طرق حداق الصبيطي عند بعض الحداقه

[بوراشد911]

السلام عليكم ورحمة الله وبركاته
اول مشاركه لي في مكشات وانشالله تكون بداية خير لي ولكم
موضوعي اليوم عن اصعب سمكه تنصاد حداق الاوهي سمكة الصبيطي:

الصبيطي يعتبر من اذكا انواع السمك يا ما ناس تعبو معاه بس يبون يصيدونه بس مافي فايده

لانه اذا شاف الصبيطي زول البني آدم على طول يعاير وماينقد وتشوفه يحوم حول الييمه ولا

يضربها لين قامو العالم يبتكرون طرق واساليب لصيد الصبيطي منها

1:الحداق بفار حي ولين الحين ماجربتها.

2:تغميس اليم ويفضل السلس بالبيض وجربتها وانجحت.

3:استخدام شحم ومصارين الدجاج .

4:استخدام العجين والخبز جربتها وانفعت معاي بس اهم شي تخلون الييمه طافحه عن السمج

الصغار لا يخمسون بالييمه.

5:دفن اليم تحت الرمل.

6:استخدام الفلافل وشفتها على اليو تيوب.

ومن اغرب الطرق الي شفتها من بعض الحداقه هي((الامساك باللوهه وهي طائر بحري سباح

ويتم ربط منقار اللوهه عشان لاتاكل الييمه ويربطون خيط في رجل الطير ويهدونه يسبح في مكان

تواجد الصبيطي ويمدون الخيط ويراقبون الطير وعلى كلامهم مايعوق يضرب الصبيطي لانه

الصبيطي يحب يسبح حول اللوه وياكل من قذارتهم هذا على كلامهم ((لاحد تلوع كبده )).

وفي طريقه سمعت عنها وهي يجيبون دجاجه مجمده ويشكونها من العرض بخشبه يعني من

تحت الجناحين ويربطون الخيط الي فيه الييمه في الخشبه ويدخلون الخيط من داخل الدجاجه و

يخلون الييمه تبعد عن الدجاجه حول ال 40 سم ويهدونها مع المايه ويفضل انه يكون في تيار يعني

على رشة المايه او على فكتها ويخلونها وعلى طول يضرب عليها الصبيطي لانه يحب الزفره.


والي عنده طريقه جديده او سمع عن طريقه غريبه ارجوا انه لايبخل علينا و يعلمنا عنها.

هذا وصلوا على رسول الله

أرجو ان يكون ماقدمته مفيد واسمحوا لي على القصور والنسيان

والسلام عليكم ورحمة الله وبركاته

[shaheen70]

ماشاء الله تبارك الله
موضوع يبيله دراسة حسب الفكرة المبدئية لأنه فية طرق كثيرة الله يعين
عوافي عليك

[بـو بـدر]

السلام عليكم ورحمه الله

مشور اخوي الكريم بو راشد

وعندي بعض الملاحضات ارجو ان تتقبلها بصدر رحب

اخوي الكريم نصيحه من اخ محب لك

شي ماشفته لا تقول لحد عنه ( وكاله يقولون يحبون التميز بين الناس )

فلذالك يقولون لك ( انا صايد السبيطي بدجاج مجمد ....؟؟؟؟ ) حب التميز
ولا يقولك انا صايد السبيطي بكذا او كذا .... اما سالفه الوهه عجيبه بصراحه

المهم لانطلع من الموضوع

اخوي الكريم ادري ان نيتك طيبه ولكن سبق وقلت لك تحري الدقه قبل النقل

=============================

موضوعي اليوم عن اصعب سمكه تنصاد حداق الاوهي سمكة الصبيطي

الصبيطي يعتبر من اذكا انواع السمك يا ما ناس تعبو معاه بس يبون يصيدونه بس مافي فايده

سمكه السبيطي حذر زيه زي اي سمكه بالبحر
ذكي بالتصرف فقط ولا شي غيره الي ( كمخه ) وذا تبي دليل للكلام هذا
شوف توقيعي صيدهم بساعه وحده بس

لانه اذا شاف الصبيطي زول البني آدم على طول يعاير وماينقد وتشوفه يحوم حول الييمه ولا يضربها لين قامو العالم يبتكرون طرق واساليب لصيد الصبيطي منها

اخي الكريم انا صايده من علي جرف وشوفه ويشوفني بمنطقه العاموده

الموضوع ومافيه انه اي شي غريب ينزل بمنطقته الي اهو حارسها وهي عباره عن 30 متر مربع او اقل مايضرب عليها الي بعد حين ......


1:الحداق بفار حي ولين الحين ماجربتها.


هاذي الطريقه يصيدون فيها الهامور ( بعمان )
ولا عمري سمعت احد حدق لسبيطي بفار

2:تغميس اليم ويفضل السلس بالبيض وجربتها وانجحت.

وصدور دجاج اعرف واحد من الربع بالشرقيه يصيده بهاذي الطريقه



3:استخدام شحم ومصارين الدجاج .

الشحم والمصارين والقوانص وركز علي قطعه اللحم الي بالمصارين


4:استخدام العجين والخبز جربتها وانفعت معاي بس اهم شي تخلون الييمه طافحه عن السمج
الخبز الايراني عندنا بالكويت والخبر العادي قطعه مربعات وركبها بالميدار
والعجين ايضا ينفع للشعم


5:دفن اليم تحت الرمل.

هاذي الطريقه للشكه او المشبك لما يكون الجزر الكبير الماي فيها تقرح وتروح لبعيد
فيقومو بوضع الميادير ويحطون اليمه فيها ويدفنون اليمه بالطين
ولما يجي المد ترتفع اليمه من الطين
ايضا لسلامتها من النويتش


6:استخدام الفلافل وشفتها على اليو تيوب.

الفلافل والكوسا وانا صايد فيهم
ولكن مو كل مكان ينفع

يعني دور شاطي دايم الناس تجيه وتاكل سندويش فلافل وهو يرعا عليها

ام الاماكن الي مايجيها احد احدقله بالمنجوس او الزوري او الميد واليواف ( حي )
يعني من المرعي الي اهو فيه

ومن اغرب الطرق الي شفتها من بعض الحداقه هي((الامساك باللوهه وهي طائر بحري سباح

ويتم ربط منقار اللوهه عشان لاتاكل الييمه ويربطون خيط في رجل الطير ويهدونه يسبح في مكان

تواجد الصبيطي ويمدون الخيط ويراقبون الطير وعلى كلامهم مايعوق يضرب الصبيطي لانه

الصبيطي يحب يسبح حول اللوه وياكل من قذارتهم هذا على كلامهم ((لاحد تلوع كبده )).

اما عاد سالفه الوهه ........؟؟؟؟ الي قالك هاذا بو لمعه من قلب

لا تعليق

وفي طريقه سمعت عنها وهي يجيبون دجاجه مجمده ويشكونها من العرض بخشبه يعني من

تحت الجناحين ويربطون الخيط الي فيه الييمه في الخشبه ويدخلون الخيط من داخل الدجاجه و

يخلون الييمه تبعد عن الدجاجه حول ال 40 سم ويهدونها مع المايه ويفضل انه يكون في تيار يعني

على رشة المايه او على فكتها ويخلونها وعلى طول يضرب عليها الصبيطي لانه يحب الزفره.

الفك المفترس مو سبيطي .........؟؟؟؟؟

والي عنده طريقه جديده او سمع عن طريقه غريبه ارجوا انه لايبخل علينا و يعلمنا عنها.

هذا وصلوا على رسول الله

أرجو ان يكون ماقدمته مفيد واسمحوا لي على القصور والنسيان

والسلام عليكم ورحمة الله وبركاته


جزاك الله خير وبارك الله فيك ولك

وارجو ان ماكون قد طولت عليكم

وانا مستعد للنقاش للي مومقتنع

تحـــياتـــي

[الضيغم]

مبدع ياراع النقاش مبدع ..

أخوي بو راشــد أنت تقصد منطقة العموده اللي صدتوا السبيطي فيها عمودة الخفجي ولا وين بالضبط ؟



والله يعطيك العافيه على الطرح المفيد ..

[بـو بـدر]

مبدع ياراع النقاش مبدع ..

أخوي بو راشــد أنت تقصد منطقة العموده اللي صدتوا السبيطي فيها عمودة الخفجي ولا وين بالضبط ؟



والله يعطيك العافيه على الطرح المفيد ..


اول شي تعديل

انا بو بدر

ولاخ صاحب الموضوع بو راشد


بالنسبه لسؤالك

نعم العاموده بالخفجي اخر شي عند الخور ومركز الرمايه

الجرف المرتفع هناك

تحـــياتـــي

[غوااص رابغ]

:الحداق بفار حي ولين الحين ماجربتها.

الرجاء التوضيح اخوي تراني ما استوعبت

[بـو بـدر]

:الحداق بفار حي ولين الحين ماجربتها.

الرجاء التوضيح اخوي تراني ما استوعبت

هلا بخوي غواص رابغ

اخوي الكريم

شباب كويتيين راحو لعمان يحدقون -- طلع عليهم فار من الحجم الصغير بالبوت وطمرهم
مو بو العريس الي منتشر علي شواطئ ( جده ) بين الحجر لا الزعنطوط

وواحد من الشباب مسك الفار وقال انا بحدق فيه طفاحي
جربو اخوانا الكويتيين يصيدون بالفار ( من باب الضحك )
من المعروف ان الهامور يجيك علي اي شي وخاصتا ( الحي )
بما ان الهامور ( تكرم ) شركه متخصصه بالتنظيف ههههههههه

صادو واحد والله عملاق هههههههههه وسموه بو الفيران

ومشت السالفه علي ( صيد الهامور بالفيران )

الخلاصه :

خليكم من البنقله لشراء الطعوم

وروحو اشترو مصايد فيران ههههههههههه


تحـــياتـــي

[شاهين2007]

السلام عليكم
اعتقد في مبالغه في مفهوم الاغلبيه لحذر السبيطي
صحيح ان السبيطي حذر وماتصيده بكثير من الخيوط اللي تصيد فيها غيره لكنه يضل سمكه
وانا شخصيا صدته بالمسدس اكثر من صيدي له بالمد او الحداق
لانك اذا كنت نازل في مكان في سبيطي و ثبت مكانك وقت ماتشوفه ثواني تحصله مدرعم صوبك من زود اللقافه اللي فيه ههههههههه وماتفرق اذا جيته بسنوركل والا عدة غوص الظاهر مايهمه صوت الهوا من المنظم
حداق السبيطي في كثير من الفن والخبره لانه وفي اعتقادي تركيبه متجانسه من حيث اختيار المكان و الموسم والوقت والمد والجزر وكذلك نوع الطعم وحجم الخيط والميدار وطريقة الترديع
وكل اللي اعرفهم من هواة الحداق تقريبا عندهم مدرسه خاصه فيهم مقتنعين فيها اتم الاقتناع بالنسبه لحداق السبيطي
المد يحتاج لمجهود اقل ولكن عادة يكون الصيد اكثر لكنه مايختلف عن الحداق من ناحية الوقت والمد والجزر والمكان المناسب والطعم وكذلك طريقة الترديع من حيث اختيار حجم مناسب للخيط الاساسي وحجم اقل للخيط الفرعي مع الاخذ بالاعتبار ان السبيطي اذا ضرب مافي احد يباريه ويوادعه فاحتمال انه يقص الخيط وارد
فالاغلبيه يعتمد اطالة الخيط الفرعي وشد الخيط الرئيسي كثر مايقدر
بالنسبه لي كان اكبر سبيطي اصيده في هافمون ومن كبره كان على راسه نو وظهره اسود ومن بعيد كانه سكن من سواد ظهره وكان ضارب على خيط 70
والصيد توافيق

[سلطان ابوحصه]

السلام عليكم ورحمة الله وبركاته
تحية مني للجميع اخوكم سلطان عضو جديد
بالنسبة للسبيطي صيده سهل إذا عرفت أوقات وأماكن مرعاة ويفضل الجيم اكون افرش واكون من نفس المرعى
ولا اعرف انزل الصور كان أوريكم خوش اصور
تحياتي للجميع