المساعد الشخصي الرقمي

مشاهدة النسخة كاملة : كم يعلف طيرك وقت المقناص .......صقار الأسياح


صقار الأسياح
15/09/2009, 01:55 AM
السلام عليكم ورحمة الله وبركاته:
اخواني اعضا مكشات الكرام انا اعرض مواضيع للفايده عرضت مواضيع قبل هذا يطلع لي بعض الشباب يقول انت تسأل عن اشياء وانت تعرفها نعم اسأل عن اشيا وانا اعرفها ليستفيد القارىء والمشارك وبعض المواضيع فعلاً اجهلها او لا املك المعلومة الكافية عنها.
اليوم موضوع هو عن علف الطير وقت المقناص يعني وانت بالبر بتاخذ اسبوع مثلا ولا صاد طيرك ولا هد وش كثر تعطيه علف عشان بكره يكون جاهز انا بجاوب عن نفسي عشان ما احد يزعل انا مثلا يوم الأثنين اعطيه عشاء وسط يعني نص حمامه ويوم الثلاثاء نص ثندوه فقط ويوم الأربعاء اقنص وجربتها مع كم طير اقصد الحرار وما شيه ودي كل واحد يدلي براية ونستفيد....



صقار الأسياح
ربع خالي
15/09/2009, 02:26 AM
اخوي الغالي صقار الاسياح ,, صقارتي للطير وانا ناوي على المقناص هي :...
ازيد عشاه قبل المقناص بأسبوع وأنا ادعاه لين ماترتفع عديته ويسويله نفيس شوي و اليوم اللي اتجه فيه للمقناص اشبط برقعه وانساه ولايشوف النور الا بعد يومين وهي المده اللي اخذها طريق للمقناص واليوم الثالث يكون مصباح اول يوم لي في ارض المقناص , واسمي بالرحمن وأحذف عنه البرقع في اول هدد وأكبر على صيدته ان الله وفقه ,,,
تقبل مروري
تحياتي
@قرناص@
15/09/2009, 02:46 AM
نص حمامه والا ثناديها وعلى حسب الطير كانه شهانه احرص على انها تكون صنيعه

خوف من المرض ،،

والله يوفقك ولاهنت على اسئلتك الهادفه ،،
أبو أمين
15/09/2009, 03:34 AM
اخوي الغالي صقار الاسياح ,, صقارتي للطير وانا ناوي على المقناص هي :...
ازيد عشاه قبل المقناص بأسبوع وأنا ادعاه لين ماترتفع عديته ويسويله نفيس شوي و اليوم اللي اتجه فيه للمقناص اشبط برقعه وانساه ولايشوف النور الا بعد يومين وهي المده اللي اخذها طريق للمقناص واليوم الثالث يكون مصباح اول يوم لي في ارض المقناص , واسمي بالرحمن وأحذف عنه البرقع في اول هدد وأكبر على صيدته ان الله وفقه ,,,
تقبل مروري
تحياتي

والله انت يا اخينا استاذ ولايهونون البقيه

لا ازيد على ماقاله اخوي الربع الخالي
الهواوي 502
15/09/2009, 03:43 AM
نص حمامه ,,, قبل االمقناص بثلاث ايام
مشبر البران
15/09/2009, 03:45 AM
الله لا يهينك على الموضوع
وننتظر باقي الأخوان
ابوناهض
15/09/2009, 04:34 AM
والله وناخووك نص حمامه قبل المقناص بثلاث ايام واليوم الثاني اقلل العلف والليوم الثالث مهنا علف اليوم الرابع توكل على الله ورخ السبوق وكشف للطير وسم وبشر باخروب والكراوين..ابوناهض الحربي
راشد الامارات
15/09/2009, 04:35 AM
خوي صقار الاسياح


اشكرك على طرحك لهالموضوع


وكم له فايده بالنسبه لنا كمبتدئين وشكر بالنسبه لكم كمدرسين

بالنسبه لي

ان كاني ماني بقانص الا بعد سبوع ولا حولها اعطيه فنداه كامله


وان كاني في وقت مقناص وصدت مثلن حبارى او كروان اخليه ياكل 4 نسرات بالكثر (اربع لقمات)وبس واذا ياني اليوم الثاني ولا صدت شي اعطيه نص فنداه..


واشكرك مره ثانيه عالمووضووع
قرناس حائل
15/09/2009, 04:46 AM
والله ياخوي صقار الاسياح على حسب الطير

فيه طيور تهد على صنعه وفيه طيور لازم تقصر عليه علشان يهد وفيه طيور سددوا

وقاربوا , بالنسبه لطيري أقمزه اليوم اللي رايحن فيه للمقناص والايام اللي بعده

صافق صافقين وعلى هذا الحال لكن قبل تقنص لازم يكون الطير فل صنعه

تقبلوا تحياتي
أخو المري
15/09/2009, 04:56 AM
مرحبا يا صقار الاسياح


ولاهنت على الموضوع الرائع



بالنسبة لي

اذا كان الطير جير اعشيه قبل المقناص بيوم علف ثندوتين يعني صفق حمامه
واذا قنصت ما اعطيه الا ثنداه وحده

اذا كان الطير حر ما اعطيه ولا لـقـمـة قبل المقناص بيوم واذا قنصت لابد اعطيه على الأقل نص ثنداه


واذا كان شاهين ما أوجبها ولا يوم لأن الشاهين سريع الأمراض واكثرها ما شاء الله ما يحتاج توجبها


ومشكووورررر مرة ثانية
على الموضوع الأجمل من رائع



أخوك / اخو المري
مدماك
15/09/2009, 05:04 AM
هلا بك اخوي والله الحرار نعطيها سمانه كامله وماعليها تهد من بكره وتلحق والشياهين اذا كنا بالمربعينيه نزود للشياهين والجيره بعض من ربعنا يعطونها سمانه ونص ......وخاصة الشياهين عشان مره ماتت على الوالد شيهانه بلمربعينيه من البرد طاحت من وكرها..........اخوك مدماك
هواي داورد
15/09/2009, 05:08 AM
نص الثنودة لتبوع الشياهين

وثندوة كاملة للحرار و الجيرة ......

كان ابي اقنص به بكره
القيصوم 815
15/09/2009, 05:55 AM
والله انا ابشارك لو ماعندي ما عندكم من الخبرة واقول ان العلف ما فيه صعوبه وانت عارف وزن طيرك قبل المشيه لكن اللي فعلن يضيق صدر كل صقار يقنص بطير واحد وهو ما ذبح ويطلع ولمدة عشر ايام وانتصفت مدة رحلته وما لقا حبارى ثم بدا ينزل الطير .. هل يكثر العلف ثم تجيك الوساويس اخاف القا ولا يطلبه او يستمر على تضعيف الطير ولقا وحدة يمكن ترفسه ثم تصير المشكلة مشكلتين ضعف طير ويهاب الحبارى

والله اعلم
فارس طيء
15/09/2009, 07:48 AM
يا مرحبا يا صقار الاسياح وحي ما جبت فعلا سؤال مهم!!

بالنسبه لي ما ازود على كلام اخوي ربع خالي بالنسبه للطيور المبروكه اما الطيور الي الله يجيركم منها ههههههه افضل الميزان يعني اكون قبل المقناص عارف وزن الهدد الي يكون الطير لاهوب بالفسقان ولاهوب بالناقظ الي ما فيه حيل يلحق واعرف كم كمية العيشه الي تخليه على نفس الوزن طول المقناص واذا طرد طرد ن ممتاز ويستاهل انك تكرمه اريحه يوم بدون عشا واليوم الي عقبه يكون على نفس العده وباذن الله ما يخونز وخصوصا الجيره الي نسمع عنها تهد يوم ويوم ولا شفناها عقب هالطريقه

تحياتي
نواف وبران
15/09/2009, 01:07 PM
والله الشباب ما قصرو كلن ابدى رايه

بالنسبه لطيوري يوم ثندوه ويوم ثنادي حمامه ومرتين بالأسبوع لأجل الروباجه

وان كنت ابي اضربلي مقناص قبل المقناص بيوم ثندوه مع حبة قلاع الألمانيه وحبه فيتامين المانيه مجربها اكثر من مره ومفعولها طيب للطير تخرش قلبه شوي
أبو رداد
15/09/2009, 03:12 PM
وعليكم السلام ورحمة الله وبركاته
ملاحظات طيبه .... سلمت أيدك يصقار الأسياح
(لكن أعتقد فاتك ذكر بعض الملاحظات)
الطير قرناس ولافرخ ؟؟ نفس القرناس الصايد أطيب من نفس الفرخ الصايد وبالعكس أذا هن موصايدات
الطير صايد الحباره ولا ؟؟ الطير الي ماهو صايد يحتاج (حاجه أكثر)
الجو بارد ولاحار ولاطبيعي ؟؟( البرد وطعام الطير يتناسن طردي)
كم وزن اوحجم الطير؟؟ (عندي جير لما أعشيه حمامه كامله ماكني عطيته شي !!)
عوامل أشوفها مهمه ويتوقف عليها طعام الطير
صقار الأسياح
15/09/2009, 05:18 PM
مشكورين على الردود الطيبه وبيض الله وجيهكم وكل واحد يدلي بدلوه للفايده نعتبرها مجلس
وشــــام
15/09/2009, 07:48 PM
السلام عليكم اخوي صقار الاسياح
اشكرك على الموضوع الرائع
عندي ملاحظه او اختلاف في وجهة النظر وهي :

الطير يجب يكون كل يوم جاهز للهدد يعني يمكن وانا جاي من المقناص بيومين يتصل بي احد الاصدقاء ويذكر لي حبارى هل اقوله اصبر يومين لين انزل الطير ...
حصل لي هالموقف قبل كم سنه وهو ان الطير صنيع وحنا بالوسم ونلقى حباراوين اليوم وحده ومن باكر وحدة وراحن سالمات ( غبينه ) وبعده من يوم انقل الطير لين يدخل الربطه وهو حول وزنة هدده مع الاخذ بالاعتبار درجة ححرارة الجو .

تقبل تحياتي
هاد بالبرقع
15/09/2009, 08:38 PM
ما شاء الله تبارك الله عليكم

هذي المواضيع الزينه اللي تفييد الزقرت

ههههههههه بس واجد اللي منقزين طيورهم انتبهو لا يذبحهن البرد بس
الطبشي
15/09/2009, 08:47 PM
السلام على حسب نفسيه الطير ....مثلا عندي طير ابدا اخف عشاه قبل المقناص بثلاث ليالي ....وعندي ثاني عشيته حمامه او نص حمامه هاد هاد مافي اذنه ماء...لاكن عموم الطيور انك تخف عشاه قبل المقناص عشان مايصير له عذر....
جـرح الشمـال
15/09/2009, 11:38 PM
انا من وجهة نظري حسب نفسية الطير اذا كان الطير شره على العلف مافيه مشكله اعشيه نص ثندوه ليلة المقناص واذا كان الطير مهو شره انقزه ليلة المقناص وكذا
هماش
16/09/2009, 02:49 AM
السلام عليكم

أحب ادلوا بدلوي مع الشباب واعطاء الرائي
اذا كنت بلمقناص وقت صيد ومابه الى اجازه كم يوم ازين نفس الطير بشناذره قبل المقناص بعشرة ايام
واذا جا حله وقنصت اول ماصبح على شبة الضو اعطي الطير نصف صافق حمامه ريوق الصبح
قبل صلاة الفجر ولمن صليت وزينت الدلال اخذة برقعه اخليه يتفلى ويدرج
ولجا المسيان حزة العشى اعطيه نصف حمام ما تضره بلهدد بئذن الله يهد ويطربك هذا اسلوبي مع البحريات وقت القنص
..@القناص@..
16/09/2009, 03:50 AM
والله ياخوي صقار الاسياح على حسب الطير

فيه طيور تهد على صنعه وفيه طيور لازم تقصر عليه علشان يهد وفيه طيور سددوا

وقاربوا , بالنسبه لطيري أقمزه اليوم اللي رايحن فيه للمقناص والايام اللي بعده

صافق صافقين وعلى هذا الحال لكن قبل تقنص لازم يكون الطير فل صنعه

تقبلوا تحياتي

والله مازيد على كلامه شيء.. عطاَك العلم
ولايهونون الربع بيض الله وجيههم
قناص الهدف
16/09/2009, 04:02 AM
بارك الله فيك