الشروكي ..... والرجه أفيدونا

[منسدح بحوض نخله]

بسم الله الرحمن الرحيم
السلام عليكم ورحمة الله وبركاته

اخواني انا موتري الشروكي موديل 99 قير اتماتيك

مشكلتي ياجماعه انه فيه رجه بسيطه يعني لامشيت لي 100كم احس بتعب ورجليني تنمل من الرجه الخفيفه هذه
رصصت الجنوط ومافاد والدبل نقول يمكن منه بس وين الفني اللي يعرف يميز هالشي

أفيدوني جزاكم الله ألف خير

[دايت]

رح لابو فهد الهاشل تلقاه بالعزيزة

رجال شرواك يبخص الشيروكي بخص . .

لامنك دخلت من عند حقين السيراميك تبي تجيك ثاني اشارة الظاهر شارع النصر
ادخل معه يمين بعدين اول اشارة رح معها يسار تعد ثاني اشاره عند مطعم ديرتي يجيك تقاطع بعد التقاطع يبي يجيك محل غاز استراحته بظهر المحل بالضبط..

بالتوفيق ياغالي . .

[منسدح بحوض نخله]

شرواك الطيب اخوي

موقعه قريب لإستراحة عيال عمي

لكن انا بالقصيم هذه المشكله

[رانجلر عنيزة]

حياك الله يالغالي

انا رجال شريت واشتغلت بالشروكيات بشكل كبير


يالغالي امش بموترك لمى يرج ثم فض القير ( خله على وضع N ) وشف وش يصير

ان ما راحت الرجه فإن البلا من الجنوط او الكفرات فيهن مشكله



ان راحت الرجه معناها من العمود اللي قدام والا اللي ورى



نجي للحين لمرحلة الفرز << صار الموضوع تمر

اشبك الدبل وامش بالموتر الى سرعة 100

ان خفت الرجه معناها من عامود الدبل عاد الله يعينك قيمته فوق الالف او افصله واحلته وخل شغلك دفرنس واحد


المرحله الثانيه ان ماخفت الرجه معناها من العامود اللي ورى

والعامود اللي ورى يرصص عند المخارط او تغيره مستعمل ما عندك مشكله لان قيمته حول ال400 ريال


وفيه ببريده والله العالم شي اسمه ترصيص ارضي اللي هو يرصص الكفر وهو راكب على الموتر تراه جيده بالحيل للشروكيات لان يرصص الكفر على رجة عاموده



هذا اللي اقدر افيدك فيه


واي شي يخص الشروكيات انا حاضر وتحت امرك

[سوبر VTC]

و عليكم السلام و رحمة الله
الحره تكون من العرموطه الاثنى متوسعه و مايفيد التشحيم
حركه بيدك اذا كان به فضاوة فهي تسبب حرة
الركبه حقت الصليبين عند جرم الدبل بوسطه خابور يكون متوسع و يسبب حرة
حل الحرة تنزيل القير 2 الى 3سم

هذي العرموطه الانثى


http://www.mekshat.com/vb/../pix/upload01/prof005/mk53291_pbjpdj.jpg

هذي المبسطه 2سم حقت كرسي القير
و هي تخفف حره العمود
و لازم تحط مسمار طويل تغير مسمار البلد


http://www.mekshat.com/vb/../pix/upload01/prof005/mk53291_mndp2.jpg


بالنسبة للحره اخبر احد الربع عنده حره كلاسيك 2001
غير عمود الدبل و خفت الحره
و فك العمود الخلفي الكردان و مشى على الدبل الخفيف على سرعه 140
و صار مافيه اصوات نهائيا
صار العمود الخلفي مطعوج لكن صليباته سليمه
غير عمود الكردان و ضبط الموتر
انت شيك على صليبات العمود الخلفي او فك العمود و اشبك الدبل
العمود الخلفي ب300 من التشاليح الدبل ب400 الى 500ريال

حل اخر
ارفع الموتر بعفريته من الخلف و خل احد يدعس بنزين و يثبت على سرعه 30 او 40
و رح تحت الموتر و حط مفك سكروب طويل على حد العمود من عند الجنب
1 مره من عند نهايه القير
2 مره من عند الوسط العمود
3 مره من عند الكارونة
و هذي طريقة ابو علي الثويني

اما طريقة ابو ابراهيم الرشيد مركز المروى
يمشي على سرعه 140 و يرفع رجله و يشبك الدبل الخفيف
و يدوس بنزين اذا اختفى الصوت فهو من عرموطة الدبل الانثى

الطريقيتن السابقتين تقدر انت تطبقهن بنفسك

مر ابو علي الثويني او الرشيد بصناعيه عنيزة
او ان شاء الله يطيب خاطرك
او مر على تشليح الطريف بالصناعيه
عندهم عمدان من 400 الى 500
قل للسوداني ابو رمزي عطن عمود نظيف مره

[منسدح بحوض نخله]

جزاك الله خير راح اجربها اليوم ان شاء الله

[منسدح بحوض نخله]

السلام عليكم

يا اخوان رحت لورشة صحارى(ابوعلي الثويني) وأقر العامل حقه عبدالمجيد بما هو آتي

1/كرسي المكينه.
2/كرسي القير.
3/جلب المقصات الثمان.
4/جلب عامود التوازن.
........................................

صراحه حيرني وقالي العمدان مافيهم شي والصليبات سليمه وكل شي سليم.

قال غير هذول وراح تشوف الفرق.

أفيدونا جزاكم الله خير

[سوبر VTC]

السلام عليكم
يا اخوان رحت لورشة صحارى(ابوعلي الثويني) وأقر العامل حقه عبدالمجيد بما هو آتي
/كرسي المكينه.
2/كرسي القير.
3/جلب المقصات الثمان.
4/جلب عامود التوازن.
........................................
صراحه حيرني وقالي العمدان مافيهم شي والصليبات سليمه وكل شي سليم.
قال غير هذول وراح تشوف الفرق.
أفيدونا جزاكم الله خير



وأقر العامل بما هو آتي


هههههههه
تشتغل انت بالمحكمه :D:p
امزح

شف يابعدي
الكراسي اذا كانت منقصه او منشعره تسبب حره
تغيير الكراسي + الجلب
يغير بالموتر و يصير الموتر ممشاه ناعم :good:
خصوصا بالمطينات
لكن لازم ابو علي يشوف الموتر خصوصا رفع الموتر من الخلف او انه يسوقه
الموتر اذا كنت لاف بالدوار و يطلع صوت طقطه فهو كرسي قير دايم ينشعر
الكرسي الامريكي ما ينفع لازم تركب اصلي او تاخذه اصلي مستعمل من الطريف
طبعا اذا كان عندك خربان
كلم عامله رشيد اذا كان ابو علي موجود حرك لمه :)
حاول بنفسك تطبق فك العمود الامامي ثم فك العمود الخلفي
لك رساله على الخاص

[منسدح بحوض نخله]

مرحبا للجميع

أبشركم حليت المشكله

رحت لورشة صحارى وطبعا معي واسطه عشان يناظرني زين

المهم قالي غير الرمان والفلنجات الأمامية وتزبط

فلله الحمد غيرتهن وتغيرت السيارة تكلفة العمل كله950 ريال طبعا القطع تشليح

[سوبر VTC]

مراحب :)

دامك عند ابو علي الثويني :good:
فارقد و امن :D

انت غيرت الفلنجتين يسار و يمين ؟؟
يعني ما فكيتوا الكارونه
خبرك رمانيين يسار و يمين الكارونة
+
رمانيين للبنيون

عموما الفلنجه تفكه له 3 مسامير
قبله تحل صامولة العكس
تمسك فرامل او تحط سيخ بوسط الهوب

بعد ما تفكه

تدوره بيدك اذا كان خفيف و له صوت
فهو خربان
يصير الرمان منجرش منكسر و طحين :p

موفق