هل انت من يفاخر ويعتز بعزبتة

[حد السيف]

السلام عليكم ورحمة الله وبركاته
شباب سهيل على البواب
والدخل مثل ماتشفون الشباب بدوى بتنتيفها
والخير قدام ان شاء الله
سؤالي يا شباب
هل انت من يعتز ويفتخر بعزبتة ويحرص عليها
ارجو ان اجد الاجابة بين طيات مشاركات الاخوة الاعزاء


محبكم اخيكم
حد السيف

[صاروخ]

نعم


لاني اقتني افضل المستلزمات للبر
افضل قهوه
افضل هيل
افضل شاهي
افضل رزززززززززززززززززززززز
افضل معاميل
فلابد ان اعتز بعزبتي وبتكميلها
صاروووووووووخ

[ابو عايد]

ايه واللــــــــــــــه افتخر بها وعندي انا عزبه المعاميل لحالها

وعزبة الاكل وما يحتويها من شوي وغيرها لحالها

وعزبة المقناص وما ادراك ما المقناص هذي تختلف واكبر حجما جدا

وليه ما افتخربها وهي مثل الخوي دايم تجمل راعيها

ومشكورعلى طرح هذا الموضوع اخي الغالي حد السيف

وتقبل تحيات // العاشق الولهان

[شاص]

إي والله أفتخر بها وأعتز بأنها تجمع أفضل الأدوات

[الضاري]

أي والله أفتخر بة وأحاول أني أجملها بأي طريقة ..

لأن العزبة الزينة والوذفة ... تفتح النفس .. وتقود الوجه لويجيك رجال ماتمون علية.

[مداوي]

السلام عليكم ورحمة الله وبركاته
اخوي حد السيف مرحبا بك وشكرا على طرحك لهذا الموضوع
واحب ان اشارك برأيي وأقول :

لا بد من الإهتمام بالعزبه والحرص عليها وتفقدها بين حين وآخر وتنظيفها بعد كل رحله في المنزل ومتابعة دلة القهوه والملقمه والبريق دائما لأنها تهجر ( يعني يطلع له ريحه اذا ما طبخ به من زمان ) ولا بد من متابعة كل جديد مناسب على كذا اقدر افتخر بالعزبه 0
ومع الف سلامه :) :) :)

[أبو يوسف]

طبعا ابفتخر بعزبتي
ولا وشوله اشيلها :)


لكن كل واحد يطمح للأفضل


مشكور اخوي على الموضوع

[...الطوقي...]

عليكم السلام ورحمة الله وبركاته..



اولا:- اشكرك اخوي حد السف على مواضيعك الحلوه والغريبه;) ..

ثانيا:-العزبه على قولة الاخوان لو مانفتخر فيها ماشلناها:) ..

بالبيت عندي مستودع خاص لعزبتي واغراضي حقت البر ..

معاميل القهوه والشاهي لحال والطبخ لحال عشان لوبغيت تتقهوا ماتنزل كل شي:D ..

وبعد كل طلعه اتفقدها وانظفها عشان ماتخيس باللي فيها:D ..

وانا اقول البر مع عزبتي احلى:D :D ..

الله يعطيك العافيه..








تحيتي..
...الطوقي...

[طيرحوران]

أخوي حد السيف
تدري أن من أحسن شي في الكشته إذا قعد الواحد يرتب بالعزبه ويتذكر وش ناقص ويكمل وينظف ويصفها هو بنفسه لأن لوجاء واحد يصفها غيره ضاعت الدعوا كلها وإذا بغيت شيء دوره ولا تلقاه وإذا سألت راعي العزبه قالك تلقاه بذاك المحل وتلقاك قاعد تحوس عنده وعسى يجيب وقت المكاشيت ونصف العزبه ...
تحياتي

[حد السيف]

السلام عليكم ورحمة الله وبركاته
الاخوة الكشاتة طيور البر
هلابكم وحياكم الله
اعرف واحد من اعتزازة بعزبتة مفصل لها شنطة دندشة وبها سجل للموجودات بها وبعد كل طلعة وقبل العودة يراجع السجل لتاكد من عدم نقصانها واذا ناقص شي الله يعين
سرني مشاركتكم وتفاعلكم
وبانتظار المزيد

محبكم اخيكم
حد السيف

[المربد]

اما العزبة فانا عندي كشوفات مسجلها بالكمبيوتر
وكل ما جاء نيّـة طلعة طبعنا نسخة من القوائم وقعدت انا مع ولدي الله يسلمه نراجع الشناط ،، حيث شنطة للقهوة والشاي ومسجلين كل محتوياتها، وشنطة للطبخ وبهاراته ، وشنطة لعدة وادوات الصيانة.

ويمكن اذا جينا البقالة نوفي ... حاجات نشريها كمالة مصاريف

مشكور اخي حد السيف على توسيع صدورنا بذكريات الكشتة وترويحنا عن جمرة الصيف

[جلوبلستار]

لازم يحافظ عليها ويعتني بها ولا يسمح لأحد انه يرتبها لأنه بيحوسها وبيحط الشاهي مكان الهيل والسكر مكان القهوه والسكين يمكن يحطها في سحاب البيز وتدخل يدك على بالك بتمسك البيز وتجرحك السكين .
كما ان العزبه المرتبه تدل على ان راعيها مرتب والعزبه الحوسه تدل على ان راعيها حوسه
وانا احرص دائما على ترتيب عزبتي واعادة ترتيبها مره اخرى حتى في اوقات الصيف يعني ارتبها وهي في مكانها بدون ما اطلع للبر واعتبرها من مقتنياتي الثمينه والغالية علي .
وسمعت من واحد يدرس في اليابان يقول انهم صنعوا عزبه الكترونيه على بطاريات وفيها لوحة مفاتيح صغيره تدخل فيها الأغراض الي تبي تحطها بالعزبه وتعطيك العزبه انذار اذا نسيت شي من الأغراض ..( امزح ) .
لكن السؤال .. هل تحرص على تغيير عزبتك ( وما اقصد الأغراض ) كل موسم ؟؟ ام تحتفظ بها وتصلح ما الي يبغى منها صيانه ؟؟ واذا كنت تغيرها كل موسم هل تحتفظ بالقديمه وتجعلها للذكرى ام تخليها مع باقي القراشيع القديمه( مهمله ) ؟؟ أسئلة تحتاج لإجابه .

[عاشق الزعيم]

السلام عليكم

بصراحة الموضوع حلو بس احس الى معه شاص هو من يعتز بالعزبه !!!!


لانه معه في كل لحظه لا تفارق عينه .... واذا اراد ان يذهب الى مكان ما على طول يتوجه الى الوجه الي يريدها حيث انه مخصص لها شنطه غاليه الثمن ...


هذا ما اعتقده لانه بصراحه لي صديق وانا اشوف اهتمامه في هذه العزبه بس ما ينتهي من البر على طول ترجع جاهزه لطلعة ثانية مع كل الأغرض والنواقص

هذا وجه نظري
ان شاء الله سوف اصورها لكم
تحياتي

[راعي المقناص]

السلام عليكم ورحمة الله وبركاته :
أشكركم جميع أعضاء مكشات على هذا الطرح الجميل،وعلى طاري العزبة أذكر واحد من الربع مايحب أحد يجي عزبته ،وخاصة عزبة الشاي والقهوة (عنده قناعة راعي العزبة هو اللي يصاليها(يصلحهاا)) أما عزبة الصبخ أما هو اللي يتولى جميع الطبخ أو يتكفل واحد ثاني بجميع المهام غير تقطيع البصل والطماط فيها مشاركة.عشان إذا صار الطبخ مهب اللي أنت تبي نعرف منهو المطرسة منه.

وتقبلوا تحياتي .

[حد السيف]

السلام عليكم ورحمة الله وبركاته
الاخوة الاعزاء
المربد...... الله يطرح بة البركة وزين الشنطة احتوائهاعلى كل ما يحتاجة الكشات
جلوبستار .... ماهي بعيدة نشوف ها النوعية من الشنط مستقبلا وشنطة العزبة ما احد يقربها الا بعد دورة مكثفة لمعرفة كل شي بها واين مكان كل قطعة بها
عاشق الزعيم.... ماهو صحيح وكل طير بر اكيد لازم تصير معة عزبتة هلابك
راعي المقناص ....... العزبة هي اختصاص وفن وغيرة ما اعرف
هلابكم وحياكم الله

محبكم اخيكم حد السيف