اف نسيت السكاكين الخ وش اسوي

[متوسد برده]

مساء الخير ان كنتم مساء او صباح الخير ان شاهدتوا المشاركه صباح


دايم بالكشتات لازم انسى بعض الاغراض واحيانا تكون اغراض مهمه واهم شي اذكر اني نسيته السكاكين احد ينسى السكاكين ياناس


كيف اكشت بدون ما انسى شي


وشلون ما انسى لوازم الطلعه


مع العلم ان عندي عزبه


لاكن لابد من النواقص

[slman]

لا نسيان بعد اليوم
اكتب جميع حوايج العزبه
بورقه وغلفها في المكتبه
ولصقها على شنطة العزبه

والسلاااااااااااااااام

[Mohammed_S]

هذا العلم الصح

سجلها بورقة وخلها بالعزبة مثل ما قال العضو سلمان

[النداوي HZ2AF]

صحيح أكتب قائمة بجميع الأغراض التي تود أخذها معك وأن شاء الله ما راح تنسى شي....... أخوك النداوي

[المتحـ2007ـد]

العزبه لازم تكون كامله يعني شيك عليها قبل ما تطلع بها للبر

وشف النواقص وشي

وأهم شي الكاتم و الصحن والملح والرز والباقي يهون تقدر تستغني عنه وله بدائل

مثل الملاس بديله عود اغسله ونظفه وحرك به - الغاز بديله الحطب

وراعي البر ما عليه خوف يسنع اموره بنفسه

[سطام vip]

بسم الله الرحمن الرحيم

السلام عليكم ورحمة الله وبركاته

اخوي ليش اصلا تطلعها من العزبه؟؟

اذا خلصت من الكشته اغسل قدورك واغراضك كلها وامسحها ورجعها للشنطه العزبه

ولا عاد تأخذ شي منها الا اضف لها وبس

انا من النوع الي ما احب اطلع شي من العزبه الا بنفسي اطلعه واستعمله واغسله

وانشفه وارده مكااانه وبكذا الحمد لله نادر انسى شي وعزبتي دوووم كامله ولله الحمد

وبعدين اخوي بدل السكين خل عند 2 او 3 ماهو شرط تكون نفس الحجم

اشتر شي كبير ووسط وصغير ينفعك وقت الزنقات

والله يسهل امرك وبالتوفيق لك

[غربي هواوي]

لا صار عندك عزبة متكاملة ودايما تشيك عليه بأذن الله ما راح ينقص شيء

[الناب]

الأصل أن العزبة ما ينزل منها شي

تضيف لها أو تغير حسب الأفضل

وألي عنده عزبه دايمه وهو ألي مسويها صدقني ما تنقص شي هو حاطه
ولا يمشي من مكانه وهو ناص عود

بارك الله فيك
موفق خير

[escape_man]

عندي موترين .. بكل موتر وبداخل الدرج عدة لاذرمان

بحجم الكف .. صناعة امريكية .. فيها مفكات وزرادية وسكين ومبرد و و و و

عدة متكاملة ماتنزل من الدرج وحجم صغير


الاصلة والقديمة يمكن ماتلاقيها بسهولة لكن توني شاري للوالد وحده من ساكو باقل

من 60 ريال وامريكية الصنع ايضاً وجيدة

[مكشاتي كوكتيل]

كيف نسيتها؟ أكيد إنك مطلعها من العزبة ولا رجعتها ويوم نويت تطلع للبر شلت الشنطة بدون ماتشيك عليها!!

لاتطلع شيء من العزبة حتى ماتنساها ولو عندك ورقة ملصقها على شنطة العزبة وكاتب فيها محتوياتها راح يفيدك في التشييك عليها قبل الطلعة.

وبعدين أكثر مايضيع من العزبة هو الأشياء والمتعلقات الصغيرة مثل السكاكين والكبريت والملاعق ومفك العلب وغيرها وبعض هذه الأشياء يمكن تعويضها والإستغناء عنها (مثل الملعقة اللي تستخدمها في إخراج الأغذية المعلبه كالجبن والتونة تقدر تستغني عنها بالسكين ومفك العلب تقدر تستغني عنه كذلك بالسكين) والبعض الآخر وهو بيت القصيد لايمكن الإستغناء عنها مثل السكين والكبريت فلذا يجب عليك وضع سكين احتياط وعلبة كبريت في الجيب الجانبي للشنطة بحيث يكون مخصص كمخبأ للأشياء الصغيرة المهمة.

اللي أنا متأكد منه إنك انقرصت بنسيانك السكين ولذا فستكون هي أول ماتتأكد من وجوده في المرة القادمة :)

[الضاحي]

يا رجال .... النسيان ملح الطلعات ..... احيانا

[عاشق الفتك 20]

ما قصر الاخوان

[شنطة عده]

مساء الخير ان كنتم مساء او صباح الخير ان شاهدتوا المشاركه صباح



دايم بالكشتات لازم انسى بعض الاغراض واحيانا تكون اغراض مهمه واهم شي اذكر اني نسيته السكاكين احد ينسى السكاكين ياناس


كيف اكشت بدون ما انسى شي


وشلون ما انسى لوازم الطلعه


مع العلم ان عندي عزبه



لاكن لابد من النواقص

الورقه والقلم وانشاء الله معاد تنسى شي

اذكر قبل مده اني لقيت اوراق مطبوعه في برق الحياء وكانت مخصصه للكشات مذكور فيها كل الي يحتاجه الكشات من اغراض
اخذت منها نسخه وصورتها عدة صور نسخ
وعندي في البيت اخذ منها نسخه في كل طلعه
وكانت الاوراق تحمل شعار منتدى مكشات
فجزاء الله صاحبها خير الجزاء

[new boOoy]

افادوك الاخوان قبلي

[عاشق الفرعه]

الورقه جيده

[متوسد برده]

الى كل من ابدى رأيه في الموضوع

انا شاكر ومقدر لفضايلكم والله لايحرمنا اهل الخير والناس اللي مثلكم وشرواكم