المساعد الشخصي الرقمي

مشاهدة النسخة كاملة : المدوخل........يعني شاهي بس بطريقة الدب


قصيمي دب سريع
09/08/2004, 05:10 PM
السلام عليكم ورحمة الله وبركاته
صلى الله عليه وسلم
هذاالله مير يسلمكم اخذ هالاسم مدوخل من طعمه
المدوخل هو الشاهي الي داخل طعم سكره على طعم شاهيه على طعم ماوه
يعني لا تقول الشاهي طاغي والا السكر طاغي والا هو باهت
متداخل ببعضه علشان كذا سميناوه مدوخل.......
ومن شروطه انه يشرب ببريدزه لين يقضي وشرط مايتغير طعمه لين يقضي الشاهي لو يصير بجنب الضو لمدة ساعتين متواصله
المقادير....مقادرير ياقلب العناء مقادير<===مدمن طلال
اول شرط يصير البريق مثل البريق الي بتوقيع فرد حمزه بس الاخ فرد شكله مفوحن بالبريق قهوه تقل يوم برقت بالبريق حسيت انه يفوح به قهوه
الشاهي ربيع ورق والسكر خشن والماء صحه
قبل كل شي نحط البريق بالماء لين يفوح واذا فاح حطينى به السكر همن لا قلب قلبه وحده سكره فهدزنوه عن النار وكبيناالشاهي همن غطينا اثمه ببياله وتركناه يتلين بجنب النار لمدة ثلث ساعه همن ادعج بياله وادع لي
والله ان اتطقطقط الشويهي وتسنك تشرب بقسماط من زينه
ايه نسيت يجين واحد ويقول وشلون اقيس الشاهي والسكر اقول له وانا شايف بريقك
مادري عنك حسب البريق اهم شي انك ماتكثر الشاهي الورق والا تخففه علشان مايعقد الشاهي
هريدي
09/08/2004, 07:26 PM
وعليكم السلام ورحمة الله وبركاته:

اللهم صل على النبي....


عاد تدري يالقصيمي وش ذكرتني به ....


دب ... وسريع .. تذكرت صراحة وشسمها ذيك القنبلة الذرية اللي ذبوها على اليابان .. دبا .. ويا سرعها وهي محدرة .. يعني الله يستر ...............



أما طريزتك ذي يبيلها عزيمتن تعزمنا عليها ، عشان نعرفها نضبوط ....



وقبل ما أمشي ..

أبغاك تعلمنا عن طريقة الشاهي المظوهر !!!!!!
متاخر
09/08/2004, 11:59 PM
وش الحكمه من تغطية اثم البريق ببياله :D
قصيمي دب سريع
10/08/2004, 05:35 AM
الشاهي المظوهر
هو الشاهي الي تشربه بالقايله
الى منك لبده وترست كريشك من هالنثريه
جب شاهي ولبه انت وخوياك وطبعا سموه مظوهر لانه يشرب الظهر والا هوة شاهي مثل اي شياههههيييينييين بالدنيا

:mad: :mad: :mad: :mad:
وشو مظوهر ........انت تطنز بطبختي
:row: يقاله معصب


وش الحكمه من تغطية اثم البريق ببياله
الحكه
الحقيقه مافيه حكمه بس ديكور..............................بريق مطعج مع كلجه ويقول ديكور
يعني لمنك شفت البريدز مغطاء اثمه ببيالة شاهي بس مجرد انك ترفع البياله وتصب مو تقعد ساعه تصارخ عطون بياله
وبعدين تضمن مايجي شي طاير ويصلق بوسطة اثم البريق تعرف الهواش اذا شافت النار فز قلبه جت تمشي مليون تهشه تبيه تبعد وهي مصممه الى تدخل النار مثل الكثير من بني ادم خله تدخل النار بس غط اثم البريق علشان ماتدخل
مو احيانا لا شربت شاهي تحس ان طعمه تقل طعم خنفساء.........هذا انا مادري ليه بس اعتقد انالخلل بثم البريق
تعرف شبك من تحت وماحد يدري وشبوسط هالي تقل رقبة غرنوق ...مره لقوناس بوسطه جعل وهم صار لهم يشربون فيه شاهي اسبوع

:p :p :p :p
عبسي4800
10/08/2004, 10:53 AM
تسلم والله يالقصيمي والى الامام انشالله والله يوفقك ...................
((( الحر)))
10/08/2004, 03:05 PM
الأصل كُتب بواسطة قصيمي دب سريع

قبل كل شي نحط البريق بالماء لين يفوح

عاد هذي الي مادري وين دحدرتها لنا منه ... ياقصيمي و دب وسريع...!!!
قصيمي دب سريع
10/08/2004, 04:39 PM
الحر
ههههههههههههههه
تصدق توي انتبه له
فعلا وشلون نحط البريق بالماء لين يفوح
هههههههههههههه
مستحيل يفوح...جالس اتخيل بريق بوسط قدر ماء والناس تحتري البريق يفوح
تصدق غلطه مطبعيه بس اعجبتني قوة ملاحظتك
صحيح حر
طيب شغل المكيف تبرد

البردقانه احسن من البرتقاله............شكرا على تشجيعك....
يشرفني ان اول مشاركه لك في المنتدى كانت رد على موضوع شاهي
كنت اتمنى لو كان الموضوع بيتزا هوت والا نعيمي بالمايونيز
شي قد المقام يليق بك مو شاهي
على فكره اسمك حلو
...الطوقي...
11/08/2004, 04:10 PM
قبل كل شي نحط البريق بالماء لين يفوح ..
^
^
^
^
^
^
:D :D ;) حلووه...

الله يعطيك العافيه اخوي على موضوعك الحلوووو بحلاة شاهيك;) ..

ننتظر النعيمي بالمايونيز:D ..

ماقصرت ولاتبخل علينا بطبخاتك..









تحيتي..
...الطوقي...
مأمورالبرقيات
11/08/2004, 06:32 PM
وانا من جهتي برسل برقيات لكل ا صدقائي اعلمهم الطريقة هذي ( امزح ) .
لكن اصعب مرحلة من مراحل العملية هي ( وكبيناالشاهي همن غطينا اثمه ببياله وتركناه يتلين بجنب النار لمدة ثلث ساعه ) ثلث ساعه !!!! كل واحد من الربع بيصب له شوي يقول ابشوف هو خدر والا لا ,, ويخلص الشاهي قبل ما تخلص الثلث ساعه ...
راعي الكيف
21/08/2004, 09:57 PM
عز الله انك قصمنجين محكحك !!!!!!!!!!!!!!!!!!!!!!

بس تدري .............. تسلم على هالمشاركة الطيبة
أبو فراس
23/08/2004, 05:43 AM
السلام عليكم ورحمة الله وبركاته
اخوي قصيمي دب سريع


تراهم نغرين منك وتلقطون زلاتك

وبعدين بالنسبة لوشع الفنجال على تعبة الابريق

اولا : تعرفون وخاصة ايام الشتاء تكون الفناجيل باردة ولكن وضع الفنجال على الثعبة يخليه حار علشان ما ينكسر

ثانيا : حتى لا يبرد الشاهي بسرعة لانك جعلته بعيدا عن الضو

ثالثا : علشان ما يطيح به شي من ذباب ونمل وقعر

رابعا : وهو الاهم ...... انا بكيفي ابحط اي شي !!!!!! وانتم وش محرق رزكم......
اشهب
18/11/2006, 07:08 PM
هههههه

يحتاج من يجرب هالشاهي
خالد777
19/11/2006, 03:05 PM
ق د س 7 7 7
قصيمي دب سريع
الصراحة أن موضوعك هذا شاااااهي محكور باااالحيل
اسمح لي اسميك احسن شياهي علشان الخبز من الخباز والشاهي من الشياهي
الزبدة انك اكتشفت سر من اسراري بالشاهي يوم اني أكشت قبل ما اتوب عن البر
لك مني كل التقدير ياقصيمي 2000
خشم العرنية
24/11/2006, 06:46 PM
جزاك الله خير
جهآم
07/08/2007, 02:07 PM
وعليكم السلام ورحمة الله وبركاته
صلى الله عليه وسلم
الله يوسع صدرك
السنع كله
09/08/2007, 05:11 PM
شاي مدنوخ وليس مدوخل كذا سمعناها من الكبارالله يرحم ميتهم ويحفظ حيهم