لاصحاب البريتا

[الشاعر العربي]

السلام عليكم

انا ادور على بندق بشرط اني اخليها بدون ترهيم ماصورة يعني بلد فجربت البلجيك ممتازة بس ماتتحمل واخذت بعدها سوبر بانيلي ومانفعت الا لما رهمت لها ماصورة والحين معي بيكال وماتنفع وزيادة خايف منها وانا الان بصدد بندق جديد واغازل الاكستريما تو بسس سوالي لاصحابة هل تحتاج تركيب ماصورة والا بلد ممتازة لاني راعي رمي طيار

[رمش الغزال]

اتشرف بالرد عليك واقول اذا انت تبي بندق لك وللزمن وماتتحسف خذها واتكل على الله والله يكتب لنا ولك اللي فيه خيره.

[نـجم الـشمال]

الله يعطيك خيرها ويكفيك شرها

[ابوفهد225]

البندق ماتحتاج ماصورة ,,, ماصورتها ممتازة بالحيل ..

والله يكتب اللي فيه خير لك ..

[الهاشمي2008]

طلبك موجود اتصلبي 0504713365ابو فيصل

[قناص خليص]

خذها والله يوفقك ورميك للطيار ركب تشك رقم 5 وراح تدعيلي

[الشاعر العربي]

الشكر لكل من رد


لكن سوالي تحتاج لترهيم ماصورة زي البانلي؟

[سعودأبوفهد]

لا لا ترهمها الماصووره ولا احلى منها تتحمل ضغووط مااتتحملها اي بندق

[MAGNUM]

صدمتني بموضوعك

شلون ترهم للبنلي ماصورة

يعني أحسن :)

[الضاحي]

البرتا اكستريما 2 ممتااااااااااااااازة جدا

ولا تحتاج اي ترهيم إطلاقا

[بن عيد1]

اكستريما شيخة البنادق مايحتاج وعن تجربه

لكن البلجيك القديمه عيبها ماتتحمل الجرامات الكبيره لكنها أحر رمي يمكن من الاكستريما وللطيار دواء

نصيحه : خذ اكستريما مموهه

السوداء تتمخش ويبين فيها المخوش بعكس المموهه

[قرناس ارامكو]

البرتا ما فيها كلام
لكن كم تسوى هالايام ؟؟؟؟

[ابو فرخه]

مساء الخير على الجميع الكستريما ممممممتازة وعزالله صدق اخوى بن عيد1 شيخه وماعليه زود وانا جربت بارود واحد من الشباب قاص الجسر الى على الماصوره ومخلي الحبه الى قدام عند محل مصلح اسلاح بالقصيم ومركب تشك 4 صراحه رمي طيار خيال

[أبوأحمد2006]

هلا بك أخوي
أنا مجرب البرتا وغيرها والله وماحلفتني أني ماشفت مثلها برمي وبخف ونظام غاز توماتيك وضد الصدا وغيرهااا
البندق ماشاء الله أبداع من كل الاتجاهات
واذا شريتها أن شاء الله لاتركب عليها اي شي خلها شد بلد
وأدعلي
تقبل تحيات
أبــوأحمـــد2006

[قانوص قديم]

السلام عليكم بندق ماعليها كلام ناعمه وبريتا طال عمرك ماهي لعب شييييخه وحتى البنلي ماتحتاج ترهيم سبطانه تيركي تشوك برايلي xxx f وشوف الطرب طال عمرك وموضوع ازالة الجسر عن البندق ههههههههه لاتعلييييق اخخخخخخخخ من يوديني للمحل الي قص لخوينا الجسر امسكه واقص راسه موضوع الجسر قديما بالكويت يحبون البراونق الطلسه الطلسه عندنا يعني من غير جسر ليش يرغبونها عشان الجسر يخرب قماش الشد او الكرسي الي على الوانيت يشققه مع الاحتكاك وهذي سيدي كل الحكايه الجسر تبريييييييد للسبطانه وسلامتك

[مقلع الرمث]

انا من مستخدمي البريتا والله بارود ونم صراحه لا رمي اطيار لا واقع لا امجامل يعني وش اقولك بسسس خذها وانت امغمض يعني اللي تحطه عليه والله ممايطير خلاص عده ميت

[ابوبارود]

يسعدني اختيارك للماركة الايطالية لانها صناعة لايعلا عليها كد ومد
ويزعلني ترهيمك للسوبر بانلي ومدحك لها بعد الترهيم لإن في وجهة نظري السوبر بانلي ماتحتاج ترهيم بتركيب التوصيلات الضيقه مثل f + xf + 660 و سئل المجربين لهذه التوصيلات ونصيحه شيل من راسك الترهيم .