اقتراح لملتقى الصقاره في خيمة الصيد بالصقور

[طيرحوران]

بسم الله الرحمن الرحيم

أخواني الصقاقير بمناسبة قرب موعد المقناص وحيث أننا في هذا المنتدى العريق والشيق والمشرفين إللي لو تلف العالم ماتلقى مثلهم وأخواننا العلامه إللي أي شي يشكل عليك بس أطرحه وشف ويش يسون فيه؟؟ أشوني ماأنا بسؤال ولا كان علوم !!!!!
المهم طرا علي طاري قلت ألحين ناخذ أخبارنا من بعض عن طريق المنتدى . والربع والله كلهم أجواد حتى أحيانا ألاحظ أسئله غريبه مره ومع ذلك عيال الأجواد يجاوبون .قلت ياولد خلني أستشيرهم في موضوع أجتماع للصقارهالموجودين في الخيمه والجلسه معهم والسواليف والتعرف فيما بيننا أكثر وأكثر لأن أي واحد يتشرف بمعرفة الرجاجيل .
قلت عاد أبطرح الموضوع لعل الله يهديهم ويوافقون وتسمح لهم الظروف ويجون لهم يوم عندي ونجتمع ونسولف عن هالقنص وعلومه .
المهم ترى إذا وافقو الجماعه على هذا الإقتراح فتراها عندي بدون جدال وإذا تشاوفنا تواعدنا عند غيرنا هذا بنسبه لي مادري عن غيري .
ترى أول من يجي المشرفين على الخيمه إذا الله كتب أن يكون فيه جمعه .
أي واحد عنده إستفسار عن هذه الإجتماع يرسل على الخاص وسوف أجيبه عن إستفساراته .
أرجو من الأخوه التكرم والموافقه على هذا الإجتماع .ولايكون لأحد عذر البعيد يجي على نفقتي الخاصه .على غفله...............D :

[اعقاب]

وعليكم السلام ورحمة الله وبركاته

ماهي بشينه

شكراً لك اخي الكريم على هذا المقال

[المري]

مرحبا ياطير حوران

وبيض الله وجهك على هذا الاقتراح


وأنا اول واحد موااااااااااااااااااااافق....


ويش رأيك بكرة!!!!!!!!!!!!!!!!!!!!!!! أمزح


المهم الى نويتوا الجمعاء ان شاء الله ان الله يسهل ذلك


اخوكم / المري

[ابو عايد]

موافق :good2::good2::BUTT1::light:

[ميراج]

الأخ طير حوران مشكور على الأقتراح والفكره زينه

ولاكن احب أوضح لك شىء مهم أنت تشوف الربع فى المنتدى تحسبهم حولك وأنا من خلال أشرافى على

الخيمه الأعظاء والمشرفين بعيدين عن بعض

اللى فى جده واللى فى الطايف واللى فى الأحساء واللى فى الشرقيه واللى فى وادى الدواسر واللى فى العراق

واللى فى القصيم واللى فى الغاط واللى فى حايل واللى فى ليبيا والجزائر اللى داخل السعوديه متباعدين جداً

وشلون بى تجمعهم فى مكان واحد

تقبل تحياتى

[الفيتو]

السلام عليكم ورحمة الله وبركاته
مساء الخير يا جماعه
طير حوران .. الله يطول عمرك كلامك يطري على الغالبيه لكن كيف
بيجتمعون على قول اخونا ميراج انا بالنسبه لي متشجع وقاعد
ارسم صور خياليه للجميع وكل واحد حاط له صوره في
مخيلتي وودي اشوفهم على الطبيعه يمكن مثل
ما تصورت لأن عندي خاصيه غريبه
ههههه ودايم تصير

والخيمه اللي كل اهلها مفـالـــيح *** يا من يجمعها ويضـــــبط وعدها
احد يجاهد فالعراق المشافــــــيح *** و معه مناعيرالمنا يــــــــا تردها
واحد بها الخليج اهل هبة اـلريح *** اللي يسابق هرجها فعـــــل يدها
واحد بنجد اللي نخيله مداويـــــح *** زبن الونيه لـ افلسة من جهدها
واحدٍ بغرب وفالجنوب الزحازيح *** وأحد شمال ونعم محصي عددها
وفي ليبيا وبمصر ربعٍ طحاطيــح *** واهل الجزاير كفو والله وأدهى
شف وضعها لوكان بتقوم وتطيــح *** صعبه تجمعها وتضـــبط وعدها

والسلام
الفيتو
http://www.mekshat.com/pix/upload/images5/mk8575_w.jpg

[بوصقر]

والله فكره طيبه ياطير حوران ومعرفت لرجال ماتنعاف

وانه رسمت في مخيلتي اخوي الكبير الفيتو واتمنا ان نلتقي مع الجميع

وان لم تكن في الدنيا اسئل الله العزيز القدير ان نلتقي في الجنه

[أبو رداد]

بسم الله الرحمن الرحيم

السلام عليكم ورحمة الله وبركاته


الاخ العزيز طير حوران ... مشكور على هذه المبادره الجميله .... والله يوفقكم ويجمعكم في الدنيا ... ويجمعنا معاكم في الجنه انشاء الله ... وحنا البعيدين لاتشيلون همنا ... يسدنا الصور ... وانشاء الله يوم يتعدل الوضع الامني في العراق... والله يخلصنا من الجيره الي عندنا... نعزمكم وتجون بين اهلكم في الرمادي وحولها وعقب العزيمه ... نسويلنا قنصه نقل حي ... و كل واحد ينفعه فعل طيره ... الله كريم ...

[fhd97]

3300CC

[fhd97]

السلام عليكم ورحمة الله وبركاته
موافق وبشده ونعم الاقتراح

[طيرحوران]

الأخ أعقاب
تسلم على مرورك ويالله شد حيلك ترى كلها 600كم ولاك عندنا بس أصمل أنت وكل شيء يهون.

أخوي المري
عاد مالك عذر توك شاري موتر الله يعطيك من خيره ويكفيك شره تعال أنت وخوينا أعقاب منها الجمعه ومنها تدرب الموتر على المشاوير.

ابو عايد
حياك الله ومادري وين جهتك الشرقيه مدري الغربيه لكن تسلم على هالموافقه القويه . ويالله يالنشاما

ميراااااااج
حياك الله ياميراج وهونها وتهون مهنا شيء بعيد الحين ولله الحمد سيارات وطيارات بس أفزعلي بجمعتهم . وحنا ترانا نعين ونعاون .

الفيتو

لا وشاعر ماشاءالله لا ألحين نبيك عاد إذا أجتمعنا أنك تسمعنا من هالقصيد غدي الربع إذا شافو فيها شعر والقصيد أنهم يتحمسون للجمعه.وأنت يالفيتو من أهل الغربيه ومن الطائف تحديدا إذا لم تكن معلوماتي خاطئه .

بو صقر

أخونا قطري والله والنعم في أهل قطر والله وأذكر العام موقف صار مع أهل قطر صراحة رجاجيل والله يوفقهم وإذا كتب الله جمعه ترى ضروري تجي للجمعه وتعطينا علوم الشياهين ترى أهل قطر أهل شيهانه وهددهم للشياهين يوسع الصدر لااله الا الله عليهم .

ابو رداد

صقار العراق العظيم أنت بإذن الله أنك تجي مهما كلف الأمر وتسلم والله على الإستضافه وأطلب من الله أنه ينصركم على عدوكم آآآآآآآآآمين إنشاءالله وترانا والله نتألم لكل شيء نشوفه ونسمعه لكن ماباليد حيله مالنا إلى الدعاء لكم .

fhd97

الله يحيك في كل وقت .

المهم يالربع والله ودي بالفعل مابي كلام خلونا نرتب مع بعضنا ونشوف الوقت المناسب والله ترى مالي قصد من هذاإلا الجمعه وشوفتكم . المهم كل واحد يعطينا الوقت المناسب له ونضبط الأمور فيما بينا لعل الله يكتب لنا لقاء في الدنيا قبل الآخره آمييييييين . حتى المكان إذا كان مكاني بعيد عليكم ممكن نغيره لمكن يوافق الجميع .
علما بإني ودي تجون عندي لإنكم إذا جيتو عندي بتشوفون أشياء ماتصدقونها بس بخليها مفاجئه .
أرجو من الجميع الحرص .
والله يحي كل واحد بإسمه .وللي عنده أي أستفسار عن الإجتماع ياخذ رقم الجوال عن طريق الرسائل الخاصه .

ودمتم

[طيرحوران]

السلام عليكم ورحمة الله وبركاته
شكلنا ماذمرنا شيء للجمعه .
المهم ترى أنا رايتي بيضاء لأني سويت إللي علي والباقي عليكم . تحياتي للجميع.

[سنافي]

انا موافق

بس بشرط ان يكون أول إجتماع عند ابو رداد ولا يكون بالرمادي
يكون بالسلمان اوالنخيب وحول ابن هذال

الأخ / الفيتو الله يكفينا شر رسمك ها ها ها ها ها ( تراني مزيون ) لا تلخبط بيني وبين ميراج