تسجيل الدخول

مشاهدة النسخة كاملة : وصف ل Gmc


BLIZER 88
05/09/2009, 08:42 AM
السلام عليكم
هذي القصيده قالها ( طاهرالاحسائي ) رحمه الله

الله على الجمس لولا وارد الستين
ياليت مابدلو روده وسكانه

ياليت شالو مقصاته مع الجنبين
خلوه سسته على الدنقل كما اخوانه

ربحان يامن شراء من اربعه وستين
ما يشتكي نفضة البطناج ربانة

الله واكبر على من ضبط التيمين
وزن بلوفه وبَرينقه وذرعانه

لولا السلنسر وسيع ودبته مترين
كان انفجر من لهيب النار شكمانه

بين السلندر وبين الهيتله وجهين
أطرنبة الماي تقلب بين قمصانه

اما الشنابر مع البستن بوزنبين
على الكرنكات في بوشات مليانه

اكويل والديلكو مايحرق ابليتين
اسلاك في الكوب وافهم حق ميزانه

واحد وخمسه وثلاثه وسته قبل اثنين
الاربعه حطها في آخر الخانه

الدينما والكتاوت شغلها تموين
بتريه للسلك والليتات بطرانه

السير والمروحه في وسط الكاور تلحين
تشبه ربابة ابومحمود والحانه

باور استيرنق في السكان له بيبين
يعجبك تصفير سفتي بلف خزانه

اما الغماره بلاسلكي بكشافين
طبلون ورشه عليه اسمه وعنوانه

ونلقاكم بيموضوع جديد ان شاء الله :d
روق999
05/09/2009, 10:28 AM
يعطيك العافيه
وتقبل مروري
عديم الوصايف
05/09/2009, 10:32 AM
يعطيك العافيه وتقبل مروري
أبو إبراهيم !!
05/09/2009, 05:44 PM
عافك الله ونقل رائع
والف شكر لك
kwa_198
05/09/2009, 05:58 PM
الله يجزاك خيروذكرتنا بآيام مضت
فهد الهلالي
05/09/2009, 07:28 PM
شدتني هذه القصيد وحبيت اكتب عنها هالمويضيع
الله اكبر شف كيف الرجال من اول يوم تغير عليهم ال64 صار مقصات مايبونه يتمنون انه جاء سست قدام
مثل اخوانه
والمعذره ياخوي الوصف هذا بالفورد وليس بالجمس
والمعروف ان السست صلبه خاصه بالمطبات اكثر قوة وصلابه وعورة زايده
والمقصات فيها ليان احسن بس اللي يسوق والركاب كلهم صلبين مثل السست مايفكرون بالمطبات
وزود على ذلك الكفرات مضلعه مثل كفرات الحراثه والهواء 50 اذا ماهو 60 ومع هذا مبسوطين تلقاهم يشيلون السامري والا الهجيني بالصندوق
واليوم جتنا هالسيارات الناعمه فليور وراء وقدام وعلى ياي ولو تاطى حصاة كبر الفنجال والا تقاطع خط مايجي عمقه خمسه سم قال ياخي كسرتنا ارفق ماتشوف
وهو جالس على مرتبه احسن من الكنب
ياويل قلبي
ماركب في صندوق الهاف اللي اصعب واصعب لا ومدبل زود سستتين للحمل صاير الموتر صبة خرسانه
اخواني اسف على الاطاله ولكن هذا شي عاصرته اول وهالحين
وعش كثير اتشوف كثير
على العموم صح السانك اخوي بليزر88 على هذا النقل الذي ذكرتنا فيه الماضي
بارك الله فيك ونريد مثل هالقصايد القديمه
تقبلوا تحياتي
BLIZER 88
06/09/2009, 12:56 AM
الله يسلمكم وشرفني مروركم
اخوي الشيخ اصح السانك و نا اشهد انا الجمس و الفورد مافي مثلهم عزم ونشاط
فهد الهلالي
07/09/2009, 01:49 AM
الله لايهينك وتسلم اخوي البليزر

تقبل تحياتي
الوتر الحزين
07/09/2009, 02:07 AM
الله يعافيك اخوي على النقل

بس ملاحظه: طاهر الاحسائي ما توفى الله يجزاك الجنه

اللي توفى هو عيسى الاحسائي و جميعهم ذكر القصيده هذي للجمس وليست للفرت

وشكرا للجميع
BLIZER 88
07/09/2009, 04:33 AM
الله يعافيك اخوي على النقل

بس ملاحظه: طاهر الاحسائي ما توفى الله يجزاك الجنه

اللي توفى هو عيسى الاحسائي و جميعهم قال القصيده هذي للجمس وليست للفرت

وشكرا للجميع

والله انا سمعت انا طاهر توفى مدري عاد