المساعد الشخصي الرقمي

مشاهدة النسخة كاملة : على طاري السوالف رقـ2ـم


ابو عايد
03/09/2004, 09:40 PM
وهذي في العام 1424هـ شهر 8 هجري شعبان جهزنا للمقناص وتوجهنا للحفر وكان معنا اربعة طيور ثلاث جبليات وحر جيرمع تدريبنا للطيور على الملواح دربنا الجير واطلع على بعد ثلاثه كيلو على الملواح هد على الجبليه وهي على وكرها ويبا يتعلفها الخايب وكنت اصور الهدد وقريب من الجبليه فزيت يوم شفت الطير على صدر الشيهانه وانا اشوته برجلي لين خلصته منها للمعلوميه ( الطير شرس جدا وينخاف منه ) وفيه شراسه حيث انه يهد على أي شي بعدها ماتت الجبليه بسمه بعد ثلاثة ايام وبآخر مقناصنا مرينا الرياض وكانت احدى الجبليات (جمله) ترجع لحم غيرنا محلنا حيث ان المحل الاول الشباب فيه واجد توجهنا لشقه ما فيها غير الجير وجمله وانا وراعي الطيور وجلس راعي الطيور بجنب طيرته الى ان شافها طيبه حوالي الساعه الثالثه صباحا ونام خويي وانا نايم قبله قمنا من النوم الساعه التاسعه وتفاجئنا حصلنا الجير يتعلف جمله وقاطم راسها على ان راعيها مخليها بالغرفه والجير بالمطبخ زعل خويي وخذا حديده يبا يضحي بالجير حلفت عليه وقلت طير ارحم من اثنين وانا مغل على الجير وحلف مايعلفه ثلاثة ايام ولكنه ما خلا طبايعه تحركنا من الرياض متوجهين للديره باقي معنا الجبليه معها الاقلاع والخايب الجير وقبل نآصل الديره ماتت الجبليه(مزنه) واول مره تحصل علينا والظاهر ان العين صايبتنا من ربع لنا ما يذكرون الله
وفي شهر عشره هجري طرح اخويي جبليه شيهانه طيبه وساموها الصقاره وما بعناها وفي يوم راح خويي يداوم بمحافظه بعيده منا 90 كم وخلى الجير عندي قلت لاحد أخواني خلك حريص وقريب من الجير لإنه كان مع الجبلية بس ماهوب قريب منها وموثقين سبوقه لكن ما مداني اروح واجي المده 15 دقيقه إلا وهو ماكل جزء من الجناح من كتف جناح الطير ومخلي فيه فجوه فقدت الاعصاب وضربت الطير ضرب مبرح قلت خله يموت وخويي بعوضه بأطيب منه لاكن مافيه فائده جلست الجبليه عشرة ايام وماتت

واخيرا مات الجير في مراحنا للصمان في شهر12/1424
أبو تركي القطامي
03/09/2004, 10:04 PM
والله يابو عايد ياوسع بالك

وياصبرك على الجير هذا عقاب ماهو طير

والله أن مصعت رأسه حاله من أول مره الله يجزاك خير
ميراج
03/09/2004, 11:45 PM
أنا يا اخ ابو فايز ما أحب الجير

وأعتقد انه طير غبى جداً ولا يستمتع الصقار بالصقاره معه يمكن انه سبوق بس ما دخل مزاجى

وطيرك هذا ما عود عليك بخير

تحياتى
هاوي مقناص
04/09/2004, 01:09 AM
بسم الله الرحمن الرحيم.............



اخ ابو عايد عسي الله يصبرك علي ها الجير ،ويعطيك خيرهن ويكفيك شرهن.


وقصص حلوه عسي الله لا يخلينا منك.


اخوك:الخشف
بوصقر
04/09/2004, 09:43 AM
والله مادري اش اقولك يامشرفنا الغالي

لاكن مشالله عليك صبوووووووووووور والصقار يحتاج صبر

لاكن وانا اخوك احلا شي في لصقاره انك تفهم طيرك وتفهم طبعه لاكن هذي لجيره اطباعها رديه

بعلمك بقصه صارت حق واحد من الجماعه عنده جير والله مادري ايش هذا الجير لاكن راسه كنه راس وكري

وريشته ريشت شاهين وكفه كف اعقاب وخابره انه قرناس مادري كم سنه المهم الرجال قنص شمال الحفر

والله وهدوه على احباره وخيب امالهم ولا بقاه لا فلتراب ولا اطيار والمهم وهم قانصين الى هذا الثعل قدامهم

وتشاورون الربع قالو ماعندن عشه لطيورنه وين الجير ويهدون الجير على الثعل والله ويشفون لهم احلاهدد

في القنصه وتداوس مع الثعل اكثر من ثلاث مرات وبعده عرف السالفه الجير ايطير فوق ويدوي على الثعل

ويضربه واكثر من ضربه وبعده صاد الجير وذبحوه تحته وعشوه وعشو اطيورهم كلها من الثعل
سنجاري
04/09/2004, 04:00 PM
والله يا خوي أبو عايد الجير مشكلة أكثر شراسه من باقي الطيور و اقوى حتى ان بعض العقبان ما سلمت منهم . يمكن السبب في التهجين أو ماله أم تعلمه من يوم انه فرخ وهم يلقمونه بالملقاط.
والله اعلم .
ابو عايد
04/09/2004, 09:27 PM
هلا والله وغلا بابو هنا القطامي

والله ياخوي الطير ماهوب لي والله لو انه لي اني لفك سبوقه لكن راعيه مغليه بسبب انه جاي هديه وانا الي مقرنسه ومشكور على مرورك

[line]

هلا والله وغلا بابو طارق مشرفنا الغالي

انا مثلك من يوم شفت الجير وعلومه حلفت مايجي على يدي جير لكنها طيور خويي وهو غالي علي وابشرك الرجال شال من راسه الجير والله يعوض علينا وعليكم بخير ومشكور على مرورك

[line]


هلا والله وغلا بالخشف

ابشرك انه مات ولا عليه حسوفه والله يا الشياهين انها اطيب منه صبرنا عليه نبي منه لكن ماوسع صدورنا

[line]

هلا والله وغلا بابو صقر

مشكور على مرورك ومشكور على ها السالفه وياخوي علم الجير علم اخر يحتاج لصقار خبرته عاليه وصبره واسع ويبليه تدريب يومي علشان اللياقه ويعطيك الف عافيه


[line]

هلا والله وغلا بسنجاري

اشهد ان فيه شراسه غير طبيعيه والله الظاهر ان السبب في التهجين

ومشكور على مرورك ويعطيك الف عافيه

وتقبلوا خالص تحيات// العاشق الولهان

http://www.mekshat.com/pix/upload/images5/mk1748_k8.JPG
fhd97
04/09/2004, 10:07 PM
وعليكم السلام ورحمة الله وبركاته
الله يعوضكم خير

من مبطى وانا عندى شك فى الطيور الجير والتهجين عقليا ماهى مضبوطه

ولا اثق فيها واعتقد معاى كثير:confused: :confused:
ابو عايد
04/09/2004, 10:32 PM
هلا والله وغلا fhd97

الله يجزاك خير كلامك صحيح من ناحية الجير ومشكور على مرورك ياغالي

وتقبل تحيات // العاشق الولهان
فارس العجمي
30/05/2005, 02:38 AM
السلام عليكم اخوي
بصراحه قصه محزنا بس في شي ضحكني
واخيرا مات الجير في مراحنا للصمان في شهر12/1424
اخوك قرناس الجزيره
المري
30/05/2005, 04:51 AM
الحمد لله على سلامتكم

الله ستر عليكم من ذا الجير
شَعَّـاااال
31/05/2005, 01:58 AM
السلام عليكم ورحمة الله وبركاته


كنت ابا اقول ونستنا لكن تكدرنا تالي السالفه


الجير راح وخذا الشر معه .....

الله يعوض عليك بفرخٍ قرانيس الهواء علمنه


سلمت يالعاشق
ابو عايد
07/06/2005, 04:03 PM
هلا والله وغلا بخوي قرناس^الجزيره

والله اني فرحة لموت الجير هذا بفرحه ما عقبها فرحه

لانه فعلا خطير جدا


هلا والله وغلا بخوي المري

مشكور على مرورك يالغالي ... ومن يقول سالم


هلا والله وغلا بخوي شَعَّـاااال

مشكور على مرورك .... والله يجزاك خير يالغالي

امين انشاء الله

تقبولا خالص تحياتي // اخوكم العاشق الولهان
أبو محمد!؟
22/09/2006, 10:40 PM
السلام عليكم
الله يعوظ على خويك وش هالجير زين ماهد عليكم ههههههههههههه

أخوك أبو محمد
ابو عايد
23/09/2006, 04:26 PM
هذا الجير من مزرعة الخضراء في قطر

الله يكفينا شر الجير بعمومه والله يجزاك خير يابو محمد
الباهي
23/09/2006, 04:34 PM
هلا بأبو عايد

اقول ذا الجير والله انها حار العفن

والله لو اني منك ان اغرقه في اقرب مكان علشان يعرف ان الله حق
ابو عايد
26/09/2006, 06:50 PM
السلام عليكم ورحمة الله وبركاته





هلا والله وأخي ابو فهد





مشكور على مرورك وعلى اطلالتك على موضوعي