المساعد الشخصي الرقمي

مشاهدة النسخة كاملة : ودي افصل خيمة ثابته بسيطة .. إقتراحتكم ؟؟


راعي السلقه
17/09/2009, 05:30 PM
السلام عليكم ..

عندي دكه 4 × 4 .. المهم اني ناوي إن شاء الله افصل خيمه بسيطه وبأقل التكاليف .. ولا ادري وش تكلف
وبعدين مابي يكون بالخيمه عمود .. ولا ادري وش الافضل الجاهز او التفصيل ؟ ووين القاهم ؟؟ سواء الي يبيع جاهز او الي يفصل ..

النقطة المهمه اني ابي اذا خلص الشتاء بإذن الله افك الخيمة واخلي المواصير .. بحيث اني استفيد من المواصير بمظلة او اركب عليها رذاذ ان الله احيانا او اي فكره اخرى

النقطه الاخيره ان الدكة محدوده بجدارين

ارجو اعطائي مقتراحتكم كامله .. سواء نوعيه القماش .. المحلات الي تبيع .. حتى تصميم الخيمه

.. علماً اني موجود في القصيم واتمنى اني مااضطر اجيب قطع او اغراض من برا القصيم .. والله يعطيكم العافيه وبيض الله وجيهكم
ابو حسناء
18/09/2009, 10:54 AM
للرفع :good:
راعي السلقه
18/09/2009, 01:02 PM
بيض الله وجهك يبو حسناء
لاتكب البيالة
18/09/2009, 07:07 PM
السلام عليكم
مدام انك تبي باقل التكاليف عندي لك اقتراح جيد جدا بل ممتاز
اولا تجيب حداد باليومية وتخليه يفصل لك هيكل الحديد حسب مزاجك ممكن تخلي الحديد يربط بمسامير وليس تلحيم لكن يبي شغل اكثر
اذا قضيت من الحديد نجي للشرع مدامك تببي شي سعره مناسب عندك الشراع الباكستاني 24 جيد جدا واذا تبي شكل الخيمة كانه بيت شعر فيه لون اسود ولا خذ ابيض او رملي او اخضر اللي يناسبك خذ لك لفة سعر المتر 8 ريال (تقريبا) واللفة ارتفاعه 1.5 وطوله 50 متر او اكثر بشوي
نجي للتفصيل خله 3 طبقات الشراع ثم طربال ثم بطانه خفيفه والمحل انصحك بالمرباع بعنيزة او عروق الشمال ببريدة وشف اسعارهم
طبعا بتطلع لك خيمة اجزم انه اقوى من اكثر بيوت الشعر لان الخامات اكثره ردي والزين غالي
ثانيا تفكه بالراحه
واي استشاره او شي حنا حاضرين سواء التصميم او حساب التكاليف او غيره
واذا بغيت شي من الرياض الشراع او شي علمن بس اشريه واكزه لك بالشحن ولو تبي نتقابل بالمجمعة واعطيك ترى حنا نعين ونعاون اهم شي تستانس بالشتاء وتشب الضو
راعي السلقه
19/09/2009, 05:03 AM
بيض الله وجهك دنيا وآخره قل آمين ..

طيب عندي سؤالين بسيطين بعدين نتوكل على الله بإذن الله ..

الاول وش افضل تصميم بحكم أن الدكة محفوفه بجدارين لازقين به .. هل الافضل تصميم كوخ أو تصميم النصف كوخ بحيث تكون الجهه الي عند الجدار اطول من الجهه الاخرى او اخليه مكعبه ؟

الثاني كم التكلفه الاجماليه المتوقعه ؟
لاتكب البيالة
19/09/2009, 05:34 AM
السلام عليكم
بما ان الدكة 4*4 خل الخيمة لازقة بالجدار لانه لو تبي تخلي مسافة بينهم بيصير على حساب الخيمة
شف تصميم صراحة هالشكل اعتقد مناسب وما يحتاج كمية كبيرة من الحديد
وموضح عليه الاطوال وممكن تغير على مزاجك
http://photos-c.ak.fbcdn.net/hphotos-ak-snc1/hs236.snc1/8325_1251664331069_1213333130_758170_7359270_n.jpg (http://www.facebook.com/photo.php?pid=357952&id=1213333130)




التكلفة المتوقعة
الشراع 400 ريال ان كان اللي ذكرته بردي الاول وبيزيد عندك
الحديد والله ما ادري لكن ما ياصل 400
البطانة والطربال وكذا رخيصة
بقي شغل اليد عاد حسب اللي بتخليه يشتغل لك
ممكن 1500 او تزيد شوي كل التكلفة
راعي السلقه
19/09/2009, 02:00 PM
ماشاء الله عليك .. هذا الشغل العدل .. خلاص نبي نتوكل على الله بإذن الله .. الله يعطيك الف عافيه