عطل إصلاحه يسير كادت أسرة تهلك عطشا بسببه

[aslaam]

السلام عليكم ورحمة الله وبركاته
كتبت هذا الموضوع ربما يستفيد البعض منه
قبل فترة كنت مع صديقي بسيارته نسير في الصحراء بشمال بلادنا الحبيبة بوقدة الصيف وكان ذلك اليوم حارا جدا كنا قريب من وقت العصررأينا من بعيد شخصا يلوح لنا وعندما اتجهنا نحوه رأينا بعيدا عنه سيارة ( جمس صالون) توقعنا أنه متعطل عند وصولنا إليه وجدناه في أشد حالات التأثر والإرتباك قال سيارتي متعطلة ومعي عائلتي وأطفالي ووالدتي مريضة بحاجة للماء ولايوجد معنا ماء لأننا استنفدناه نحن هنا منذ ست ساعات أو أكثر وكما ترون لايوجد شجر نستظل به .. هون صاحبي عليه وقال أبشر معنا الماء البارد وكل ماتحتاج أركبه وذهبنا إلى سيارته .
المشكلة بشكل مختصر انفجر عليه لي التدفئة من غير مايحس (يوجد للجمس ومعظم السيارات متشابهه ليان "هوزان"لونهما أسود على يمين المحرك تجاه القربة مقابل للراكب بعض السيارات يجمع بينهما بلف لإغلاق الماء وفتحه أحدهما يخرج من طرمبة الماء يتجه لطبلون السيارة والآخر الراجع ومهمتهما تدفئة داخل السيارة في وقت البرد) "كتبت الموضوع بالليل ولو كنت بالنهار لصورتهما للتوضيح" سألته كيف حدث العطل ؟ قال : أثناء سيرنا لاحظت تغيرا بالسيارة عندها نظرت للطبلون فوجدت الحرارة على الآخر أي على الأحمر أوقفتها وأطفيتها وعندما فتحت الكبوت كاد يحترق وجهي من شدة الحرارة انتظرت وقتا طويلا لتبرد وبعدها فتحت الراديتر فإذا هو خالي من الماء مع العلم أني مشيك عليه قبل السفر .سكبت به مامعي من ماء وتفاجأت بنزول الماء من هذا الخرطوش حاولت ربطه بقطعة قماش دون فائدة ..
طلبت منه سكين وزرادية وسيم لم أجد معه إلا السكين القطع كان بشكل عرضي وبمنتصف اللي مما سهل علينا ربطه بعد فصله جزأين بحثت في سيارة صديقي وجدت زرادية تمشي الحال (بنت حلال) بقي علينا السيم ركبنا السيارة وبعد بحث مضني وجدناه بحمد الله قريب من مراح غنم قديم .فصلنا اللي مع المقطع وقمنا بثني كل طرف بقوة وربطناه بالسيم وشديناه بالزرادية (اعترض بالبداية الطريقة وبعد افهامه بعدم المضرة وإنما مهمته تدفئة السيارة وأن الضررينتج من مشيه عليها بدون ماء اقتنع) . (إذا كان معك عدة يمكن الغاؤه من طرمبة الماء مباشرة) سكبنا مامعنا من ماء ولله الحمد كان كافيا للراديتر والقربة , بعد عدة محاولات اشتغل ولله الحمد من تأثير الحرارة عليه . أخبرناه أن الخطر مازال قائما لظهور بعض العلامات بعد تشغيله ونصحناه بعدم إطفائه حتى يصل إلى أقرب مدينة ذهب ومشينا خلفه إلى أن وصل مشارف أول قرية (يمكن في حدود 35كم) بعدها رجعنا لأن وجهتنا كانت بالطريق المعاكس .
ملاحظات للفائدة :
1- لم ينظر للطبلون إلا بعد إحساسه بوجود مشكلة .
2- لم يلاحظ الخلل إلا بعد مروروقت ليس بالقصير والدليل لم يلاحظ وجود تسرب الماء لأن المحرك والراديتر قد جفا من الماء .
3- يعتقد أن جميع أجزاء السيارة مهمة لايستغنى عنه حتى في وقت الاضطرار .
4- عدم حمل بعض الأشياء البسيطة والمهمة ولاتأخذ حيزا بالسيارة مثل المفك والزرادية وطقم مفاتيح والسبانة والشطرطون والسكين والكشاف وخاصة (معلاق الملابس يجي له يوم ويفيد هاللي يجدع في كل مكان)
5- يجب عدم ترك الطريق المعبد واختصاره بالطريق الصحراوي حتى ولو طال خصوصا إذا كان معك عائلة .
حمانا الله وإياكم من كل مكروه . كتبتها لربما يستفيد البعض منها وأنا أعرف أن أكثركم ذو خبرة أفضل مني ,تحياتي.

[عذب الروح]

الله يجزاك خير بالفعل العدة مهمة جداً بالسيارة وكذلك حسن الدبرة(السنع)

الله لايورينا والمسلمين مكروه

كل الشكر لك

تحيتي

[العريني1]

الله يجزاك خير ..وسبق صارت معي نفس الحاله ..وفعلا الخرطوش للتدفئه

[mhsen111]

السلام عليكم
جزاكم الله خير وجعلها الله في موازين حسناتكم والله لا يحرمكم من الأجر .

[سندباد الخليج]

جزاكم الله خير انت وخويك

نصائح يجب ان تؤخذ بالحسبان

بارك الله فيك اخي الكريم

[محيسن1]

الله يجزاك خير
ويكفينا شر المواقف ذي
خصوصا مع العائله

[اللهيب ssss]

الله يجزاك خير وما قصرت ......

[سوبر VTC]

و عليكم السلام و رحمة الله
الحمدلله على سلامتهم
و بيض الله وجيهكم ياشقرديه على الفعل الطيب :good:
و جزاكم الله خير

سبق اني اخوي اخذ الجمس م2001 و صادفت ارتفعت عليه الحرارة بالديرة على الاتش
المهم انه وقف و لقى اللي حق التدفئة من عند صدر الموتر منكسر (كبس بلاستيك)

و السبب و العلم عند الله انه قبل فترة بسيطه مغيرين البواجي
و البوجي الاخير من عند صدر الغمارة مكانه ضيق جدا و اكيد مع الفك و الربط لمس اللي:no:
و مع الايام و الحرارة انشعر و انكسر
اذا امكن غدا ان شاء الله انزل صورته

تحياتي

[أبوعُمر]

يعطيكم العافية و بيض الله وجيهكم .

و تنبيه في محله

[ساري 111]

جزاكم الله خير اً وجعل ماقمتم به في موزازين حسناتكم


قبل عدد من السنين كان معي جمس 93

في يوم من الايام لاحظت تسريب ماء قدام الراكب

فتحت الكبوت لقيت اللي حق مكيف الحار اللي داخل بالثلاجه منكسر من عند السنه(المونيوم)|

السبب والله اعلم اني قبل فتره رحت لمحل رديترات ومن زود النصح حط فلاش لتنظيف مجاري الماء

وشكل هالفلاش لعب بالدنيا ...

لذالك انصح الجميع الحذر منه

[nova]

بارك الله فيك اخوي علي الموضوع


ومشكور علي النصائح


مو هذا الغلط فيه ناس كثيره تختصر السفر عبر الطرق الصحروايه وتترك الطرق المعبده الامنه .


والغلط الاكبر عدم حمل العده اللازمه للطورائ ولو نفكر فيها يا جماعه ما تكلف 100 ريال لو نقول


صندوق عده صغير يكلف 20 وكم سكروب ((درنفيس )) انقول 10 ريال ومفاتيح 20 ريال وعدة


ومستلزمات بسيطه مثل زراديه عاديه وزراديه كبس وشطرطون (( تيب )) ومعجون سيلكون للحراره


من نوع العصار ومعجون حديد عصار اللي يجي عصارين واحد اسود والثاني رمادي وعلبة فيوزات


صغيره وكم محبص ((قفيص )) حق اللي بعدة احجام وبس هذا اهم شئ والضروريات وما نقول


جيبوا عده المانيه اصليه وتكلف مبلغ وقدره بس هذا عده بسيطه ومهمه واي شخص يحتاجها عند


الاعطال الطارئه، ولو تضيفون عليها سير (( غايش )) الماكينه يكون له منفعه بالسفر


وحبيت اضيف علي اخو اسلام ان البلاك (( البوجي )) القديم تقدر تركبه علي (( الهوز)) وتلغي


لي (( هوز )) التدفئه ، بس اهم شئ انه فيه نقطه لا احد ينساها ان اللي (( الهوز )) التدفئه


اثنين مو واحد واحد داخل متجه والثاني راجع ولازم نلغيهم اثنينهم .


وانصح الجميع فحص دوري لدورة التبريد مثل الراديتير واللي (( الهوز )) وفلسات الماء الجانبيه


وفحص الثرومستات لا نترك العطل يجينا فجأه يمكن يجينا العطل واحنا اشد الحاجه للسياره او بموقف


كما حصل مع العائله التي صادفها اخونا اسلام .في الطريق الصحرواي .


والله يكفينا ويكفيكم شر تلك الحوادث الطارئه


وتحياتي لكم

[سلامي لكم]

شكرااااااااا لك وجزاك الله خير والله يستر علينا وعليكم

[صقر الحراملة]

الله يجزاكم خير على مساعدة الرجال و يكثر من أمثالكم

يا ليت لو كل واحد منا إذا جاته فرصة ياخذ فكرة و لو بسية عن الميكانيكا يمكن تفيده أحد الأيام

و تقبل تحياتي

[sfa135]

جزاك الله خير على المعلومه

[صوت الجزر]

بيض الله وجهك وهذي صارت معي حول الشوكي في صالون 89 ومعي الاهل ويسر ربك الامر بوضع بواجي في الليات والحمد لله تساهيل ’’,’’,’’,’’,’’
وتقبل مروري وتحياتي’’,’’,’’,’’,’’,’’

[الزين عندي]

جزاك الله كل خير وصحيح العدة في السيارة مهمة ولايستغني الواحد عنها في كل الظروف

[سوبر VTC]

بيض الله وجهك وهذي صارت معي حول الشوكي في صالون 89 ومعي الاهل ويسر ربك الامر بوضع بواجي في الليات والحمد لله تساهيل ’’,’’,’’,’’,’’
وتقبل مروري وتحياتي’’,’’,’’,’’,’’,’’



بوضع بواجي في الليات



تفكير متميز ما شاء الله :good:

[النجم الطائر]

الله يبطي بساعة البلا
والله لا يطيحنا الا بعيال الاجاويد

[ابهاوي404]

الله يجزاك خير ويكثرمن امثالك.وهذا درس لكل واحدأ منا تعلم ولو مبادي.
عن مكنيكا السياره., ., وكل عام والجميع بخير .

[لعّاب المنايا]

الله يجزاك خير وبيض الله وجهك على فعلك الطيب

[كرفان]

السلام عليكم
مرحبا بالاخوان.....احببت أن أضيف شيأ من خبرتي لما حدث لصاحب السيارة ، فـفي مثل هذه الحالة يمكن السير بالسيارة لان الموتور لم يتعطل ولكن بطريقة مختلفه نظرا لخروج الماء ، حيث يمكن السير والتوقف بصورة متقطعه ،يعني إطفائها وتركها تسير حتى تتوقف من نفسها (تدحدر) ثم تشغيلها مرة أخرى والسير عليها بصورة سريعه حتى تصل سرعتها إلى المئة كيلوا متر في الساعة ثم إطفاء المحرك مباشرة ،وهكذا لأن العملية تحتاج إلى وقت وصبر ولكن النتيجة سوف توصلك بإذن الله .هذا ماأحببت المشاركة به (أخوكم كرفان)

[النيزك الناري]

بالنسبه لي يالربع أغيره كل سنه أو بالأصح سنه ونصف لأن مشا ويري واجد وهو منباب الإحتياط

[مركزالعبد]

السلام عليكم..

كلها نصائحك طيبه

واللي اطيب منها شهامتكم

الله لايقطع توالي الاجاويد

[aslaam]

بارك الله بجميع الإخوة الكرام الذين قرأوا موضوعي وجزاهم الله خير الجزاء على ردودهم الطيبة ووالله ما وضعته إلا من أجل أخذ الحيطة والحذر حفظني الله وإياكم من كل مكروه.

[محمد بن سعيد]

جزاكم الله خير والعدة لا بد منها في كل سيارة

[ابوراس الدحمي]

كتب الله اجرك وفرج الله كربتك يوم القيامة
بس هل نفس الكلام موجود في جيوب التايوتا
تحياتي

[محمد العوني]

جزاك الله خير وفرج الله كربتك

[نشمي الحوطة]

جعلـك سالم ..

وما قصرت ..

وجزاك الله خير على حسن التصرف ..

[ابو خطاب]

جزاك الله خير هذا من اغاثة الملهوف.
عن ابي عمر (رض)ان رسول الله(ص)قال(المسلم اخو المسلم .لايظلمه ولايسلم.من كان في حاجه اخيه كان الله في حاجته.ومن فرج عن مسلم كربه فرج الله عنه بها كربه من كرب يوم القيامه ومن ستر مسلما ستره الله يوم القيامه))

[مدورالصمان]

الله يجزاك خير ويكثر من أمثالك.....

[أبو_خالد]

الله يجزاكم خير ويقيكم مصارع السوء انت ومن يقرأ
وفعلا يجب الحيطة والحذر خصوصا إذا كان معك نساء واطفال


تقبل مروري

[ابو خالد 1992]

جزاك الله خير اخوي ورحم الله والديك انت ورفيقك
وفي انتظار امــيــر المنتدى سوبر فتك
ينزل الصور مع الشرح

[ابو خالد 1992]

وينك ياسوبر مدحناك ولاشفنى منك شي لا صور لاشرح ؟

[zZzZzIDAaAaAN]

كفو والله
الله يجعلها في ميزان حسناتكم
و ملاحظات مهمة...
بس بخصوص اني اشيل عدة ممكن اشيلها علشان لو جا شرواك يلقاها عندي
ولا انا من جنبها يا رجال بالميكانيكا

[sapoon]

والله انك صادق ....
مرة احترقت علي ظفيرة كهربه حقت الفورد ولولا الله ثم وجود العدة وبعض الأسلاك كنت ما تحركت من مكاني
الحمد لله

[taag1]

السلام عليكم ورحمة الله وبركاته
حياك الله اخي / aslaam
الله يجزاك الف خير على هالعمل الأنساني ولاهو مستغرب على شبابنا حفظهم الله
والمشكله يمكن بعض الناس يعمي الله بصيرته وينلخم من الموقف ولايجيد التصرف
وخصوصا اذا كان بالصحراء ومعه عائله كفانا الله واياكم شر المصائب .,.,.,.,
اشكرك اخي الكريم على النصيحه الغاليه ولاعدمناك وكثر الله امثالك .,.,.,.,

[أبوسليم]

جزاكم الله خير

[اسبيدر مان]

الله بعطيك العافيه وانا صارت معي مرتين لكن الحمدلله كلهن في وسط الديره
الاولى على سياره تويوتا كراون ورحت لمكنيكي وقص اللي وركب فيه بوجي وشد عليه قفيز وبعتها وهي كذا
والثانيه كنا شباب وجالسين في منتزه في الباحه وكانت سيارتنا جمس صالون وكان الجو بارد ولاحضنا تسرب ماء اخضر تحت السياره على طول انا رحت للي حق المكيف الحار وفعلا حصلته مشعور لكن من الجهه الي لم الارض ومن الصعب رأيته من الاعلى فعلا طول رحنا لكهربائي واخت من عنده بوجي خربان وشريت قفيز وسويت نفس الطريقه الى سواها المكنيكي في سيارتي الكراون ومشت اموره لكن يقولي ذبحن البرد صار مافيه مكيف حار

[إبن فيصل]

كلامك في محله والله يجزاك خير.

[رعد الصحراء]

الله يجزاكم خير ويوفقكم وبيض الله وجيهكم ويجعلها في ميزان حسناتكم

[سطام vip]

بسم الله الرحمن الرحيم

اولا الله يجزاكم كل خير ولا يحرمكم الاجر

ومتابعة الطبلون شي ضروري والعده لازم تكون في السياره

حتى لو كا كنت تعرف تصلح يمكن يفزعون لك ناس يعرفون يصلحون بس مامعهم عده

انا الحمد لله العدة ما تنزل من سيارتي ابد الربع يضحكون علي يقولون شايل

هالشنطه كلها ليش خذ لك مفك وزراديه صراحه معي عده شبه متكامله

والحرص زين والله يستر على الجميع

ودمت بحفظ المولى

[ابوتركي1]

الله يعطيك العافيه وبارك الله فيك 00
المشكله في ناس وللاسف مايعرف في السياره اي شي غير تغير الكفر ويطلع اماكن لو تعطلت السياره يفتح فمه 00
انا لي صديق انخرمت عليه ثلاجة الحار كابرس 94 وروح عند مكنيكي تركي سواله مشروع خسر فيه ليات وثلاجه وفكت طبلون بحدود 1700 ريال وجلست السياره عنده ثلاث ايام 000
وجاني واحد من اصدقائي في نفس الوقت وشكالي انه عنده تهريب ماء ويوجد ماء عند الراكب قلتله تبغي مكيف الحار قال لا قلتله فك الكبوت وفصلت الحار عن الثلجه والمكينه وسديتها بخشبه علشان الخشب يتمدد بالحراره وما اخذت مني نصف ساعه ليس ثلاث ايام مثل المكانيكي التركي وماكلفت غير سلك وخشبه 000وهذا بعض ضحايه عدم معرفة الناس مكانيكة السيارات ولو قليل000

[مشلب]

الله يجزاك خير
موفق خير

[1من الناس]

انا اشهد انك انت وخويك رجااااال بمعن الكلمه جعلها الله في ميزان حساناتكم ومبروك عليكم الشهر مقدما....

[.أبوعبدالرحمن]

الله يوفقك ويسهل امرك وجعلك في خير ونعيم من الله



وشاكر لك التنبيه

[برق خاطف]

الله يجزاكم خير على مساعدة الرجال و يكثر من أمثالكم

[الربذي]

وعليكم السلام سبحان الله ارسلك الله جل شانه لهم منقذ
مدري ليه قريت اسمك السلام وهو اسلام صح.اسمك كذا وبعدين هو غلط بعائله ويروح 35 كم وسط وهيج الصحراء القاتل كتب الله له عمر جديد ولا لو ماشفتوه مات من القهر والحزن والعطش وخوفه على عائلته بمهنى راح يتجرع الحسرات لو ماشفتوه وتعديتوه وهو يراكم الفرج القادم ......

سبحان الله سبحان من خلق وفرق ....قارنو بين هولاء الافذاذ والابطال والرجال الكرام
وبين هذا الخبر ....
عاجل ( خاص ) -

تعرض رب أسرة من أهالي منطقة القصيم فجر (الخميس) أثناء تعطل سيارته في مركز الهلالية للاعتداء من قبل مجموعة شباب يركبون سيارة يابانية الصنع نزلوا واوسعوه ضربا وخطفوا خادمته وفروا إلى جهة غير معلومة .

مركز شرطة البكيرية تلقى البلاغ وحتى هذا الوقت لم يتم القبض على الجناة ولا يعلم مصير الخادمة ................

[الربذي]

مبارك الشهر على الجميع اللهم ياربي تقبله منا واعنا على قيامه وصيامه يرفع للمزيد من الاطلاع والاستفاده ...رفع الله قدر كاتبه .

[DIVE STAR]

جزاك الله خير

فعلا المشكله هذي تصير بشكل كبير

وسبق ان صارت معنا واحنا كاشتين بسياره احد الشباب من نوع شيروكي

ويوم قلت له الحل قال لا لا تسوي شي

وصور القسام ( قطعه بلاستيك كانت تهرب الماء وتصل بين الخراطيش المخصصه للمكيف)

وقال بيرسله لاخوه وسائط في الرياض ويخليه يجيبه من الصناعيه

بيني وبينك شفت الرجال طول السالفه قلت له شف مسأله اننا ننتضر اخوك لين يجي انسى

انا بلغي الخراطيش ونعبي الموتر مويه ( الغيناها بأستخدام بواجي وشدات في الخراطيش )

واذا صار شي للموتر انا اشتريه منك وادفع لك قيمته كامله

وايدوني الشباب وقالوا للرجال اني خبير نوعا ما في الميكانيكا

والحمد لله مشت الامور ورجعنا الرياض وغير القطعه وصارت الامور تمام


بارك الله فيك وكل عام وانتم بخير

[الهاوي2008]

وعليكم السلام ورحمة الله وبركاته

الف شكر على طرح هالقصة للفائدة

[aslaam]

السلام عليكم ورحمة الله وبركاته
طلب أحد الاخوة صورة توضح مكان اللي وهذه الصورة نتمنى لكم صوما مقبولا

هذا مكانه من جهة طرمبة الماء والطرف الآخر بالثلاجة خلف الدينمو
http://www.mekshat.com/pix/upload03/images120/mk36428_1.jpg
الصورة الثانية صورة الاثنين الداخل للطبلون (للغمارة) والخارج منه ومن طريقه تشاهد نهايته بالمحرك
http://www.mekshat.com/pix/upload03/images120/mk36428_ly.jpg

[ابوفيصل9]

الله يعطيك العافية وجزاك الله كل خير