اخوكم مبتلى بعادة ويرجو منكم الراي والنصيحة .,,

[مهيلان]

ما ادري عن سبب هالعاده لكن احس انها بدت تزداد مع الايام . واحس انني مع الايام اهييء نفسي للمداومة عليهامن حيث اشعر او لا اشعر .. على الرغم من علمي بخطرهاوان الرسول صلى الله عليه وسلم قد حذر منها ...
هذه العادة هي طلوعي للصيد ( لحالي ) يعني وحيدا ..

هذا المنظر تعودت عليه فرشه نفر واحد وفنجال واحد وبياله وحده .. وقدر على المقاس
http://www.mekshat.com/pix/upload/images5/mk4024_gg.jpg

اسمحوا لي من واقع تجربة ان احلل الموضوع من جميع الجوانب حتى يكون حكمكم علي ناتج عن علم ودراية ..

في البداية ساجيب على تساؤلات قد تطرا على من يقرا الموضوع .
فاقول : ليس الدافع لطلوعي لحالي قلة الاخويا فهم كثير وله الحمد ..
--النفسية ولله الحمد من احسن ما يكون ..

الاسباب كثيرة .. واغلبها راجعة لاخوياي ..

فاحيان اكون متجهز من يوم الاربعاء العصر وتتفاجاء
ان ما عندك احد من اخوياك
فواحد ماطلع من الدوام الا متاخر وبينام الا صلاة المغرب
والثاني عنده عشاء وما يخلص لين يمشون الضيوف
والثالث طرى عليه طاري وهون ..
واخيرا تمشي من الديرة الساعه وحده ليلا وتصل مكانك الثانية والنصف وتنام ساعتين ويوم الخميس تكره حتى نفسك من الارهاق والتعب ..

من اسبابي ايضا اني مر على موقف في احد الشعبان كنت ارمي جول من الطيور وفجاة تدخل احد الكشاته بصورة مفاجاة وصار يرمي نفس الطيور اللي ارميها بكل جراة وكانه ما يشوفني حتى تفرقت الطيور ..
بعدهاحلفت ان ما اطلع نهاية الاسبوع ما دام المساله وصلت لهذا الحد من قلة الاحترام ...
ووسط الاسبوع راحة ما بعدها من جميع النواحي .. الصيد الوفير , وتختار اللي تبي من الشجر للمقيال
حتى من الناحية الامنيه ففي الغالب ان التفتيش على السلاح غير المرخص يكون نهاية الاسبوع .. واللي يمر شعيب العصل يوم الخميس بيشوف العجب العجاب :confused: ..
ووسط الاسبوع كل الربع مداومين ..

- اذا كنت وحدك فانت حر في برنامجك اليومي فاحيانا ترى من المصلحة ان الغدا يتاخر الا بعد العصر اذا كان هناك صيد يستاهل .. احيانا لضيق الوقت الفطور يكون في السياره وانت ماشي .. والعشاء طاسة حليب .. لكن لو معك احد لازم تراعي رغبته يمكن يبي الغدا في وقته ويبي العشاء كبسة رز .. والفطور فول :confused: :( القرموشي

- بعض الناس ما عنده جلد وتحمل فاحيانا تضطر تطلع من الشعيب الى شعيب ثاني احسن منه يبعد 50 كم فتلقى خويك تعبان وساكت مجاملة لك . او يقول ان المشوار ما له داعي وفي كلتا الحالتين منتب مرتاح ..

_ من يطلع لوحده تلقاه متجهز اكثر من اللي يطلع مع ربعه ويكون اكثر حذر من غيره ..سواء على نفسه او السياره .وكذلك نصيبه من الصيد يكون اكبر ,,

من سلبيات الوحده
منهي عنها شرعا : قال صلى الله عليه وسلم ( المسافر شيطان والمسافران شيطانان والثلاثة ركب .. )
-ضيقة الصدر احيانا خاصه وقت الفراغ ,, لكن نعوضها احيانا بالجهاز اللاسلكي ..
- الانسان معرض للكثير من الاخطار قرصة عقرب او خراب سياره او حادث سيارة وكثير من الاخطار يلزم ان يكون حولك من يفزع لك ..

ختاما اتوقع ان هناك من يعارضني في طريقتي ومن يؤيدني عليها علما اني ما اتجاوز يوم ونصف او يوم كامل في اغلب الرحلات .. مع العلم ان طلعات التمشيه ما اطلعها لحالي .. ولكن الصيد فقط ..
هل تشوفون ان لي عذر في طريقتي او لا اعذر
ودمتم سالمين

[ابو سلمان]

اخوي مهيلان الله يحفظك

كلامك فيه من الصواب كثير لاكن ممكن الشخص يلقا ولو واحد من الربع نفس ميوله وتوجه في جميع الامور ولكن اذا المسألة يوم او يوم ونصف مافيه مشكلة اعتقد ممكن الواحد يقطع الوقت بطريقة او خرى بالتفكر في عظمة الخالق عز وجل ولامر فيه سعة ...... اخوك اوقات السوي سواتك :)

[line]


http://www.mekshat.com/pix/upload/sign/images/mk9589.gif

[راعي كيف]

اخوي مهيلان كنت اعاني نفس المشكلة حتى تركت الصيد كلة
ونسيت شي بعد انك إذا رحت للبر وماقلت لحد زعلو الربع وتشرهو ويالله من هالسوالف الله يعيننا
اخيراً اقتصرت على الكشتات والتمشي وغيرة تجنباً للأحراج :(
وشكرأ على طرحك مثل الموضوع الحساس




اخوك المحب راعي كيف
ابو ناصر:row:

[Eagle]

عزيزي مهيلان
مانقدر نقول الي تسويه غلط لانه كلنه محبين للبر والكشتات
واحيانا اشتاق لشوفة البر واروح بروحي بس من غير سلاح ولا حته عزبه
بس آخذ فره بالسياره وارجع
وحته خلال هالرحله القصيره تحدثلي مشاكل مثل التغريز او البنشر فأتمنى انه معاي احد
نصيحتي لك لو معزم تطلع بروحك ومالقيت من يخاويك
خل عند احد من الربع او الاهل خبر وين مكانك وموقعك عشان لاقدر الله وصار شي او انقطعت فيك الاتصالات او عطلت السياره اتسهل عليهم يلقونك
والله يحفظكم جميعا من كل مكروه

[ابو عمر اللاحم]

اخي الكريم مهيلان حفظه الله ...

عنوان موضوعك يدل على انك مقتنع قناعة تامه بخطورة ما تفعله وانك متضايق منه على الرغم من انك لاتطلع واحدك الا يوم واحد او يوم وانص كما تقول .

انصحك اخي الكريم بنتقاء ما يناسبك من الاصحاب والذين ترتاح لهم ويرتاحون لك ولن تعدم ذلك .
بعض الناس يطلع مع من هب ودب ولا ينظر ما يرتاح له ويناسبه .

ملاحظه لن تجد انسان كامل ولابد من اختلاف الاذواق واختلاف الافكار . ولابد لك من التطنيش ولاتؤاخذ زميلك بكل زله وكل كلمه .

وشكراً لك على ايراد هذه الموضوع المهم ،،،،

[العنكبوت]

اخوي مهيلان ,,,

الصراحه ماشوف باللي تسويه ان شالله اي شي الا انه مخاطره

بس على قولك يومو نص ااخر شي معقوله وزي ماقالو الاخوان

اترك خبر ,, وان حصل لاتبعد

ومشكلتك احس انها مشكله عدد كبير من الكشاته

وخاصه الصيد لانه لاصار بالصيف الا يالاقي خوي

والا لقيت الا ياضابطن وقته على وقتك

ولاكن انا تغلبت نوعا ما على هالشي باني بديت اعطي الي معي الي يبي

ولا احاول اتعصب لرأيي وخصوصا لاصرت انا الي دعيته (يعني ظفيته:D )

وخذ الامور ببساطه وشبابيه

والشي الثاني هالافكار تجر لك مشاكل ,,, احسم قضيتك عند شيخ والا خبير

ولاتكثر التفكير به ,, لان بدايه المشكله انك تفكر هل عندك مشكله !!!

وبتمر الايام وتصير ذكريات

اخوك العنكبوت

[panadol]

العزيز مهيلان المسلم إذا وجد دليلا عن المصطفى صلى الله عليه وسلم أخذ به وترك ماسواه ....
لكن إذا ماتيسرلك أحد يخاويك أخبراهلك عن وجهتك وكم يوماستجلس وعليك بقراءة وردالصباح والمساء واذانزلت منزلا فقل الدعاء : بسم الله الرحمن الرحيم أعوذ بكلمات الله التامات من شرماخلق اللهم أنزلني منزلا مباركا وانت خيرالمنزلين . فإنه لن يضرك شئ حتى ترتحل من ذلك المكان كما أخبرالرسول الصادق المصدوق صلى الله عليه وسلم . يعني لو لدغتك عقرب أو أفعى لأقدرالله فلن يضرك شئ إن شاءالله . ولا تنس تشيك على الموتر بدقه وان تيسرولقيت عامل هندي يخاويك تراه ماهي شينه يلقط الصيد ويغسل المعاميل ولا يهون نتف الدخل الي يسميه واحد من ربعنا ( أشغال شاقه ) ويازين الجوال الفضائي .............................. ولك تحياتي

[عبوووود]

الأصل كُتب بواسطة ابو سلمان
اخوي مهيلان الله يحفظك

كلامك فيه من الصواب كثير لاكن ممكن الشخص يلقا ولو واحد من الربع نفس ميوله وتوجه في جميع الامور ولكن اذا المسألة يوم او يوم ونصف مافيه مشكلة اعتقد ممكن الواحد يقطع الوقت بطريقة او خرى بالتفكر في عظمة الخالق عز وجل ولامر فيه سعة ...... اخوك اوقات السوي سواتك :)

[line]


http://www.mekshat.com/pix/upload/sign/images/mk9589.gif

[العرج السبوق]

اخوي العزيز مهيلان *****

السلام عليكم ورحمة الله وبركاته
أشكرك على هذا الموضوع الذي تم طرحه .... فأنت كفيت واوفيت وتحدثت بمصداقية وفعلاً ذكرت أشياء صحيحة 100% عن الاصدقاء ومواعيدهم وأنا صراحه أفضل الخروج لوحدي للصيد خصوصاً في هذه الايام التي تكثر فيها الطيور المهاجرة والصيد متوفر ولله الحمد ولكن لاتتجاوز الرحلة يوماً .
ولكن الخوي لابد منه لعدة أمور يعرفها الجميع والاخوان ردوا بمافيه الكفاية لكن لوسمحت ياعزيزي مانوع ( البندقية التي على فرشتك )

والله أسأل أن يرزق من حيث لاتحتسب

( لاخاب ضنك بالرفيق الموالي)
(مالك مشاريهن على نايد الناس )


أخوك العرج الســــــــــــــــبوق

[حفرلوجيا]

الأخ مهيلان اشكرك على لفت الانتباه لموضوع هام جداً .

وكأني فهمت من اسلوب ومحاولة أخونا مهيلان ان يكون الموضوع ذو فائدة ,, أن الخروج للرحلات وحيداً ليست بتلك المشكلة التي تؤرقه لتلك الدرجة ولكنه أراد التنبيه وتداول الأمر للخروج بما يفيد.

هناك فئة من الهواة مدمنين على تتبع أحوال الطقس وملاحقة السحب ومكان سقوط الأمطار أثناء هطولها على ما يحمله ذلك من خطورة جراء العواصف والصواعق والسيول .. ولكن غالبا تجد رحلة أحدهم لوحدة لاتطول.

واعرف اشخاصا لاتنقصهم الحكمة , ولكن فتنة الرحلة تغويه للخروج وحده بعد أن ( يعذر) لنفسه .. فمره خل اروح اسير على بناخينا راع البل .. ومره خل ادور بسباس وحوا واجيبها للوالدة .. ومره خل أنظف الشوزن ...... والنتيجة لازار البناخي ولاجاب العشب والشوزن كانت للرمي ولا نظفها.

أتأمل فيمن أعرف , فأجد الصقارين قلما يذهب أحدهم لوحده .. والكشاتة اللي بطلوا الصيد تجدهم يذهبون شلة قلت أو كثرت .

ويبقى الشوزنجي .. هنا مربط الفرس ( هذا اللي قلنا يدور الأعذار لنفسه ) .:)

لذلك اخوي مهيلان ارجع للصورة بموضوعك ودخلها على الفوتوشوب وانزع البندق وبطل الصيد وستجد بعد فترة انك لاترغب الرحلة وحيدا.:)

لكن المشكلة ان الشوزنجي المفتون بالصيد إذا جاء وقت الصيد تحصل اصبعه تتحرك تلقائيا من جراء الادمان .. ولا يبري علته إلا الزناد ورمي الفشق وسدح الطيور .:looney:

أنا أشوف اللي يقدر يكون مثل اخونا راعي كيف , هذا حل المشكلة , يعني لو الله ( وفقك ) بترك الصيد كان انحلت خصوصا ان أخونا مهيلان نبهنا إلى أن اخلاق بعض الصيادين ومضايقاتهم تطفي لهفة الصيد .
لكن إذا فتنة الصيد في ذروتها فكما قال الأخوه .. اختر من الأصحاب من ( تنسجم) معه وينسجم معك , ومع ممارسة طقوس الصحبة مع الألفة ستجد أنك فيما بعد أدمنت على مصاحبة صاحبك ..
ادمان أهون من ادمان .:)

[مهيلان]

السلام عليكم
كل الشكر للاخوه المشاركين والقراء
في البداية احب اذكر ان الردود ابهرتني وفاجأتني لانها جميعا قالت بصوت واحد : غلطان يا مهيلان وطريقتك غير صحيحه . طيب انا بينت عذري وهو اني ما القى من يخاويني وسط الاسبوع ..
من وجهة نظري اشوف ان عذري مقنع اذا اصريت على الطلوع ..
لكن الشيء اللي ما توقعته وتفاجات به هو ما نصحني به الاخوين راعي كيف , وحفرلوجيا ..يوم قالوا : اترك الصيد !!! وزادها حفرلوجيا بقوله : لو وفقك الله وتركت الصيد ..
لو ذهبت لمحرك بحث مكشات وكتبت ( اترك الصيد ) بيقول لك المحرك : ما قالها الا اثنين الاول قالها وهو مستعجل والثاني قالها بناء على تجربة مريره مع الصيد !!!!
اذا عملنا بهذه النصيحه يتوجب علينا اغلاق خيام الصيد البري والبحري والاسلحة . وحذف اي موضوع عن الصيد لانه ( غير مكشاتي )

كل الشكر لكم وللدكتور النفسي عنكبوت ..
العرج السبوق البندق شوزن امريكيه كسر ( كل على همه سرى )

والسلام عليكم

[الجمس]

اخوي مهيلان
السلام عليكم ورحمة الله وبركاته
ليس وحدك من يقوم بهذا العمل فامثالك كثر وانا واحد منهم. من الصعب جدا ان تجد شخص يرغب في الذهاب معك متى ماشئت ويكون على نفس التردد , لذا تضطر للذهاب لوحدك. وكنت اذهب دائما لوحدي حتى حدثت حادثه لشخص اعرفه كان مولع بالصيد وكان يغيب عن البيت لمده قد تصل الى عشرة ايام لوحده وبدون مرافق حتى تعودوا الاهل على غيابه . وفي احد المرات طالت غيبته لاكثر من عشرين يوما وبدأ اهله بالقلق عليه وبدأ البحث والسؤال عنه لمده شهر تقريبا وبعد ذلك اتى خبر من الشرطه بالعثور على جثته داخل سيارته في احد الشعبان وقد اخترقت طلقه شوزن بطنه وكانت من الشوزن الخاصه به وفي اعتقادي ان المرحوم باذن الله كان يطرد ارنبا واتجهت به الي الشعيب وسقطت السياره من حافة الشعيب وثارت البندق واصابته في بطنه ولو كان معه مرافق لكان الوضع تغير لكن هذه مشيئة الله ولاراد لها ( رحمه الله رحمة واسعه وغفر الله له واسكنه فسيح جناته) .
في الوقت الحاضر اذا رغبت في الذهاب للبر للنزه اوللصيد ولا لقيت خوي اخذ عطي الله (بنقلا) وهذا حارس عندي بالاستراحه لكن( شقردي مع الاعتذار لخونا شقردي) بتسويه القهوه والشاهي والنتف والسلخ والطبخ وضف العفوش وخاصة سلخ الضبان مابعد شفت مثله .
مع تحياتي للجميع.

[بركان]

اخي/ مهيلان
لقد لامست الحقيقة بمقالك
نعم مشكلتك ان صح تسميتها مشكله هي مشكلة الكثير وانا منهم
فعندما تنوي الذهاب للبر قد لا تجد في نفس اللحظة من يرافقك خاصة اذا كنت مثلي اي من نوعية( فرد حمزه ثاير ثاير) حتى لو في خباه.
احيانا لا يكون لدي رغبة جامحة في الذهاب للبر ولكن عندما يمر فرق طيور (القوارير) (الوروار) ويبدأ في التغريد صباحا يدغدغ تغريده عواطفي واعود مسرعا واجهز العده وانطلق كاني ورقة كيس اسمنت في يوم عاصف.

اخي الكريم اذا كانت كشتتكت قريبة وليوم واحد وفي منطقة فيها ارسال جوال من اجل غرض في نفس يعقوب فلا اعتقد ان في ذلك مخاطره ابدا. ولكن احرص على لبس بوت طويل اذا كنت من هواة قنص الطيور لحماية ارجلك من اللدغات لا سمح الله لان من يقنص الطيور دائما رأسه الى السماء. كما ان البوت وان كان حارا يحمي الارجل من الاشواك والاعواد والحجاره.

وعلى فكره تراني طالع اليوم بلحالي وان كان تبي تعرفني تراني لا بس بوت طويل واصل الى منتصف الفخذ تقول كانني افغاني بيطب وسط خلطة اسمنت.!!! كععععع كعععع.
تحياتي وتقديري.

[الطبيب]

انا من الناس ( واعوذ بالله من كلمة انا ) ما اقدر اروح للبر لحالي او اصيد واطبخ وانفخ لحالي

وليس السبب ان الموضوع كثير علي ولكن بسبب اني ما اقدر اجلس وحيد لاونيس ولاحس ولا خويا حولي

والشي الآخر والاهم هو تشكيل وتنوع الخويا علشان تجرب كل خوياك وتعرف منهو الصالح من الطالح ( ولله الحمد لم اجد طالح الى الآن )

الصيد ما يصلح وحيد مهما كانت الظروف لانه ينطوي على مخاطر كثيره ومجازفه

ولنفرض لا سمح الله انك تعرضت لحادث ( ايا كان نوعه ) فلو كان معك خوي لكفاه ان يسوق السياره الى اقرب مستوصف او موقع للهلال الاحمر مثلا

الشيء الآخر

هو ان الخوي مثل السلاح بجنبك يكفيك امور كثيره ويونسك بالسوالف


والتعقيب هنا على ان الخلوه طيبه من وقت لآخر لكي يخلو الانسان بنفسه ولو لكي يرتاح من تعب وهموم الحياه

ولكن الخلوه تكون ماهي بعيده عن الديره ولمدة ساعتين او ثلاث فهي كفايه

هذا رأيي

وهو كما قال الشافعي رحمه الله

(( رأيي صواب يحتمل الخطأ ورأي غيري خطأ يحتمل الصواب ))

هذا والله اعلم

والسلام ختام

[بن نويشر]

دور على الشقردية والله وسلملي عليهم ،،

الحقيقة أنا مريت بهذه التجربة منذ فترة وحبيت أشارك معي واحد من الأصدقاء في طلعة عقب المغرب للثمامة نشب ضويه ونضبط الحليب والزنجبيل .. الخ .

الحاصل تدرون وش قال ؟؟!!

قال يا جماعة الخير (برد) !!!!!!!!!!!!!!!!!!!!!!!!!!!!!!!!!!!!

ومره أخرى حبيت أن أعرض الموضوع على صديق آخر ، الحقيقة الرجال ما خالف بس له شرط !!! بأن يكون محفول مكروم ، يعني ما ناقص ألا أنك تدخل بيته وتشيله من غرفته وتركبه السيارة وفي اليل ترجعه مثل ما أخذته شبعان ومرتاح . لا والمنه عليك بعد ، بأن تكرم وراح معك !!!!! (يا سبحان الله)

والسالفة الأخيرة ..
مره مجموعة من زملاء العمل يبطلعون كشته نهاية الأسبوع وما عندهم عزبه أتصل واحد منهم وطلب مني عزبتي وقالت : له هذه الساعة المباركة بس المعذرة أنا أيضاً بطلع وأحتاج لها .. فتضايق الرجال وقال : تكفى يالحبيب يالطيب بدل غير ما لنا ألا أنت !! قلت : والله أسمحولي أنا والله مأقدر والحقيقة أني مواعد جماعة ولا أستطيع بأن أتخلى عنها ، وأنتم بإمكانكم تدبرون أنفسكم بكل سهولة .

الحاصل .. جا يوم السبت وقابلت الشباب وقلتهم هاه وش أخبار الرحلة ؟؟ قالوا: ما طلعنا ، قلت : ليش ؟
قالوا : ما عندنا عزبة !!!!!!!!!!!!!

أيش رأيكم يا شباب ..


وتقبلوا خالص التحية ،،

[مهيلان]

اخوي الجمس مشكور على المشاركة
والسالفة الي ذكرتها هي مما اخاف منه ,, الله يغفر له ويرحمه
__________________
بركان يا هلا بك ومرحبا

حيا الله الافغاني :)

مشكور على النصيحه
_______________________

طبيبنا الغالي

حياك الله وبياك

لا تنسى ان نفسيات الناس تختلف من شخص لاخر

( اخبر لك واحد من الربع قانص للربع الخالي سبعة ايام لحاله !!!! )

__________________________________

سنيدي حياك الله يا سنايدي

مثل ما قلت الاخويا ماهم على كيفك ..
سؤال : خويك اللي طلب العزبة ,, ما قال لك تخاوينا للبر ؟؟؟؟ والله من قل الخاتمه ...



اشكر الجميع ودمتم

[أبو تركي القطامي]

أخوي مهيلان
وعليكم السلام ورحمة الله وبركاته
من وجهة نظري نوع الكشته تحدد العدد المطلوب من الشله وهل تكون لحالك أو معك عدد من أخوياك
يعني تمشى لا زم يكون معك أحد
صيد قميري يفضل أنك وحدك
دخل يستحسن أن يكون معاك أثنين أو ثلاثه
القطا يستحسن أن يكون معاك سيارتين أو أكثر
وعادتك زينه وشينه بنفس الوقت

[سنتافي]

السلام عليكم ورحمة الله وبركاته
اخوي مهيلان الظاهر انه مشكلتنا متشابهه لحد كبير لكن الاختلاف هو اني اوح الحالي للبر عشان ارتاح من البشر (لا اقصد الاهانه لأي احد ) يعني ودي اروح لمكان بعيد وساكن عشان اغرق بأفكاري ومعي شاي بالحليب والزنجبيل دافي مزبوط واروح اتفكر مهب من قل الاخويه ولا من شين النفسيه لكن خلنا نقول محاولة تقليل التوتر الي ممكن يحصل لو معك احد لكن عندي اقتراح وارجو الا يأخذ بشكل خاطيئ وش رايك تأخذ ام العيال مهب للصيد لكن لجل القعده الهاديه الجميله (:D مسوي رومنسيه) المهم او واحد من العيال مهب شرط عيالك حتى لو عيال اخوانك يعني ضحيه جديده لتهوى البر والصيد ومافيه
http://www.mekshat.com/pix/upload/images5/mk8041_1121.JPG

[الكشاف]

السلام عليكم ورحمة الله وبركاته
بصراحة انا ماأتوقع احد يطلع لحاله لكن يوم شفت الردود استغربت وشكيت ان أخونا مهيلان لدية مشكلة في البداية مع أخوياه . أخوي مافائدة الكشتات والطلعات والصيد بدون أخويا ولو لمدة نصف يوم .
أرجو منك أخي العزيز ان تبحث عن أقرب الناس اليك وتحاول ان توافق بينكم بالوقت مهما حصل وانصحك بعدم الطلعات لوحدك ولو اضطررت ولم تجد أحد في نفس اليوم يمكن ان يلحق بك غداً والحلول كثيرة ..
والله يحفظك .

[خيَال]

السلام عليكم ورحمة الله وبركاته

الاخ مهيلان انت مثلي انا إذا طلعت لحالي ا ستانس لا نك تكون حر اذا خاوني احد ازعجني متى ندخل حر وبعيد المكان ومن ها الكلام وانت اخبر لاكن الله يستر علينا وعليك
واحينا اروح احطب لحالي
وذا خواني احد قلتله اطلع بسيارك علشان مايزعجني متى مابغا يدخل يدخل

واخبر ان هذا الحقيقه خطاء لاكن وش تسوي؟؟؟؟؟؟؟؟
صح ولا

[أبو فالح]

السلام عليكم ورحمة الله وبركاته


مهيلان :

صراحة .... كنت إذا شفت عنوانك أعتبره وادي محسر ، أمشي وخليه ، لكن شفت الردود كثرت ،

والردود دائمآ مقياس دقيق لقوة الطرح أو جديد الطرح،، ، قلت أدخل وعرف وش يبي مهيلان ،،

لقيت أسلوبك شفاف جدآ ومقنع جدآ ... قبل أقرا كلامك كنت أعتقد أن أللي يطلع للبر بدون أخويا

هذا واحد ( يدعي ) :) لكن أنت خففت هذا الحكم الجائر ............... لكن ما زلت أعتقد هذا .


مهيلان :

وش تنتظر أنصحك ... تحب أقولك خللك على دربك وطلع خلاوي على هواك لا مكدر ولا مندر ،

وهذا هو اللي أبخاطرك واللي أنت ناويه ، قبل أتشاور أو بعد ما شاورت .. يعني أنت كاشت كاشت ...

أجل يا مهيلان لا وصيك أصح تاخذ معك أحد ........ لكن قبل ما تجزم على أوصاتي ودي أعطيك

اللي أبخاطري :


ماراح أقولك عن مخاطر طلعة البر خلاوي .. تدري ليش ؟ لين هذا ما يخفاك أبد ... ولا راح أقولك

عن نهي الرسول عن الطلعة خلاوي ،، لينك أنت أول واحد جاب ها الحديث ، ولا راح أقولك أطلع أ

و لا تطلع ،، لاْنك سكرت الباب في ردك الأخير يوم تقول ( من وجهة نظري أشوف أن عذري

مقنع لو أصريت أطلع )... يا مهيلان لا صارت أعذارك مقنعة ليش أتشاور ؟... يا مهيلان أطلع

خلاوي 1000 يوم ، لكن قبل ما تروح دور على أعذار مقنعة ولا تخلي أحد يدري به غير الوالدة .

يامهيلان : نفسي ما تسمح إلا أعلمك وشي شوفتي ... إذا أخذته فنا والله ما غشيتك ،، وذا

جدعته ( وهي أقرب الحراوي ) يمكن يمر على ها الموضوع أمهيلان ثاني ويلقا به فا يدة .

يا مهيلان :

طلعة الواحد خلاوي ما فيها خير أبد ، ويا مهيلان ليش أتهدد ، عاد يوم رمى واحد معك خربت

الناس ، ولا فيه غير أمهيلان يعرف السلوم الطيبة ، لا يا مهيلان ، وش دعوى .. أنا أطلع وفلان

يطلع ولا شفنا شوفك ، ويا مهيلان أنا ما حذرك عن طلعة يوم ،، هاذي أمره سهل ، لا تقعد أبد ..

لكن خوفي تمرح خلاوي ( تقل جني ) .. يا مهيلان وش فيها من الونس ، ترى الجهاز أمره غريب ،

يمكن أتراسل واحد أيحشش ، ويمكن أتراسل إمام مسجد ... أنا ما دري ولا أنت أدري ، يعني يا

مهيلان ما لك قبيل في ها الجهاز ، لا مل منك راح وخلاك .. ولا تامن يشتمك الخوي ... يا مهيلان

هاذي خوة .. والمشكلة يا مهيلان ماهي هاذي بس ، المشكلة كثرة الطلعات خلاوي تخليك ( ور ) لا

تدخل ولا يدخل عليك ، يعني نفسيه ، والناس ترى يا مهيلان ما تسلم منهم ، وولهم أنا .

يا مهيلان ( الحقيقي ) :

إذا كنت على شوفك وعذارك مقنعة .. أجل تراي أمزح معك ، توكل على الله خلاوي ، ولا تخلي

شعيب أو أرض ما وطيته ، ولا تنسى تاخذ معك ( الثريا ) .

يا مهيلان ( الشبيه )

الهرج التالي لا يهمك ، لكن إذا كنت تشوف شوفة عمك أمهيلان ( الحقيقي ) أجل تراه مزحة ثانية .


ومع السلامه كلكم الأول والثاني .

[Khalid AlGhamdi]

والله انك ماتنلام لكن اقول لك


اذا بغيت تطلع دق علي ............. 0504 واخاويك :)

[((( الحر)))]

اخوي مهيلان بارك الله فيك على طرح هذا الموضوع الحساس الي يبي يفتح لبعض الربع نفسياتهم ويقنعهم بحاجه كانوا خايفين منها...!!!

اسمحلي اخوي مهيلان بتلخيص زبدة الكلام حسب ردود اخوني على الموضوع...

* اذا كانت الطلعه كشته وتمشي وسياحه ... فالافضل ان يكون معك من ثلاثة اشخاص وطالع...!!!

* اذا كانت الطلعة صيد وخاصة طيور غير الدخل... فلافضل انك تكون لحالك ... لانك تبي تغير وجهك حسب مزاجك ورغبتك وتبي تبدل رايك بالدقيقه اكثر من عشر مرات ومن هذا المنطلق الرفيق يضايقك ولحالك اسلم...!!!

* طلعت الطيور الصغيره الدخل اذا كنت ناوي تصيد وترجع فلحالك افضل ولو ماصيدة واجد المهم الي بالنفس يطيح...!!!

* طلعت طيور صغيره دخل وتبي تجلس تغدى او تعشى او تنام بالبر الى بكره فالافضل تاخذ خوي واحد بس علشان يكون الصيد وافر ويكفيكم ويونسك شوي عن الحده والوحشه بالليل...!!!

*متعارف عند الناس او بالغالب ان الي يطلع لحاله للبر يشكون الناس في عقليته الا اذا بان عليه حبه الشديد للبر فان الامر يصبح مثل الاسطور الي يذكرها الناس بقولهم (( من حب فلان للبريطلع دايم لحاله)) ولاكن اذا كان الامر للصيد فان الوحده افضل واسلم لو لحقك لوم...!!!

هذا من وجهة نظري وللجميع حرية الراي...!!!

تذكير... حبيبنا ابو ياسر ((( مكشات))) الله يذكره بالخير له موضوع العام الماضي عن رحلته للصيد لحاله في منطقة قبه ولمدة يومين على هذا الرابط ... لاحظ الاسباب التي جعلته يخرج لوحده وكأنه يتعذر عن اسباب خروجه وحيداً...!!!

http://www.mekshat.com/vb/showthread.php?s=&threadid=11290
على طاري ابو ياسر الله يذكره بالخير... من زمان ما طل علينا... عسى المانع خير...!!!

تحيتي للجميع .................(((الحر)))

[مهيلان]

السلام عليكم ورحمة الله

كل الشكر لمن شارك في هذا الموضوع الشائك .. والذي رغم كثرة الردود فيه الى الان ما طلعنا بنتيجة
ولم يتبين من يؤيد ممن يعارض .. حتى من يمارسون نفس الطريقة فقد دخلوا على استحياء ... ما ادري ليش ... هل ينتضرون ما تؤول اليه الاغلبية الساحقه فياخذون برايهم او هم متيقنين ان الوحدة ليس فيها من الخير مثقال ذرة .. دون التفريق بين الضرورة والاختياريه .. على كل حال ..
ابو هنا القطامي تقسيمك قريب للصواب ومشكور على المشاركة
______________

سنتافي
حياك الله انا اوافقك على شيء واحد اني اطلع لحالي عشان ارتاح من البشر كما ذكرت ..
كيف ترتاح من البشر ؟؟؟؟
ج : اطلع وسط الاسبوع ..

وين اخوياك ؟؟؟
ج : مداومين ..
هذي المعادلة الصعبه اللي قام عليها الموضوع ...
_______________
اخوي الكشاف حياك الله يا الغالي

وكلامك ونصيحتك مقبوله ويجيب عنها ردي السابق على الاخ سنتافي .........

_______________
الغالي خيال حياك ربي

الحال من بعضه كما قال المصري ...

المشكله تكمن في اخر جمله من ردك .......
ودمت سالما
______________
ابو فالح
مشكور على ردك اللي تناقضت عندي المشاعر وانا اقراه واختلط الخوف بالفرح والحزن بالضحك ..
حتى ادركت اني مهيلان غير حقيقي ,,, ويوم عرفت قلت لازم ابحث عن مهيلان الحقيقي .. وبعد جهد جهيد
لقيته في احد الشعبان لحاله متغدي على كبسة حجل وصفارى وحاط راسه ومقيل ... صحيته لصلاة العصر
وقام وهو مرتاع قال من انت؟ قلت انا مهيلان مزيف من مكشات .. قال وصلت .. واثناء ما هو يتوضا من تانكي السياره قلت له : انت ليش طالع لحالك .. ما تدري انك غلطان ...قال : عندكم بمكشات واحد اسمه ابو فالح .. قلت :نعم... قال : سلملي عليه وقل له يا ابو فالح نصيحتك اعتبرها وصلت لكن اسال نفسك ان كان قصدك الخطر .. فاغلب من نعرفهم طبلون السيارة ما ينزل عن 160 كم .. وان كان قصدك الوناسة فعلى قول المثل النفس وما تشتهي .. وان كانك ما تبيني امرح خلاوي فالشكوى على الله وهذا شي تعودنا عليه..والا تبيني اعد النجوم الى الصبح !! ..وان كان القصد الحكم الشرعي .. فاقول ..وقَف ولا اقول شيء .......
سكت مهيلان واكمل وضوئه واقام لصلاة العصر وقدمته للصلاة وكبر ... وركع .. ورفع من الركوع ...ثم سجد ورفع من السجود لكني لم ازل ساجدا .. والسبب انه ما رفع صوته لانه تعود يصلى منفردا...!!!

_____________

اخوي ماكس حياك الله وخوتك تنشرى ..
بس والله من قل الصمله .. منهالحين هَونت وما كملت رقم تلفونك

_____________

اخوي الحر مشكور على مرورك وتلخيصك لردود الاخوان

ومثل ما قلت (ولاكن اذا كان الامر للصيد فان الوحده افضل واسلم لو لحقك لوم...!!!)
وشكرا لك .......

____________

ادعوا جميع الاخوة لقرائة الموضوع اللي وضع رابطه اخونا الحر للاخ مكشات وهو عبارة عن رحلة صيد
له وحيدا بالنفود وفي اخر الموضوع نقاش عن الوحدة في الرحلات ,,,,

اكرر شكري الجميع والسلام عليكم

[عبار درب]

اخوي مهيلان
انا والله حالي غالباً مثل حالك
والأخوان ماقصرو بالرأي والمشوره وابا اضيف بعض الوصايا لعل الله ينفع بها الي حالهم مثل حالنا

1/ اذا اقبلت على المكان اللي تبي تصيد فيه عسه قبل ، شف من فيه من الخلق وش هم من الناس كشاته رعيان، قناصه وبفطنتك تقدر تميزهم من سياراتهم واغراضهم،ومكان تواجدهم
2/ اذا شبهت على احد قناصين مثلك مر عليهم سلم واسأل عن الصيد واوح لهم انك تدور ربعك او تنتظرهم
من باب الحيطه ليس الا
3/ اذا لقيتهم ناس اجاويد مثلك وشرواك وشروى اهل هالمنتداى خذ علومهم وعطهم علومك وتعرف عليهم
والله ياخوك ان كثير ممن تعرفت عليهم بهالشكل دامت بيني وبينهم علاقات اخوه وطيبه وذكريات جميله
4/ اذا مالقيت في محل مقناصك احد تذكر اخر مكان مأهول وسجله بالجهاز(gps)
5/لاسامح الله اذا تعرضت لحاله طارئة ( عطل في السياره او اصابه بك انت لا قدر الله ) السكينه ثم السكينه والهدوء واعلم ان هذا مقدرا عليك ومااصابك ماكان ليخطيك فلا تدخل في الوساويس( قولة لو) ابحث عن الحل بكل هدوء ومثلك وشرواك لا تنقصهم الحيله
6/اذا طردت صيد وابعد عنك لا تلح في طرده واقنع بانه ماكتب لك ، فلألحاح في طرد الصيد يوهق بعض
المرات
واخيراً هذا ايميلي راسلني اذا بغيتنا نتخوى وتراي جاد مأهون(abaradarb@yahoo.com )
للأحاطه هذه الوصايا اكمال لما قدمه الخوان في مشاركاتهم والتي اسأل الله ان لايحرمهم الأجر عليها

[ابوقاسم]

ترى يخوك الواحد ما يطلع الا علشان خوياه حتى لو هي للصيد .............
وماله حلاة الصيد ا لا بهم ............
وان ما حصل من يرتاح له قلبك ما هنا طلعه...........

[أبو فالح]

السلام عليكم ورحمة الله وبركاته

مهيلان الغالي :

يا مهيلان لا تواخذنا ، العتب والله على الفهم .

إذا كنت تنشد عن عاصمة السعودية ؟ أنا والله أعرفه زين ... الرياض يا بعدي ،، وذا

كنت تنشد منهو وزير التربية والتعليم ؟ أنا أجاوب عليك ... أسمه محمد الرشيد . ويامهيلان

لا تنشد عقبي أحد ،، تراي والله أمتأكد با الحيل .

يا مهيلان أنت وش سالفك ، أكثر من 20 رد ولا واحد عرف وش يبي أمهيلان ،، يا

مهيلان تراك ما سألت الربع وشلون ( أنشطار الذرة ) أنا هاذي ما أعرفه ،،

يا مهيلان ، السموحة إذا قلت أنك ما تدري وش اللّي تبي ،، أو تكون غيرت اّّللي أنت تبي .

يا مهيلان قلبي :


أنت تقول : على كثرة الردود ، ما طلعنا في نتيجة ،،،، وش تبي من نتيجة ، أنت

علمن بس ، وزهل الدعوا . صراحة يا مهيلان غموضك هذا إيذ كرن ، با النكتة اللي تقول :

أثنين وقفو عند بقالة قال السواق يا خوي وش تبي ؟ رد عليه : اّللي تبي . نزل السواق يم

البقالة وختار لنفسه مشروب ( بيبسي ) وختار لرفيقه ( براية ) وعطا الرفيق ، قال الرفيق : أنا

ما طلبت ها ذي ، أنا رغبتي ( ببسي ) .

.. ونت يا مهيلان تختلف أشوي عن ها الربع ، أنت يا مهيلان فعلآ طلبت ( براية ) والربع جابو

كرتون كامل ، يوم حطوه في حجرك ،، قلت : أنا أشتهي ( بيبسي) أنتم خا لفتو رغبتي .

مهيلان حياتي :

موضوعك واضح جدآ ، ما يحتاج عفرته أو أستشاري ، أنت تصيح : يا قبيلة المكاشتة


أنا مبلي في ها العادة وش تنصحونن ،،، والربع والله ما قصرو ، كلهم أفزعو معك ، اللي

جاب ألف ريال ،، واللي جاب معه نشرة عن أ مراض الدخان ،، وبعضهم توقع شي أردى ، وجاب

معه شريط يوسف الصالح ( قصة حياتي ) لكن يوم أد خلو يم مجلسك ، عرفو وش تبي با

الضبط ،، لقو السالفة رجّال مبلي بالوحدة وطلعات البر خلاوي ، ويقول يا الربع وش

تنصحونن أنا أمشي على ها العادة أو هاذي مبرراتي .... أو أقطعه أوها ذي الأسباب ... يعني

جوابك يا مهيلان أقطع أو واصل ،،، لكن أعيال عمك في قبيلة المكاشتة ،، ما يكفيهم ها

الجواب ،،، وكثرهم راح إيفصل ويعلل ويسهب ، وكل هذا علشان أعيونك ، عساها سته على

سته ،،، وبا النهاية رديت عليهم يا مهيلان وعلنت أن ( لغز زايد ) محد عرفه .

مهيلان :mad:

أنا أبجتهد معك آخر أجتهاد ،، يمكن أتصادف وعرف وش تبي .

1 - إذا كنت تبي الشور والنصيحة تطلع أو ما تطلع ... أنصحك ما تطلع إلاّ معك خوي .

2 - إذا كنت تقول أنا طالع طالع وحداني ... لكن وش رايكم مع ها الأسباب هل أنا معذور أو

غير معذور ؟ .. أنا أقول والله معذور ........ لكن أنتبه ، هذا ما هو طلب نصيحة ( مثل ما طقيت

با العنوان ) هذا أستفتا أو إبداء رأي .

3 - إذا كنت تبي الشور والنصيحة وتقديم حلول علشان تترك ها البلوى ،،، خذ كم حل .

أ - سيارة البر ضروري تبيعه ، وشر بداله ( كامري ) علشلن تركب مع أحد .

ب - قدم فيزة ( هندي ) وكتب في شروط التقديم ،، يكون شمري ،، معه سبحه ،،، عنده طير با الهند

،،، يكون بالد بره ،،، صامت ،، يشوف زين ،،، خرمان قهوة ،، يميل العقال ،، وذا تحصلت على ها

الهندي مد أنت وياه .

ج - بع أسلاحك كله ( تراي شراي )

د - لو عجزت أتقاوم ثم طلعت ، دور على شلة ولصق بهم .... لكن أنتبه أتصليبهم أنت .. علشان

الجماعة يرفعون من السجود ;)

4 - إذا كنت أدور الّلي يثير المكاشته في خيمتهم ،، أو هاذي سالفك من طقطق إلى سلام عليكم

فنا أول واحد يحب راسك ،، ويقول ما قصرت والله يكثر من أمثالك ،، والمنتديات تحتاج مثل

ها الطرق المهيلاني .


( مهيلان أنت :good: ولا تواخذ ن ، تراي أدور التالية .)

[سنتافي]

السلام عليكم ورحمة الله وبركاته

انا بصراح مع كلام بوفالح وما اقول الا الله يعين العاشقين الظاهر انه فيه احد واجع قلبك ودك تهوجس به لحالك http://www.mobile4arab.com/vb/images/icons/icon10.gif
الظاهر انها التاليه الله يعينك :rolleyes:

ايه بغيت انسى اذا لقيت الهندي الله الله لا اواصيك شفلي مثله بس لا يكون محكحك ولا جربكس معدوم ولا شي ولا تنسى المواصفات
يكون شمري ،، معه سبحه ،،، عنده طير با الهند،،، يكون بالد بره ،،، صامت ،، يشوف زين ،،، خرمان قهوة ،، يميل العقال ;)
http://www.mekshat.com/pix/upload/images5/mk8041_1121.JPG

[ذيب البر]

أنا اعاني من نفس المشكلة بس تصدق لقيت حل

إحرص على خوة الشباب الصغار عيالي اخوك مثلاُ او اخوانك منها تعلمهم بعض الامور

ويتعودون عليها ومنها يونسونك ويساعدونك في النتف وبعض الامور

لان الواحد مل من كثرة اعذار الشباب يوم الاربعاء خاصة

وترى بعضهم مايلام خاصة الى جلست تقنع فيه اسبوع كامل وطلع معك وماوفقتوا بصيد

والصيد توافيق

تحيااااااااااااااااااااااااااااااااتي

[dejjo]

السلام عليكم ورحمة الله وبركاته
شدني موضوعك يامهيلان.
كنت قبل اذهب للصيد لوحدي والحمد لله مافيه مشاكل والى الآن والحمد لله بس كنت احاول اخذ احد من الربع
لو جاء كان بها واذا ماجاء اخبر الشباب وين رايح ومتى ارجع تقريبي الحين الحمدلله الجوال في كل مكان.
بعدين حاولت اخذ احد من اخواني وفي نفس الوقت صديقي وانا وهو دايم مع بعض في المقناص واذا عنده شغل او مشغول اخبره المكان اللي بروح له وهو معي دايم على اتصال بالهاتف.
حتى في بعض الاحيان اذا فيه صيد كثير يجي على طول بعد ما اخبره.
بالنسبه للمقناص اللي اكثر من يومين لازم ايكون معي اخوي او احد من الربع واخوي معه خبر وين رايحين ومتى بنعود وحنا في اكثر من سياره
سبحان الله يحصل شي من المشاكل او احد يمرض لاسمح الله او تتعطل احد السيارات.
ونصيحتي لكم
خبر اي واحد وين رايح ومتى بتعود أو يكون بينك وبينه اتصال دائم.
لازم تختار ربعك زين او احد من اخوانك او جماعتك اذا ماعندك اخوان.
لانك انت وياه برنامجكم واحد وخاصه الاخو او اللزيم (الصاحب الرفيق صح).
لازم تصبر على ربعك اللي معك وترفق بهم واتشاور انت وياهم قبل الكشته او المقناص طبعا (ثقيل الدم اتركه)
اذا كنت تريد تذهب لوحدك
جهز نفسك وسيارتك زين وقبل اي شي كما قلت اترك خبر وين رايح ومتى بتجي ويكون اتصال بينك وبين اي واحد من اصدقاءك او اهلك.
خذ عزبتك وتفقدها قبل تروح وتاكد من الاغراض زين
كثر من الماء اذا كان المكان بعيد
يجب تكون معك عده للسياره وتفقد الكفر الاحتياطي والاطارات زين

اخيرا
في بعض الاحيان الواحد يحب يروح لحاله مو غلط بس يكون مستحيط
اقول ترى الجماعه زينه ولو واحد معك
هذا رائي الخاص ... وجزاكم الله خير

[أبو فراس]

السلام عليكم ورحمة الله وبركاته

اخوي خيَال

نفس الحال ما ابي احد يروح معي بسيارتي ابي لحالي اقف متى ما ابي وامشي متى ما ابي حر اشغل مكيف او ما اشغل ابي هوا طري المهم اني حر بنفسي

[نقا هشال]

انا اقول هالطريقه ازين..يعني تنوم بدري في البيت وتطلع بدري واذا خلصت وطاح اللي في راسك عود... وهوذي طريقه مجربه وحلوه...

[سيف حسنا]

السلام عليكم ورحمه الله وبركاته
اخوي مهيلان تقول النصيحه اكلتها مره بحياتي ماانساها عام 1418 لاكن رزقني الله بشايب بعد حوالي يوم اواقل من يوم بساعه والسالفه عطال بالسياره فالنصيحه لاتروح لحالك واكثر ماكثر على قولتهم(الزكرت)...........والله الموفق

[خشم الحصان]

الاخ الغالي
مهيلان
السلام عليكم
اخي العزيز اسمك يخالف ماكتبت حيث ان اسمك (مهيلان)اي انك تاخذ الامور بمهل وتعقل طيب وراك ماخذت طلعتك لوحدك بمتمهل وركاده المشكله ياخيي انك (فهمن كل الاوضاع) وبعض الاخوان علموك ببعض المشاكل التي وجهتهم عندما خرجو لوحدهم انا اقول والله اعلم ان طلوعك لوحدك مهيب زينه لئنه لو قدر الله عليك شي بحلت بعمرك لو حصل لك نقول اضعف الايمان خربة السياره
طيب ياخيي وش( ب) تسوي وانت لحالك والارض ممدوده والمسافه بعيده والهواجيس بدة تقرب لسحيلة الراس
في هالحاله تبي تدور اي شخص بيفزعلك وبيروح نهارك وانت ياراقي هالطعس ويامحول منه ولو يخترش اي صوت حولك قلت هذا صوت سياره ثم طمرة كنك مقروص ورقيت مره ثانيه او تقول الجهاز الايكوم وعلي العامه ثم تدخل ياخيي شفقان كنك واحد قبلوه في كليه وتدور اسمك في لوحة المقبولين ثم خذ تتريق وخذ توسل منك الين الله يرزق بوحد ثم يفزعلك تراء ياخيي (الزمن ماتغير ....بس اهل الزمن .....متغيرين....)عاش ابو بكر سالم:cool: والشاعر خشم الحصان يقول(لاصرت بالدهناء في جمرة القيض...........والموتر تعطل وانت لحالك)
اكيد انك بتذكر الشاعر الي يقول(الله كريمآ ماومر بالتهاليك)
وانت ياخيي غلطان بالحيل الله يغفرلك ويفتح علي قلبك وخل اسمك دليل تفكيرك
اخوك
خشم الحصان