سؤال عن منطقة راس بو قميص ضرووري [الأرشيف]

مشاهدة النسخة كاملة : سؤال عن منطقة راس بو قميص ضرووري

سلاح

25/08/2004, 03:05 AM

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين

السلام عليكم ورحمة الله وبركاته

إخوتي الأعزاء أعضاء مكشات

لدي كم سؤال أرجوا من يستطيع الإجابة عليها أن يفضل بها مشكوراً

بالنسبة لمنطقة راس بو قميص كم تبعد عن مدينة الأحساء؟

ولو نويت أحدق في تلك المنطقة ما هو أنسب مقاس للخيط؟

وما أنسب مقاس للميدار والبلد(الثقل)؟

كيف هي الطريقة الصحيحة لربط الميدار والبلد(الثقل) بالخيط يعني البلد فوق والميدار تحت أو العكس؟

وماهو أنسب وقت للصيد في تلك المنطقة؟
وقد سمعت أنه لابد لي من إستخراج تصريح من سلاح الحدود فماهي طريقة إستخراج التصريح وهل يأخذ وقت طويل لإستخراجه؟

أرجوا منكم إخوتي الإجابة على هذه الأسئلة المحيرة بالنسبة لي في أقرب وقت

ولكم جزيل الشكر والتقدير

أخوكم المح

سلاح

سلاح

25/08/2004, 05:17 PM

إخوتي الأعزاء
لم أضع سؤالي إلا للضروره لأنني أعتزم إن شاء الله بكرة أو بعده الخروج إلى تلك المنطقة لتجربة الصيد هناك
لأنني مازلت مبتدأ ويجب أن أجرب كل شئ لأعرف عن الصيد في البحر

أرجوا منكم إخوتي

MARINE
الكشاح
ابو زاهر
gulfhunter

من لا يحضرني أسمائهم من الأعضاء المخضرمين في الخيمة البحرية الرد على أسئلتي

ولكم خالص التقدير والإحترام

أخوكم المحب/

سلاح

الكشاح

28/08/2004, 02:04 PM

السلام عليكم ورحمة الله وبركاته
اخي العزيز سلاح اولا اسف على التأخير في الرد على سؤالك

وثانيا انا من دولة الامارات ولا عندي فكرة عن راس بو قميص..اسمع واشوف في المنتدى عن اعلومه
واتمنى ان ازوره...واما عن الخيوط وعن ترديعها..بقولك حسب خيرتي البسيطه..

عن نفس فانا اذا اصيد على السيف بالسناره اضع البلد في النهايه وميدارين بعد كل واحد شبرين

واحيانا اخلي الميادير في المقدمه..والبلد بعيد عنهم حوالي ذراعين..وهذا للشعري وماشابه..والخيوط قياسها

60 ولا 70..ولكن النصيحه انك تصبر شوي لان الجوي حار انتظر لغاية ما يتحسن الجو شوي

اما المسافة من الاحساء الي مفرق راس بو قميص حوالي 200 ك

مع تمنياتي لك بتوفيق

واليك هذا الرابط ممكن يفيدكhttp://www.mekshat.com/vb/showthread.php?s=&threadid=9021

ابو زاهر

28/08/2004, 02:36 PM

حياك الله اخوي سلاح واشكرك على حسن الظن فينا انا والشباب
بصراحه المنطقه مارحتلها ولا مره في حياتي لاكن اعرف شباب راحولها
واغلب الي يروحون يخيمون 3 ايام
لازم سياره ما تغرس ويكون معك ثلاجه تحط فيها الرزق
والمنطقه مشهوره بحاجتين الحر الشديد والمد الخطير
واعذرني على التقصير
اخوك ابو زاهر .

ابو زاهر

28/08/2004, 02:45 PM

gulfhunter

29/08/2004, 11:07 AM

السلام عليكم ورحمة الله وبركاته:-

حياك الله أخوي سلاح........

بالنسبه لمنطقة راس أبوقميص .. أعتقد الأخ marine أكثر واحد يفيدك ويفيدنا.....

وبالنسبه لمقاس الخيط يعتمد عليك .... من 60 الى 80 أو 90 إذا في هوامير من الكبار...... وأفضل 70 ... لأنك بتصيد فيه الشعر والهامور والفسكر إذا موجود.........

ويكون رقم الميدار 8..... والبلد حسب العمق ..... من 1 إلى واحد ونص...... ويكون الخيط ركه....... يعنى الميدار بالأول والبلد قبله بمترأاو أزيد......

وبالنسبه للتصريح لازم يكون عندك صديق في سلاح الحدود يسنع الأموار ........

غواص الاحلام

29/08/2004, 12:12 PM

الاخ/ سلاح
السلام عليكم ورحمة الله وبركاته
فيما يتعلق بالتصاريح اللازمة للذهاب الى راس ابو قميص فهى على النحو الاتى:
1) تصاريح النزهة/ وهى من الصباح حتى المغرب ويمنع المبيت وتكون فى منطقة المتنزهين فى العديد ويمكن الحصول عليها من قيادة حرس الحدود فى سلوى

2) تصاريح المبيت والتخييم / وتحتاج الى امر صريح من قيادة حرس الحدود فى سلوى الى مركز ابو قميص والافضل قبل ماتضرب المشوار انك تاخذ الامر من قيادة حرس الحدود فى المنطقة الشرقية ويبيلها واسطة الى حد ما.

المهم انك تتاكد من ان التصريح يكون فى منطقة ابو قميص وليس العديد حيث ان الكثيرين يخلطون بين المنطقتين نظرا لاتصالهما ببعض .اما عن الصيد فهذا رزق من الله الكريم الاكرم لو كان مكتوب لك يبي يجيلك فى اي مكان

والله الموفق:

سلاح

29/08/2004, 02:43 PM

الله يعطيكم العافيه
مشكورين وماقصرتوا

وبصراحه إستفدت من هالمعلومات
وإن شاء الله يكتب إلي فيه الخير

MARINE

29/08/2004, 04:43 PM

السلام عليكم ورحمة الله وبركاته
حياك الله اخوي سلاح
اما بالنسبه للمنطقه انصحك تأجيل الرحله لمدة شهر حتى يزين الجو شوي
الخيط اللي نستخدمه عادة60 او 70 هذا مناسب جدا اما الميدار رقم 9 مناسب
واذا تبي تروح لازم تحمل معك خيمه وثلاجات حتى تحط السمك وكثر ثلج وانصحك بالقوالب الكبيرة
لان حرارة الشمس لاتطاق ومثل ماقلت روح انت مع واحد يعرف المنطقه زين
اما بالنسبه للتصريح فهو شئ عادي جدا ممكن تصرح في مركز سلاح حدود سلوى
ولا يحتاج واسطه ولاشئ واغلب الصيادين يستخدمون الخثاق للحداق
وانصحك نصيحه لاتفكر انك تسبح في مكان ماتعرفه او احد من زملائك لان المكان خطير
واذا بغيت اي شئ في الخدمه حنا حاضرين
اخوك
MARINE
:heart:

gulfhunter

30/08/2004, 08:34 AM

حياك الله MARINE والله يعطيك العافيه على التوضيح...... بس في كم سؤال.....

1. لازم ناخذ طراد .... إذا لا.. هل الحداق بالطراد أفضل من السيف....
2. كيف الغوص... ولو معلومات زياده من خبرتك..........
3. هل نحتاج سياره جيب ...... يعني السيدان صعبه.

غواص الاحلام

30/08/2004, 10:41 AM

الاخ gulfhunter

السلام عليكم ورحمة الله وبركاته
بخصوص الأسئلة اللى وجهتها للاخ /marine فاذا سمح لى وانت انى ادلو بدلوى بس لاتقولون ملقوف ولا كن والله حب فزعة وتبادل معلومات فان اصبت فلله الحمد وان اخطأت فغفرانك ربى
فيما يتعلق بالسؤال الاول
انت كمن يقارن السيف بالعصى فالصيد بالطراد هناك افضل بمراحل لان اماكن المحادق مختلفة وتحتاج الى طرادوخاصة بطريقة السمارى .وعلى العموم سبق ان صدنا عن طريق السيف وبدون طرادلاكن الكمية لاتقارن مع ماصدناه عن طريق الطراد.والاهم من ذلك لو رحتو بالطراد لازم يكون النوخذة جيد وعلى دراية بالمشاكل التى قد تواجهكم هناك خاصة اذا بغيتو تروحون بعيد ومنها مايلى:

1)اوقات المد والجزر لاسيما فى حداق الليل فهناك اماكن ضحلة تختفى وقت المد وتظهر بقدرة قادر فى وقت الجزر الا انها ماتبان كاملة للعيان خاصة بالليل ولاكن بمجرد العبور فوقها بالطراد سيعلق بها(واسأل من سبق انه شمع فيها)

2) الحدود الجغرافية فهناك حدود قطر والسعودية والامارات فلو كنت تحدق بعيد شوى ممكن تواجه مشكلة فى اى منطقة حدودية انت فيها حيث ممكن انك تتهم بقضية تعدى على الحدود (ورح اثبت العكس)

3)الانتباه لموسم السريات تشوف البحر والجو يازينه زيناه وفجأة وبلا مقدمات تقوم الدثة - موج يروع الغافلين-وريح تهب ويستار استر

فيما يتعلق بالسؤال الثانى عن الغوص هناك فهو لايخلو من المخاطر اسوة باى بحر (عقام على قفى من يشيل-قروش -والساتر الله سبحانه)
وافضل اماكن للغوص هى الجهة بين المركز واتجه شمال صوب قطر بمحاذاة الشاطئ اوفى الجنوب منطقة الكويفرية وتتبع الصدوع والجروف والمجافر وانتبه من العقام ترى لى زميل صفقه واحد فى وجهه سبب له اصابات بليغة استدعت عملية جراحية
بالسبة للسؤال الثالث هل تحتاج لجيب او سيدان انا اقولك ان كانك تبي توصل للمنطقة القريبة من قطر فاالافضل سيارة جيب لان فيه امكن صباخ وشى وعر وشى رميلات اما اذا كنت من المركز ودون فالسيارة السيدان ممكن توصل فالطريق منالخط السريع الى المركز مزفلت لا كنه متعرج ومليان حفر انتبه وانا اخوك وهناك مسالك من الخط الى السيف ممكن للسيارة السيدان ان تسلك فيه باذن الله
تكفون يالربع سامحونى على الاطالة وانت خاصة يا marine وعسى الله يغفرلنا اجمعين والله الموفق.

طحنون

30/08/2004, 12:46 PM

السلام عليكم ورحمة الله وبركاته
هلاباخوي سلاح الشباب ماقصروكفوووفوبس عندي لك ملاحظه صغيره
المنقطه تعتبر محميه بحريه وبريه وفيها الخيرالوفير ولاتخلو من الغرائب
فهو اذا سقى الما لاتروح انصحك بالذات نصف الشهر واخر الشهرمومثل باقي المناطق وفيه منطقه معروفخ وهو الراس اللي مقابل الجزيره وهو على شكل مثلث اذاراح الما يوصل الما الى فوق الركبه
انطلق ورح الجزيره من الجه الجنوبيه يسمونها التنور هاذا موقع يوصي عليه الدكتورمايضرب الاعريضي
وشعري حجم ديزل يعني كبير جدا جدا جدا وفسكراحجام خياليه
بس ونتبه وانت راجع اذا صادفك الليل لا تولع اي كشاف او اي شي يضي ولو انه بحجم الدبوس
لاسمح الله ينطلق عليك اللي انت خابر يمشي خسه الاف ... حاقول... مايمشي الا على طرف اذنبه
والممر منطقه عبورللقروش قل الدعاء واتكل على الله
والصيد بل الخثاق افضل شي في المنطقه عموما لانك لوحطيت سمك ميد اوسلس بتخسركل شي
وبعدين الخثاق متوفر بكثره في موسمه
وابو قميص معروف اذا صدت صدت
بس اذا سمعت اطلاق نار شوفلك مزبن وازبن لانها منطقه متوتره
اسف على الاطاله
واي استفسار حاضرين:cool:

طحنون

30/08/2004, 12:56 PM

سلاح اخوي نسيت اقولك شي
لاتضيع وقتك مع حرس الحدود تعالهم بدري يعني وقت الدوام الرسمي احسن لك لان لو تجي خارج الدوام
الرسمي اخلف الله عليك يبيلك اربع ساعات الى ست ساعات على بال مايجي المسؤل عن اصدار التصاريح
اهم شي صوره البطاقه الشخصيه والاستماره يشيكون عليها بس بدون صوره
والشبكات ممنوعه باانواعها الااذا في تزين دبر عمرك والساكتون ممنوعه لاني ناسي السكتون في السياره
وخذوها وحنا طالعين اختها مع التعهد بعدم حملها وانا ماعندي سالفه فيها ناسيها مااقصداني اجيبها
واذا فيه حارش وارش علمني
بالوفيق:D

gulfhunter

30/08/2004, 04:00 PM

السلام عليكم ورحمة الله وبركاته

حياك الله أخوي غواص الأحلام …… شكراً على مشاركتك…….

الله يعطيك العافيه…. يعني اللي يبي الهامور والشعري لازم يودي طراد معاه…. والحداق سماري. .. حلو بس ياريت تزودني بإحداثيات اماكن الحداق …………

العقام….؟؟؟؟؟؟؟؟؟؟؟؟؟؟

شلون الصافي … هل هو متوفر بكثره وين مناطقه ….

و للمره الألف مشكور……

حياك الله أخوي طحنون….. ومشكور على المشاركه……
وشكلك داخل بقوه…. الله يوفقك

وأن شاء الله مافي حارش وارش

MARINE

30/08/2004, 04:36 PM

كيف حالك يا gulfhunter ان شاء الله بخير
ماقصرت وبيض الله وجهك اما بالنسبه للطراد اعتقد انها صعبه شوي لانها منطقه حدوديه ولا زم
يكون عندك رخصة صيد رسميه واهم شئ الواسطه لان كل القوارب هناك حق صيادين رسميين
الشئ الثاني ذكر اخوي طحنون الجزيره انتبه تحاول تدخل او تطلع من الجزيرة وقت المد لان
المكان فيه تيار يسحب سياره مش آدمي وصارت لنا سالفه مع هذا المدخل الخال
كان بروح فيها لولا فضل الله علينا والحمدلله على كل حال
اخوك
MARINE
:heart:

gulfhunter

31/08/2004, 11:14 AM

حياك الله اخوي MARINE ومشكور على المشاركه...........

وعلى فكره شكلنا راح نسوي رحله لأعضاء المنتدى البحري لراس ابو قميص

MARINE

31/08/2004, 03:04 PM

السلام عليكم ورحمة الله وبركاته
هاهاهاهاهاهاهاهاهاها
:D :D :D
اذا معزم ابشر بس خل الجو يزين يعني بعد شهر وشوي
ونعطيك العلوم الزينه وبالتوفيق
اخوك
MARINE
:heart:

gulfhunter

31/08/2004, 04:47 PM

هلابك أخوي MARINE

الزين مايجي منه الاً الزين

وبأنتظارك..... والله يوفقك

MARINE

31/08/2004, 06:51 PM

ماتقصر اخوي gulfhunter
وابشر باللي يسرك ان شاء الله
اخوك
MARINE
:heart:

الكشاح

01/09/2004, 12:50 AM

الحاضرين... الظاهر انكم بترمضون في راس بو قميص...مع اليرايير والشعري

وبتصير قماري وسماري.....ونشكركم جميعا على المعلومات المفيده...

وانا اقوووول خلو رحلة العيد الي راس بو قميص..ازين واحسن

تحياتي للجميع

MARINE

01/09/2004, 07:05 AM

حياك الله اخوي الكشاح
وحيا الله اهل الامارات كلهم
اخوك
MARINE
:heart:

gulfhunter

01/09/2004, 07:07 AM

السلام عليكم ورحمة الله وبركاته

MARINE تسلم وماقصرت

حياك الله يا الكشاح .......الوعد في راس ابو قميص!!!!!!!!!:D

سلاح

01/09/2004, 06:43 PM

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته

إخوتي الأعزاء

الكشاح
ابو زاهر
gulfhunter
غواص الاحلام
MARINE
طحنون

والله يعجز اللسان عن شكركم يا إخوان

وما أقول غير
الله يعطيكم ألف ألف ألف ألف عافيه

ماقصرتوا

وبالنسبة للرحلة
ولو إني مبتدأ
بس أنتوا عزمّوا :good:

ومشكورين

أخوكم المحب/
سلاح

MARINE

05/09/2004, 03:26 PM

حياك الله اخوي سلاح
وابشر ان شاء الله
ونخليك تصير مخضرم في الصيد ان شاء الله وتوسع صدرك وصدورنا
بس خل الجو يزين
اخوك
MARINE
:heart:

سلاح

05/09/2004, 07:11 PM

مشكور ياغالي
والله يكتب إلي فيه الخير

وأنت لك وقفه معي ما أنساها ياغالي

ولا يهون الباقين

MARINE

11/09/2004, 07:32 AM

حياك الله اخوي سلاح
واحنا حاضرين للطيبين
اخوك
MARINE
:heart:

كاتم البحار

15/12/2005, 09:53 AM

بصراحة انا ابي اروح رأس ابو قميص بس ما ادلها ممكن من الاعضاء الكرم ان يدلونا راس ابو قميص

طحنون

15/12/2005, 11:21 AM

كاتم البحار
انت من وين علشان اوصفلك زين ولاتسأل احد من تطلع من بيتكم الى المكان اللي تبيه في رأس ابو قميص
,وألا تدري خذالتوصيف السريع
اول ماتوصل مركز حدودسلوى وتأخذ التصريح وملاحظه انك تأخذ احتياطك ومن معك بظروره تصوير بطاقه الاحوال وأستماره السياره
وبعد ما تنتهي منهم تمسك طريق الامارات حتى تجيك لوحه على يدك اليمين مكتوب عليها راس ابو قميص لف معها
يسار
تمشي تقريبا 37 كيلو والطريق لك عليه مكسرشوي الى ان تصل البوابه لدخول الشاطي
حرس الحدود يشيك على تصريحك وامسك الطريق الى ماتوصل للوحات مكتوب عليها ((شاطي متنزهين))
طبعا لك الخيار في اي مكان تجلس فيه واختر الا ماكن المرتفعه لان الموقع فيه من الغرابه ما الله به عليم
ماتدري في اي وقت يمكن ان يصير مد اوجزر
واذا صار مد الله يعينك اذا كنت بمكان نازل او متساوي مع البحر
طبعا لازم انك تستكشف المكان مظبوط وين تحدق فيه او وين تغوص فيه او وين تحط الغزول
طبعا هاذي الاشياء حسب خبرتك في الصيد
وخذ في بالك ان الجوال 95 في % مايشتغل على طول يتحول قطري او اماراتي في حاله الاوتو
طبعا اذا سمعت صوت اطلاق نار حولك حلك حذر ولا تتحرك بالسياره شوفلك مكان وازبن فيه ولا تسوي نفسك رانبو
لان هناك رانبو مايمشي معهم يمرعليك عيار 50 زي سلام عليكم ويتحول الشاطي الى العاب ناريه تشوف الشباب
ويوش عند اذنك
طبعا لازم تزداد نسبه الحذر بنسبه 200 في الميه في اي شي سواء في نزولك البحر او على الشاطي
بالنسبه لي انا اعرف الشاطي من 17 سنه وحصلت لنا مواقف كثيره
واي سوال انا حاظر

سلاح

16/12/2005, 06:32 PM

أخوي طحنون معلومات مثيرة جدا جدا

الشباب يمر من جنب إذنك هذي جلووه تقول نور ليزر مار جنبك لكن الفرق أنك تسمع في إذنك صوت طووووووووووووووووووووووووووط من سرعة الطلقة إذا انت قريب منها...

طيب ياغالي
تعتقد ماهو سبب إطلاق النار الي يصير هنالك؟