---- سؤال . الجميع يدخل --------- [الأرشيف]

وَسَام!

10/09/2009, 03:01 AM

والله العذاريب واجد ومنها!
1 - ان الطير بعد ماهديته تلاب لاهو اللي يلحق ولا هو اللي يهزع يروح اليوم وانا اطرد!
2 - الطير ضعيف صمله مايهد على العسر يبي شي هين!
3 - الطير جبان مايهد شجاعه !
4 - الطير مايهد الا ضعيف يعني مايهد وهو معتد !
طبعا هذه الامور اتكلم عنها اذا كان الطير وحش! وقد تنطبق ايضا على البيتي
اذا كان صاحبه ردي ذمه ولم يخبرني بها!
ولاهنت يابو ماجد

ماهد الشياهين

10/09/2009, 03:11 AM

اسعد الله اوقاتكم بكل خير

سؤالك واضح

وانا اقولك الطير المزاجي الصلف

اللي كل شين فيه طيب وزين لكن مزاجي ان ارخيته وان رفعته ما يفيد فيه شي

أبو يزيد 11

10/09/2009, 03:50 AM

أن الطير (يهد ويأكل الصقور الآخرى)

اوه

10/09/2009, 04:21 AM

السلام عليكم الطير الكفاخ(الي ما يبرد جناحه) في البرقع وبدون برقع ولغريبه في خيمه البيع والشراء ما يطرح السوال عن الطير هل هو كفاخ اولا واعتقد انه عذروب من عذاريب الطيور

garah

10/09/2009, 04:24 AM

اخـــووووي
قلب ذيب
مشكوور على مواضيعك
الي دائماً ماتصب لمصلحة كل صقار وكل متذوق لهذي الهواية
اما بخصوص الموضوع فعندي لك امرين
الأول:انك تبحث عن طير بكر ولا ثنو مجهوووووول
ويباع لك الطير وبعد فتره يطلع الطير فااااسد وله علوم؟؟؟؟؟
الثاني:انك تشتري طير مثانا ذبح حبارى وسبق وتاخذ مصفوط من رجال صافطلك
واخر شي يطلع الطير فاسد ويوم تكلم راعي المصفوط يقول انت مشرط علينا اذا الطير
مافعل انك ترجعه؟؟؟؟؟؟
وبالأخير تقبل مروري
ولك خالص تحياتي
آآخــــووووكــ
جــراح

أخو المري

10/09/2009, 04:28 AM

السلام عليكم

زيادة على الاخوان

بعض الطيور التفاريخ وقليل من التهاجين ماترتفع يعني الحمامة تروح فوق 10 امتار وما حول ما يقدر يرتفع لها
أقول بعضها وليست كلها؟؟؟؟؟

الشئ الثاني:
الطير أعور مايشوف الا من عين وحده مثلأ

وتقبل مروري

...

garah

10/09/2009, 04:29 AM

السلام عليكم الطير الكفاخ(الي ما يبرد جناحه) في البرقع وبدون برقع ولغريبه في خيمه البيع والشراء ما يطرح السوال عن الطير هل هو كفاخ اولا واعتقد انه عذروب من عذاريب الطيور

تحياتي لك ااخــوي آآوه
ولكن حبيت ارد على وجهة نضرك الكفاخ وان محد يسأل عن الشي وهو عذروب
وفعلن هو عذرووب
ولكن الكثير يعمل على الشي وهو سؤال هل الطير طلاع؟؟؟؟؟ يعني اكيد الطير الي يطلع معناته راكد ومفرع
له داخل السياره
وطلعه على الحباري
وان الكفاخ مستحيل يصير طلاع وراكد
فتحياتي لك وتقبل مروري
آآخــــووووكـ
جــراح

ابوناهض

10/09/2009, 04:32 AM

يقولونلك طرح ووحش وتتفاجئ انه جني عش ياحسرتاااه

بو غازي

10/09/2009, 04:54 AM

السلام عليكم ورحمه الله وبركاته
اخوي قلب ذيب الله يعيطك العافية اما بالنسبة للجواب والله اعلم في اشياء كثيرة بس اعتقد انت تقصد؟ الحقلان على العلف او الكوشة على العلف !! والله اعلم.
اشكرك على الموضوع .
:)

بن عويان

10/09/2009, 01:14 PM

ان يكون الطير جبان و يخاف و خاصتا في هدد الكراوين

عروق الدهنا

10/09/2009, 01:14 PM

الله يعطيك العافية

دايم مواضيعك مفيده وشيقه

انا اخذت طير
من رجال وقالي ان الطير خالي من العذاريب والطبوع الشينه
المهم اخذت الطير للمستشفى وفحصته
وقال لي الدكتور
ان حدا عيونه ناقصه 60%
واخذت الطير وهديته يوم شفت سبقه هونت اني اكلم راعيه
وادري لو ابكلمه مافيه امل يرجعه
لانه قال خالي من العذرايب
وارخص ذمته عشان الدراهم

وعلى العموم اشكرك جزيل الشكر على الموضوع الطيب

تحياتي

المري

10/09/2009, 01:24 PM

تسلم اخوي ابو ماااجد على هذا الموضوع الطيب وماقصرت

والشباب ماقصرو..

بخصوص الجيره الوحوش ( السيبيريات ) مرة جاء في السوق ذاك السيبيري اللي

يأخذ القلب وكنا اثنين انا وواحد من الربع وكلنا متولعين بالسيبيريات.. المهم نزل الطير

السوق واخذه المحرج واخذ يحرج على الطير وانتزاود في الطير وكل اشوي ازيد ب1000

وفيه واحد يزاودني ولا ناظرته المهم ماعاد خلاني هاللي يزاود معي شي رفع الطير ويوم

ناظرت اللي يسوم معي ويزاودني في الطير !!! تعرف من طلع !!! طلع خوي اللي معي!!!

هههههه وجانا ضحك في ذاك الليل وكنا في شهر رمضان, المهم شرينا الطير وطلعنا من

الرياض مستااااااااانسين لدرجة ماتتصورونها , وصلنا الديرة وعلى طول مارحنا البيت

توجهنا لمكان الدعو ويوم دعينا الطير الله لايوريكم اياه !!! كل ريشة تفرد لحالها !!!!

يادافع البلا...

هذا من العذاريب اللي ماتكتشفها الا بعد المشترى...

والعذاريب واااجد

وسلاااااااااااااامتكم

اخوكم - المري

مشبر البران

10/09/2009, 04:34 PM

أخوي قلب ذيب شاكر لك على الموضوع الرائع والمفيد

@قرناص@

10/09/2009, 04:57 PM

السلام عليكم ورحمة الله وبركاته ،،

حياك الله اخوي / قلب ذيب ولاهنت على الموضوع المهم والمفيد واكيد اغلب الصقاره صارت لهم مواقف من شراء طير جديد ،،

العذاريب واجده والصقاقير ماخلو لنا شيئ ،،

لاكن على العموم اذكر فيه واحد من الربع شراله شهانه وبعد فتره طلع يدعيها لاكن المشكله انها ماتتعدى 40 متر الا وهي موقعه ؟؟

فحص الطير مافيه شيئ !

والله اعلم ،،

قلب ذيب

10/09/2009, 05:21 PM

الله يحيي كل باسمه .
حقيقه مداخلات جزله ومفيده , وتعرفنا على تجارب حيه من بعض الاخوه الصقاقير .
هماش . شكرا لك , بعض الفروخ ماتعرف تكسر العظم خاصه الجير منها . وجني العش في أكقر الطيور واضح .
ابوامنه . الطير اللي عليه شروط يجب على البايع الالتزام بشرطة . شكرا لك .
وسام .ارحب . تلك عذرايب تجدها في الوحش , وبمكن تجاوزها . اللي نقصده عذروب خلى راعي الطير يبيعه .
ماهد الشاهين . الله يحييك . ماقلته صحيح لكنه يظل ضمن الشروط المتفق عليها . ويمكن تجاوز مزاجية الطير .
ابوزيد 11 . مرحبا . اللي ياكل الطيور احد العذاريب . لكن بعض الصقاقير يحب ذلك النوع من الطيور .

قلب ذيب

10/09/2009, 05:32 PM

اوه . هلا . الطير الكفاخ اذا كان صايد مقبول عند بعض الصقاقير .
جراح . ماعليك زود . ماطرحته صحيح لكن يضل ذلك في حدود ماتم الاتفاق عليه .
اخو المري . هلا . الجير الذي لايرتفع بسبب تربيته في اقفاص ولم يطلق في الفضاء , ويمكن تعليمه الارتفاع بالطياره . اما الطير الاعور . فالقانون لايحمي المغفل !ههههه
ابوناهض . مرحبا . صحيح يقولون طرح وحش بس ذلك ضمن الشروط .
ابوغاري . الله يحييك . الحقلان والتكويش ومافي شاكلته تدخل ضمن الشروط المسبقه .
عروق الدهنا . مرحبا . عذروب سطحي , اعجبك الطير وقررت اقتناءه .
بن عويان . مرحبا . كلامك صحيح لكن تلك العذاريب يمكن تجاوزها .

قلب ذيب

10/09/2009, 11:08 PM

ارحب يابومعيض . والله انك ذبحتني من الضحك على ذلك الموقف في مشتراكم للطير ! كل واحد يزايد على خويه . امر غريب . المهم انكم خذيتو الطير . اثمن تواجدك الطيب .
مشبر البران . الله يحييك ولاشكر على واجب .
قرناص . ارحب . أكيد الطير كان به دود رئه . ودود الرئه لايبان الابالمنظار في أكثر الاحيان . شكرا لك .

501

11/09/2009, 12:41 AM

عذروب الطير عندما تشري طير مشرووووط انه طلع راكـــــــــــد وتكشفه بالاخير ينط من مرتبه لا مرتبه
ويكافخ طول المقناص

وسلمت يا ابو ماجد

501

بـو بـدر

11/09/2009, 12:53 AM

السلام عليكم ورحمه الله

اعتقد العذروب الي ماتعرفه الي وقت المقناص هو

الطير يكوش علي الصيد مايخليك تقريب

------------------

والعاذاريب كثيره والله اعلم

تحـــياتـــي

رأعي الخرشه

11/09/2009, 01:56 AM

السلام عليكم ورحمة الله وبركاته
في البدايه الله يتقبل مناا ومنكم الصيام والقياام امين
والله موضوع مميز بصراحه والعيوب كثيره من طيور السوق وانا اقول هي توفيق من الله سبحانه ان كان الطير وحش او قرناص بيت والطيور في البدايه منااظر ماهي مخابر وراح تخبر الطير زين بعد ماتشوفه في الدعو او في ارض المعارك يا كم طير جات فيه الهقو وفشل وياكم طير عافوه الصقاقير وجاب الله فيه شي عجيب سبحان الله ,,,,
تقبل مروري

ربع خالي

11/09/2009, 02:19 AM

ماهو عذروب الطير الذي لاتكتشفه الا بعد شراءك للطير والقنص به ؟

أخوي الغالي سؤالك ذو شقين ,...
الشق الاول العذروب اللي يطلع في الطير بعد الشراء// والجواب:: أي عذروب يكون خافي عن العين ،ـ أما جرح تحت الريش ـــــ شق في قضاب إحدى ريش الجناح ــــــ فقدان النظر في إحدى العينين من غير أثر علامه للعمى ــــ والكثير ولاننسى بأن احيانا عند الشراء يكون المشتري لايدقق أكثر بسبب الفرحه بالطير عند مايرغب في شراء هذا الطير ويكون السعر في متناول يده ,,,,

أما الشق الثاني وهو اكتشاف العذروب في وقت المقناص // بالنسبه لي ما اعتقد بإن يخفاني شي من عذاريب الطير قبل المقناص والسبب بأني رح اجربه في الدعو والهدد على الحمام وبعض طيور البحر التي بالاسر مثل الصلال ,, ووعموما الصقار من ينقل الطير عشرة ايام عرف نفس طيره وأنا من الاشخاص اللي يصير تواصل بيني وبين طيري ( عاد هذي ما اعرف اشرحها والسبب بأنها تكون تواصل غلا واحساس) ,,,
تقبل مروري
تحياتي

Rahi

11/09/2009, 02:43 AM

السلام عليكم

العذاريب وايد

وأنا اقول يمكن الطير يكون بتال

وهذا بنسبه لي أشوفه عذروب فالطير وبعض الصقاقير مايخالف عندهم

مدماك

11/09/2009, 04:13 AM

هلا بك اخوي قلب ذيب الله حيه والله هذي من راسي...الطلع.نقل العلف.مايضايف . والباقي قالوه الاخوان...بس بسال الوالد بيجاوب ان شاء الله......مدماك

أحمر العين

11/09/2009, 05:23 AM

تكـــــون حــدى عيـــونه الشــوف فيهـــا تعبــــان

الشي الثاني والاهــــم:

لامن حذفـــت للطيـــر ملــواح ويكـــون جنحـــان حبــاري
[ يــرمــز الطير] << اعرف أن الطير طقوع وما معه قلب وذروق ولا يهد على حباري

راعي الشهامه

11/09/2009, 05:38 AM

ياهلا ومرحبا عد هماااااال المطر بأبوماجد .. حي ذا الوجه

والله الربع ماقصروا وكل اللي براسي جابوه . بس يمكن يكون الطير يجفل براعيه . يتنكر لراعيه

عوق الخريش

11/09/2009, 09:46 AM

بسم الله الرحمن الرحيم
السلام عليكم ورحمة الله وبركاتة
حيااك الله أخوي الغالي : قلب الذيب
يعطيك العاافية والله يبيض وجهك على الموضوع المتألق والمهم صرااحة للجميع وفية النقااش مفيد...لآهنتــ,,,
باالنسبة لي أنا عذروب الطير الذي لآأكشفة ألآبعد الشراء والقنص بة طبعاّ العذاريب وااجد غض النظر عن ألأامرااض لأن ألآن يوجد مستشفياات وعيادات ,,
العذروب هو أطباع الطير عموماّ هذي اللى صعبة احكم عليهاااا ,,,
تحياتي لكـ...وشكراّ,,

أخوكـ

( عوق الخريش )

قلب ذيب

11/09/2009, 02:44 PM

شكرا لردودكم الوافيه , صراحه اثريتوا الموضوع .
501 . الله يحييك . عدم ركادة الطير على التكايه يمكن معالجتها وهو عذروب بسيط .
ابوبدر . مرحبا . ياخوي وين صدت هالهوامير الطيبه , والسبيطيه او الشعوم الراهيه . لازم نخاويك رحلة بحر . التكويش وماشابهه في الطير يدخل ضمن شروط البيع .
راعي الخرشه . حياك الله . كلامك صحيح بس هناك عذروب يعوفك الطير بعد المقناص به .
ربع خالي . هلا وغلا . ماقلته صحيح لأن العذاريب كثيره بس منها المعيب والذي يتمنى الصقار انه مااشترى الطير بعد اكتشافه .
Rahi. هلا . تقصد تلاب . التلاب في الطير عذر . لكن بعض قرانيس الهوى يتلب الحبارى حتى يبعد بها , وعندما تبعد يلحقها في ثواني! حتى يستطيع اكل مايكفيه قبل وصول راعيه . ويحد راعيه على المطبات . وقد حدث ذلك معنا في العراق , لدرجة ان احد اخويانا خلا طيره تالب ورى حبارى من كثر ماعجزه بالطرد .!!

قلب ذيب

11/09/2009, 02:57 PM

مدماك . الله يحييك . كلامك في محله لكن تلك العذاريب يمكن الشرط عليها بين البايع والمشتري .
احمر العين . مرحبا . ماذكرت صحيح لكنها تقى عذاريب مشروطه .
راعي الشهامه . هلا وغلا . صحيح الجفال عذروب في الطير خاصه قرانيس الهوى او الطيور المشبوكه من طيور اخرى ( عندما يقبل عليه راعيه ) يفك الصيده , وهناك طيور ماتداني حاسر الراس او لابس البنطلون
او بعض الالوان . كلها عذاريب لكن يمكن تجاوزها .
عوق الخريش . مرحبا ومسهلا والله يحييك . هناك من العذرايب مايتم اكتشافه بعد شراء الطير خاصه القرناس البيتي , لكن يمكن معالجتها , لكن العذروب اللي يخلي راعي الطير يبيعه وهو متأكد ان الشراي لن يكتشفه الابعد حين ! هو العذروب الكايد .
- - شكرا لكم والاجابه سوف تكون قريبه , وفي الحقيقه اثريتونا بهذه المعلومات القيمه . اشكر الجميع .

الجراح11

11/09/2009, 07:53 PM

اعتقد الاجابه انا الطير يعاف الحبارى وهو فاعل وسبوق ومشرط عليه يسما ( عايف)

قلب ذيب

11/09/2009, 11:29 PM

الجراح 11. الله يحييك .
قربت حول الاجابه الصحيحه . الطير ( عايف ) لكن كيف ؟

قلب ذيب

11/09/2009, 11:40 PM

العذروب هو .
الطير مايجي الحبارى في القاع ! يبغيها طيار .
الحبارى تطير في القاع الوعر وتبعد بالطير . يلحقها الطير ويوقع حذاها وتروح هارب عنه وهو يناظرها !
يحدك الوعر على اللحاق بالحبارى وبالتالي تهرب الحبارى وتختفي والطير موقّع يتلفت !!
- -تخاويت مع احد الجماعه في احد المقانيص . وكان عنده طير كامل المواصفات والكامل الله اذا ارتفعت الحبارى مايخليها تمغط ظهرها واذا ابعدت مسوحل وقعّت جنبها وحط وزانها ! تكسرنا من الوعر يريدني اطير الحبارى للطير . ولانوصل الحبارى الا قد هربت وابعدت . وملينا لدرجة اني انزل منه وقت هداد طيره واخليه يطرد لحاله . ويعود عليّ وقد نتثرت اغراضنا داخل السياره . القهوه منكبه . والغراض مبعثره . واطريت اني اعطيه السياره واستأجر سياره أخرى لحالي !!؟
الطير مايجي الحبارى في الارض , هذا العذروب ماتكتشفه الابعد ماتشتري الطير وتهده , والبايع زاهق من الطير , ويعرف انك لن تكتشف ذلك العذروب الابعد ماتقنص بالطير وتهده .
- - شكرا لكم والحقيقه استفدنا من مداخلاتكم الجزله واكتشفت عذرايب كثيره كنت اجهلها . للجميه خالص تقديري .

اوه

12/09/2009, 01:32 AM

اخوي قلب ذيب اضن انه مو عذروب لا روحت عن الطيور اهده بس وين الي مثله

بو غازي

12/09/2009, 03:52 AM

السلام عليكم ورحمه الله وبركاته
اخوي قلب ذيب الله يعطيك العافية على الموضوع الي شاركوا فيه الاغلبية وكلن ادلى بدلوه وماشاءالله صدقت والله استفدنا كثير من المشاركات وعسى الله يعيطك العافية واحب ابدي راي فيك باعجاب لتواصلك مع الاعضاء بمواضيع يتشارك فيه الجميع .
وبما ان الموضوع مثبت وقابل للنقاش احس ان العذروب الي انت تقول عنه هو مايسمى عذروب يتماشى مثل الطير فيه ريشه تردف او مثلا الطير فيه صدغه او الطير يحقل او الطير يهبد او الطير يكفخ وقت العشا او فيه صيحه.
يعني هي من باب والله مدري كيف اوصلها بس مااحطها من ضمن العذاريب الي انا ذكرت فيما سبق بالاعلى وماشاءالله عليك عندك عمق في التفكير .
لكن انا اشوف ان اجابات الاغلبيه هي الاقرب من سؤالك من وجهة نضري.
تقبل مروري وعسى الله يعيطك العافية يارب
:)

الجراح11

12/09/2009, 08:15 AM

قلب الذيب اشكرك واشكر جميع المشاركين اللي استفدنا منهم وافدنا.... .... ومثل هالنقاش او الاساله ؟ جميله تزيد من المعرفه والخبره

قلب ذيب

12/09/2009, 02:49 PM

شكرا على تواصلكم الطيب .
اوه . مع احترامي لوجه نظرك . ذلك العذروب يجعل أكثر الصقاقير يعافون طيورهم ويعرضونها للبيع !
ابوغازي . القصد ان ذلك العذروب لايمكن اكتشافه الابعد هداد الطير , بينما هو عذروب كباقي العذرايب التي ذكرتها . لك تقديري .
الجراح 11 . لك التقدير والتحيه والاحترام .