كم يوم يكفي للدعو..........صقار الأسياح

[صقار الأسياح]

السلام عليكم ورحمة الله وبركاته:-
ياشباب فيه موضوع مهم الا وهو كم مدة دعو الطير لتكتمل لياقته انا صراحه ادعي 15 يوم لأن طيوري مربوطه ربط ودي كل واحد يعطينا رايه وبعد كم يوم اهد له حمام عطونا رايكم .
صقار الأسياح 15/9/ 1430هـ

[أبو أمين]

15 يوم كفايه للطير السبوق ويساعده اذا كان مفكوك طلق

اما اذا كان مربوط ادعه تدريجي الين ينطلق جناحه ويتعدا مرحله الملوع وبعدين فك حمام

[هماش]

الطيور ماهي سوى
فيه طير عشرة ايام يكفنه واول حمامتين بيروحن واما الباقي لاء

وفيه طيور يبغالها اكثر 15 يوم

[ذراع الذيب]

السلام عليكم ورحمة الله وبركاته
صباح الخير ياصقار الاسياح هالعلوم انت ادرابها اكثر منا وعندك المعرفه,,
الكافيه ومشكور على المشاركه هذي اللي قصدت فيها الفايده للجميع,,
15 يوم كافيه لتعطي الطير لياقه واكثر مايجرد الطير الملواح اكثر,,
من الحمام وكلن له طريقه,,

[راعي غضبان]

ماقصرو الشباب الله يبيض وجيهم افادوك والي بنقوله قالوه والله يوفقنا وياك

[رادار قبه]

الهدادتوه الله يجيب الغيث

[صقار الأسياح]

مرحبا بالجميع نفيد ونستفيد

[أبو أمين]

صقار الاسياح تعين التاريخ

هذا التاريخ ما اخترع الكمبيوتر ولا انولدت انا ولا انت

1330 !!!!!!!!!!!!!!!!!!!!!

[مشبر البران]

والله ما عندي علم لاكن الأخوان ما يقصرون
وعدل التاريخ

[جـرح الشمـال]

حياك الله اخوي صقار الاسياح
من 15 الى 20 يوم اتوقع يكفي للطير
والله يرزق الجميع

[قنآآص]

مقصرو الاخوان وعتقد انو 15 يوم كافيه

[ابو سلطان898]

والله ياخوي رايي من رايك طال عمرك 15 يوم كافيه دعو بالملواح وبعدها فك حمام بس لايصير قوي (يجرد الطير ولا يتعبه او يملعه) والتوفيق على الله

[راعي الشلفاء]

السلام عليكم

اسمع اذا تدعي بذلحر ماضني يستفيد الطير اذا طق ثلاث يروح ويوقع

[معسف العاصي]

موضوع مهم ياصقار الاسياح
انت قصدك يعني 15 يوم يكفن دعوو ؟ وبعدها تفك حمام ؟
اذا كان هذا ماتقصده فأنا من وجهة نظري أقول لك أول شي تفقد الطيور لايكون تملعت
وثاني شي كمل دعوك بالملواح لمدة شهد بدون لاتفحم الطير
ثالث شي فك له حمام بالاسبوع مرتين بالكثير بعد الشهر بس لا يكون الحمام قوي اسحب له من الريش أهم شي لايروح على الطير حمام
رابع شي طمعه على حمامته بالعلف اذا طرحها أول مره أكرمه بالعلف
وانشالله فالك الحباري
تحياتي ومنك نستفيد

[@السيف@]

ما قصرة الوجيه النيره وتقبل مروري

[الشبل العجمي]

أخي العزيز ..

أنا من وجهة نظري للطير السبوق 15 يوم كافية بأذن الله .

والخوف من الملوع الله يكفينا شرها.

وأنا لطيري 15 يوم أنشاء الله تدريجين الدعي وبعده حمام بس يكون أفضل لونك تنتف من أول حمامتين ريشتين والباقي لاعاد تنتف .

تقبل مروري

أخوكمــ/الشبل العجمي

[@قرناص@]

15 يوم كافيه ،،

والحمام لاحقين عليه لايتملع الطير والجو يزين ان شاء الله ،،

ولاهنت ياصقار الاسياح وانت اخبر في ها الامور ،،

[سنجااار]

15 يوم كافيه اذا بتدعي الفجر وتالي النهار وتركد معك وقت للدعو

بالتوفيق ان شاء الله صقار الاسياح

تقبل مروري

[طير حر]

السلام عليكم

الدعو طال عمرك ما له ايام محدوده لانك لازم تدعيه يومياً الى ان تربطه مره ثانيه

وبالنسبه لهدد الحمام اذا تبي طيرك يطير و لا يتملع فانتظر

ادعه اول على الملواح الين يطق 60 الى 70 مره على الملواح ومن ثم فكله حمام ماخوذ منه 2 و2 وبالتدريج لين يصيد السلم

هذا من واقع تجربه ولك الخيار

تحياتي

[قلب ذيب]

السلام عليكم

الدعو طال عمرك ما له ايام محدوده لانك لازم تدعيه يومياً الى ان تربطه مره ثانيه

وبالنسبه لهدد الحمام اذا تبي طيرك يطير و لا يتملع فانتظر

ادعه اول على الملواح الين يطق 60 الى 70 مره على الملواح ومن ثم فكله حمام ماخوذ منه 2 و2 وبالتدريج لين يصيد السلم

هذا من واقع تجربه ولك الخيار

تحياتي
كلام صحيح 100%

[الامبراطوري]

السلام عليكم

إذا قصدك ياصل الطير إلى
اخر لياقتة أعتقد على الأقل خمس وأربعين يوم
مابين دعو وملواح وفك حمام

ودمتم بود

[ربع خالي]

اخوي صقار الاسياح ,, لياقة الطير تختلف من طير الى طير وخاصه اذا حسبنا الفرق بين الطير اللي مقاسه 16*16 والطير اللي مقاسه 18*18 ,, وعلى حسب مسافة المدعى ,, فالاكيد بأن الطير الاصغر في الحجم ياخذ اللياقه قبل الطير الكبير ,, اما المده فأعتقد للطير الصغير تكون في ال 20 يوم والطير الكبير لايقل عن الشهر , لأكتساب اللياقه الكامله للطيرين ,,,
تقبل مروري
تحياتي