أرجووو المساعده يا اخوان

[حمد العازمي]

السلام عليكم ,,,, اشكركم على هذا المنتدى الجميل صراحه

والذي ابهرني وافادني بصراحه ولكن

عندي سلوقي جايني هدووو وعمره سنه وثلاث شهور
بس يااخوان الصراحه تعبني ماعرفت اتعامل معه
اذا نزلته وابيه يمشي جمبي بالسياره يمشي متر وعقبه
يصد وينحش ادق له هرنات مايرد مايرد لين انا ارده
واذا ابيه يركب مايركب الا لين انا ازخه وركبه
ومايجي على ليت السياره

الزين اللي فيه انه يصيد لكن طبعه غثيث وتخبرون عمره كبير صعب
التعامل معاه

الصراحه انا قالي واحد اضربه اذا سوا غلط
بس انا اللي اعرفه الضرب من الصغر يجيب نتيجه
لكن لمثله ماعتقد


اتمنى احد يفيدني وانا مبتدا في امور السلق

وشكرا

[غيماااار]

يليته عندي اخ يالقهر

[غيماااار]

غيماااار وبس

[راعي السيزو]

ولله علا السياره فا حاول انك تربط حبل وتربطه بل سياره بس امش سرعه يعني50 سوها اسبوع وبعدين فكه وشوف اذا تمام تمام اذا رجع فا مالك الا تعامل خويي ابو خلف الا وهو كا التالي
1 انك تطقه طق اذا ما مشا ورا السياره واربطه وامش فيه 100
2ما تعطيه اكل لمدة 5 ايام بس اليوم الخامس شوف اذا صار تمام عطه اكل اذا ما زان عطه شوشيه شويه لا تكثر اكل له
3 اذا كان موترك حوض لالالالالا تفتحله الباب خله يطمر وهو قافل علا شان اذا رحت قنص خفيف ما تنزل من السياره
اتمنا اني سويتك شي والله الموفق

[وًاثق الخطوهً]

وعليكم السلام

والله انا عندي تقريبن نفس المشكله بس الي عندي انه ما يجي قدام السياره

يجي ورا وانتم عارفين انه ما يصلح كذا وربي مدري ويش اسوي معه

وانا نفسي ضيقه معه بي الذات مدري شكلي يوم ابي اجيب عمره

المهم انا عندي سوال عندي سلقه وجابت جريه متاء ترد صدرها انا الحين شلتها عن الجراوه بس مدري كم تجلس ؟ سوري انا حاس اني خرجت عن الموضوع

[عثمان المطيري]

يامرحبا ياحمد العآزمي

كلام اخوي .. راعي السيزو تعذيب !

وخمس ايام يمدي السلوقي فطس من الموت وصار جيفه !!!

الوكأد ياحمد الذيخ حاول انك تربطه بحبل طويل شوي يعني 4 ولا 5 امتاار وامش على الموتر على الراحه

يعني 20 ولا 30 وصيح له خله يلحقك .. ولاتسرع ان اسرعت ووقف راح يختنق من الطوق ..

وخلك على هالحآله كم يوم ..

وبنسبه للمشي على الليت السلوقي فيه طبع ان شاف الصيده على الليت جاها فالليل

وماعليك لأتنزله الا اذا فيه شي قدآم الليت مره ومرتين وعقب يتعلم من نفسه ينزل وطوووالي على الليت .. من نفسه

وعلى انه يركب الموتر حآول انك تربطه وتركض معه وليا جيت للحووض اطمر وقووله فوق فوق ولا اركب اركب .. وحآول تجيب لك سلقه مدربه عشان تسهل عليك التدريب .. وحط خيشه ولا شي يرفع السلوقي عشان يسهل عليه الطمر للحوض .. بالبدآيه ..

وان شاء الله ماقصرررت يااولد الديره ..

[عشق الولع]

وش الي اربطه وش الي جووعه صاحين انتم ولا بكم شين..!!!!!!!!!!!!!!!!!

هذا حيوان بهيمه ياخي الرسول عليه الصلاة والسلام قال الرفق بالحيوان..!!

ياخي السلق بهايم ترا مافيه اسهل من تعليمه بس يبيله صبر ثم الصبر ثم الصبر

خيوهـ اذا عندك سلق متعلمه ولا دبر عمرك شف لك سلق متعلمه

وهدهن مع سلوقيك وترا الجرا بذات تتعلم من الكبار بسرعه

ياما مرت علينا سلق بروسها طابوك وتعند لكن بالصبر ومع الوقت

وصلنا معها للي حنا نبيه اما جوعه خمس ايام ليه بقوانتنامو هو..!!

وسالفة التركيب والتحويل برضو جب سلوقي متعلم وخله يركب قدامه

وهو بيتعلم ولا اذا جا وقت الاكل حط له بالسياره وخله يركب

ومثلا حط له مركا خله يركب عليها اذا كان قصير وشي شوي يتعلم

اما ع طول تبيه مثل الخيل يقمز قمز..!!

اتمنى اني وضحت كلامي ومعليش ع الاطاله بس ناس غريبه

تقل هوايتهم تعذيب السلق ماهو تعليمها وكسب خوتها

تقبل مروري

[عشق الولع]

ولله علا السياره فا حاول انك تربط حبل وتربطه بل سياره بس امش سرعه يعني50 سوها اسبوع وبعدين فكه وشوف اذا تمام تمام اذا رجع فا مالك الا تعامل خويي ابو خلف الا وهو كا التالي
1 انك تطقه طق اذا ما مشا ورا السياره واربطه وامش فيه 100
2ما تعطيه اكل لمدة 5 ايام بس اليوم الخامس شوف اذا صار تمام عطه اكل اذا ما زان عطه شوشيه شويه لا تكثر اكل له
3 اذا كان موترك حوض لالالالالا تفتحله الباب خله يطمر وهو قافل علا شان اذا رحت قنص خفيف ما تنزل من السياره
اتمنا اني سويتك شي والله الموفق


ياخي يا أدمي اذا السلوقي سرعته 65 ون طار نقول 75 بالله شلون يمشي 100..!!!!!!!!!!! :confused: :confused:

حقني وفهمني بالله عليك .......!! :confused:

والله لو السلوقي له 6 رجول ما وصل لسرعه هذي..!! :confused:

[ابو حاكم]

جب معه سلقه او سلوقي يعزز له والله ان يسلك معك
تقبل مروريـــ............ الشقاويــ

[ذيب الدهنا]

انا والله ماعندي علم لكن فادوك الاخوان

[@قرناص@]

ولله علا السياره فا حاول انك تربط حبل وتربطه بل سياره بس امش سرعه يعني50 سوها اسبوع وبعدين فكه وشوف اذا تمام تمام اذا رجع فا مالك الا تعامل خويي ابو خلف الا وهو كا التالي
1 انك تطقه طق اذا ما مشا ورا السياره واربطه وامش فيه 100
2ما تعطيه اكل لمدة 5 ايام بس اليوم الخامس شوف اذا صار تمام عطه اكل اذا ما زان عطه شوشيه شويه لا تكثر اكل له
3 اذا كان موترك حوض لالالالالا تفتحله الباب خله يطمر وهو قافل علا شان اذا رحت قنص خفيف ما تنزل من السياره
اتمنا اني سويتك شي والله الموفق


الوكاد ياراعي الموضوع ..


جب لك سلقه مدربه وريح عمرك خلها تعلم الي عندك وان شاء الله تظبط ،،


واذا ماحولك شيئ ،،


قبل لاتطلع بالسلقه دايم اكلها وهي عندك ومسح عليها ونادها ولاعبها لين تعرفك زين بعدها اطلع بها وخلها حول الموتر ثم امش وصفر لها لين تجيك ولاتسرع خلك شوي شوي لين تتعود بعدها ابدى زيد السرعه


والسلقه خلها مجوعه 6 ساعات بس لا اقل ولا اكثر ،،


والله يوفقك وفالك الظبي


وياليت صورر لها نشوف ووش هي ،،


وحياك الله ..

[عروق الدهنا]

لاتعـــلــــــــــــــــــــــــيق

[هاوي سلق]

يااخوان كل يعطينا وجهة نظره
وجزاكم الله خير

[الرعد99]

هدو الوضع يا شباب بعدين انت غلطان يا اخوي راعي السيزو تجوع 5 ايام ليه وتربطه فالموتر وانت تمشي ليه ناوي تذبحه مثل ماقالو الشباب جيب معه سلوقي مدرب جربتها مع ذيخ عمره 3سنين لا يركب ولا يطرد خليته مع سلقتين مدربه شهر واسبوع وبعدها طرد واقنص به لحاله واتمنى اني افدتك يا حمد العازمي
وتقبل مروري

[حمد العازمي]

لاهنتو يالربع وبيض الله وجيهكم

لاهنت اخوي عثمان المطيري وجاري التجريب ولاهنت اخوي الرعد99 على النصائح

وشكرا

[feras19]

لا اللة الا الة مجانين يمشي100 وماياكل 5ايام حسبنا اللة ونعن الوكيل