يالربع طيري مايروبج

[ابو عايد]

السلام عليكم ورحمة الله وبركاته

اخواني الصقارين هديت طيري(شيهانه جبليه) اكثر من اسبوعين سلم وعطيته سكر نبات قبل اسبوع والطير له يومين مايروبج على اني معلفه على لحم بريش وعظام والغريب انه يطلب في اليوم الثاني ولايخلي صيدته
ويش اسوي :( :( :(

[سنافي]

ابو عايد /
السلام عليكم ورحمة الله وبركاته

فيه مثل يقول ( الشيوخ أبخص ) وهذا المثل ينطبق على الطيور في مثل هذه الحاله ( الطيور أبخص ) الطير يمكن يحتفظ بالروباجة طالما هو بحاجة الى عناصرها الغذائية مثل الكالسيوم في العظام والريش او الدهون في الجلد وغيرها ... وقد يروبج الطير بدون ما تلاحظ ذلك وهل تصدق ان الطير يروبج اثناء الطيران؟ نعم يستطيع الطير التخلص من الروباجة أثناء الطيران متى ما شعر الطير انها تعيق دينماكية وإنسيابية جسمة اثناء الطيران وفي هذه الحالة لايمكنك رؤيتها....

عموما ... من الأهمية أن يأكل الطير العظام والريش لما فيها من فوائد وقيمة غذائية للطير كما من الطبيعي ان يتخلص الطير من الفضلات عن طريق الروباج .. فإذا كنت تعشي الطير الساعة الخامسة عصرا فمن المتوقع ان يروبج الطير الساعة العاشرة صباحا كحد ادنى خصوصا في وقت ( الصفري ) ويتقدم التوقيت في الأيام الباردة حيث يروبج الطير قبل الساعة السابعة صباحا

لذا تأكد من ان الطير ( مفرع ) في التوقيت المناسب
ايضا تأكد من ( عدة ) الطير فالطير عندما يكون وزنة نازل يحتفظ بالروباجة لسد حاجتة من الجوع.


وتقبل تحياتي.

[ميراج]

السلام عليكم ورحمة الله وبركاته

طيرك ضعيف يابو فايز لذالك يكض على الروباجه إرفع الطير وتشوفه يروبج بعد 14 ساعه

وبعدين أنقل الطير بعد العلف حتى يصرف عشاه قبل تمرحه

عسى طيرك مهوب جير ترى كلامى ماينطبق على الجير لأنه طير تصانيف ولا أدانيه

تحياتى

[$عاشق الحرة$]

بسم الله الرحمن الرحيم

السلام عليكم ورحمة الله وبركاته

حياك الله اخوي ابو فايز

الله يعيينك يالذيب وانا ماني هاك الخبرة

الله يعيينك ويريح بالك

قل آمين

لك فائق إحترامي

اخوك

عاشق الحره

[سنجاري]

أخوي أبو عايد : طبع النفس للنفس غلاب ..

أنا مع أخوي سنافي , الطير ما يجود الروباج الا بسبب .

[ابو عايد]

وعليكم السلام ورحمة الله وبركاته

الله لايهينك يا بوناصر الطير مثل ما قلت ضعيف ولكن قبل يومين كنت مفرع عنه والطير يبي يحذف شي لكن ما حذف ولاهديته لين تاكدت انه طالب العلف والطير مره اعطيه صافي وخمسه ايام بريش وعظام مره هاد على الملواح حر ولا طلب وزاغ ثم وقع وجيناه ولا معيننه مروبج في محله وطلب بعدها وانا طيري ابشرك انه رجع لطبيعته يروبج وهو مبرقع ومشكور على الايضاح يا غالي والله لايهينك

[line]

وعليكم السلام ورحمة الله وبركاته

هلا والله وغلا بابوطارق مشرفنا الغالي مشكور على هذه المعلومه والجير حالف ما يوقع على يدي الا ان كان طرح والطير اشبعته ونقلته بعد العلف وصار يروبج لكن يتاخر الى الساعه الواحده على اني اعلفه 6 ولا 6.5

[line]

هلا والله بعاشق الحره مشكور على مرورك والله يهينك يكفينا مرورك يا غالي

[line]

هلا والله وغلا بسنجاري مشكور على مرورك والله لايهينك ويعطيك الف عافيه يا غالي


واسف على التاخير كنت مسافر

وتقبلوا تحيات // العاشق الولهان