع على اي منها تقدر تقول عنه طلع
بشرط انه مايتحرك على غير هالثلاث

[راعى شاهين]

مكشاتى سابق بيض الله وجهك كفيت وفيت

[ناصر الحمد]

السلام عليكم ورحمة الله وبركاته

مساكم الله بالخير جميعا

بالنسبع للأخ الي كتب مواصفات الطير انه طلع ثبات أنه طلع على صيد غير الحبارى وهذا مع أحترامي الشديد لصاحب الطير غير صحيح
الطير طلاع يعني طلع على الحبارى فقط وغير الحبارى حتى ولو طلع على اي صيد من بط وصلال وغيره فهو غير طلاع

لاكن والله اعلم ان قصده ان الطير طلاع انه الطير يعرف الطلع والدليل ذكر الي طلع عليهن

[الجراح11]

السلام عليكم ورحمة اللة وبركاته.
يالربع ما نقلنا الطير ولا شريناه بغالي الاثمان الا لابرق الريش ( الحبارى ) ولا غيرها يهون . هي المقياس الحقيقي بكل شي ( السبق - الصمله - الذبح - الطلع )
يعني ما نسمي الطير طلاع الا ذا طلع على حبارى

[ابوفارس 5350]

سلام عليكم ورحمة الله وبركاته
موضوع مهم تشكر عليه اخوي مكشاتي
الاخوان ماقصرو ولا ازيد عليهم والطير الطلاع تطلق علي الطير
الي سبق له ان طلع على احبارى وتكرر طلعه عليها او ارنب او كراوين
(هاذا يطلق عليه طير طلاع )
وطلع يختلف من طيرالى طير فيه الي طلعه طيب وفيه الي طلعه وسط
والمعروف بين الصقاقير ان الحباري والكراوين ولارانب تحتفي عن الصقار
ويلزمه طير طلع يكشف له المنطقه ويفتشها خاصه المناطق الي ينعدم فيها الاثر
مثال حبارى تدسس عنك اوارنب نفيج اوكروان يزحف عنك
في وجهة نضري هنا يكون دور الطير الطلاع
( اما الصيد الي مايختفي ماني بحاجه لي طير يطلع عليه )

[ذيب السدرية]

مثل ماقالو الاخوان الطلاع هو اللي يطلع على الحبارى فقط وأنا أضيف الى كلامهم حتى ولو كان غير راكد يعني يركد ساعة ويكفخ ساعة مثلا وفي الساعة اللي ركد فيها يمديه يطلع لو كان حوله شي والمطلاع غير المكفاخ يعني واضح انه طلع على شي موب يكفخ لانه يتوق ويسمر قبل مايطلب أرجو أن تكون اجابه كافيه وشكرا

[روووح]

الراكد راكد ولابعد طلع على شي بس مايكفخ على التكيه ويتشوف وطبوعه زينه بس مابعد شاف شي واما الطلاع الي تشوفه من يوم تفرعبه وهو يتلهب ويفتش الارض ويتهايق وراء الشجر وقد طلع على شي اما ارنب او حبارى والف شكر لك وتقبل تحياتي

والله ما ازيد على كلامي اخوي راعي غضبان بشي

[القنـاص2008]

موضوع حلو ورهيب ومفيدة لكسب الخبرة

القناص2008

[هاد بالبرقع]

مساء الخير
الطير اللي ينقال عنه طلاع ويطلع هو الطير النبيه اللي يقنص معك وهو على التكيه
واذا شاف شي من الثلاث تل وقال لك فكن هذا الطير اللي يطلع سوا حبارى او ارنب او كروان اما اللي كل ما تل دوك سبوقك على باشك او حمامه وغيره هذا ودك تبرقعه

بالعربي اللي يطلع ما يتل الا على وحده من الثلاث هذا تقول عنه يطلع

وشكرا تحياتي وانا دبشتن ما اعرف بس اجتهاد

[الغايب الحاضر]

أعتقد أن المقصود هو الطلع على الحباري والدليل أن سعر الطير اللي يشرط راعيه انه مايطلع إلا على الحباري ترتفع قيمته بشكل كبير حتى لو كان ماهو سبوق,,, والله أعلم...

[مطامر]

السلام عليكم
اشكرك مكشاتي على الموضوع الطيب ويستحق البحث ورأيي الشخصي اللي عرفته من سنين ان فيه راكد وفيه طلاع
والراكد مر عليكم اوشفتوه مع احد يعني صحيح مايكفخ بس قليل نبهه ولايفتش عن الصيد اوعنده ضعف نظر ويحتاج نظاره او عملية تشطيب هههههههههه
والطلاع هو بشكل عام راكد ونبه لجميع مايطير او يحترك وحسب الارض اللي يقنصها لكن عند البيع والشراء الصقاره يبحثون عن الطير الي يطلع على الحباري
ولا يريدون طلع لاشياء ثانيه وانا مع العمده ابو رداد في كلامه ان كلمة طلاع كلمه عايمه وغير دقيقه والافضل في رأيي فالبيع والشراء يكتبون هل اطلع حباري ؟
والبائع يكتب عدد مرات الطلع اويقول طلعه ثبت حبارى وهذا يعني انه طلع كثير
والله يرزق كل مسلم على نيته

[قنيص غير]

ماقصروا الاخوان

[مراد منصور]

شكرا على الموضوع و تقبل مروري.

[الصبيحي22]

بسم اله وصلاه علي رصول الله امابعد اخي اسال انتم تقولو طلع ونحنو نقول طيرجلوه لاكن نقول مثل ماتقولون اطلع هوطيرالي يمشي للحباري من بعيداونقول يطلع للحباره من مسافت 2كيلو او3 واكثر ويكون اطيرثابت علي الكف اصقار مايمشي الاللحباري اوكروان وسلام تقبل مروري ونشالله افت الااخ العزيز

[ذيب البر]

حياك الله يالغالي





وبخصوص استفسارك /
نظرا لكثرة الأعضاء ( الله يزيدهم ) وابتعاد المناطق عن بعض لا بد بأن يكون هناك
إختلاف في بعض المفاهيم وهذا شي طبيعي ، وحتى مسميات الطيور نفسها تختلف
من مكان وأخر .
وأنا عن نفس ونيابه عن منطقة نجد فإن الطير الطلاع لا تطلق إلا على الطير الذي
يطلع على الحبارى ويتكرر هذا الطلع ومن مسافه بعيده والركاده والطلع على الصيد
الأخر لا يعتبر الطير طلاع أبد
وهذا حسب عرفي ويمكن قد أكون مصيب أو مخطي
وتقبلوا خالص تحياتي ،،،


أخوكم / بدر العرادي



وفيت وكفيت خاصة نقطة انه طلع على حبارى وتكرر اما الي يقول طلاع والطير ما ذبح الحبارى اسمحلي اقول هذا مايعرف الصقاره حتى لو اختلفت لهجات المناطق

ولكن الاختلاف عندي بالي اطلع او بمعنى اوضح درجت الحبارى قدام السيارات يشوفها الاعمى وكفخ الطير يبيها وقالوا الطير طللاع واشتهر وزاد سعره وطيروه بالسما

انا وجهة نظري الشخصية الطير الطلاع هو الي زي ماقال اخونا بدر الي يطلع على حبارى ويتكرر الطلع ومن مسافات بعيدة بدون جره لاحظ
فيه بعض الربع اعرفهم شخصيا اذا طاحوا على الجره وبشرهم واحد بها شوف العين لقط الريشه وقال الطير طلع هههههههه وشتهرت طيورهم على هذا الاساس

فيه نقطه برضه نسيتها بعض شيبانا سموا الي يطلع على الحبارى طلاع وانا اسميه هو الطللاع لان الحبارى تبي من يطلعها لكن بعض الصيد غبي اسمحلى في الكلامه في عملية التخفي ولا يجيدها مثل الحبارى والارنب دايم نشوفها قبل الطيور ولا تطلع عليها الطيور الا اذا قامت سوا بعيد او قريب لكن الحبارى الحبارى الي يطلعها انا اقول هو الطلاع

(وجهة نظر )