وش افضل تانكي ماء الواقف ولا المنسدح

[ERIC7]

السلام عليكم ورحمة الله وبركاته
الشهر عليكم مبارك جميعا وجعلنا الله من صوامه وقوامه

ابي اشتري ولا افصل مع اني عجاز واحب الجاهز تانكي ماء لليوكون مع العلم اني شايل المرتبه الثالثه
ابي نصيحتكم وش افضل التانكي الواقف ولا السدح من ناحية الثبات والصوت وضغط الماء وثقله على الموتر مابي الموتر يطيح من ورى
وخصوصا الواقف يركب له مشدات ولا كيف يتثبت خصوصا اذا مافيه عفش اخاف اكل مطب والتانكي فاضي ما ادري الا وهو طالع مع القزازه
انتظر نصايحكم لاني لي شهرين وانا محتار

[باثفندر]

كل واحد له رغبة ،،،، ووجهة نظري الشخصية الواقف افضل يوزن الثقل في وسط السيارة تقريبا ،،، ومحمي اكثر من اللي منسدح بعدين انت عندك مساحة شايل المرتبة الثالثة .

[GX2007]

خذ لك التانكي الواقف اللي يجي خلف المرتبه ازين واخف للموتر لانه يكون الحمل كله فوق الدفرنس ...... وكل واحد له وجه نظر

[أبو عيسى 770]

الواقف ولا المنسدح <<<<<<<<<<< هههههههههههه
المنسدح أزين لأن الواقف ياخذ محل و المنسدح 5 أو 6 سم بس و يوازن أحسن

[غالي]

انا ابعطيك وجهة نظري


الواقف طال عمرك لو سيارتك شنطتها تكفي تقدر تحطه بالشنطه بدون ماتشيل المرتبه الثالثه

لكن المنسدح غصب تشيل المرتبه

خذ مقاساته وادرس هالنقطه

عل وعسى تفيدك خصوصا اذا كنت راعي عائله قد تحتاج المرتبه الثالثه

تحيتي لك والله يوفقك :)

[راعي الفتك 9]

الواقف أفضل بكثير له مشدات يشد مع المرتبه الثانيه
وفيه صوت خفيف مع الفات :d

[تركي الضرغام]

السلام عليكم
موترك يوكن وأنا موتري لاند كروزر
وأنا مريت بمثل هالتجرب ميخالف لو طولت بس بشرحلك للي صار معي
أنا كنتن مفصل تانكي فرش على الأرض سل ستيل بنذيك القيمه بس يوم حملته عانيت من نزول الموتر وثقل على السيارة بعت التانكي وشريت واقف والحمد الله خفيف على السيارة فاضي ولا مليان ما تدري ( هو خزان الوادي 90 لتر ) وحطيته حط لا تثبيت ولا شي والشنطه فاضيه ما أذكر أنه طاح سواء مليان ماء أو فاضي
أشتر راحتك

وأنا أنصحك لا تفصل ولا شي أشر من الجاهز

[سلهمت حر]

السلام عليكم
اعتقد ان المنسدح افضل لان الواقف يعيبه اخذ مساحة كبيرة من غير ما تدري تشوف شكله تحس انه ما اخذ مساحة و غير كذا شكله قبيح
و اللي حق البزبوز لازم يكون طويل ولا زم تربط مدري تشد
هذه وجهة نظري

[ERIC7]

جزاكم الله الف خير
اللي يسأل ليه اشيل المرتبه الثالثه انا موتري قصير مهوب الطويل يعني اذا خليت المرتبه الثالثه وحطيت تانكي الشنطه ماتاخذ ولا كيس فاضي
وبالنسبه لخزان الوادي مدري ليه احس الالمونيوم افضل منه مع اني ماجربته
على العموم الاغلبيه اجمعوا على الواقف لازلنا ننتظر اراء الباقي من الاخوه

[ERIC7]

يا اخوان فيه احد جرب خزان الوادي 145 لتر اذا يطلع منه صوت عالي مع الفرامل والملفات ولا لا؟ انتظر احد يفيدني بهذا الخصوص

[محمد بن سعيد]

الأفضل التانكي اللي واقف وخصوصاً التوانك اللي بها قواطع لأنها ما ترج مع المطبات والبطانيج اما خزان الوادي سبق وركبته عملي وممتاز بس يعيبه عدم وجود قواطع واضطررت إلى تغييره بخزان المنيوم من البريه

[اسير المقناص]

السلام عليكم

افضل شي لليوكن هو التانكي الفرش وانا مركبه بإرتفاع 11 س وسعة 150 لتر

وخفيف بالتنزيل والتركيب ولا يتحرك ابد افضل من الواقف

[ERIC7]

مشكورين جميعا على ارائكم اذن خزان الوادي X
طلع اراء جديده للفرش انه يناسب اليوكون افضل من الواقف مع اني افضله في الشكل وتحميل الاغراض لاكن ضغط الماء بيكون ضعيف جدا

[غالي]

أخي العزيز

دام الوكيل ماعطاك ضمان ضد الكسر

أعرف انه محتمل انه ينكسر من الحمل فوقه

انتبه للنقطه

تحيتي

[ابوفيصل1]

رحت شفت الخزان واعجبني من ناحية الشكل والقوة كذلك انة مفصل وهذا راح يكتم صوت الماء اذا نقص ولكن حجمة صغير بانسبة لمساحة اليوكن ويبيلة تثبيت لانة ماراح يثبت في فراغ من اليمين تقريبن عشرة سنتيمتر ومن اليسار عشرة سانتي ومن المقدمة والمؤخرة اذا وسطتة دخل السيارة بيكون من خمس عشر سنتيمتر الى عشرين ولو مليتة موية راح يتحرك يمين ويسار واذا مسكت فرامل راح يتقدم الى الامام واذا انت طالع طلعة او جبل راح يزحف ويدقر على باب الشنطة خاصة ان سيارتي ملبسها بلاستيك نايلو ****
كذلك محل التعبية مرتفع ولو انة على مستوي التانكي افضل او صنعو التانكي على مستوي مكان التعبية كان اخذ كمية ماء افضل وكان على مستوي واحد خاصة اذا بتفرش علية وتحط بزارينك في الخلف

اذا لقيت حل لهذه المشكلة من ناحية التثبيت شريتة اليوم قبل بكرة


http://www.mekshat.com/vb/images/misc/progress.gif

[باسم40]

مساكم /صبحكم الله بالخير
الرد متاخر شوي بس حبيت ادلي بدلو للفائده
انا مركب تانكي 117 لتر تقريبا حديد واقف من 17 سنه تقريبا ممتاز جدا لانه راكب على محور السياره (الدفرنس) يعني ما يهزع قفى السياره اذا امتى ماء الا تقريبا (1 سم) تقريبا او اقل سواء في السياة القديمه موديل 85 لاند كروزر(سست) او هلآخيره 203 لاند كروزر علما انني مجلسه تجليس بدون تثيبت
وتشغل قاعدته من 30 - 35 سم تقريبا ولو تلاحض المسافه هذي تجدها ضايعه تحت مسند المرتبه الخلفيه الا من الاغراض الصغيره وممكن يثبت فقط بتركيب السرير من خلفهويكون السرير اقل من ارتفاعه ب(5سم )تقريبا